Room 3 - New Testament

Nɔɔyʋ fɛyɩ siɣsiɣ

¹ Yee ḿbʋ́ ɛyʋ ɛkɛ Yuda tʋ, ɛwɛnɩ kɛzɛɣa nakɛyɛ yaa we? Pɛlʋʋ ñɛwɛ wazaɣ nakɛyɛ yaa we?

² Kɛzɛɣa sɔsɔɔ nakɛyɛ wɛ pɩtɩŋa pɩ-taa siŋŋ. Kajalaɣ ñɩŋga lɛ se Yuda ñɩma nesi taa Ɛsɔ ɖʋzɩ ɛ-tɔm.

³ Yee pa-taa nabɛyɛ ɛtɔɖɔ tɩ-yɔɔ lɛ, pɩwɩlɩɣ se Ɛsɔ ɛɛlakɩ mbʋ́ ɛɖʋwa se ɛlakɩ yɔ yaa we?

⁴ Toovenim lɛ, pɩtɛkɛ ḿbʋ́! Pʋwɛɛ se paa weyi ɛtɩlɩ se paa ɛyáa tɩŋa ɛcɛtɩɣ yɔ, Ɛsɔ ñɛkɛ toovenim tʋ. Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Pʋwɛɛ se patɩlɩ-ŋ se ŋkɛ toovenim tʋ ñɔ-yɔɔdaɣ taa, nɛ yee pahʋʋnɩ-ŋ yɔ, ŋwakɩ.»

⁵ Mbʋ́ ɖɩlakɩ nɛ pɩtatʋʋzɩ yɔ, ḿbʋ́ wɩlɩɣnɩ se Ɛsɔ tʋʋzaa. Yee ḿbʋ́ lɛ, pʋwɛɛ se ɖɩyɔɔdɩ ɖɔɖɔ ɛzɩ lɛlaa yɔɔdʋʋ se Ɛsɔ tatʋʋzɩ yɔ alɩwaatʋ ndʋ́ ɛhɔŋ ɖa-nɩŋgbaaŋ yɔ yaa we?

⁶ Toovenim lɛ, pɩtɛkɛ ḿbʋ́! Yee ɛtatʋʋzɩ lɛ, ɛzɩma ɛpɩzɩɣ ɛhʋʋnɩ ɛyáa tɩŋa tɔm yɔ?

⁷ Ɛlɛ́, yee mɛn-cɛtɩm ɛwɩlɩɣnɩ Ɛsɔ toovenim kaŋŋ nɛ piyeki se pasam-ɩ lɛ, ɛbɛ yɔɔ ɖɔɖɔ pʋwɛɛ se pahʋʋnɩ-m nɛ pakʋ mɔn-tɔm ɛzɩ kɩwɛɛkɩm laɖʋ yɔ?

⁸ Yee pɩɩkɛ ḿbʋ́ yɔ, pʋbʋ ɖɩɩyɔɔdaa se: «Đɩla kɩdɛkɛdɩm nɛ pɩlɩɩ-ɖʋ kɩbandʋ.» Ḿbʋ́ mbá pɛcɛtɩɣnɩ ɖa-taa yɔ pɔtɔŋ se ɖɩyɔɔdʋʋ. Ɛsɔ kɔŋ pɩtɛ ɛyáa ḿbá hʋnaʋ nɛ ɛkʋ pɔ-tɔm. Ḿbʋ́ pʋmʋnaa se pɛtɛmna.

⁹ Se we pʋwɛɛ se ɖɩyɔɔdɩ yɔ? Đa Yuda ñɩma ɖakɩlɩnɩ mbá pɛtɛkɛ Yuda ñɩma yɔ yaa we? Pɩtɛkɛ ḿbʋ́ kpem! Maatɛm yɔɔdʋʋ se Yuda ñɩma nɛ mbá pɛtɛkɛ Yuda ñɩma yɔ, patɩŋa payɩ pɛwɛ kɩwɛɛkɩm nesi taa.

