Room 16 - New Testament

Sɛtʋ

¹ Meheyiɣ-mɩ se ɖa-taabalʋ halʋ ñɩnʋ Foobee kɛ ɛyʋ siŋŋ. Ɛlakɩ tʋmɩyɛ Sankree Yesu ŋgbɛyɛ taa.

² Ɩmʋ-ɩ Kɩpaɣlʋ yɔɔ ɛzɩ pʋmʋnaʋ se Ɛsɔ ñɩma ɛmʋ ɖama yɔ nɛ ɩsɩnɩ-ɩ mbʋ́ pɩtɩŋa payɩ e-liu wɛɛ se ɩsɩnɩ-ɩ yɔ pɩ-taa. Mbʋ́ pʋyɔɔ yɔ, ɛ-maɣmaɣ ɛsɩnɩ ɛyáa sakɩyɛ, ɛsɩnɩ ma-maɣmaɣ ɖɔɖɔ.

³ Ɩsɛɛ Prisiili nɛ Akilaasɩ ɛyáa mbá ma nɛ wɛ ɖɩlakɩ Krɩstʋ Yesu tʋmɩyɛ yɔ.

⁴ Ḿbá coɖini sɩm nɛ paya ma-ñʋʋ. Pɩtɛkɛ men-ɖeke mɛnsɛɣnɩ-wɛ, Yesu aŋgba wena awɛ mbá pɛtɛkɛ Yuda ñɩma yɔ pɛ-tɛ yɔ, atɩŋa a-taa ñɩma sɛɣ-wɛ ɖɔɖɔ.

⁵ Ɩsɛɛ ɖɔɖɔ Yesu ŋgbɛyɛ taa ñɩma mbá pekpeɣliɣ Prisiili nɛ Akilaasɩ ñɩma ḿbá pɛ-tɛ yɔ. Ɩsɛɛ man-taabalʋ kʋsɔɔlʋ Epayɩnɛɛtɩ. Ɛnʋ calɩnɩ wɛnaʋ lidaʋ Krɩstʋ yɔɔ Aazii hɔɔlʋʋ taa.

⁶ Ɩsɛɛ Maarɩɩ weyi ɛlabɩ-mɩ tʋmɩyɛ siŋŋ yɔ.

⁷ Ɩsɛɛ Andronikuusi nɛ Yuuniyaasɩ mbá pɛkɛ Yuda ñɩma ɖɔɖɔ ɛzɩ ma yɔ. Ma nɛ wɛ paaɖʋ salaka. Pɛkɛ Krɩstʋ tiyiyaa mbá ɛyáa sɩm-wɛ siŋŋ yɔ. Pɛkɛ Krɩstʋ ñɩma nɛ pʋcɔ pɩtalɩnɩ-m.

⁸ Ɩsɛɛ Ampliyaatuusi weyi pɩtɩŋnɩ Kɩpaɣlʋ yɔɔ nɛ ɛkɛ man-taabalʋ kʋsɔɔlʋ yɔ.

⁹ Ɩsɛɛ ɖa-taabalʋ Urbɛɛnɩ weyi ɖa nɛ ɩ ɖɩlakɩ Krɩstʋ tʋmɩyɛ yɔ nɛ man-taabalʋ kʋsɔɔlʋ Staacɩɩ.

¹⁰ Ɩsɛɛ Apelɛɛsɩ weyi pɩtɩŋnɩ takʋʋ yɔɔ nɛ ɛwɩlɩ se ɛwɛnɩ lidaʋ Krɩstʋ yɔɔ siŋŋ yɔ. Ɩsɛɛ ɖɔɖɔ Aristoobuuli hɔʋ taa ñɩma.

¹¹ Ɩsɛɛ Eroodiyɔɔ weyi ɛkɛ Yuda tʋ ɖɔɖɔ ɛzɩ ma yɔ nɛ Narsiisi hɔʋ taa ñɩma mbá pɛkɛ Kɩpaɣlʋ ñɩma yɔ.

¹² Ɩsɛɛ Triifɛɛnɩ nɛ Triifoozi. Pɛkɛ halaa mbá palakɩ Kɩpaɣlʋ tʋmɩyɛ yɔ. Ɩsɛɛ man-taabalʋ kʋsɔɔlʋ halʋ ñɩnʋ Pɛɛrzidii weyi ɛlabɩ Kɩpaɣlʋ tʋmɩyɛ siŋŋ yɔ.

¹³ Ɩsɛɛ ɖɔɖɔ Ruufuusi weyi ɛkɛ ɛyʋ kɩbanʋ Kɩpaɣlʋ nʋmɔʋ taa yɔ nɛ e-ɖoo weyi mayaɣ ɖɔɖɔ se mon-ɖoo yɔ.

¹⁴ Ɩsɛɛ Asiŋkriiti nɛ Fleegɔɔ nɛ Ɛrmɛɛsɩ nɛ Patroobaasɩ nɛ Ɛrmaasɩ nɛ taabalaa mbá pa nɛ wɛ pɛwɛɛ yɔ.

¹⁵ Ɩsɛɛ Filoloogi nɛ Yuuli nɛ Neeree nɛ ɛ-kɔɔ nɛ Olɛmpaasɩ nɛ Ɛsɔ ñɩma lɛlaa mbá pa nɛ wɛ pɛwɛɛ yɔ patɩŋa payɩ.

