Maatiyee 27 - New TestamentPowoni Yesu Room wiyaʋ Pilaatɩ tɛ (Mrk 15.1; Luk 23.1-2; Yoh 18.28-32) 1 Pakpa Yesu nɛ kife tanaŋ tɛɛ cu lɛ, Yuda ñɩma cɔjɔnaa sɔsaa nɛ pɛ-ŋgbɛyɛ taa sɔsaa pɔyɔɔdɩ patɩŋa payɩ se pakʋ-ɩ. 2 Peeɖe pɔhɔkɩ-ɩ nɛ powoni-i Room wiyaʋ Pilaatɩ tɛ. Yudaasɩ sɩm tɔm (Tʋma 1.18-19) 3 Yudaasɩ weyi ɛɖʋzɩ Yesu koyindinaa nesi taa yɔ, ɛnawa se pakʋʋ Yesu lɛ, ɛpazɩ kpiɖuu nɛ ɛkpaɣ liidiye pɔɔyɩsɩ niidozo nzɩ́ paahɛyɩ-ɩ yɔ se ɛpɩsɩɣna ɛcɛlɩ cɔjɔnaa sɔsaa nɛ pɛ-ŋgbɛyɛ taa sɔsaa. 4 Ewoba lɛ, eheyi-wɛ se: «Malabɩ kɩwɛɛkɩm: mankpa ɛyʋ ɛnɛ ɖulum nɛ mɛncɛlɩ se pakʋ-ɩ.» Ɛlɛ́, pocosi-i se: «Ñɔ-cɔlɔ lɛ! Pɩtana-ɖʋ.» 5 Peeɖe ɛkpaɣ liidiye ńɖɩ́ nɛ ɛmɩzɩ Ɛsɔ ɖɩɣa taa nɛ ewolo ɛɖɩ ɛ-tɩ nimiye nɛ ɛsɩ. 6 Ɛlɛ́, cɔjɔnaa sɔsaa tɔzɩ liidiye ńɖɩ́ nɛ pɔtɔ se: «Đa-paɣtʋ taa lɛ, pɩtaha nʋmɔʋ se paɖʋ-ɖɩ Ɛsɔ ɖɩɣa koozaɣ taa, mbʋ́ pʋyɔɔ yɔ, pɩkɛnɩ ɛyʋ sɩm liidiye.» 7 Panɩnɩ ɖama lɛ, pakpaɣ-ɖɩ nɛ payabɩnɩ tɛtʋ pɛŋ mayʋ cɔlɔ se pepi agɔmaa. 8 Ḿbʋ́ yebina nɛ pɩkpaɣʋnɩ kɩyakʋ ŋ́gʋ́ yɔ, payaɣ tɛtʋ ńdʋ́ se: «Sɩm Tɛtʋ.» 9 Pɩlabɩ ɛzɩ náyʋ Yereemii maʋ Yesu tɔm Ɛsɔtɔm Takayaɣ taa yɔ. Ɛmawa se: «Pakpaɣ liidiye pɔɔyɩsɩ niidozo nzɩ́ Izrɛɛlɩ ñɩma ɖʋ ɛ-yɔɔ yɔ 10 nɛ payabɩnɩ tɛtʋ pɛŋ mayʋ cɔlɔ. Ḿbʋ́ Kɩpaɣlʋ kaɖʋwa se meheyi-wɛ.» Yesu wɛ wiyaʋ Pilaatɩ ɛsɩndaa (Mrk 15.2-5; Luk 23.3-5; Yoh 18.33-38) 11 Powoni Yesu Room wiyaʋ Pilaatɩ cɔlɔ lɛ, ɛpɔzɩ-ɩ se: «Ña lɛ Yuda ñɩma wiyaʋ sɔsɔ naa we?» Yesu cosi-i se: «Ñɔyɔɔdʋʋnɩ ḿbʋ́.» 12 Cɔjɔnaa sɔsaa nɛ pɛ-ŋgbɛyɛ taa sɔsaa pakʋyɩ ɛ-yɔɔ, ɛlɛ́, etocosi-wɛ natʋyʋ. 