Maatiyee 4 - New Testament

Satanɩ takɩ Yesu lakʋ taa

¹ Pʋwayɩ lɛ, Fezuu Kiɖeɖeu tolisi Yesu nɛ kiwoni-i lakʋ taa se Satanɩ ɛtakɩ-ɩ.

² Yesu kɔhɔkɩ nɔɔ kɩyakɩŋ nɩɩnaza. Pʋwayɩ lɛ, ñɔɔsɩ wɩ-ɩ.

³ Peeɖe Satanɩ woba ɛ-cɔlɔ nɛ eheyi-i se: «Yee ŋnaɣ se ŋkɛ Ɛsɔ Pɩyalʋ yɔ, heyi pɛɛ anɛ se apɩsɩ tindine nɛ ŋtɔɔ.»

⁴ Yesu cosi-i se: «Pama Ɛsɔtɔm Takayaɣ taa se: ‹Pɩtɛkɛ tɔɔnaɣ ɖeke ɛyʋ cakɩnɩ wezuu. Ɛlɛ́, pʋwɛɛ se ɛcaɣ-kʋ ɖɔɖɔ nɛ tɔm ndʋ́ tɩtɩŋa payɩ tɩlɩɣnɩ Ɛsɔ nɔɔ taa yɔ.› »

⁵ Yesu cosi-i ḿbʋ́ lɛ, Satanɩ ɛnʋ ɛkpaɣ-ɩ ewoni-i Ɛsɔ tɛtʋ taa nɛ ɛkpazɩ-ɩ ɖooo Ɛsɔ ɖɩɣa ñʋʋ taa

⁶ nɛ eheyi-i se: «Yee ŋkɛ Ɛsɔ Pɩyalʋ yɔ, kʋyɩ ŋmaa tataa. Mbʋ́ pʋyɔɔ yɔ, pama Ɛsɔtɔm Takayaɣ taa se ‹Ɛsɔ heyiɣ e-tiyiyaa se petem-ŋ pɔ́ɖɔ́kɩ-ŋ pe-nesi taa nɛ ŋtaatɔlɩ pɩyɛ naɖɩyɛ yɔɔ nɛ pʋkʋ ña-naŋgbaŋaɣ.› »

⁷ Peeɖe Yesu cosi-i se: «Pama ka-taa ɖɔɖɔ se: ‹Taatakɩ ña-Kɩpaɣlʋ Ɛsɔ se ŋna ɛ-wayɩ.› »

⁸ Ecosi ḿbʋ́ lɛ, Satanɩ ɛnʋ ɛtasɩ-ɩ kpaɣʋ nɛ ewoni-i pʋʋ ŋgʋ́ kʋkʋyɩ siŋŋ yɔ kʋ-ñʋʋ taa nɛ ɛwɩlɩ-ɩ kedeŋa yɔɔ ajɛya kpeekpe nɛ a-koboyaɣ

⁹ nɛ eheyi-i se: «Yee ŋluŋ mɛn-tɛɛ nɛ ŋɖʋ-m hɩɖɛ yɔ, mahaɣ-ŋ pɩtɩŋa payɩ.»

¹⁰ Yesu heyi-i se: «Satanɩ ɖɛɛ mɔ-yɔɔ! Mbʋ́ pʋyɔɔ yɔ, pama Ɛsɔtɔm Takayaɣ taa se: ‹Ña-Kɩpaɣlʋ Ɛsɔ ɖeke koŋ tɛɛ pʋwɛɛ se ŋluŋ nɛ ŋla ɛ-tʋmɩyɛ.› »

¹¹ Peeɖe Satanɩ yebi-i. Pʋwayɩ lɛ, Ɛsɔ tiyiyaa wolo Yesu cɔlɔ nɛ pasɩnɩ-ɩ.

Yesu pazɩ Ɛsɔtɔm susuu Galilee egeetiye taa

¹² Pɩkɛdaa lɛ, Yesu nɩɩ se pakpa Yohanɛɛsɩ nɛ paɖʋ-ɩ salaka. Pʋ-yɔɔ ɛpɩsɩ Galilee egeetiye taa.

¹³ Ɛtalaa lɛ, ɛtacaɣ Nazarɛɛtɩ. Ɛlɛ́, ɛɖɛɛ Kapɛrnayum. Tɛtʋ ńdʋ́, tɩwɛ Galilee teŋgu nɔɔ, Zabulɔɔ nɛ Nɛftalii pɔ-hɔɔlɩŋ taa.