¹⁶ Ɩsɛɛ ɖama camɩyɛ ɛzɩ pʋmʋnaʋ se Yesu ŋgbɛyɛ taa ñɩma ɛsɛɛ ɖama yɔ. Yesu aŋgba tɩŋa taa ñɩma sɛ-mɩ.

Pɔɔlɩ tasɩɣ ɛyáa lɔŋ

¹⁷ Man-taabalaa, meheyiɣ-mɩ se ɩkpa mɩ-tɩ nɛ mbá paatisiɣ tɔm ndʋ́ pawɩlɩ-mɩ yɔ nɛ pawɩlɩɣ-mɩ ndʋ́ tɩwɛnɩ ndɩ yɔ. Ḿbá cɛyɩɣnɩ Ɛsɔ ñɩma pe-lidaʋ wɛnaʋ taa nɛ patayɩɣ-wɛ. Ɩtaañɔtɩnɩ-wɛ.

¹⁸ Mbʋ́ pʋyɔɔ yɔ, pɩtɛ ɛyáa ḿbá, paalakɩ ɖa-Kɩpaɣlʋ Krɩstʋ tʋmɩyɛ. Ɛlɛ́, pe-hiliŋ taa ɖeke pɔcɔŋna nɛ palakɩ nɔɔ leleŋ nɛ pɛcɛtɩɣnɩ mbá patasɩmdɩ pʋyʋ yɔ.

¹⁹ Mɩ lɛ, ɛyáa tɩŋa na ɛzɩma mbʋ́ ɩñaŋ Kɩpaɣlʋ yɔ. Pʋ-yɔɔ man-taa hʋlʋmɩnɩ-mɩ. Ɛlɛ́, me-liu wɛɛ se ɩkɛ lɔŋsɩnɖaa nɛ ɩla mbʋ́ pʋwɛ ɖeu yɔ nɛ ikoli mbʋ́ pɩfɛyɩ ɖeu yɔ.

²⁰ Ŋgʋ́, Ɛsɔ weyi ɛhɛzɩɣ ɛyáa laŋa yɔ, ɛkɔŋ Satanɩ nuutuu alɩwaatʋ pazɩ taa nɛ efiɣni nɛ eluzi-i mɩ-tɛɛ. Đa-Kɩpaɣlʋ Yesu ɛlabɩ-mɩ lootiye.

²¹ Man-taabalʋ Timootee weyi ma nɛ ɩ ɖɩlakɩ tʋmɩyɛ yɔ nɛ Lusiyuusi nɛ Yaasɔɔ nɛ Soziipatɛɛrɩ mbá pɛkɛ ɖɔɖɔ Yuda ñɩma ɛzɩ ma yɔ, pɛsɛ-mɩ.

²² Ma Tɛrtiyuusi weyi Pɔɔlɩ heyi-m nɛ mama takayaɣ kanɛ nɛ ɛ-nɔɔ yɔ, mɛnsɛɣ-mɩ ɖa nɛ Kɩpaɣlʋ ɖɛ-kpɛndʋʋ taa.

²³ Gayuusi weyi ɛmʋ-m ɛ-tɛ yɔ, ɛsɛ-mɩ. Ɛ-tɛ Yesu ŋgbɛyɛ taa ñɩma tɩŋa woki pekpeɣliɣ. Eraastɩ weyi ɛkɛ tɛtʋ taa liidiye ɖɔkɩyʋ yɔ nɛ ɖa-taabalʋ Kaartuusi pɛsɛ-mɩ ɖɔɖɔ. [

²⁴ Đa-Kɩpaɣlʋ Yesu Krɩstʋ ɛla mɩtɩŋa payɩ lootiye. Pɩla ḿbʋ́!]

Ɛsɔ ɖeke tɩnɩ koboyaɣ!

²⁵ Đɩsa Ɛsɔ, mbʋ́ pʋyɔɔ yɔ, ɛpɩzɩɣ ɛha-mɩ ɖoŋ nɛ ɩɖɔkɩ mɩ-tɩ ɛ-nʋmɔʋ taa. Pʋwɛ ɛzɩ paɖʋʋ Laŋhɛzɩyɛ Tɔm ndʋ́ monsusuu nɛ mɛnkɛdɩɣ ɛyáa Yesu Krɩstʋ tɔm yɔ tɩ-taa yɔ. Tɩ-taa ɛwɩlɩ-ɖʋ mbʋ́ pɩɩwɛ mɛsaɣ tɛɛ nɛ ɛtaawɩlɩ-pʋ ɛyáa ɖooo ɛzɩ ɛlabʋ kedeŋa yɔ.

²⁶ Lɛɛlɛɛyɔ pɩtɩŋnɩ tɔm ndʋ́ náyaa mawa yɔ tɩ-yɔɔ nɛ pukuli tɩ-yɔɔ nɛ kedeŋa yɔɔ ɛyáa kpeekpe tɩlɩ-tʋ ɛzɩ ɛnʋ Ɛsɔ weyi ɛwɛ tam yɔ ɛɖʋʋ yɔ. Pɩlabɩ ḿbʋ́ se pɛwɛnɩ lidaʋ Ɛsɔ yɔɔ nɛ pañam-ɩ.

²⁷ Ɛsɔ weyi e-ɖeke koŋ ɛkɛ lɔŋsɩnɖʋ yɔ, ɖɩsam-ɩ tam. Pɩtɩŋnɩ Yesu Krɩstʋ yɔɔ nɛ ɖɩsam-ɩ. Pɩla ḿbʋ́!