Maatiyee 26 - New TestamentCɔjɔnaa sɔsaa nɛ Yuda ñɩma sɔsaa tam Yesu yɔɔ nɔɔ (Mrk 14.1-2; Luk 22.1-2; Yoh 11.45-53) 1 Yesu tɛm ɛ-tɔmkpɛlɩkɩyaa tɔm ndɩ ndɩ kɛdʋʋ payɩ lɛ, eheyi-wɛ se: 2 «Ɩnawa se pɩkazɩ kɩyakɩŋ naalɛ se pɔtɔɔ Yuda ñɩma Paska Kazandʋ. Alɩwaatʋ ńdʋ́ tɩ-taa pɔkɔŋ kpaʋ Ɛyʋ Pɩyalʋ nɛ paɖʋzɩ-ɩ koyindinaa nesi taa nɛ paba kam-ɩ kaamaŋkaɣ yɔɔ.» 3 Peeɖe cɔjɔnaa sɔsaa nɛ Yuda ñɩma sɔsaa pekpeɣli ɖama cɔjɔnaa ñʋʋdʋ weyi payaɣ se Kayifu yɔ, ɛ-ɖɩɣa taa nɛ 4 panɩnɩ ɖama patɩŋa se pakpa Yesu mɛsaɣ tɛɛ nɛ pakʋ-ɩ. 5 Pɔyɔɔdaɣ se: «Đɩtaakpa-ɩ kazandʋ alɩwaatʋ. Pɩtɛkɛ ḿbʋ́, ɛyáa samaɣ kʋyʋʋ ɖɔ-yɔɔ.» Halʋ nɔɔyʋ pɩyɩ tɩlaaɖɩ Yesu ñʋʋ taa (Mrk 14.3-9; Yoh 12.1-8) 6 Yesu kowobi Betaanii tɛtʋ cikpetu taa nɛ ɛsʋʋ Siimɔɔ weyi ɛɛkɛ canaɣ yɔ ɛ-ɖɩɣa taa. 7 Pɔtɔkaɣ tɔɔnaɣ lɛ, halʋ nɔɔyʋ sʋʋ pɔ-cɔlɔ, ɛɖɔkɩ tɩlaaɖɩ ŋgʋ́ kʋwɛ liidiye pɩtɩɩfɛyɩ yɔ, fiɣa kɩñɩlɩsaɣ nakɛyɛ taa ɖo. Pɩkɛdaa lɛ, ɛpɩyɩ-kʋ Yesu ñʋʋ taa waaa. 8 Ɛ-tɔmkpɛlɩkɩyaa na ḿbʋ́ lɛ, pa-taa wɩɩnɩ halʋ ɛnʋ nɛ pɔtɔŋ se: «Halʋ ɛnɛ, ɛwɛɛkʋʋ tɩlaaɖɩ ŋ́gʋ́ nɛ ɛlɔʋ yem yɔ, pʋwazɩɣ-ɩ we? 9 Yee paapɛdɩ-kʋ, pataayabɩ-kʋ liidiye sɔsɔɖɛ nɛ paha kʋñɔndɩnaa naa we?» 10 Pɔyɔɔdɩ ḿbʋ́ lɛ, Yesu nɩɩ nɛ ɛpɔzɩ-wɛ se: «Ɛbɛ yɔɔ ɩcɛyɩɣ halʋ ɛnʋ ḿbʋ́? Mbʋ́ ɛlabɩ-m yɔ, pʋwɛ ɖeu. 11 Mbʋ́ pʋyɔɔ yɔ, mɩ nɛ kʋñɔndɩnaa ɩwɛna tam. Ɛlɛ́, ma maawɛɣ mɩ-cɔlɔ ḿbʋ́. 