¹⁰ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Nɔɔyʋ fɛyɩ se ɛtʋʋzaa, paa kʋɖʋm maɣmaɣ!

¹¹ Nɔɔyʋ fɛyɩ se ɛwɛ lɛɣtʋ. Nɔɔyʋ fɛyɩ ɖɔɖɔ se ɛñɩnɩɣ Ɛsɔ.

¹² Patɩŋa payɩ pelebi nʋmɔʋ, patɩŋa payɩ pɛwɛɛkaa. Nɔɔyʋ fɛyɩ se ɛlakɩ kɩbandʋ, paa kʋɖʋm maɣmaɣ!

¹³ Pokuli pɔ-nɔsɩ yɔ, pʋwɛ ɛzɩ pɩlaʋ ŋgʋ́ pokuli kʋ-nɔɔ yɔ. Pa-nzʋlʋmɛɛ pepeɣziɣni ɛyáa. Tɔm ndʋ́ pɔyɔɔdʋʋ yɔ, tɩkʋʋ ɛyáa ɛzɩ ɖʋmaa sɔtʋ yɔ.

¹⁴ Ɛzaɣ́tʋ nɛ kpalʋʋ wɩlʋʋ tɔm posuni pɔ-nɔsɩ taa ɖo.

¹⁵ Pɛwɛ kpekpeka ɛyáa ɖɩkʋyɛ.

¹⁶ Paa le patalaa yɔ, pɛwɛɛkɩɣ wondu nɛ peyele pɩnɩɩ ɛyáa siŋŋ.

¹⁷ Paasɩŋ mbʋ́ paala nɛ pa nɛ lɛlaa pɛwɛɛ laŋhɛzɩyɛ taa yɔ.

¹⁸ Pa-paa fɛyɩnɩ Ɛsɔ pe-wezuu caɣʋ taa.»

¹⁹ Đɩnawa se mbʋ́ pɩtɩŋa payɩ paɖʋ Mooyiizi paɣtʋ taa yɔ, mbá pasɩm-tʋ yɔ, ḿbá paɖʋ-tʋ. Pʋwɛ ḿbʋ́ se nɔɔyʋ ɛtaapɩzɩ ehiɣ ndʋ́ ɛwana yɔ nɛ ɛyáa tɩŋa tɩlɩ se payʋsɩ Ɛsɔ ɛsɩndaa.

²⁰ Mbʋ́ pʋyɔɔ yɔ, Ɛsɔ ɛɛpɩsɩɣ nɔɔyʋ kʋtʋʋzʋ se ɛɖɔm paɣtʋ yɔɔ camɩyɛ. Ɛlɛ́, paɣtʋ yekina nɛ ɛyʋ tɩlɩ se ɛlabɩ kɩwɛɛkɩm.

Yesu Krɩstʋ yɔɔ lidaʋ wɛnaʋ yekina nɛ ɛyʋ pɩsɩ kʋtʋʋzʋ

²¹ Paa ḿbʋ́ yɔ, lɛɛlɛɛyɔ Ɛsɔ wɩlɩ-ɖʋ ɛzɩma mbʋ́ ɛpɩsɩɣ-ɖʋ kʋtʋʋzaa yɔ. Ɛlɛ́, pɩtɛkɛ Mooyiizi paɣtʋ yɔɔ ɛtɩŋnaa. Pama pʋ-tɔm paɣtʋ nɛ náyaa pa-takayɩsɩ taa.

²² Ńdʋ́ lɛ se: mbá patɩŋa payɩ pɛwɛnɩ lidaʋ Yesu Krɩstʋ yɔɔ yɔ, Ɛsɔ pɩsɩɣ-wɛ kʋtʋʋzaa. Mbʋ́ pʋyɔɔ yɔ, pɛfɛyɩ ndɩ nɛ ɖama:

²³ ɛyáa tɩŋa payɩ labɩ kɩwɛɛkɩm, paakaɣ naʋ Ɛsɔ koboyaɣ kaʋ.

