Room 4 - New Testament

Abraham wɛnaʋ lidaʋ Ɛsɔ yɔɔ yɔ

¹ Đɩyɔɔdʋʋ ɖɔ-cɔzɔ Abraham tɔm se we yɔ? Ɛbɛ ehiɣ Ɛsɔ cɔlɔ?

² Toovenim lɛ, yee Ɛsɔ ɛɛpɩsɩ Abraham kʋtʋʋzʋ tʋma wena ɛlaba yɔ a-yɔɔ yɔ, pʋbʋ ɛɛkʋndaa. Ŋgʋ́, pɩtamʋnɩ ḿbʋ́ Ɛsɔ ɛsɩndaa.

³ Ɛlɛ́, pama Ɛsɔtɔm Takayaɣ taa se: «Abraham wɛnɩ lidaʋ Ɛsɔ yɔɔ yɔɔ, ɛ́lɛ́ kpaɣ-ɩ se ɛkɛ kʋtʋʋzʋ.»

⁴ Ŋgʋ́, weyi ɛlabɩ tʋmɩyɛ nɛ pɛhɛyɩ-ɩ yɔ, paatɔŋ se kʋjɔʋ palabɩ-ɩ. Ɛlɛ́, ɛ-kɩmɩyɛ pɛhɛyɩ-ɩ.

⁵ Weyi ɛ́lɛ́ ñaalakɩ naɖɩyɛ se papɩsɩ-ɩ kʋtʋʋzʋ, ɛlɛ́, ɛwɛnɩ lidaʋ Ɛsɔ yɔɔ yɔ, ɛpɩsɩɣ kʋtʋʋzʋ ɛ-ɛsɩndaa. Mbʋ́ pʋyɔɔ yɔ, Ɛsɔ pɩsɩɣnɩ kɩwɛɛkɩm laɖaa kʋtʋʋzaa.

⁶ Ḿbʋ́ ɖɔɖɔ Daaviidi yɔɔdɩ weyi Ɛsɔ pɩsɩ-ɩ kʋtʋʋzʋ yɔ ɛ-tɩ hiɣu tɔm. Ŋgʋ́, ɛ́lɛ́ taakpaɣ ɛ-tʋmɩyɛ nɛ ɛ́yáa pʋyʋ. Ɛyɔɔdaa se:

⁷ «Mbá pɛwɛ koboyaɣ taa yɔ, ḿbá yɔ: mbá payʋsaa nɛ Ɛsɔ kpeɣ-wɛ nɛ ehuuzi pa-kɩwɛɛkɩm yɔɔ yɔ.

⁸ Weyi ɛwɛ koboyaɣ taa yɔ, ɛnʋ yɔ: Kɩpaɣlʋ takpaɣ ɛ-kɩwɛɛkɩm nɛ ɛ́yáa pʋyʋ.»

Pɩtɛkɛ pɛlʋʋ lakɩna nɛ ɛyʋ pɩsɩ kʋtʋʋzʋ

⁹ Yuda ñɩma koboyaɣ ɖeke tɔm pɔyɔɔdʋʋ ḿbʋ́ yaa we? Yaa kedeŋa yɔɔ ɛyáa lɛlaa pɩzɩɣ pehiɣ koboyaɣ ŋ́gá ɖɔɖɔ? Ɖɩyɔɔdɩ lɛɛlɛɛyɔ se: «Abraham wɛnɩ lidaʋ Ɛsɔ yɔɔ yɔɔ ɛ́lɛ́ kpaɣ-ɩ se ɛkɛ kʋtʋʋzʋ.»

¹⁰ Ɛzɩma ɛɛwɛ alɩwaatʋ ndʋ́ Ɛsɔ kpaɣ-ɩ ḿbʋ́ yɔ? Paapɛlɩ-ɩ yaa we? Aayɩ, pataapɛlɩ-ɩ nɛ pʋcɔ.

¹¹ Pʋwayɩ pɛpɛlɩ-ɩ nɛ pɩkɛnɩ-ɩ yʋsaɣ: ŋ́gá wɩlɩɣna se Ɛsɔ kpaɣ-ɩ se ɛkɛ kʋtʋʋzʋ lidaʋ ŋgʋ́ ɛɛwɛna nɛ pʋcɔ pɛpɛlɩ-ɩ yɔ kʋ-yɔɔ. Ḿbʋ́ yebina nɛ Abraham kɛ mbá pɛtɛpɛlɩ-wɛ nɛ pɛwɛnɩ lidaʋ Ɛsɔ yɔɔ nɛ ɛ́lɛ́ kpaɣ-wɛ se pɛkɛ kʋtʋʋzaa yɔ patɩŋa payɩ pɔ-cɔzɔ.

¹² Ɛkɛ ɖɔɖɔ mbá pɛpɛlɩ-wɛ yɔ pɔ-cɔzɔ. Ɛlɛ́, pɩtasɩnɩ pɛ-pɛlʋʋ ɖeke, pɛwɛnɩ lidaʋ ɖɔɖɔ Ɛsɔ yɔɔ ɛzɩ ɖɔ-cɔzɔ Abraham kɛwɛnaʋ nɛ pʋcɔ pɛpɛlɩ-ɩ yɔ.

