Room 5 - New Testament

Pɩtɩŋnɩ Yesu yɔɔ nɛ ɖa nɛ Ɛsɔ ɖiceɣ

¹ Đe-lidaʋ yɔɔ pɩtɩŋnaa nɛ Ɛsɔ pɩsɩ-ɖʋ kʋtʋʋzaa. Pʋ-yɔɔ pɩtɩŋnɩ ɖa nɛ ɖa-Kɩpaɣlʋ Yesu Krɩstʋ ɖɛ-kpɛndʋʋ yɔɔ nɛ ɖa nɛ ɩ pʋwɛɛ leleŋ.

² Ɛ-yɔɔ pɩtɩŋnaa nɛ ɖɩpɩzɩ ɖɩwɛnɩ lidaʋ Ɛsɔ yɔɔ nɛ pɩha-ɖʋ waɖɛ se ɖɩtɩlɩ lootiye nɖɩ́ ɛlabɩ-ɖʋ nɛ ɖɩhaɣ-ɖʋ ɖoŋ yɔ. Pʋ-yɔɔ ɖɩkʋndʋʋ nɛ ɖɩtaɣ liu se ɖa nɛ Ɛsɔ ɛnʋ ɖɩkɔŋ wɛʋ e-koboyaɣ taa.

³ Halɩ pɩkpɛndɩnɩ kʋñɔŋ taa maɣmaɣ, ɖɩkʋndʋʋ, mbʋ́ pʋyɔɔ yɔ, ɖɩnawa se kɩ-taa ɛyʋ kpɛlɩkɩɣ ɛ-hɔyɛ ɖɔkʋʋ.

⁴ Ɛɖɔkʋʋ ɛ-hɔyɛ lɛ, ɛpɩɩ Ɛsɔ ɛsɩndaa. Ɛpɩɣ lɛ, ɛsʋʋ liu taʋ yɔɔ.

⁵ Ŋgʋ́, liu taʋ ḿbʋ́, piipeɣziɣ-ɖʋ. Mbʋ́ pʋyɔɔ yɔ, Ɛsɔ tɩŋnɩ e-Fezuu Kiɖeɖeu ŋgʋ́ ɛha-ɖʋ yɔ kɩ-yɔɔ nɛ ɛɖʋ ɛ-sɔɔlɩm ɖa-taa.

⁶ Toovenim lɛ, Krɩstʋ sɩba mbá ɖa ɖa-paa fɛyɩnɩ Ɛsɔ yɔ ɖɔ-yɔɔ alɩwaatʋ ndʋ́ Ɛsɔ ɖʋwa yɔ. Alɩwaatʋ ńdʋ́ lɛ, ɖɩtatɩɩwɛnɩdɩ ɖoŋ nɩɩyɩ.

⁷ Paa ɛyʋ ɛtʋʋzaa yɔ, pʋwɛ kaɖɛ siŋŋ se nɔɔyʋ etisi nɛ ɛsɩ ɛ-yɔɔ. Pʋtɔmaɣ yɔ, ɛyʋ kɩbanʋ yɔɔ nɔɔyʋ pɩzɩɣ etisi nɛ ɛsɩ.

⁸ Ɛlɛ́, Ɛsɔ ñawɩlɩ-ɖʋ ɛzɩma mbʋ́ ɛsɔɔlɩ-ɖʋ yɔ. Mbʋ́ pʋyɔɔ yɔ, alɩwaatʋ ndʋ́ ɖɩɩkɛ kɩwɛɛkɩm laɖaa yɔ eyeba nɛ Krɩstʋ sɩ ɖɔ-yɔɔ.

⁹ Lɛɛlɛɛyɔ, yee Ɛsɔ ɛtɩŋnɩ ɛ́lɛ́ calɩm kpɛndʋʋ yɔɔ nɛ ɛpɩsɩ-ɖʋ kʋtʋʋzaa lɛ, ɛzɩma ɛɛyakɩ ɖa-ñʋʋ se ɛ-pana ɛtaatasɩ-ɖʋ kpanaʋ yɔ?