12 Ɛpɩyɩ tɩlaaɖɩ ŋ́gʋ́ mon-tomnaɣ yɔɔ se ɛñɔɔzɩ-kɛ nɛ pʋcɔ pepim-m. 13 Toovenim lɛ, meheyiɣ-mɩ se: paa le posusuu Laŋhɛzɩyɛ Tɔm yɔ, pɔkɔŋ kɛdʋʋ mbʋ́ halʋ ɛnɛ ɛlabɩ mɔ-yɔɔ yɔ pʋ-tɔm nɛ ɛyáa ɛtaasɔɔ ɛ-yɔɔ kaʋ.» Yudaasɩ labɩ tamaɣ se ɛɖʋzʋʋ Yesu cɔjɔnaa sɔsaa nesi taa (Mrk 14.10-11; Luk 22.3-6) 14 Pʋwayɩ lɛ, Yesu tɔmkpɛlɩkɩyaa hiu nɛ naalɛ taa weyi payaɣ se Yudaasɩ Iskarɩyɔɔtɩ yɔ, ewolo ɛna Yuda ñɩma cɔjɔnaa sɔsaa 15 nɛ ɛpɔzɩ-wɛ se: «Yee manpɩzaa mankpa Yesu nɛ mɛncɛlɩ-mɩ, ɛbɛ ɩhaɣ-m?» Kpaagbaa ḿbʋ́ lɛ, pakalɩ liidiye pɔɔyɩsɩ niidozo nɛ pɛcɛlɩ-ɩ. 16 Pɩkpaɣʋnɩ alɩwaatʋ ńdʋ́ yɔ, ɛpazɩ ñɩnʋʋ nʋmɔʋ ŋgʋ́ ɛɛtɩŋ nɛ ɛkpa Yesu nɛ ɛ́ɖʋzɩ pe-nesi taa yɔ. Yesu pɔzaa se patɩzɩ Paska Kazandʋ tɔɔnaɣ (Mrk 14.12-21; Luk 22.7-14, 21-23; Yoh 13.21-30) 17 Kazandʋ ndʋ́ tɩ-yɔɔ pɔtɔkɩ tindine nɖɩ́ ɖɩ-taa fɛyɩ sɔsɔɔna yɔ, tɩ-kajalaɣ kɩyakʋ wiye Yesu tɔmkpɛlɩkɩyaa woba ɛ-cɔlɔ nɛ pɔpɔzɩ-ɩ se le e-liu wɛɛ se patɩzɩ-ɩ Yuda ñɩma Paska Kazandʋ tɔɔnaɣ nɛ le e-liu wɛɛ se ɛtɔkɩ-kɛ? 18 Ɛlɛ́, ecosi-wɛ se: «Iwolo tɛtʋ taa nɔɔyʋ cɔlɔ nɛ iheyi-i se Wɩlɩyʋ se ɛ-sɩm alɩwaatʋ talaa, ñɛ-tɛ ɛ nɛ ɛ-tɔmkpɛlɩkɩyaa pɔkɔŋ pɔtɔɔ Yuda ñɩma Paska Kazandʋ.» 19 Ɛlɛ́, ɛ-tɔmkpɛlɩkɩyaa la ɛzɩ eheyuu-wɛ yɔ nɛ patɩzɩ kazandʋ tɔɔnaɣ. Yesu yɔɔdaa se ɛ-tɔmkpɛlɩkɩyaa taa nɔɔyʋ kɔŋ-ɩ kpaʋ nɛ ɛ́ɖʋzɩ koyindinaa nesi taa 20 Pɩlɛdaa lɛ, Yesu nɛ ɛ-tɔmkpɛlɩkɩyaa hiu nɛ naalɛ pacaɣ tɔɔnaɣ ɖɩtɔɔyɛ. 