Room 11 - New Testament

Ɛsɔ tɔlɔ Izrɛɛlɩ ñɩma

¹ Pʋ-yɔɔ mɔnpɔzʋʋ se: Ɛsɔ lɔ Izrɛɛlɩ ñɩma naa we? Pɩtatɩɩkɛʋ ḿbʋ́ kpem! Mbʋ́ pʋyɔɔ yɔ, ma-maɣmaɣ mɛnkɛ Izrɛɛlɩ tʋ. Mɛnkɛ Abraham liɖe taa tʋ, mɛwɛ Bɛnjamɛɛ cejewiye taa.

² Ɛsɔ tɔlɔ ɛ-ñɩma mbá ɛɛlɩzɩ ɖooo lɔŋ yɔ. Pɩlakɩ-m ɛzɩ ɩsɩm Ɛsɔtɔm Takayaɣ taa ɖenɖe pamawa se Elii kpiɖaɣ Izrɛɛlɩ ñɩma yɔɔ Ɛsɔ ɛsɩndaa yɔ.

³ Ekpiɖaɣ nɛ ɛtɔŋ se: «Kɩpaɣlʋ, pakʋ ña-náyaa nɛ pɔyɔkɩ ɖenɖe ɖenɖe palaɣ-ŋ yɔ. Men-ɖeke koŋ pɩsɛɣa nɛ pacaɣ se pɛtɛzɩ-m.»

⁴ Ɛlɛ́, Ɛsɔ cosi-i se we? Ecosi-i se: «Mansɩ man-tɩ ɛyáa kutokiŋ lʋbɛ, potoluŋ sɩʋ ŋgʋ́ payaɣ se Baalɩfa yɔ kɩ-tɛɛ.»

⁵ Ḿbʋ́ ɖɔɖɔ pʋwɛ lɛɛlɛɛyɔ alɩwaatʋ tʋnɛ tɩ-taa: Yuda ñɩma hɛkʋ taa lɛ, Ɛsɔ labɩ nabɛyɛ lootiye nɛ ɛlɩzɩ-wɛ nɛ ɛsɩɩ-wɛ ɛ-tɩ.

⁶ E-lootiye yɔɔ ɛlɩzɩ-wɛ, pɩtɛkɛ pa-tʋmɩyɛ yɔɔ ɛlɩzɩ-wɛ. Pɩtɛkɛ ḿbʋ́, Ɛsɔ lootiye ɛɛtasɩɣ kɛʋ lootiye siŋŋ.

⁷ Đɩyɔɔdʋʋ se we yɔ? Đɩtɔŋ se Izrɛɛlɩ ñɩma tehiɣ mbʋ́ pañɩnaɣ yɔ. Ɛlɛ́, mbá Ɛsɔ lɩzɩ pa-taa yɔ, pe-ɖeke pehiɣni-pʋ nɛ pɩsɛɣ pʋtɔ lɛlaa nɩŋgbaaŋ taa se pataanɩɩ.

⁸ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Ɛsɔ yeba nɛ pa-ñʋŋ taa kpa ɖoŋ nɛ ehuuzi pɛ-ɛsɛ yɔɔ se pataana nɛ ɛtɔ pa-nɩŋgbaaŋ taa se pataanɩɩ nɛ pɛwɛɛ ḿbʋ́ halɩ nɛ sɔnɔ.»

⁹ Daaviidi mawa ɖɔɖɔ se: «Pɔ-tɔɔnasɩ ɛpɩsɩ kaamʋʋ nɛ piyuu nɛ pɩkpa-wɛ nɛ pɔtɔlɩ nɛ pɔhɔ pa-nɩŋgbaaŋ.

¹⁰ Pɛ-ɛsɛ ɛyʋlʋmɩ nɛ pataatasɩ naʋ kaʋ! Nɛ pʋwɛɛ pɩnazɩɣ-wɛ.»

¹¹ Pʋ-yɔɔ mɔnpɔzʋʋ se: pucoɖuu Izrɛɛlɩ ñɩma nɛ pɔtɔlɩ yɔ, pɔtɔlaa se kʋyʋʋ fɛyɩ yaa we? Pɩtɛkɛ ḿbʋ́ kpem! Ɛlɛ́, pɛ-ɛzaɣ́tʋ yɔɔ lɛ, mbá pɛtɛkɛ Yuda ñɩma yɔ, papɩzaa pehiɣ ñʋʋ yabʋ se Yuda ñɩma ɛsɛzɩ ɛsɩyɛ pɔ-yɔɔ.