¹⁰ Đɩɩkɛ Ɛsɔ koyindinaa. Ɛlɛ́, eyele nɛ pɩtɩŋnɩ ɛ-Pɩyalʋ sɩm yɔɔ nɛ ɖa nɛ ɩ ɖɛ-hɛkʋ taa ñɔɔzɩ. Yee ɖa nɛ ɩ ɖɛ-hɛkʋ taa ɛñɔɔzaa lɛ, ɛzɩma ɛɛpɩzɩɣ ɛtɩŋnɩ ɛ-Pɩyalʋ wezuu yɔɔ nɛ ɛya ɖa-ñʋʋ yɔ?

¹¹ Pɩtasɩɩnɩ pi-ɖeke, ɛlɛ́, ɖɩtɩŋɩɣnɩ ɖa-Kɩpaɣlʋ Yesu Krɩstʋ yɔɔ nɛ ɖɩkʋndʋʋnɩ Ɛsɔ. Mbʋ́ pʋyɔɔ yɔ, ɛ-yɔɔ pɩtɩŋnaa nɛ ɖa nɛ Ɛsɔ ɖɛ-hɛkʋ taa ñɔɔzɩ lɛɛlɛɛyɔ.

Aɖam nɛ Yesu Krɩstʋ pɔ-tɔm

¹² Ɛyʋ kʋɖʋm koŋ yɔɔ pɩtɩŋnaa nɛ kɩwɛɛkɩm sʋʋ kedeŋa taa: ɛnʋ lɛ Aɖam. Sɩm ñatɩŋnɩ kɩwɛɛkɩm yɔɔ nɛ pʋbʋ ñasʋʋ ɖɔɖɔ nɛ pʋkʋʋ ɛyáa tɩŋa, mbʋ́ pʋyɔɔ yɔ, patɩŋa payɩ palabɩ kɩwɛɛkɩm.

¹³ Pʋcɔ nɛ Ɛsɔ cɛlɩ Mooyiizi paɣtʋ lɛ, kɩwɛɛkɩm kɛtɛm wɛʋ kedeŋa yɔɔ. Ɛlɛ́, Ɛsɔ takpaɣ-pʋ ɛ́yáa pʋyʋ alɩwaatʋ ndʋ́ paɣtʋ fɛyɩ yɔ.

¹⁴ Paa ḿbʋ́ yɔ, kpaɣ Aɖam alɩwaatʋ nɛ puwolo pɩsɩɩnɩ Mooyiizi ñɩndʋ lɛ, sɩm ñaawɛɛ pʋkʋʋ ɛyáa. Halɩ pɩkpɛndɩnɩ mbá patala kɩwɛɛkɩm mbʋ́ Aɖam weyi ɛtɔɖɔ mbʋ́ Ɛsɔ kaɖʋwa yɔ pʋ-yɔɔ yɔ, ɛlaba yɔ. Aɖam ɛnʋ lɛ weyi pʋwɛɛ se ɛkɔɔ yɔ ɛ-lɛzʋʋ.

¹⁵ Ɛlɛ́, kɩwɛɛkɩm ḿbʋ́, paatɩɩkpakɩɣ-pʋ se pɛkɛdɩɣnɩ mbʋ́ Ɛsɔ ha-ɖʋ falaa yɔ. Mbʋ́ pʋyɔɔ yɔ, yee pɩtɩŋnɩ ɛyʋ kʋɖʋm koŋ kɩwɛɛkɩm yɔɔ nɛ sakɩyɛ sɩkɩ lɛ, ɛzɩma Ɛsɔ lootiye nɛ kʋjɔʋ ŋgʋ́ ɛtɩŋnɩ ɛyʋ kʋɖʋm koŋ yɔɔ nɛ ɛlabɩ-ɖʋ falaa yɔ, paapɩzɩɣ pɛwɛɛ ɛyáa sakɩyɛ cɔlɔ siŋŋ yɔ? Ɛyʋ ɛnʋ lɛ Yesu Krɩstʋ.