13 Peeɖe Pilaatɩ pɔzɩ-ɩ se: «Ŋŋnɩɣ ɛzɩma mbʋ́ pakʋyʋʋ ñɔ-yɔɔ yɔ yaa we?» 14 Ɛlɛ́, esuma, ɛtatasɩ cosuu natʋyʋ. Peeɖe pɩɖɩɣzɩ Pilaatɩ yem ɖɩɣ ɖɩɣ. Pakʋ Yesu tɔm nɛ paɖʋ se pakʋʋ-ɩ (Mrk 15.6-15; Luk 23.13-25; Yoh 18.39-19.16) 15 Paa Yuda ñɩma Paska Kazandʋ ndʋ́ lɛ, Pilaatɩ lɩzɩɣ salaka tɩnaa taa kʋɖʋm weyi ɛyáa samaɣ sɔɔlaa se palɩzɩ-ɩ yɔ. 16 Ŋgʋ́, alɩwaatʋ ńdʋ́ lɛ, abalʋ weyi payaɣ se [Yesu] Baraabaasɩ nɛ pasɩm-ɩ paa le yɔ, ɛɛwɛ salaka taa. 17 Pʋ-yɔɔ Pilaatɩ pɔzɩ ɛyáa samaɣ ŋgá kekpeɣlaa yɔ se: «[Yesu] Baraabaasɩ nɛ Yesu weyi payaɣ se Krɩstʋ yɔ, pa-taa weyi mi-liu wɛɛ se meyele?» 18 Ɛpɔzɩ-wɛ ḿbʋ́, mbʋ́ pʋyɔɔ yɔ, ɛnawa se paanaɣ Yesu nɛ ɛsɩyɛ yɔɔ pakpa-ɩ nɛ powoni ɛ-cɔlɔ. 19 Pilaatɩ kacaɣ tɔm ɖɩhʋyɛ. Pɩkɛdaa lɛ, ɛ-halʋ tiyi se peheyi-i se: «Taaɖʋ ñɔ-nɔɔ ɛyʋ kʋtʋʋzʋ ɛnʋ ɛ-tɔm taa. Monɖozi-i ɖeɖe ɖoó taa nɛ ɛ-tɔm labɩ-m kʋñɔŋ pɩtɩɩfɛyɩ.» 20 Peeɖe cɔjɔnaa sɔsaa nɛ pɛ-ŋgbɛyɛ taa sɔsaa peheyi ɛyáa samaɣ se keheyi Pilaatɩ se eyele Baraabaasɩ nɛ pɩkazɩ pakʋ Yesu. 21 Ɛtasɩ-wɛ pɔzʋʋ se: «Anɩ mi-liu wɛɛ se meyele pa-naalɛ pa-taa?» Pocosi-i se: «Baraabaasɩ!» 22 Ɛlɛ́, ɛpɔzɩ-wɛ se: «Mala Yesu weyi payaɣ se Krɩstʋ yɔ ɛzɩma?» Pocosi-i patɩŋa se: «Kam-ɩ kaamaŋkaɣ yɔɔ!» 23 Peeɖe ɛtasɩ-wɛ pɔzʋʋ se: «Ɛlɛ́, kɩdɛkɛdɩm mbʋ́ kpem ɛlaba?» Pɛtɛzɩ kobusi mabʋ ɖoŋ se: «Kam-ɩ kaamaŋkaɣ yɔɔ!» 24 Pilaatɩ nawa se paa ɛwɛɛ ɛyɔɔdʋʋ, pɩɩlɛɣzɩɣ pʋyʋ, ɛlɛ́, pɩtɛzɩɣ miŋ saʋ kɩsaʋ. Alɩwaatʋ ńdʋ́ʋ́ etiyaa se pɔkɔnɩ-ɩ lɩm. Pɔkɔnɩ-pʋ lɛ, ɛsɩŋ ɛyáa ɛsɩndaa nɛ ɛsaŋ e-nesi nɛ ɛtɔ se: «Pɩtɛkɛ mɔntɔmna se pakʋ ɛyʋ kʋtʋʋzʋ ɛnɛ! Mɩ-cɔlɔ lɛ!» 25 Ɛlɛ́, ɛyáa samaɣ tɔ se: «Ɛ-sɩm sʋʋtʋ ɛpɩsɩ ɖa nɛ ɖe-piya ɖɔ-yɔɔ!» 26 Pʋ-yɔɔ ɛlɩzɩ Baraabaasɩ nɛ eyele polu Yesu agbazɛɛ nɛ ɛkpaɣ-ɩ ɛcɛlɩ-wɛ se powoni-i