¹² Mbá pɛtɛkɛ Yuda ñɩma yɔ, Yuda ñɩma ɛzaɣ́tʋ nɛ pɔ-tɔlʋʋ pɔ-yɔɔ pehiɣ Ɛsɔ ñɩm. Yee pɩkɛ ḿbʋ́ lɛ, ɛzɩma pʋwɛɣ alɩwaatʋ ndʋ́ patɩŋa payɩ papɩsɩɣ ñʋʋ yabʋ nʋmɔʋ taa yɔ?

Mbá pɛtɛkɛ Yuda ñɩma yɔ pa-ñʋʋ yabʋ tɔm

¹³ Mbá mɩ ɩtɛkɛ Yuda ñɩma yɔ, mɩ mɔyɔɔdʋʋnɩ lɛɛlɛɛyɔ: ma lɛ Krɩstʋ tiyiyu weyi ɛlakɩ tʋmɩyɛ mbá pɛtɛkɛ Yuda ñɩma yɔ pɛ-hɛkʋ taa yɔ. Pʋ-yɔɔ lɛ, mamaɣzɩɣ se man-tʋmɩyɛ wɛ wazaɣ siŋŋ.

¹⁴ Malakɩ ḿbʋ́ se pʋtɔmaɣ yɔ, me-liɖe taa ñɩma kaatɛzɩ wɛʋ ɛsɩsɛmɩyɛ nɛ pɩya pa-taa nabɛyɛ ñʋʋ.

¹⁵ Mbʋ́ pʋyɔɔ yɔ, Ɛsɔ lɔʋ Yuda ñɩma ḿbá yɔ, ɛ nɛ ɛyáa lɛlaa peceɣaa. Yee pɩkɛ ḿbʋ́ lɛ, ɛzɩma pʋwɛɣ alɩwaatʋ ndʋ́ ɛɖaɣnɩɣ-wɛ mʋ́ʋ yɔ? Pʋwɛɣ ɛzɩ ɛyʋ sɩkʋʋ nɛ efe nɛ pʋwɛɣ yɔ.

Tɛyɛ yɔɔ tɩʋ nɛ tɩʋ ŋgʋ́ pɔsɔwa yɔ ɩ-tɔm

¹⁶ Ɩtɩlɩ se: yee pafaɣ tindine hɔɔlaɣ kajalaɣ ñɩŋga nɛ paha-kɛ Ɛsɔ yɔ, pɩwɩlɩɣ se ɛnʋ tɩnɩ tindine ńɖɩ́ ɖɩtɩŋa ɖɔɖɔ. Yee pakpaɣ tɩʋ nakʋyʋ lila nɛ paha Ɛsɔ yɔ, ɛnʋ tɩnɩ ki-pilinzi ɖɔɖɔ.

¹⁷ Izrɛɛlɩ ñɩma wɛ ɛzɩ somuu ŋgʋ́ pɔsɔwa nɛ pɛsɛtɩ ki-pilinzi nasɩyɩ yɔ. Weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ́ kʋñɔ tɛyɛ yɔɔ yem yɔ ki-piliŋa. Pɛsɛtɩ-kɛ nɛ pɔsɔ ŋgʋ́ pɔsɔ kʋsɔʋ yɔ ki-pilinzi nzɩ́ pɛsɛtaa yɔ si-lone taa: lɛɛlɛɛyɔ, ŋtɔkɩ ɖɔɖɔ liɖe nɖɩ́ ɖɩcalɩɣ-kʋ yɔ ɖɩ-yɔɔ.

¹⁸ Pʋ-yɔɔ lɛ, taakpaɣ pilinzi nzɩ́ pɛsɛtaa yɔ se sɩtɛkɛ pʋyʋ. Ɛbɛ yɔɔ ŋkpazɩɣ ña-tɩ yɔ? Pɩtɛkɛ ñɔ-yɔɔ lila wɛɛ, ɛlɛ́, ñɛwɛnɩ lila yɔɔ.