21 Pɔtɔkaɣ lɛ, eheyi-wɛ se: «Toovenim lɛ, mankaɖɩɣ-mɩ se: mɩ-taa nɔɔyʋ kɔŋ-m kpaʋ nɛ ɛ́ɖʋzɩ koyindinaa nesi taa.» 22 Ɛyɔɔdɩ ḿbʋ́ lɛ, ɛ-tɔmkpɛlɩkɩyaa laŋa wɛɛkɩ pɩŋŋ nɛ pɔpɔzʋʋ-ɩ kʋɖʋm kʋɖʋm se: «Kɩpaɣlʋ! Ma na?» Ɛnɛ se: «Kɩpaɣlʋ! Ma na?» 23 Ɛlɛ́, ecosi-wɛ se: «Weyi ma nɛ ɩ ɖɩtɔkɩ ñanaɣ kʋɖʋmaɣ taa yɔ, ɛnʋ kɔŋnɩ-m kpaʋ nɛ ɛ́ɖʋzɩ koyindinaa nesi taa. 24 Ɛyʋ Pɩyalʋ kɔŋ kʋyʋʋ kedeŋa yɔɔ cɩnɛ ɛzɩ pamaʋ ɛ-tɔm Ɛsɔtɔm Takayaɣ taa yɔ. Ɛlɛ́, pʋtɔɔ weyi ɛɖʋzʋʋ-ɩ koyindinaa nesi taa yɔ! Yee pataalʋlɩ pʋdʋ yɔ, pɩɩkɩlɩ-ɩ sɛʋ.» 25 Peeɖe Yudaasɩ weyi ɛɖʋzʋʋ-ɩ koyindinaa nesi taa yɔ, ɛpɔzɩ-ɩ se: «Wɩlɩyʋ! Ma na?» Ɛlɛ́, Yesu cosi-i se: «Ñɔyɔɔdʋʋnɩ ḿbʋ́.» Kɩpaɣlʋ tɔɔnaɣ tɔm (Mrk 14.22-26; Luk 22.15-20; 1 Kɔr 11.23-25) 26 Yesu nɛ ɛ-tɔmkpɛlɩkɩyaa pɔtɔkaɣ tɔɔnaɣ lɛ, ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ se: «Ɩmʋ nɛ ɩtɔɔ, pʋnɛ lɛ mon-tomnaɣ.» 27 Pʋwayɩ lɛ, ɛkpaɣ sʋlʋm nɛ caɖaɣ nɛ ɛsɛɛ pʋ-yɔɔ Ɛsɔ nɛ ɛcɛlɩ-wɛ nɛ ɛtɔ se: «Ɩmʋ nɛ ɩñɔɔ mɩtɩŋa payɩ. 28 Sʋlʋm pʋnɛ lɛ man-calɩm mbʋ́ pɩkpɛdɩɣ ɛyáa sakɩyɛ yɔɔ se Ɛsɔ ɛpɩzɩ ekpeɣ-wɛ pa-kɩwɛɛkɩm yɔ. Pʋ-yɔɔ ɛtɩŋɩɣna nɛ ɛɖʋ nɔɔ haʋ. 29 Mankaɖɩɣ-mɩ se pɩkpaɣʋnɩ lɛɛlɛɛyɔ yɔ, maatasɩɣ sʋlʋm pʋnɛ ñɔʋ nɛ pʋkɔɔ pɩsɩɩnɩ kɩyakʋ ŋgʋ́ ma nɛ mɩ ɖɩñɔ sʋlʋm kɩfam man-Caa Ɛsɔ Kewiyaɣ taa yɔ.» Yesu yɔɔdaa se Pɩyɛ kɔŋ kpɛzʋʋ se ɛtasɩm-ɩ (Mrk 14.27-31; Luk 22.31-34; Yoh 13.36-38) 30 Ɛtɛm-wɛ heyuu ḿbʋ́ lɛ, petee kazandʋ hendu nɛ pɛɖɛɛ pakpa Somiŋ Pʋʋ yɔɔ. 31 Yesu nɛ ɛ-tɔmkpɛlɩkɩyaa pakpa peeɖe lɛ, eheyi-wɛ se: «Iseɣ mɩtɩŋa payɩ nɛ iyebi-m ɖoó anɛ a-taa maɣmaɣ. Mbʋ́ pʋyɔɔ yɔ, Ɛsɔ yɔɔdaa nɛ pama ɛ-Tɔm Takayaɣ taa se: ‹Mamakɩ ninɖiɣyu sɩbʋ yɔɔ sɩbʋ yɔɔ, nɛ piyele heŋ mɩzɩ ɖama.