Mbá pɛwɛnɩ lidaʋ Ɛsɔ yɔɔ yɔ, ɛlakɩ-wɛ mbʋ́ pɩtɩŋa ɛɖʋwa yɔ

¹³ Toovenim lɛ, pɩtɛkɛ paɣtʋ yɔɔ ɖɔm yɔɔ pɩtɩŋnaa nɛ Ɛsɔ heyi Abraham nɛ ɛ-sayɩnaa se pɔkɔŋ tɩɣyʋʋ kedeŋa kpeekpe. Ɛlɛ́, ɛwɛʋnɩ lidaʋ nɛ Ɛsɔ kpaɣ-ɩ se ɛkɛ kʋtʋʋzʋ yɔ, pʋ-yɔɔ pɩtɩŋnaa.

¹⁴ Yee mbá pɔɖɔŋ paɣtʋ yɔɔ se Ɛsɔ ɛkpaɣ-wɛ se pɛkɛ kʋtʋʋzaa yɔ ɛɖʋwa se patɩɣyɩ-kɛ yɔ, pʋbʋ pɩɩwɩlaa se lidaʋ nɛ mbʋ́ ɛɖʋwa se ɛlakɩ yɔ, pɩɩwazɩɣ pʋyʋ.

¹⁵ Mbʋ́ pʋyɔɔ yɔ, paɣtʋ kulusuu Ɛsɔ pana. Ɛlɛ́, ɖenɖe tɩfɛyɩ yɔ, paatɔŋ se pɔtɔɖɔ tɩ-yɔɔ ɖɔɖɔ.

¹⁶ Pʋ-yɔɔ lɛ, lidaʋ ŋgʋ́ ɖɩwɛnɩ Ɛsɔ yɔɔ yɔ, kʋ-yɔɔ ɛɖʋwa se ɛlakɩ-ɖʋ pʋyʋ. Ɛlakɩ-ɖʋ-pʋ falaa se pʋwazɩ Abraham sayɩnaa tɩŋa payɩ. Pɩtɛkɛ mbá pɛcɛlɩ-wɛ paɣtʋ yɔ, pe-ɖeke pʋwazɩɣ. Ɛlɛ́, pɩkpɛndɩnɩ mbá pɛwɛnɩ lidaʋ ɖɔɖɔ ɛzɩ ɖɔ-cɔzɔ Abraham yɔ, mbʋ́ pʋyɔɔ yɔ, ɛnʋ lɛ ɖatɩŋa payɩ ɖɔ-cɔzɔ.

¹⁷ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Malɩzɩnɩ-ŋ se ŋkɛ ajɛya ndɩ ndɩ taa ñɩma cɔzɔ.» Ɛkɛ ɖɔ-cɔzɔ Ɛsɔ weyi ɛwɛnɩ ɛ-yɔɔ lidaʋ yɔ ɛ-ɛsɩndaa. Ɛnʋ feziɣni sɩɖaa nɛ ɛyɔɔdʋʋ nɛ mbʋ́ pɩtaawɛɛ yɔ, pʋwɛɣ.

¹⁸ Abraham kɛwɛnɩ lidaʋ nɛ ɛɖaŋ nɛ ɛkɔɔ ɛkɛ ajɛya ndɩ ndɩ taa ñɩma cɔzɔ ɛzɩ Ɛsɔ keheyuu-i yɔ. Eeheyi-i se: «Ḿbʋ́ ña-sayɩnaa ɖɔʋ.»

¹⁹ Abraham kɛwɛna ɛzɩ pɩnzɩ mɩnʋʋ yɔ. Ɛlɛ́, pɩtaalabɩ-ɩ ɛjandʋ e-lidaʋ wɛnaʋ taa, ŋgʋ́, ɛɛñɔtɩnɩ pɩlaʋ kpam. Đɔɖɔ lɛ, ɛɛnawa se ɛ-halʋ Saara tapɩzɩɣ se ɛlʋlɩ.

²⁰ Paa ḿbʋ́, ɛcɔnɩ mbʋ́ Ɛsɔ ɖʋwa se ɛlakɩ-ɩ yɔ lɛ, ɛtapʋtɩ. Ɛlɛ́, e-lidaʋ yele nɛ ɛkpa ɖoŋ nɛ ɛsa Ɛsɔ.

²¹ Ɛnawa kpem se Ɛsɔ pɩzɩɣ ɛla mbʋ́ ɛɖʋwa se ɛlakɩ yɔ.

²² Pʋ-yɔɔ ɛ́lɛ́ kpaɣ-ɩ se ɛkɛ kʋtʋʋzʋ.

²³ Ɛlɛ́, tɔm ndʋ́ pamawa se: «Ɛsɔ kpaɣ-ɩ se ɛkɛ kʋtʋʋzʋ» yɔ, pɩtɛkɛ e-ɖeke ɛ-yɔɔ pama-tʋ.

²⁴ Mbá ɖa ɛpɩsɩ-ɖʋ kʋtʋʋzaa yɔ, ɖɔ-yɔɔ ɖɔɖɔ pama-tʋ. Mbʋ́ pʋyɔɔ yɔ, ɖɩwɛnɩ lidaʋ Ɛsɔ weyi efezi ɖa-Kɩpaɣlʋ Yesu nɛ sɩm taa yɔ ɛ-yɔɔ.

²⁵ Đa-kɩwɛɛkɩm yɔɔ eyeba nɛ pakʋ-ɩ, ɛlɛ́, efezi-i se ɛpɩsɩ-ɖʋ kʋtʋʋzaa.