¹⁹ Ŋkaɣ-m heyuu se «Pɛsɛtɩ pilinzi ńzɩ́ se pɔsɔ-m si-lone taa.»

²⁰ Pɩkɛ toovenim. Pɛsɛtɩ-sɩ, mbʋ́ pʋyɔɔ yɔ, ńzɩ́ lɛ lidaʋ fɛyɩwaa nɛ ña ñɛwɛɛ lone nɖɩ́ pɔsɔ-ŋ ɖɩ-taa yɔ ñe-lidaʋ wɛnaʋ yɔɔ. Taakpazɩ ña-tɩ, ɛlɛ́, sɔɔndʋ ɛkpa-ŋ.

²¹ Mbʋ́ pʋyɔɔ yɔ, yee Ɛsɔ etohuuzi Yuda ñɩma mbá pɛwɛ ɛzɩ kajalaɣ pilinzi yɔ pɔ-yɔɔ yɔ, eehuuzuu ña ɖɔɖɔ ñɔ-yɔɔ.

²² Cɔnɩ ŋna Ɛsɔ camɩyɛ lakasɩ nɛ ɛzɩma mbʋ́ ɛhʋʋnɩ ɛyáa nɛ ɛhɔŋ pa-nɩŋgbaaŋ ɖɔɖɔ yɔ: ɛhʋʋnɩ mbá palabɩ kɩwɛɛkɩm yɔ nɛ ɛlakɩ ña ɖeu. Ɛlɛ́, pʋwɛɛ se ŋwɛɛ Ɛsɔ camɩyɛ lakasɩ nʋmɔʋ taa. Pɩtɛkɛ ḿbʋ́, ɛsɛtɩɣ-ŋ ɖɔɖɔ ɛzɩ pɛsɛtʋʋ piliŋa yɔ.

²³ Yee Yuda ñɩma eyebi pa-kaañamtʋ nɛ paɖaɣnɩ wɛnaʋ lidaʋ yɔ, Ɛsɔ pɩsɩɣnɩ-wɛ ɖenɖe paawɛɛ yɔ. Mbʋ́ pʋyɔɔ yɔ, ɛwɛnɩ ɖoŋ se ɛɖaɣnɩ-wɛ sɔʋ.

²⁴ Pʋ-yɔɔ lɛ, weyi ña ŋtɛkɛ Yuda tʋ yɔ, ŋwɛ ɛzɩ somuu ŋgʋ́ kʋñɔ tɛyɛ yɔɔ yem yɔ ki-piliŋa maɣmaɣ: pɛsɛtɩ-kɛ nɛ pɔsɔ-kɛ ŋgʋ́ pɔsɔ kʋsɔʋ yɔ kʋ-yɔɔ. Ŋgʋ́, ŋtɛkɛ kʋkʋ piliŋa. Yee Ɛsɔ ɛpɩzɩɣ ɛla ḿbʋ́ lɛ, ɛzɩma ɛɛpɩzɩɣ ɛpɩsɩnɩ Yuda ñɩma mbá pɛwɛ ɛzɩ somuu ŋgʋ́ pɔsɔ kʋkʋ kʋsɔʋ yɔ ki-pilinzi maɣmaɣ nɛ ɛpɩsɩnɩ ɛsɔ si-lona taa?

Izrɛɛlɩ ñɩma kpeekpe hikiɣ ñʋʋ yabʋ

²⁵ Man-taabalaa, mancaɣ se mawɩlɩ-mɩ mbʋ́ pɩɩwɛ mɛsaɣ tɛɛ yɔ nɛ ɩtaakpaɣ mɩ-tɩ se ɩkɛ lɔŋsɩnɖaa: Izrɛɛlɩ ñɩma lɛlaa tamaa, paapɩzɩɣ panɩɩ. Ɛlɛ́, pɛwɛɣ ḿbʋ́ nɛ pʋkɔɔ pɩsɩɩnɩ alɩwaatʋ ndʋ́ mbá Ɛsɔ lɩzɩ mbá pɛtɛkɛ Yuda ñɩma yɔ pa-taa yɔ patɩŋa payɩ pehiɣ ñʋʋ yabʋ yɔ.