pakam-ɩ kaamaŋkaɣ yɔɔ. Sɔɔjanaa pɛŋ Yesu tɛtɛ (Mrk 15.16-20; Yoh 19.2-3) 27 Pʋwayɩ lɛ, sɔɔjanaa woni Yesu Pilaatɩ tɛ kadaɣ taa. Peeɖe powobi patɩŋa payɩ nɛ pekpeɣlini-i 28 nɛ pɔhɔzɩ e-wondu nɛ posuu-i awiitoko kɩsɛmʋʋ waaa 29 nɛ palʋʋ awiya hulaɣ nɛ sɔɔɔ nɛ papam-ɩ nɛ pɛcɛlɩ-ɩ ɖaʋ nɛ ɛ́ɖɔ́kɩ e-nesi kɩbanzɩ taa ɛzɩ wiyaʋ yɔ. Ɛlɛ́, papazɩ ɛ-tɛɛ luŋuu nɛ pɛsɛɣ-ɩ nɛ woŋa se: «Yuda ñɩma wiyaʋ sɔsɔ! Sɛɛ ɖeu!» 30 Nɛ pɔtɔʋ ɛ-yɔɔ ndaatʋ nɛ pamʋʋ ɖaʋ ŋgʋ́ paacɛlɩ-ɩ yɔ nɛ pamakɩ ɛ-ñʋʋ taa. 31 Pɛtɛm-ɩ tɛtɛ pɛŋʋʋ ḿbʋ́ lɛ, pɔhɔzɩ toko kɩsɛmʋʋ ŋ́gʋ́ nɛ papɩsɩnɩ e-wondu posuu-i nɛ powoni-i se pakam-ɩ kaamaŋkaɣ yɔɔ. Sɔɔjanaa kam Yesu kaamaŋkaɣ yɔɔ (Mrk 15.21-32; Luk 23.26-43; Yoh 19.17-27) 32 Palɩɣaɣnɩ Yesu tɛtʋ wayɩ se pakam-ɩ lɛ, pakatɩ Siirɛɛnɩ abalʋ nɔɔyʋ nɛ pakpa-ɩ se ɛsɩɣlɩ Yesu kaamaŋkaɣ, payaɣ-ɩ se Siimɔɔ. 33 Pɩkɛdaa lɛ, patalɩ ɖenɖe payaɣ se Goligota yɔ, pʋ-tɔbʋʋ se ñʋmbɔɔyaɣ lone. 34 Ɛlɛ́, pɛcɛlɩ-ɩ sʋlʋm se ɛñɔɔ, paasidi pɩ-taa kɔyɛ nɖɩ́ ɖɩwɛ ñaŋ yɔ. Ɛɖɩŋ-pʋ lɛ, ekizi se ɛɛñɔʋ. 35 Peeɖe sɔɔjanaa kpa-ɩ pakam-ɩ kaamaŋkaɣ yɔɔ nɛ pɩsɛɣ paɖʋ miika nɛ patayɩ ɖama e-wondu. 36 Pɛtɛma lɛ, pacaɣ peeɖe nɛ paɖaŋ ɛ-yɔɔ. 37 Paama kpata nakʋyʋ yɔɔ mbʋ́ pʋ-yɔɔ pakam-ɩ yɔ nɛ paka kaamaŋkaɣ yɔɔ ɛ-ñʋʋ taa. Pamawa se: «Ɛnɛ lɛ Yesu weyi ɛkɛ Yuda ñɩma wiyaʋ sɔsɔ yɔ.» 38 Pʋwayɩ lɛ, paka ɖɔɖɔ mɩ́láa naalɛ nabɛyɛ ɛ-cɔlɔ: lɛlʋ ɛ-nɩwaŋ yɔɔ nɛ lɛlʋ ɛ-nɩmɩyɛ yɔɔ. 39 Nʋmɔɖɔnaa mbá pɛɖɛɣaɣnɩ peeɖe yɔ, pekpiɣyaɣ ñʋŋ nɛ patʋʋ-ɩ 40 se: «Weyi ña ŋtɔŋaɣ se ŋyɔkʋʋ Ɛsɔ ɖɩɣa nɛ ŋɖaɣnɩ-kɛ maʋ nɛ kɩyakɩŋ naadozo yɔ, ya ña-maɣmaɣ ña-ñʋʋ! Yee ŋkɛ Ɛsɔ Pɩyalʋ yɔ, tibini kaamaŋkaɣ yɔɔ nɛ ɖɩna!» 41 Cɔjɔnaa