Room 6 - New Testament

Yee palabɩ-ɖʋ lɩm sɔʋ sɔnzɩ yɔ, ɖa nɛ Krɩstʋ ɖɩsɩkɩ nɛ ɖife

¹ Se we ɖɩkaɣ yɔɔdʋʋ yɔ? Đɩwɛɣ kɩwɛɛkɩm labʋ yɔɔ ḿbʋ́ se Ɛsɔ lootiye ɛtɛzɩ ɖɔʋ naa we?

² Pɩtɛkɛ ḿbʋ́ kpem! Mbá ɖa ɖɩwɛ ɛzɩ sɩɖaa nɛ kɩwɛɛkɩm tatasɩ wɛnaʋ ɖoŋ ɖɔ-yɔɔ yɔ, ɛzɩma ɖɩpɩzɩɣ ɖɩwɛɛ pɩ-taa ɖɔɖɔ yɔ?

³ Lɩm sɔʋ sɔnzɩ kpɛndɩ ɖa nɛ Krɩstʋ Yesu. Sɩ-yɔɔ pɩtɩŋnaa nɛ ɖa nɛ ɩ ɖɩkpɛndɩ ɛ-sɩm taa. Mɩ-maɣmaɣ ɩtatɩlɩ ḿbʋ́ yaa we?

⁴ Yee ḿbʋ́ palabɩ-ɖʋ-sɩ yɔ, pɩwɩlɩɣ se ɖa nɛ ɩ ɖɩsɩbɩna nɛ pepim-ɖʋ. Pɩlabɩ ḿbʋ́ se ɖa ɖɔɖɔ ɖihiɣ wezuu caɣʋ kɩfam ɛzɩ pɩtɩŋnaʋ Caa ɖoŋ taa nɛ Krɩstʋ fe nɛ ɛlɩɩnɩ sɩɖaa taa yɔ.

⁵ Yee ɖa nɛ ɩ ɖɩkpɛndɩ ɛ-sɩm taa yɔ, ɖa nɛ ɩ ɖɩkpɛndɩɣ ɖɔɖɔ ɖife.

⁶ Đɩsɩm ɖeu se: wɛtʋ ndʋ́ ɖɩɩwɛna ɖooo lɔŋ yɔ, alɩwaatʋ ndʋ́ pakam Krɩstʋ kaamaŋkaɣ yɔɔ yɔ, pɛkpɛndɩnɩ-tʋ nɛ paka. Pɩlabɩ ḿbʋ́ se ɖɛ-wɛtʋ ńdʋ́, tɩtaatasɩ wɛnaʋ ɖoŋ ɖɔ-yɔɔ nɛ ɖɩtasɩ kɛʋ kɩwɛɛkɩm yomaa.

⁷ Mbʋ́ pʋyɔɔ yɔ, weyi ɛsɩba yɔ, ɛlɩ kɩwɛɛkɩm nesi taa.

⁸ Ŋgʋ́, yee ɖa nɛ Krɩstʋ ɖɩsɩbɩna yɔ, ɖɩtaɣ liu se ɖa nɛ ɩ ɖɩkɔŋ wɛʋ wezuu ɖɔɖɔ.

⁹ Đɩnawa se Krɩstʋ weyi ɛsɩba nɛ ɛlɩɩnɩ sɩɖaa taa yɔ, ɛɛtasɩɣ sɩbʋ ɖɔɖɔ. Sɩm tatasɩ wɛnaʋ ɖoŋ ɛ-yɔɔ.

¹⁰ Ɛsɩbʋ yɔ, ɛsɩba kpaagbaa sɩbʋ se kɩwɛɛkɩm ɛsɩɩ tɩnaɣ. Ɛlɛ́, lɛɛlɛɛyɔ ɛwɛʋ wezuu yɔ, ɛwɛ-kʋ se pɩkɛdɩnɩ Ɛsɔ.

¹¹ Pʋ-yɔɔ lɛ, mɩ-maɣmaɣ ɩkpaɣ mɩ-tɩ se ɩwɛ ɛzɩ sɩɖaa yɔ nɛ kɩwɛɛkɩm tatasɩ wɛnaʋ ɖoŋ mɩ-yɔɔ. Ɩkpaɣ mɩ-tɩ ɖɔɖɔ se ɩwɛ wezuu mɩ nɛ Krɩstʋ Yesu mɩ-kpɛndʋʋ taa se pɩkɛdɩnɩ Ɛsɔ.

¹² Yee ḿbʋ́ pɩfɛyɩ se mi-tomnasɩ ɛtasɩ wɛʋ kɩwɛɛkɩm nesi taa nɛ piyele nɛ ɩla mbʋ́ sɩsɔɔlaa yɔ. Mbʋ́ pʋyɔɔ yɔ, sɩsɩkɩ.