› 32 Yesu tasɩ yɔɔdʋʋ se: «Ɛlɛ́, alɩwaatʋ ndʋ́ menfeŋ yɔ, manɖaŋɩɣ-mɩ Galilee.» 33 Peeɖe Pɩyɛ heyi-i se: «Paa lɛlaa eseɣ patɩŋa se peyebi-ŋ yɔ, ma maalakɩ ḿbʋ́ kaʋ!» 34 Ɛlɛ́, Yesu heyi-i se: «Toovenim lɛ, meheyiɣ-ŋ se ɖoó anɛ a-taa maɣmaɣ, pʋcɔ kalɩmɔʋ koo lɛ, ŋkpɛzɩɣ tam naadozo se ŋtasɩm-m.» 35 Ɛlɛ́, Pɩyɛ heyi-i se: «Paa sɩm yɔ, ma nɛ ŋ ɖɩsɩ, maakpɛzɩɣ kaʋ se mantasɩm-ŋ.» Ɛ-tɔmkpɛlɩkɩyaa lɛlaa yɔɔdɩ patɩŋa ḿbʋ́ ɖɔɖɔ. Yesu sɛ Ɛsɔ Jesemaanɩ (Mrk 14.32-42; Luk 22.39-46) 36 Pʋwayɩ lɛ, Yesu nɛ ɛ-tɔmkpɛlɩkɩyaa patalɩ ɖenɖe payaɣ se Jesemaanɩ yɔ. Peeɖe eheyi ɛ-tɔmkpɛlɩkɩyaa se: «Ɩcaɣ cɩnɛ nɛ mowolo mɛnsɛɛ Ɛsɔ nɛ mɔnkɔɔ.» 37 Ɛɖɛɣaɣ lɛ, ɛ́yáa Pɩyɛ nɛ Zebedee pɩyalaa naalɛ. Pɛɖɛ tɔmkpɛlɩkɩyaa lɛlaa yɔɔ pazɩ lɛ, ɛ-laŋɩyɛ wɛɛkɩ nɛ sɔɔndʋ kpa-ɩ. 38 Peeɖe eheyi-wɛ se: «Mɛ-ɛsɛ ñɩŋ sɩm yɔɔ sɩm yɔɔ. Ɩcaɣ cɩnɛ, ma nɛ mɩ ɖɩcaɣnɩ ɖɛ-ɛsɛ.» 39 Ɛlɛ́, etuzi ɛ-tɩ ɛsɩndaa pazɩ nɛ eluŋ nɛ ɛpa ɛ-ɛsɛ nɛ tɛtʋ nɛ etendi Ɛsɔ se: «Man-Caa! Yee ŋtisiɣ yɔ, taayele nɛ kʋñɔŋ ŋ́gʋ́ kɩtalɩ-m. Ɛlɛ́, la mbʋ́ ñe-liu wɛɛ yɔ, taala mbʋ́ me-liu wɛɛ yɔ.» 40 Ɛtɛm Ɛsɔ sɛʋ lɛ, ɛpɩsɩ ɛ-tɔmkpɛlɩkɩyaa ḿbá pɔ-cɔlɔ nɛ ɛmaɣnɩ pɔɖɔŋ ɖou. Peeɖe ɛpɔzɩ Pɩyɛ se: «Yee ḿbʋ́, ɩtapɩzɩ ɩsɩnɩ-m caɣʋ paa ñɩɩɩ! 41 Ɩcaɣnɩ mɩ-ɛsɛ nɛ ɩsɛɛ Ɛsɔ, pɩtɛkɛ ḿbʋ́, ɩkɔŋ ɩsʋʋ takʋʋ taa. Ɛyʋ liu wɛɛ se ɛla mbʋ́ pʋwɛ ɖeu yɔ, ɛlɛ́, ɛwɛnɩ kaapɩzɩtʋ.» 42 Ɛyɔɔdɩ ḿbʋ́ lɛ, ɛtasɩ ɛ-tɩ tuzuu nɛ etendi Ɛsɔ se: «Man-Caa! Yee ŋŋtisiɣ se kʋñɔŋ kʋnɛ kɩɖɛɛ nɛ mantaasʋʋ kɩ-taa yɔ, ŋla mbʋ́ ñe-liu wɛɛ yɔ.» 43 Ɛtasɩ pɩsʋʋ ɛ-tɔmkpɛlɩkɩyaa cɔlɔ lɛ, ɛmaɣnɩ ɖɔɖɔ pɔɖɔŋ ɖou, patapɩzɩ pacaɣnɩ pɛ-ɛsɛ. 44 Peeɖe Yesu tuzi ɛ-tɩ tozo ɖeɖe nɛ ɛtasɩ Ɛsɔ tenduu nɛ ɛyɔɔdɩ tɔm kʋɖʋmtʋ ndʋ́. 