¹⁴ Pɩlabɩ ḿbʋ́ se pɩla ɛzɩ náyʋ Ezaayii yɔɔdʋʋ yɔ. Ɛyɔɔdaa se:

¹⁵ «Ɩnaɣ, Zabulɔɔ nɛ Nɛftalii pɔ-hɔɔlɩŋ taa ñɩma mɩ nɛ mbá mɩ mɩwɛ ɖɔɖɔ teŋgu habɩyɛ nɔɔ nɛ Yɔɔrdaŋ pɔɔ wayɩ yɔ! Mbá mɩ ɩkɛ Galilee ñɩma nɛ mbá pɛtɛkɛ Yuda ñɩma yɔ pɛwɛɛ mɩ-tɛ yɔ!

¹⁶ Ɩnɩɩ camɩyɛ se: ɩɩwɛ cɩkpɛndʋʋ taa nɛ ɩna ñalɩmɩyɛ sɔsɔɖɛ naɖɩyɛ! Ɩɩwɛ sɩɖaa ɛjaɖɛ taa nɛ ñalɩmɩyɛ ñalɩ mɩ-yɔɔ.»

¹⁷ Yesu talɩ Kapɛrnayum lɛ, ɛpazɩ Ɛsɔtɔm susuu nɛ eheyiɣ ɛyáa se: «Ɩlɛɣzɩ wɛtʋ, mbʋ́ pʋyɔɔ yɔ, Ɛsɔ Kewiyaɣ wɩzɩ talʋʋ!»

Yesu ya kajalaɣ tiyiyaa

¹⁸ Nakʋyʋ wiye Yesu ɖɔŋaɣ Galilee teŋgu nɔɔ. Pɩkɛdaa lɛ, ɛna kpakpasɩ kpayaa naalɛ nabɛyɛ, pɔlɔwaɣ piyiŋ. Ḿbá yɔ: Siimɔɔ weyi payaɣ ɖɔɖɔ se Pɩyɛ yɔ nɛ e-neu Andree.

¹⁹ Ɛna-wɛ ḿbʋ́ lɛ, eheyi-wɛ se: «Ɩkɔɔ ɩtɩŋ-m nɛ manpɩsɩ-mɩ ɛyáa kpayaa ɛzɩ ɩkpaɣʋ kpakpasɩ yɔ.»

²⁰ Peeɖe patiyebi pe-piyiŋ nɛ patɩŋ-ɩ.

²¹ Etuzi ɛ-tɩ ɛsɩndaa lɛ, ɛna Yakubu nɛ e-neu Yohanɛɛsɩ, pa nɛ pa-caa Zebedee pɛwɛ pa-kpɩyʋʋ taa nɛ pɔñɔɔzʋʋ pe-piyiŋ. Ɛlɛ́, ɛ́yáa-wɛ

²² nɛ patɩyebu pa-caa nɛ kpɩyʋʋ nɛ patɩŋ ɛ-wayɩ.

Yesu wɩlɩɣ ɛyáa Ɛsɔtɔm nɛ ɛwazɩɣ-wɛ pa-kʋdɔmɩŋ

²³ Yesu cɔwaɣ Galilee egeetiye tɩŋa taa payɩ nɛ eheyiɣ ɛyáa Ɛsɔ Kewiyaɣ Laŋhɛzɩyɛ Tɔm Ɛsɔ ɖɩsɛyɛ ndɩ ndɩ taa nɛ ɛlakɩ nɛ ajamaa ndɩ ndɩ nɛ kʋdɔndɩnaa ndɩ ndɩ patɩŋa pɔ-yɔɔ cɛkɩ.

²⁴ Peeɖe ɛ-hɩɖɛ sɛ Siirii ɛjaɖɛ tɩŋa taa. Pʋ-yɔɔ pakpakaɣ mbá pɛwɛnɩ kʋdɔmɩŋ ndɩ ndɩ yɔ patɩŋa nɛ mbá pʋcɔzʋʋ-wɛ yɔ: eliikenaa nɛ abom tɔlɩyaa nɛ kalɩkalasɩ nɛ powokini ɛ-cɔlɔ nɛ ɛlakɩ nɛ pɔ-yɔɔ cɛkɩ.

²⁵ Alɩwaatʋ ńdʋ́ʋ́ ɛyáa samaɣ kpɛzɩnɩ hɔɔlɩŋ tɩŋa nɛ patɩŋɩɣ ɛ-wayɩ. Paalɩnɩ Galilee nɛ Tɛtʋ Hiu egeetiye taa nɛ Yeruusalɛm nɛ Yudee nɛ Yɔɔrdaŋ pɔɔ wayɩ.