²⁴ Ɛlɛ́, Ɛsɔ lakɩ-wɛ lootiye nɛ ɛpɩsɩ-wɛ kʋtʋʋzaa falaa yem. Mbʋ́ pʋyɔɔ yɔ, Krɩstʋ Yesu ha ɛ-tɩ nɛ pɩya pa-ñʋʋ.

^25-26 Ɛnʋ Ɛsɔ ɖʋwa se pɛkpɛdɩ ɛ-calɩm nɛ pɩtɩŋnɩ pʋ-yɔɔ nɛ ɛñalɩ mbá patɩŋa payɩ pɛwɛnɩ lidaʋ ɛ-yɔɔ yɔ, pa-kɩwɛɛkɩm. Ḿbʋ́ ɛwɩlɩnɩ ɛzɩma mbʋ́ ɛtʋʋzaa yɔ. Ɛɖɔkɩ ɛ-hɔyɛ ɖooo lɔŋ nɛ ɛtɔhɔ mbá paalabɩ kɩwɛɛkɩm yɔ pa-nɩŋgbaaŋ. Ɛñɩnɩɣ se ɛwɩlɩ ɛzɩma mbʋ́ ɛtʋʋzaa yɔ alɩwaatʋ tʋnɛ tɩ-taa nɛ paa weyi ɛsɩm-ɩ ḿbʋ́ nɛ ɛkpɛndɩ ɛpɩsɩ weyi ɛwɛnɩ lidaʋ Yesu yɔɔ yɔ kʋtʋʋzʋ.

²⁷ Yee ḿbʋ́ lɛ, ɛbɛ yɔɔ ɛyáa kʋndʋʋ yɔ? Nabʋyʋ fɛyɩ. Ɛlɛ́, ɛbɛ yɔɔ kpem? Papɩzɩɣ pakʋndɩ se pɔɖɔŋ paɣtʋ yɔɔ yaa we? Pɩtɛkɛ ḿbʋ́! Ɛlɛ́, pɛwɛnɩ lidaʋ yɔɔ papɩzɩɣ pakʋndɩ.

²⁸ Mbʋ́ pʋyɔɔ yɔ, ɖɩnawa se lidaʋ yɔɔ Ɛsɔ pɩsɩɣ ɛyʋ kʋtʋʋzʋ. Pɩtɛkɛ paɣtʋ yɔɔ ɖɔm yɔɔ.

²⁹ Ɛsɔ wɛʋ yɔ, Yuda ñɩma ɖeke Ɛsɔ ɛkɛnaa yaa we? Ɛtɛkɛ ɖɔɖɔ mbá pɛtɛkɛ Yuda ñɩma yɔ pɛ-Ɛsɔ yaa we? Toovenim lɛ, ɛkɛ ɖɔɖɔ pa-ñɩnʋ.

³⁰ Mbʋ́ pʋyɔɔ yɔ, Ɛsɔ kʋɖʋm koŋ wɛna. Ɛpɩsɩɣ Yuda ñɩma kʋtʋʋzaa lidaʋ ŋgʋ́ pɛwɛna yɔ kʋ-yɔɔ. Ḿbʋ́ ɖɔɖɔ ɛpɩsɩɣ mbá pɛtɛkɛ Yuda ñɩma yɔ kʋtʋʋzaa lidaʋ kʋɖʋmʋʋ ŋ́gʋ́ kʋ-yɔɔ.

³¹ Pɩwɩlɩɣ se lidaʋ yɔɔ lɛ, paɣtʋ tɛkɛ pʋyʋ yaa we? Toovenim lɛ, pɩtɛkɛ ḿbʋ́! Ɛlɛ́, ɖɩwɛnɩ lidaʋ yɔ, ɖɩwɩlɩɣ mbʋ́ paɣtʋ kɛnaa kpem yɔ.