¹⁶ Meheyiɣ-mɩ se kɩwɛɛkɩm mbʋ́ ɛyʋ kʋɖʋm koŋ laba yɔ, paatɩɩkpakɩɣ-pʋ se pɛkɛdɩɣnɩ Ɛsɔ kʋjɔʋ ŋ́gʋ́. Mbʋ́ pʋyɔɔ yɔ, kɩwɛɛkɩm kʋɖʋmʋm koŋ yɔɔ lɛ, pahʋʋnɩ ɛyʋ nɛ pakʋ ɛ-tɔm. Ŋgʋ́, mbʋ́ Ɛsɔ haɣ ɛyʋ falaa ɛ-kɩwɛɛkɩm sakɩyɛ wayɩ yɔ, piyeki nɛ ɛpɩsɩ-ɩ kʋtʋʋzʋ.

¹⁷ Yee ɛyʋ kʋɖʋm koŋ kɩwɛɛkɩm yɔɔ pɩtɩŋnaa nɛ sɩm tɔɔ kewiyaɣ lɛ, ɛzɩma pɩɩpɩzɩɣ pɩtɩŋnɩ Yesu Krɩstʋ ɖeke koŋ yɔɔ nɛ mbá Ɛsɔ lakɩ-wɛ lootiye siŋŋ nɛ ɛpɩsɩɣ-wɛ kʋtʋʋzaa falaa yɔ, paba ñacaɣ wezuu nɛ pɔtɔɔ kewiyaɣ yɔ?

¹⁸ Pʋ-yɔɔ lɛ, ɛzɩma mbʋ́ pɩtɩŋnɩ kɩwɛɛkɩm kʋɖʋmʋm koŋ yɔɔ nɛ Ɛsɔ hʋʋnɩ ɛyáa tɩŋa nɛ ɛkʋ pɔ-tɔm yɔ, ḿbʋ́ ɖɔɖɔ pɩtɩŋɩɣnɩ lakasɩ kɩbanzɩ kʋɖʋmsɩ koŋ yɔɔ nɛ ɛpɩsɩ ɛyáa tɩŋa payɩ kʋtʋʋzaa nɛ pehiɣ wezuu.

¹⁹ Toovenim lɛ, ɛzɩma mbʋ́ pɩtɩŋnɩ ɛyʋ kʋɖʋm koŋ kaañamtʋ yɔɔ nɛ ɛyáa sakɩyɛ pɩsɩ kɩwɛɛkɩm laɖaa yɔ, ḿbʋ́ ɖɔɖɔ pɩtɩŋɩɣnɩ ɛyʋ kʋɖʋm koŋ ñamtʋ yɔɔ nɛ Ɛsɔ pɩsɩ ɛyáa sakɩyɛ kʋtʋʋzaa.

²⁰ Paɖʋ paɣtʋ lɛ, kɩwɛɛkɩm tɛzɩ ɖɔʋ. Ɛlɛ́, ɖenɖe kɩwɛɛkɩm tɛzɩ ɖɔʋ yɔ, lootiye ñɔɖɔwa nɛ pɩkɩlɩ.

²¹ Yee ḿbʋ́ ɛzɩma mbʋ́ pɩtɩŋnɩ sɩm yɔɔ nɛ ɖɩwɛɛ kɩwɛɛkɩm nesi taa yɔ, ḿbʋ́ ɖɔɖɔ pɩtɩŋɩɣnɩ Ɛsɔ tʋʋzʋʋ yɔɔ nɛ ɖɩwɛɛ e-nesi taa se pɩtɩŋnɩ ɖa-Kɩpaɣlʋ Yesu Krɩstʋ lootiye yɔɔ nɛ ɖihiɣ wezuu maatɛŋ.