Room 10 - New Testament

Yuda ñɩma nɛ mbá pɛtɛkɛ Yuda ñɩma yɔ, pɛwɛnɩ Ɛsɔ kʋɖʋm

¹ Man-taabalaa, mbʋ́ mañɩnɩɣnɩ ma-laŋɩyɛ tɩŋa nɛ mentendiɣ Ɛsɔ Yuda ñɩma yɔɔ yɔ lɛ se: ɛya pa-ñʋʋ.

² Mbʋ́ pʋyɔɔ yɔ, manpɩzɩɣ malɩzɩ pa-aseɣɖe se pañakɩ pana siŋŋ Ɛsɔ nʋmɔʋ taa. Ɛlɛ́, patasɩm-kʋ.

³ Toovenim lɛ, patakpaɣ ɛzɩma mbʋ́ Ɛsɔ pɩsɩɣ ɛyáa kʋtʋʋzaa yɔ nɛ payaa pʋyʋ nɛ pa-maɣmaɣ pañɩnɩɣ mbʋ́ paala nɛ papɩsɩ kʋtʋʋzaa yɔ. Pʋ-yɔɔ pɔtɔɖɔ ɛzɩma mbʋ́ Ɛsɔ pɩsɩɣ ɛyáa kʋtʋʋzaa yɔ pʋ-yɔɔ.

⁴ Mbʋ́ pʋyɔɔ yɔ, Krɩstʋ yɔɔ paɣtʋ tatasɩ wɛnaʋ ɖoŋ se mbá patɩŋa payɩ pɛwɛnɩ lidaʋ Ɛsɔ yɔɔ yɔ, papɩsɩ kʋtʋʋzaa ɛ-ɛsɩndaa.

⁵ Tɔm ndʋ́ Mooyiizi ma ɛzɩma mbʋ́ pɩtɩŋnɩ paɣtʋ yɔɔ ɖɔm yɔɔ nɛ Ɛsɔ pɩsɩ ɛyʋ kʋtʋʋzʋ yɔ pʋ-yɔɔ yɔ, ńdʋ́ lɛ se: «Weyi ɛɖɔŋ mbʋ́ paɖʋ paɣtʋ taa yɔ pʋ-yɔɔ yɔ, pɩtɩŋɩɣnɩ pʋ-yɔɔ nɛ ɛwɛɛ wezuu.»

⁶ Ɛlɛ́, ɛzɩma mbʋ́ pɔtɔm se Ɛsɔ tɩŋɩɣnɩ lidaʋ ŋgʋ́ ɛyʋ wɛnɩ ɛ-yɔɔ yɔ kʋ-yɔɔ nɛ ɛpɩsɩ-ɩ kʋtʋʋzʋ yɔ, ńdʋ́ lɛ se: «Taapɔzɩ ña-maɣmaɣ ña-tɩ se akaɣ kpaʋ ɛsɔdaa?» Pʋ-tɔbʋʋ se akpaɣ ɛsɔdaa nɛ etisi Krɩstʋ.

⁷ Taapɔzɩ ña-maɣmaɣ ña-tɩ ɖɔɖɔ se: «Akaɣ tibu tɛtɛɛ?» Pʋ-tɔbʋʋ se atiki ɛlɩzɩ Krɩstʋ nɛ sɩɖaa taa.

⁸ Se we pama Ɛsɔtɔm Takayaɣ taa yɔ? Pamawa se: «Ñɔ-cɔlɔ tɔm wɛɛ, tɩwɛ ñɔ-nɔɔ taa nɛ tɩwɛɛ ña-taa.» Ŋgʋ́, ńdʋ́ lɛ lidaʋ tɔm ndʋ́ ɖisusuu yɔ.

⁹ Ńdʋ́ lɛ se: yee ŋyɔɔdɩnɩ ñɔ-nɔɔ ɛyáa tɩŋa ɛsɩndaa se Yesu lɛ Kɩpaɣlʋ nɛ ña-taa lɛ, ŋwɛnɩ lidaʋ se Ɛsɔ fezi-i nɛ ɛlɩɩnɩ sɩɖaa taa yɔ, Ɛsɔ yakɩ ña-ñʋʋ.

¹⁰ Yee ḿbʋ́ ɛyʋ wɛɣnɩ lidaʋ ɛ-taa nɛ Ɛsɔ pɩsɩ-ɩ kʋtʋʋzʋ, nɛ ɛyɔɔdɩnɩ ɛ-nɔɔ nɛ ɛ́lɛ́ ya ɛ-ñʋʋ.