¹³ Ɩtaakpaɣ mi-pilinzi nɛ ɩlabɩnɩ kɩwɛɛkɩm ɛzɩ mbʋ́ palakɩnɩ mbʋ́ pɩtatʋʋzɩ yɔ. Ɛlɛ́, mɩ-maɣmaɣ ɩkpaɣ mɩ-tɩ nɛ ɩcɛlɩ Ɛsɔ ɛzɩ mbá pasɩba nɛ pefe yɔ. Đɔɖɔ lɛ, ɩkpaɣ mi-pilinzi ńzɩ́ nɛ ɩcɛlɩ-ɩ ɛzɩ mbʋ́ palakɩnɩ mbʋ́ pʋtʋʋzaa yɔ.

¹⁴ Pɩfɛyɩ se ɩtasɩ wɛʋ kɩwɛɛkɩm nesi taa, mbʋ́ pʋyɔɔ yɔ, paɣtʋ tatasɩ wɛnaʋ ɖoŋ mɩ-yɔɔ. Ɛlɛ́, Ɛsɔ lootiye ɖoŋ taa ɩwɛɛ.

Pʋwɛɛ se ɖɩlɩɩ kɩwɛɛkɩm yomiye taa nɛ ɖɩpɩsɩ Ɛsɔ tʋmlaɖaa

¹⁵ Se we ɖɩkaɣ yɔɔdʋʋ kpem yɔ? Paɣtʋ tatasɩ ɖoŋ wɛnaʋ ɖɔ-yɔɔ nɛ ɖɩwɛɛ Ɛsɔ lootiye taa yɔɔ pɩha-ɖʋ nʋmɔʋ se ɖɩla kɩwɛɛkɩm naa we? Pɩtɛkɛ ḿbʋ́ kpem!

¹⁶ Ɩtatɩlɩ se yee ɩkpaɣ mɩ-tɩ nɛ ɩcɛlɩ nɔɔyʋ nɛ ɩkɛ e-yomaa nɛ ɩñaŋ-ɩ yɔ, pʋbʋ, ɩkɛ e-yomaa kpem yaa we? Ḿbʋ́ ɖɔɖɔ ɩpɩzɩɣ ɩkɛ kɩwɛɛkɩm yomaa yaa Ɛsɔ yomaa. Ɛlɛ́, yee ɛyʋ ɛkɛ kɩwɛɛkɩm yom yɔ, puwokini-i sɩm taa. Yee ɛkɛ Ɛsɔ yom yɔ, piyeki nɛ ɛla mbʋ́ pʋtʋʋzaa yɔ.

¹⁷ Ɛlɛ́, ɖɩsa Ɛsɔ. Mbʋ́ pʋyɔɔ yɔ, mbá mɩ ɩɩkɛ kɩwɛɛkɩm yomaa yɔ, lɛɛlɛɛyɔ, ɩmʋ tɔm ndʋ́ pawɩlɩ-mɩ yɔ nesi naalɛ nɛ ɩɖɔŋ tɩ-yɔɔ.

¹⁸ Puholi-mɩ nɛ kɩwɛɛkɩm nesi taa nɛ ɩpɩsɩ mbʋ́ pʋtʋʋzaa yɔ pu-yomaa.

¹⁹ Ɩɩnɩɣ tɔm taa lɔŋ yɔɔ mankpakɩɣ mbʋ́ ɛyáa lakɩ yɔ se malɩzɩnɩ-mɩ pɩ-taa. Đooo lɛ, iiyeba nɛ mi-pilinzi pɩsɩ mbʋ́ pipisiɣ ɛyáa yɔ nɛ kɩdɛkɛdɩm po-yomaa nɛ ɩtɛzɩ pɩsʋʋ kɩdɛkɛdɩm laɖaa kpem. Ɛlɛ́, lɛɛlɛɛyɔ, iyebi sɩpɩsɩ mbʋ́ pʋtʋʋzaa yɔ pu-yomaa nɛ ɩtɛzɩ pɩsʋʋ Ɛsɔ ñɩma kpem.

²⁰ Alɩwaatʋ ndʋ́ ɩɩkɛ kɩwɛɛkɩm yomaa yɔ, pɩtaakɛnɩ-mɩ kɩcɛyʋʋ se ɩla mbʋ́ pʋtʋʋzaa yɔ.

²¹ Lakasɩ nzɩ́ ɩlaba nɛ sɩkpaɣ-mɩ fɛyɛ lɛɛlɛɛyɔ yɔ, pɩlɩ-mɩ we sɩ-taa? Siwokini-mɩ sɩm taa!

²² Ɛlɛ́, lɛɛlɛɛyɔ, Ɛsɔ holi-mɩ nɛ kɩwɛɛkɩm nesi taa nɛ ɩpɩsɩ e-yomaa. Mbʋ́ pɩlɩ-mɩ pɩ-taa yɔ lɛ se ɩpɩsɩ ɛ-ñɩma nɛ pɩtɛmna se ihikiɣ wezuu maatɛŋ.

²³ Kɩwɛɛkɩm kɩhɛyʋʋ lɛ sɩm. Ɛlɛ́, kʋjɔʋ ŋgʋ́ Ɛsɔ lakɩ-ɖʋ falaa yɔ lɛ wezuu maatɛŋ ŋgʋ́ ɖihiɣ ɖa nɛ ɖa-Kɩpaɣlʋ Krɩstʋ Yesu ɖɛ-kpɛndʋʋ taa yɔ.