Maatiyee 28 - New Testament

Yesu femnɩ sɩm taa

¹ Kɩyakʋ kɩhɛzʋʋ ɖɛwa nɛ kife kujuka lɛ, Magdala Maarɩɩ nɛ Maarɩɩ lɛlʋ pakʋyɩ tanaŋ cu nɛ powolo se pana Yesu pɩlaʋ.

² Kpaagbaa ḿbʋ́ lɛ, tɛtʋ ñamsɩ siŋŋ nɛ Kɩpaɣlʋ tiyiyu nɔɔyʋ lɩɩnɩ ɛsɔdaa nɛ etii epilisi pɩlaʋ nɔɔ pɩyɛ nɛ ɛsɩɩ kɩjaʋ nɛ ɛcaɣ ɖɩ-yɔɔ.

³ Ɛñɩlɩsaɣ ɛzɩ tɛʋ ñɩlɩsʋʋ yɔ nɛ e-wondu hʋlʋmɩ layɩ layɩ.

⁴ Peeɖe sɔɔndʋ kpa mbá paaɖaŋ kʋ-yɔɔ yɔ siŋŋ nɛ peseli yem kpa kpa kpa nɛ pe-feziŋ li.

⁵ Ɛlɛ́, Ɛsɔ tiyiyu heyi halaa ḿbá se: «Mɩ lɛ, sɔɔndʋ ɛtaakpa-mɩ. Manawa se Yesu weyi paakam kaamaŋkaɣ yɔɔ yɔ, ɛnʋ ɩñɩnɩɣ.

⁶ Ɛfɛyɩ cɩnɛ, efema ɛzɩ ɛɛyɔɔdʋʋ yɔ. Ɩkɔɔ ɩna ɖenɖe paahɛzɩ-ɩ yɔ

⁷ nɛ iwolo lɔŋ iheyi ɛ-tɔmkpɛlɩkɩyaa se efema nɛ ɛlɩɩnɩ sɩɖaa taa. Ewoki Galilee nɛ ɛɖaŋ-wɛ, peeɖe pakaɣ-ɩ naʋ. Ńdʋ́ maawɛna se meheyiɣ-mɩ.»

⁸ Peeɖe patɩkʋyɩ pɩlaʋ yɔɔ nɛ sɔɔndʋ nɛ laŋhʋlʋmɩyɛ siŋŋ nɛ peseɣ se powoki peheyi ɛ-tɔmkpɛlɩkɩyaa.

⁹ Pɩkɛdaa lɛ, Yesu katɩ-wɛ nɛ ɛtɔ se: «Mɛnsɛ-mɩ!» Peeɖe powobi poluŋ ɛ-tɛɛ nɛ pakpa ɛ-naŋgbanzɩ nɛ paɖʋ-ɩ hɩɖɛ.

¹⁰ Ɛlɛ́, Yesu heyi-wɛ se: «Sɔɔndʋ ɛtaakpa-mɩ. Iwolo iheyi man-taabalaa se powolo Galilee, peeɖe pakaɣ-m naʋ.»

Sɔɔjanaa kɛdɩɣ mbʋ́ panawa yɔ

¹¹ Halaa ḿbá pakʋyɩ pɩlaʋ yɔɔ nɛ pɛɖɛɣ lɛ, sɔɔjanaa mbá paɖaŋ kʋ-yɔɔ yɔ, pa-taa lɛlaa wolo tɛtʋ taa nɛ pɛkɛdɩ cɔjɔnaa sɔsaa mbʋ́ pɩtɩŋa pɩlaba yɔ.

¹² Peeɖe paba nɛ ŋgbɛyɛ taa sɔsaa pekpeɣli ɖama nɛ pɔyɔɔdɩ nɛ pañɩnɩ liidiye sakɩyɛ nɛ pɛcɛlɩ-wɛ

¹³ nɛ paka pa-ñʋŋ taa se: «Iheyi ɛyáa se iɖowaɣ ɖoó taa nɛ ɛ-tɔmkpɛlɩkɩyaa kɔɔ pamɩlɩ-ɩ.

¹⁴ Yee wiyaʋ sɔsɔ ɛnɩ ḿbʋ́ lɛ, ɖɩtɩlɩ mbʋ́ ɖɩɩla nɛ ɖɩhɛzɩ ɛ-laŋɩyɛ nɛ ɛtaalabɩ-mɩ pʋyʋ yɔ.»

¹⁵ Ɛlɛ́, sɔɔjanaa ḿbá pamʋ liidiye ńɖɩ́ nɛ pala ɛzɩ peheyuu-wɛ yɔ. Pʋ-yɔɔ tɔm ńdʋ́ tɩwɛɛ tɩcɔʋ Yuda ñɩma cɔlɔ halɩ nɛ sɔnɔ.

Yesu wɩlɩ ɛ-tɩ ɛ-tɔmkpɛlɩkɩyaa

¹⁶ Yesu tɔmkpɛlɩkɩyaa hiu nɛ kʋɖʋm kowobi Galilee pʋʋ ŋgʋ́ ɛɛwɩlɩ-wɛ yɔ kʋ-yɔɔ nɛ paɖaŋ-ɩ peeɖe.

¹⁷ Pɩkɛdaa lɛ, pana-ɩ nɛ poluŋ ɛ-tɛɛ nɛ paɖʋ-ɩ hɩɖɛ. Ɛlɛ́, pa-taa lɛlaa wɛɛ nɛ papʋtʋʋ pa-taa.

¹⁸ Peeɖe Yesu woba pɔ-cɔlɔ nɛ eheyi-wɛ se: «Ɛsɔ ha-m ɖoŋ tɩŋa payɩ ɛsɔdaa nɛ tataa.

¹⁹ Iwolo ajɛya kpeekpe taa ɛyáa cɔlɔ nɛ ɩla nɛ papɩsɩ mɔn-tɔmkpɛlɩkɩyaa nɛ ɩlabɩ-wɛ lɩm sɔʋ sɔnzɩ Caa Ɛsɔ nɛ ɛ-Pɩyalʋ nɛ e-Fezuu Kiɖeɖeu pa-hɩɖɛ taa.

²⁰ Ɩkpɛlɩkɩ-wɛ nɛ pɔɖɔ mbʋ́ pɩtɩŋa payɩ maaɖʋ-mɩ yɔ pʋ-yɔɔ. Ɩtɩlɩ se mɛwɛɣ mɩ-cɔlɔ kɩyakɩŋ tɩŋa nɛ pʋkɔɔ pɩsɩɩnɩ kedeŋa tɛm wiye.»