45 Pʋwayɩ lɛ, ɛpɩsɩ pɔ-cɔlɔ nɛ ɛpɔzɩ-wɛ se: «Ɩwɛ ɖom yɔɔ tam ḿbʋ́? Lɛɛlɛɛyɔ, alɩwaatʋ talaa se paɖʋzɩ Ɛyʋ Pɩyalʋ kɩwɛɛkɩm laɖaa nesi taa. 46 Ɩkʋyɩ ɖɩkatɩ weyi ɛkpaɣ-m se ɛɖʋzɩ pe-nesi taa yɔ! Ɛkɔŋ naɣ yɔ!» Pakpa Yesu (Mrk 14.43-50; Luk 22.47-53; Yoh 18.3-12) 47 Yesu yɔɔdaɣ ḿbʋ́ lɛ, ɛ-tɔmkpɛlɩkɩyaa hiu nɛ naalɛ taa lɛlʋ weyi payaɣ-ɩ se Yudaasɩ yɔ nɛ ɛyáa samaɣ nakɛyɛ patalɩ. Pɔɖɔkɩ sɛsɩ kɩɖaɣlɩsɩ nɛ pɔla. Cɔjɔnaa sɔsaa nɛ Yuda ñɩma sɔsaa petiyini-wɛ. 48 Yudaasɩ ɛnʋ, ɛkpaɣnɩ Yesu se ɛɖʋzɩ kɩwɛɛkɩm laɖaa nesi taa. Ɛɛtɛm ɛyáa samaɣ ŋ́gá kɛdʋʋ ɛzɩma mbʋ́ ɛlakɩ nɛ pasɩm-ɩ nɛ pakpa-ɩ yɔ. Eheyi-wɛ se: «Yee mowobi mɛnsɛɛ nɔɔyʋ nɛ mamʋzɩ ɛ-laɣzaɣ yɔɔ lɛ, ɛnʋ lɛ. Ɩkpa-ɩ.» 49 Ɛtalaa lɛ, ɛtɩwobu Yesu cɔlɔ nɛ eheyi-i se: «Wɩlɩyʋ, sɛɛ ɖeu!» Ɛlɛ́, ɛmʋzɩ ɛ-laɣzaɣ yɔɔ. 50 Yesu heyi-i se: «Mɛ-ɛgbaɣdʋ, la mbʋ́ ŋkɔm se ŋlakɩ yɔ lɔŋ!» Peeɖe ɛyáa samaɣ woba kakpa Yesu. 51 Ɛlɛ́, ɛ-tɔmkpɛlɩkɩyaa taa lɛlʋ sezi ɛkpɛɛ ɛ-sɩɣa kɩɖaɣlaɣ nɛ ɛsɛtɩ cɔjɔnaa ñʋʋdʋ tʋmlaɖʋ nɩŋgbaŋʋʋ. 52 Peeɖe Yesu heyi-i se: «Pɩsɩnɩ ña-sɩɣa ko-huyuu taa, mbʋ́ pʋyɔɔ yɔ, mbá patɩŋa payɩ pakʋʋ lɛlaa nɛ sɛsɩ yɔ, sɩɣa pakʋʋnɩ-wɛ ɖɔɖɔ. 53 Ŋtatɩlɩ se manpɩzaɣ se mayaa man-Caa se ɛkɔɔ ɛsɩnɩ-m nɛ halɩ etiyini-m e-tiyiyaa tikasɩ hiu nɛ naalɛ kpaagbaa yaa we? 54 Ŋgʋ́, yee malabɩ ḿbʋ́, ɛzɩma tɔm ndʋ́ pama Ɛsɔtɔm Takayaɣ taa yɔ, tɩpɩzɩɣ tɩla? Pamawa se pʋwɛɛ se tɩla ḿbʋ́.» 