Room 13 - New Testament

Ɛsɔ ɖʋnɩ ajɛya ñʋndɩnaa se powoni samaɣ koboyaɣ taa

¹ Pʋwɛɛ se paa weyi ɛña ñʋndɩnaa mbá pɔcɔŋnɩ ajɛya yɔɔ yɔ. Mbʋ́ pʋyɔɔ yɔ, mbá patɩŋa payɩ pɛkɛ ñʋndɩnaa yɔ, Ɛsɔ hanɩ-wɛ waɖɛ. Ɛsɔ sɩnɩ ñʋndɩnaa mbá pɛwɛɛ yɔ patɩŋa.

² Pʋ-yɔɔ lɛ, weyi ɛɛñaŋ ñʋʋdʋ yɔ, ɛtaña mbʋ́ Ɛsɔ ɖʋwa yɔ. Mbá palakɩ ḿbʋ́ yɔ, pa-maɣmaɣ peyeki se pahʋʋnɩ-wɛ.

³ Toovenim lɛ, mbá palakɩ mbʋ́ pʋwɛ ɖeu yɔ, sɔɔndʋ ɛɛkpaɣ-wɛ nɛ ñʋndɩnaa. Ɛlɛ́, mbá palakɩ mbʋ́ pɩfɛyɩ ɖeu yɔ, ḿbá seɣni-wɛ. Ñe-liu wɛɛ se sɔɔndʋ ɛtaakpa-ŋ nɛ ñʋndɩnaa naa we? Yee ḿbʋ́ la mbʋ́ pʋwɛ ɖeu yɔ nɛ pasam-ŋ.

⁴ Mbʋ́ pʋyɔɔ yɔ, Ɛsɔ tʋmɩyɛ taa pɛwɛɛ yɔɔ pañɩnɩɣ se ŋla mbʋ́ pʋwɛ ɖeu. Ɛlɛ́, yee ŋlakɩ mbʋ́ pɩfɛyɩ ɖeu yɔ yɔ, sɔɔndʋ ɛkpa-ŋ nɛ wɛ. Mbʋ́ pʋyɔɔ yɔ, yee pɛwɛnɩ waɖɛ se pɔhɔ ɛyáa nɩŋgbaaŋ yɔ, pɩtɛkɛ yem: pɛkɛ Ɛsɔ tʋmlaɖaa se pahʋʋnɩ mbá palakɩ mbʋ́ pɩfɛyɩ ɖeu yɔ nɛ ɛ-nɔɔ nɛ pɔhɔ pa-nɩŋgbaaŋ.

⁵ Pʋ-yɔɔ lɛ, pʋwɛɛ se paa weyi ɛña ñʋndɩnaa. Pɩtɛkɛ nɩŋgbaŋʋʋ hɔm yɔɔ ɖeke pʋwɛɛ se ɩñam-wɛ. Ɛlɛ́, ɩñam-wɛ, mbʋ́ pʋyɔɔ yɔ, ɩnaɣ ɖɔɖɔ mɩ-taa se pʋmʋnɩ ḿbʋ́.

⁶ Pʋ-yɔɔ ɖɔɖɔ ɩhɛyɩɣ lambuu. Mbʋ́ pʋyɔɔ yɔ, Ɛsɔ ɖʋ ñʋndɩnaa se pala tʋmɩyɛ ńɖɩ́ camɩyɛ.

⁷ Ɩhɛyɩ paa weyi mbʋ́ pʋwɛɛ se ɩhɛyɩ-ɩ yɔ. Ɩhɛyɩ lambuu mʋyaa pa-lambuu nɛ ɩhɛyɩ tikee mʋyaa paba tikee. Ɩña weyi pʋmʋnaa se ɩñam-ɩ yɔ nɛ ɩɖʋ hɩɖɛ weyi pʋmʋnaa se ɩɖʋ-ɩ-ɖɩ yɔ.

Weyi ɛcaɣ se ɛɖɔ Ɛsɔ paɣtʋ yɔɔ yɔ, pʋwɛɛ se ɛsɔɔlɩ lɛlaa

⁸ Ɩtaatɔɔ nɔɔyʋ kɩmɩyɛ nɛ pɩtasɩnɩ sɔɔlɩm kɩmɩyɛ nɖɩ́ ɩtɔɔ ɖama yɔ. Mbʋ́ pʋyɔɔ yɔ, weyi ɛsɔɔlɩ lɛlaa yɔ, ɛɖɔm mbʋ́ pɩtɩŋa payɩ paɖʋ paɣtʋ taa yɔ pʋ-yɔɔ.

⁹ Toovenim lɛ, paɣtʋ ndʋ́ paɖʋwa se: taala acɛyɛ, taakʋ ɛyʋ, taamɩlɩ, taaɖʋ ɛsɩyɛ lɛlaa ñɩm yɔɔ nɛ lɛɛtʋ ndʋ́ tɩwɛɛ yɔ tɩtɩŋa payɩ tɩwɛ paɣtʋ ndʋ́ paɖʋwa se: sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ tɩ-taa.

¹⁰ Weyi ɛsɔɔlɩ ɛ-taabalʋ yɔ, ɛɛlakɩ-ɩ mbʋ́ pɩfɛyɩ ɖeu yɔ. Pʋ-yɔɔ lɛ, weyi ɛsɔɔlʋʋ lɛlaa yɔ, ɛɖɔŋ paɣtʋ ndʋ́ tɩwɛɛ yɔ tɩtɩŋa payɩ tɩ-yɔɔ.

Pʋwɛɛ se ɖɩñɔɔzɩ ɖa-tɩ nɛ ɖɩɖaŋ Krɩstʋ kɔm

¹¹ Ɩla ḿbʋ́, mbʋ́ pʋyɔɔ yɔ, ɩnawa se alɩwaatʋ ndʋ́ Ɛsɔ yakɩ ɖa-ñʋʋ yɔ, tɩtalaa se ifemni mi-ɖom yɔɔ. Mbʋ́ pʋyɔɔ yɔ, ɖa-ñʋʋ yabʋ ñɔtɩnɩ-ɖʋ nɛ pɩkɩlɩ ɛzɩ alɩwaatʋ ndʋ́ ɖɩɩcalɩ wɛnaʋ lidaʋ Yesu yɔɔ yɔ.

¹² Đoo ɖɛwa nɛ tɛʋ caɣ fem. Pʋ-yɔɔ lɛ, ɖɩhɔzɩ mbʋ́ ɖɩlakaɣ cɩkpɛndʋʋ taa yɔ nɛ ɖɩlɔ nɛ pɩsɛɣ ɖɩkpaɣ hɔzɩŋ weyi ɖɩɩlabɩnɩ you wɩsɩ taa yɔ.

¹³ Đɩɖɔ camɩyɛ siɣsiɣ ɛzɩ pʋmʋnaʋ se ɛyʋ ɛɖɔ ñalɩmɩyɛ taa yɔ. Đɩɖɔkɩ ɖa-tɩ nɛ kujoŋjoŋ labʋ nɛ sʋlʋm kpaŋʋʋ nɛ acɛyɛ labʋ nɛ ɛzaɣ́tʋ labʋ nɛ you nɛ ɛsɩsɛmɩyɛ.

¹⁴ Ɩkpaɣ Kɩpaɣlʋ Yesu Krɩstʋ wɛtʋ ɛzɩ mi-you wondu yɔ. Ɩtaatasɩ yebu nɛ mɩ-maɣmaɣ mɩ-wɛtʋ hɔm-mɩ nɛ ɩla mbʋ́ mi-liu wɛɛ yɔ.