²⁶ Peeɖe Ɛsɔ kɔŋ yabʋ Izrɛɛlɩ ñɩma tɩŋa ñʋʋ ɛzɩ pamaʋ Ɛsɔtɔm Takayaɣ taa yɔ. Pamawa se: «Ñʋʋ yaɖʋ kaɣ lɩnaʋ Yeruusalɛm. Ɛhɛzɩɣ Yakɔɔbʋ liɖe taa ñɩma kɩwɛɛkɩm.

²⁷ Ḿbʋ́ lɛ nɔɔ haʋ mbʋ́ meyeki nɛ pʋwɛɛ ma nɛ wɛ ɖɛ-hɛkʋ taa alɩwaatʋ ndʋ́ menkpeɣiɣ-wɛ pa-kɩwɛɛkɩm yɔ.»

²⁸ Yee ɛyʋ ɛkpaɣ ɛzɩma mbʋ́ Yuda ñɩma kizi Laŋhɛzɩyɛ Tɔm yɔ yɔ, pɩwɩlɩɣ se pɛkɛ Ɛsɔ koyindinaa. Pɩlabɩ ḿbʋ́ se pʋwazɩ-mɩ. Ɛlɛ́, yee ɛyʋ ɛkpaɣ ɛzɩma mbʋ́ Ɛsɔ lɩzɩ-wɛ yɔ yɔ, pɩwɩlɩɣ se pɛkɛ mbá Ɛsɔ sɔɔlɩ-wɛ mbʋ́ ɛɛɖʋwa se ɛlakɩ pɔ-cɔzɔnaa yɔ pʋ-yɔɔ.

²⁹ Mbʋ́ pʋyɔɔ yɔ, Ɛsɔ ɛɛmʋʋ mbʋ́ ɛhawa yɔ kaʋ. Ɛɛlɛɣzɩɣ ɖɔɖɔ lɩmaɣza mbá ɛya-wɛ yɔ pɔ-tɔm taa.

³⁰ Toovenim lɛ, ɩtaña Ɛsɔ ɖooo lɔŋ. Ɛlɛ́, lɛɛlɛɛyɔ pɩtɩŋnɩ pa-kaañamtʋ yɔɔ nɛ Ɛsɔ na mɩ-pʋtɔdɩyɛ.

³¹ Ḿbʋ́ ɖɔɖɔ lɛɛlɛɛyɔ patañam-ɩ nɛ ɛna mɩ mɩ-pʋtɔdɩyɛ. Đɩ-yɔɔ pɩtɩŋɩɣna nɛ ɛpɩzɩ ɛna pa-pʋtɔdɩyɛ ɖɔɖɔ.

³² Mbʋ́ pʋyɔɔ yɔ, Ɛsɔ yeba nɛ ɛyáa tɩŋa wɛɛ ɛzɩ yomaa yɔ pa-kaañamtʋ yɔɔ se ɛna patɩŋa payɩ pa-pʋtɔdɩyɛ.

Ɛsɔ lɛ sɔsɔ

³³ Ɛsɔ camɩyɛ lakasɩ ɖɔwa siŋŋ! Ɛ-lɔŋsɩnɖɛ nɛ ɛ-lɛɣtʋ pɛfɛyɩ kámaɣ́! Apɩzɩɣ ɛlɩzɩ mbʋ́ Ɛsɔ ɖʋ ɛ-taa yɔ pʋ-tɔbʋʋ? Apɩzɩɣ ɛnɩɩ mbʋ́ ɛlakɩ yɔ pʋ-tɔbʋʋ?

³⁴ Pama Ɛsɔtɔm Takayaɣ taa se: «Asɩm Ɛsɔ lɩmaɣza? Apɩzɩɣ ɛkɛ ɛ-tɔm tasɩyʋ?

³⁵ Apɩzaa ɛcalɩ-ɩ haʋ pʋyʋ nɛ pʋwɛɛ se ɛhɛyɩ pʋdʋ pʋ-yɔɔ?»

³⁶ Mbʋ́ pʋyɔɔ yɔ, ɛ-cɔlɔ pɩtɩŋa pɩlɩɣna. Ɛnʋ yebina nɛ pɩtɩŋa pʋwɛɛ se pɩkɛ ɛ-ñɩm. Ɛsɔ hɩɖɛ ɛsɛɛ paa ɖooye! Pɩla ḿbʋ́!