55 Peeɖe Yesu pɔzɩ ɛyáa samaɣ se: «Ɩkɔm ma-wayɩ nɛ sɛsɩ kɩɖaɣlɩsɩ nɛ pɔla yɔ, mɛnkɛ mɩ́lʋ́ naa we? Ma nɛ mɩ ɖɩɩwɛ Ɛsɔ ɖɩɣa taa kɩyakɩŋ tɩŋa nɛ mawɩlɩɣ Ɛsɔtɔm, ɛlɛ́, ɩtakpa-m. 56 Ɛlɛ́, pɩtɩŋa pɩlabɩ ḿbʋ́ se tɔm ndʋ́ náyaa ma Ɛsɔtɔm Takayaɣ taa yɔ, tɩla.» Peeɖe ɛ-tɔmkpɛlɩkɩyaa tɩŋa payɩ mɩzɩ ɖama nɛ peyebi-i. Powoni Yesu Yuda ñɩma cɔjɔnaa sɔsaa cɔlɔ (Mrk 14.53-65; Luk 22.54-55, 63-71; Yoh 18.13-14, 19-24) 57 Pakpa Yesu lɛ, pakpaɣ-ɩ se powokini-i Yuda ñɩma cɔjɔnaa ñʋʋdʋ Kayifu tɛ ɖenɖe pɛ-ŋgbɛyɛ taa sɔsaa nɛ pa-paɣtʋ wɩlɩyaa paakpeɣlaa yɔ. 58 Pɛɖɛɣaɣnɩ-ɩ lɛ, Pɩyɛ wɛɛ mɛlʋʋ taa mɛlʋʋ taa nɛ ɛtɩŋɩɣ ɛ-wayɩ. Ɛtalɩ cɔjɔnaa ñʋʋdʋ ɛnʋ ɛ-taɣ yɔɔ lɛ, ɛcaɣ Ɛsɔ ɖɩɣa yɔɔ ɖaŋɩyaa cɔlɔ se ɛna mbʋ́ pʋkɔŋ tɛmnaʋ yɔ. 59 Peeɖe cɔjɔnaa sɔsaa nɛ tɔm hʋyaa lɛlaa tɩŋa pañɩnaɣ aseɣɖe tɩnaa se powolo pɛcɛtɩnɩ Yesu taa nɛ pehiɣ-i pakʋ-ɩ. 60 Ɛlɛ́, petehiɣ nɔɔyʋ. Ŋgʋ́, ɛyáa sakɩyɛ woba nɛ pɛcɛtɩnɩ ɛ-taa. Pɩkɛdaa lɛ, abalaa naalɛ nabɛyɛ wolo 61 nɛ pɔtɔ se: «Abalʋ ɛnɛ, ɛtɔm se ɛpɩzɩɣ ɛyɔkɩ Ɛsɔ ɖɩɣa nɛ ɛɖaɣnɩ-kɛ maʋ nɛ kɩyakɩŋ naadozo.» 62 Peeɖe cɔjɔnaa ñʋʋdʋ kʋyaa nɛ ɛpɔzɩ Yesu se: «Tɔm ndʋ́ tɩtɩŋa payɩ ɛyáa panɛ pɔtɔŋ se ŋyɔɔdaa yɔ, ŋfɛyɩnɩ natʋyʋ se ŋcosuu yaa we?» 63 Ɛlɛ́, esuma ɖiɣ ɖiɣ. Peeɖe ɛpɔzɩ-ɩ se: «Ña lɛ Weyi Ɛsɔ Lɩzaa Yɔ yaa we? Ña ɖɔɖɔ lɛ Ɛsɔ Pɩyalʋ? Yee ḿbʋ́, ɖuúni Ɛsɔ wezuu tʋ.» 64 Yesu cosi-i se: «Ña-tɩ tɩŋa ŋyɔɔdɩnɩ ḿbʋ́. Đɔɖɔ lɛ, mankaɖɩɣ-mɩ se: pɩkpaɣʋnɩ lɛɛlɛɛyɔ yɔ, ɩkɔŋ naʋ Ɛyʋ Pɩyalʋ, ɛcaɣ Ɛsɔ Đoŋ Tɩŋa Tʋ cɔlɔ lone kɩbanɖɛ taa. Ɩkɔŋ-ɩ naʋ ɖɔɖɔ ɛsɔmɩndʋ yɔɔ, ɛɖɔŋ kɔm.» 65 Cɔjɔnaa ñʋʋdʋ ɛnʋ, ɛnɩ ḿbʋ́ lɛ, ɛkʋyɩ nɛ ɛcɩyɩ ɛ-cɔjɔtʋ toko nɛ pɩwɩlɩ se pɩwɩzɩ-ɩ pɩŋŋ nɛ ɛpɔzɩ ɛyáa lɛlaa se: «Ɛwɛɛkɩ Ɛsɔ hɩɖɛ! Ɛbɛ yɔɔ pʋwɛɛ se ɖɩtasɩ ñɩnʋʋ aseɣɖe tɩnaa yɔ? Paa weyi ɛnɩnɩ ɛ-nɩŋgbaaŋ! 66 Ɩmaɣzɩɣ se we?» Ɛlɛ́, pocosi se: «Ɛ-tɔm sɩba, pʋwɛɛ se pakʋ-ɩ.» 67 Peeɖe papazɩ Yesu ɛsɩndaa tɔʋ ndaatʋ nɛ pamakɩ-ɩ ŋguluma nɛ lɛlaa cɛkɩ-ɩ kadanzɩ 68 nɛ pɔtɔŋ se: «Weyi ña Ɛsɔ Lɩzaa Yɔ, kpeɣ se amabɩ-ŋ?» Pɩyɛ kpɛzɩ nabudozo se ɛtasɩ Yesu (Mrk 14.66-72; Luk 22.56-62; Yoh 18.15-18, 25-27) 69 Alɩwaatʋ ndʋ́ Pɩyɛ caɣ taɣ yɔɔ yɔ, tɩ-taa cɔjɔnaa ñʋʋdʋ tʋmlaɖʋ halʋ ñɩnʋ nɔɔyʋ lɩwa nɛ ɛmaɣnɩ-ɩ nɛ eheyi-i se: «Ña ɖɔɖɔ! Ŋtɩŋaɣ Galilee tʋ Yesu wayɩ.» 70 Peeɖe ɛkpɛzɩ patɩŋa pɛ-ɛsɩndaa se: «Maasɩŋ ndʋ́ ŋcaɣ yɔɔdʋʋ yɔ.» 71 Pʋwayɩ lɛ, ɛlɩɩ ewolo nɔnɔɔ taa. Ɛlɛ́, tʋmlaɖʋ halʋ ñɩnʋ lɛlʋ tasɩ-ɩ naʋ nɛ eheyi mbá pɛwɛ peeɖe yɔ se: «Ɛnɛ ɖɔɖɔ ɛtɩŋaɣ Nazarɛɛtɩ tʋ Yesu wayɩ.» 72 Ɛlɛ́, Pɩyɛ tasɩ kpɛzʋʋ nɛ eɖuu se: «Mantasɩ abalʋ ɛnʋ.» 73 Pɩkɛdaa lɛ, mbá pɛwɛ peeɖe yɔ, potuzi pa-tɩ nɛ pɔñɔtɩnɩ-ɩ nɛ peheyi-i se: «Toovenim, ŋkɛ pa-taa lɛlʋ: ñɔ-yɔɔdaɣ wɩlɩɣnɩ ḿbʋ́.» 74 Peeɖe ɛkpɛzaa laɣ laɣ nɛ eɖuu se: «Nɛ Ɛsɔ! Mantasɩ abalʋ ɛnʋ!» Kpaagbaa ḿbʋ́ lɛ, kalɩmɔʋ koo. 75 Ɛlɛ́, Pɩyɛ tɔzɩ tɔm ndʋ́ Yesu keheyi-i se: «Pʋcɔ kalɩmɔʋ koo lɛ, ŋkpɛzɩɣ tam naadozo se ŋtasɩm-m» yɔ tɩ-yɔɔ. Peeɖe ɛkʋyaa ɛlɩɩ nɛ ewili ɛzɩ pɛcɛbɩ e-liu tɛɛ yɔ. |