sɔsaa nɛ paɣtʋ wɩlɩyaa nɛ Yuda ñɩma ŋgbɛyɛ taa sɔsaa pɛpɛŋaɣ Yesu tɛtɛ ḿbʋ́ ɖɔɖɔ nɛ pɔpɔzʋʋ se: 42 «Ɛyabɩ lɛlaa ñʋŋ ɛzɩma tɛ, ɛɛpɩzɩɣ se ɛya ɛ-maɣmaɣ ɛ-ñɩŋgʋ! Pɩtɛkɛ ɛnʋ tɔmna se ɛnʋ lɛ Izrɛɛlɩ ñɩma wiyaʋ sɔsɔ naa we? Etibini kaamaŋkaɣ yɔɔ lɛɛlɛɛyɔ nɛ ɖɩwɛnɩ lidaʋ ɛ-yɔɔ! 43 Ɛɛta Ɛsɔ liu nɛ ɛkaɖɩ se ɛnʋ lɛ Ɛsɔ Pɩyalʋ. Tɔɔ! Lɛɛlɛɛyɔ, ɖɩcɔna ɖɩna se Ɛsɔ liu wɛɛ se ɛya ɛ-ñʋʋ naa ɛɛyakɩ?» 44 Halɩ pɩkpɛndɩnɩ mɩ́láa mbá paakam ɛ-cɔlɔ yɔ nɛ patʋʋ-ɩ ɖɔɖɔ ḿbʋ́. Yesu sɩba (Mrk 15.33-41; Luk 23.44-49; Yoh 19.28-30) 45 Puwiye ńɖɩ́ wɩsɩ siɣaa lɛ, cɩkpɛndʋʋ yu ɛjaɖɛ tɩŋa kpemm nɛ pʋkɔɔ pɩsɩɩnɩ ɖanaɣ ñɩɣtʋ naadozo. 46 Pʋkɔma ɛzɩ ɖanaɣ ñɩɣtʋ naadozo yɔ lɛ, Yesu ma kubuka ɖoŋ se: «Elii, Elii! Lamaa sapaktanɩɩ.» Pʋ-tɔbʋʋ se: «Mɛ-Ɛsɔ, Mɛ-Ɛsɔ! Pɩlabɩ ɛzɩma nɛ ŋlɔ-m?» 47 Mbá paawɛ peeɖe yɔ, pa-taa lɛlaa nɩ ḿbʋ́ lɛ, pɔtɔŋ se: «Ɩnɩɩ ɛyaɣʋ Elii!» 48 Peeɖe pa-taa lɛlʋ tisewa nɛ ewolo ɛkpaɣ kʋca nɛ ewona elii sʋlʋm kɩñɩŋɩm nabʋyʋ taa nɛ ɛtʋʋ ɖaʋ nɔɔ taa nɛ ɛwɩlɩɣ-ɩ se ɛmʋzɩ. 49 Ɛlɛ́, pa-taa lɛlaa tɔ se: «Iyele ɖɩna se Elii kɔŋ nɛ ɛya ɛ-ñʋʋ naa we?» 50 Peeɖe Yesu tasɩ mabʋ kubuka ɖoŋ nɛ ɛhɛɛ. 51 Alɩwaatʋ ńdʋ́ tɩ-yɔɔ pɩsaʋ sɔsɔʋ ŋgʋ́ paakaɣ Ɛsɔ ɖɩɣa taa yɔ, kɩkpaɣnɩ ñʋʋ taa faɣʋ nɛ kitii kɩkaɖɩnɩ pɩ-tɛɛ hɔɔlɩŋ naalɛ. Tɛtʋ kañamsaa nɛ ɛwasɩ ya 52 nɛ pɩlaŋ yɔɔ kuli nɛ Ɛsɔ ñɩma sakɩyɛ mbá paasɩba yɔ, pefe 53 nɛ palɩɩnɩ pɩlaŋ taa. Yesu kɔma efe lɛ, powolo Yeruusalɛm nɛ ɛyáa sakɩyɛ na-wɛ. 54 Room sɔɔja sɔsɔ nɛ lɛlaa mbá ɛ nɛ wɛ paaɖaŋ Yesu yɔɔ yɔ, pana tɛtʋ ñamsʋʋ nɛ mbʋ́ pɩtɩŋa payɩ pɩlabɩ ḿbʋ́ yɔ lɛ, sɔɔndʋ kpa-wɛ siŋŋ nɛ pɔtɔ se: «Toovenim, ɛnɛ ɛɛkɛ Ɛsɔ Pɩyalʋ!» 55 Halaa nabɛyɛ kɛwɛ poliŋ taa nɛ pɔcɔŋnɩ ɖɔɖɔ, pɔɖɔ sakɩyɛ. Ḿbá katɩŋnɩ-ɩ nɛ ɖooo Galilee nɛ pasɩŋnɩ-ɩ. 56 Pa-taa lɛlaa yɔ: Magdala tɛtʋ taa Maarɩɩ nɛ Yakubu nɛ Yozɛɛfʋ po-ɖoo Maarɩɩ nɛ Zebedee pɩyalaa ɖoo. Yozɛɛfʋ pim Yesu (Mrk 15.42-47; Luk 23.50-56; Yoh 19.38-42) 57 Đanaɣ ɖanaa lɛ, Ariimatee ñɩm tʋ weyi payaɣ se Yozɛɛfʋ nɛ ɛkɛ Yesu tɔmkpɛlɩkɩyʋ ɖɔɖɔ yɔ, 58 ewolo Room wiyaʋ Pilaatɩ cɔlɔ. Ewoba lɛ, etendi-i se yee etisiɣ yɔ, ɛcɛlɩ-ɩ Yesu nɛ ewona epi. Ɛlɛ́, Pilaatɩ tisi nɛ ɛha nɔɔ se powolo pakpaɣ-ɩ nɛ pɛcɛlɩ-ɩ. 59 Peeɖe ɛkpaɣ-ɩ nɛ ɛhɔkɩ-ɩ pɩsaʋ kɩfalʋʋ kʋhʋlʋmʋʋ nakʋyʋ taa 60 nɛ ewona epi pɩlaʋ kɩfalʋ ŋgʋ́ eeyeba nɛ pɛcɛsɩ-ɩ ɛwaɣ taa yɔ kɩ-taa nɛ epilisi pɩyɛ sɔsɔɖɛ naɖɩyɛ nɛ ɛɖɩɣ kʋ-nɔɔ nɛ ɛcaŋ ɛɖɛɛ. 61 Magdala Maarɩɩ nɛ Maarɩɩ lɛlʋ paacaɣ peeɖe nɛ patʋʋzɩnɩ ɖenɖe pɩlaʋ ŋ́gʋ́ kʋ-nɔɔ wɛna yɔ nɛ pɔcɔŋnɩ-kʋ. Sɔɔjanaa ɖaŋ Yesu pɩlaʋ yɔɔ 62 Kɩyakʋ ŋgʋ́ Yuda ñɩma ñɔɔzʋʋ pa-tɩ se pʋcɔ pɩtalɩ kɩyakʋ kɩhɛzʋʋ yɔ, kɩɖɛwa nɛ tɛʋ fe lɛ, cɔjɔnaa sɔsaa nɛ Farɩsɩ ñɩma powolo pekpeɣli Pilaatɩ tɛ 63 nɛ peheyi-i se: «Đajaa! Đɩtɔzʋʋ se alɩwaatʋ ndʋ́ pɔbɔtʋ ɛnɛ ɛɛwɛnɩ ɛ-ɛsɛ yɔ, ɛtɔm se kɩyakɩŋ naadozo wayɩ lɛ, efeŋ. 64 Pʋ-yɔɔ lɛ, ɖɩpɔzʋʋ-ŋ se ŋlɩzɩ sɔɔjanaa nɛ powolo paɖaŋ ɛ-pɩlaʋ yɔɔ nɛ pʋkɔɔ pɩsɩɩnɩ kɩyakɩŋ naadozo ɩnʋ. Pɩtɛkɛ ḿbʋ́, ɛ-tɔmkpɛlɩkɩyaa woki patʋlɩ kʋ-nɔɔ nɛ pamɩlɩ-ɩ nɛ pɔkɔɔ pɛcɛtɩ ɛyáa se efema nɛ ɛlɩɩnɩ sɩɖaa taa nɛ pɛ-cɛtɩm ñɔkɔɔ pɩkɩlɩ kajalaɣ ñɩmbʋ.» 65 Peeɖe Pilaatɩ cosi-wɛ se: «Sɔɔjanaa yɔ! Ɩkpaɣ-wɛ nɛ powolo paɖaŋ pɩlaʋ yɔɔ ɛzɩ ɩsɔɔlʋʋ yɔ.» 66 Peeɖe powobi pañɩ pɩyɛ nɖɩ́ paɖɩɣ pɩlaʋ ŋ́gʋ́ kʋ-nɔɔ yɔ ɖɩ-yɔɔ se nɔɔyʋ etukuni-ɖɩ lɛ, pana. Pɛtɛma lɛ, pasɩɩ sɔɔjanaa se paɖaŋ kpam. |