¹¹ Ḿbʋ́ pama Ɛsɔtɔm Takayaɣ taa se: «Paa weyi ɛwɛnɩ lidaʋ ɛ-yɔɔ yɔ, ɛɛkaɣ fɛyɛ tɔɔʋ.»

¹² Pʋ-yɔɔ lɛ, tayʋʋ nabʋyʋ fɛyɩ Yuda ñɩma nɛ mbá pɛtɛkɛ Yuda ñɩma yɔ pɛ-hɛkʋ taa: patɩŋa pa-Kɩpaɣlʋ kʋɖʋm, ɛhaɣ ɛ-ñɩm mbá payaɣ-ɩ se ɛsɩnɩ-wɛ yɔ patɩŋa.

¹³ Ḿbʋ́ pama Ɛsɔtɔm Takayaɣ taa se: «Weyi ɛyaɣ Kɩpaɣlʋ se ɛsɩnɩ-ɩ yɔ, ɛyakɩ ɛ-ñʋʋ.»

Laŋhɛzɩyɛ Tɔm susuu

¹⁴ Ɛlɛ́, ɛzɩma papɩzɩɣ payaa-ɩ se ɛsɩnɩ-wɛ nɛ pɛfɛyɩnɩ lidaʋ ɛ-yɔɔ? Ɛzɩma papɩzɩɣ pɛwɛnɩ lidaʋ ɛ-yɔɔ nɛ patanɩɩ ɛ-tɔm nɔɔyʋ cɔlɔ? Ɛzɩma papɩzɩɣ panɩɩ ɛ-tɔm nɛ nɔɔyʋ tosusi-tʋ?

¹⁵ Ɛzɩma tɔm susiyaa wɛɣ nɛ petetiyi nabɛyɛ se posusi-tʋ? Ḿbʋ́ pama Ɛsɔtɔm Takayaɣ taa se: «Tɔm susiyaa wokuuni ɛyʋ tɔm kɩbandʋ yɔ, pɩlabɩ ɖeu lɛ yee!»

¹⁶ Ɛlɛ́, pɩtɛkɛ patɩŋa paatisini Laŋhɛzɩyɛ Tɔm. Toovenim lɛ, Ezaayii ma ɛ-takayaɣ taa se: «Kɩpaɣlʋ, atisi tɔm ndʋ́ ɖisusaa yɔ?»

¹⁷ Pʋ-yɔɔ lɛ, lidaʋ lɩɣnɩ tɔm ndʋ́ ɛyʋ welesiɣ yɔ tɩ-cɔlɔ. Tɔm ndʋ́ ewelesiɣ yɔ lɛ Krɩstʋ tɔm ndʋ́ posusuu yɔ.

¹⁸ Ḿbʋ́ mɔnpɔzʋʋ se: Yuda ñɩma tanɩɩ tɔm ńdʋ́ yaa we? Panɩ-tʋ. Ḿbʋ́ pama Ɛsɔtɔm Takayaɣ taa se: «Ɛyáa nɩ pa-taŋ paa le kedeŋa yɔɔ, nɛ halɩ ndʋ́ pɔyɔɔdaa yɔ, tɩtalɩ ɖooo kedeŋa tɩnaɣ yɔɔ.»

¹⁹ Mantasɩɣ pɔzʋʋ se: Izrɛɛlɩ ñɩma tanɩɩ tɔm ńdʋ́ tɩ-taa yaa we? Mooyiizi layɩ cosuu se: «Ɛsɔ yɔɔdaa se: ‹Meyeki nɛ ɩla sʋsɩ ɛjaɖɛ nɖɩ́ patakpaɣ payaa pʋyʋ yɔ ɖɩ-taa ñɩma. Mansazɩɣ-mɩ nɛ mɩ-pana kpanɩ ɛjaɖɛ nɖɩ́ ɖɩ-taa ñɩma fɛyɩ lɛɣtʋ yɔ.› »

²⁰ Pʋwayɩ lɛ, Ezaayii ñakatɩ nɛ esusuu se: «Ɛsɔ yɔɔdaa se: ‹Mbá pataañɩnɩɣ-m yɔ, pana-m. Mawɩlɩ man-tɩ mbá pataasʋlʋmʋʋ-m pʋyʋ yɔ.› »

²¹ Ɛlɛ́, Izrɛɛlɩ ñɩma ñɩndʋ lɛ, ɛyɔɔdaa se: «Mañɩnɩ kɩyakʋ nɛ kɩ-tɛɛ pilim se mɔñɔɔzɩ ma nɛ mbá paañaŋ-m nɛ pɛkɛlɛsɩɣ-m yɔ ɖɛ-hɛkʋ taa.»