Maatiyee 25 - New Testament

Pɛlaa hiu eduuye

¹ Yesu tasɩ ɛ-tɔmkpɛlɩkɩyaa heyuu se: «Alɩwaatʋ ńdʋ́ lɛ, ɛzʋnɔ Ɛsɔ Kewiyaɣ kɔŋ wɛʋ: pɛlaa nabɛyɛ wɛnɩ ḿbʋ́, pɛwɛ hiu. Halɩkpaɣyɛ naɖɩyɛ wiye lɛ, pakpaɣ kanɖʋnaa nɛ powolo paɖaŋ halɩkpaɣyʋ.

² Pa-taa lɛ, pɛlaa kagbaanzɩ kɛ kɩmɛlɛmɩŋ nɛ kagbaanzɩ ñɛkɛ lɔŋsɩnɖaa.

³ Kɩmɛlɛmɩŋ ɩnʋ, ɩkpaɣ ɩ-kanɖʋnaa lɛ, ɩtɛcɛ kaɖɩsɩm se pɩtɛm ɩ-kanɖʋnaa taa lɛ, ɩɩɖʋ.

⁴ Piyele lɔŋsɩnɖaa ñakpaɣ pa-kanɖʋnaa nɛ pɛkpɛndɩnɩ kaɖɩsɩm nɛ powolo.

⁵ Ŋgʋ́, halɩkpaɣyʋ tɔkɔɔ lɔŋ nɛ pɛlaa ḿbá patɩŋa payɩ peliisi nɛ poɖoo.

⁶ «Pʋkɔma ɛzɩ ɖoó hɛkʋ lɛ, panɩɩ kubuka nakɛyɛ se: ‹Ɩɩnaɣ pɛlɛ walʋ! Ɩkʋyɩ nɛ ɩkatɩ-ɩ!›

⁷ Peeɖe pɛlaa ḿbá pakʋyɩ patɩŋa se pɔñɔɔzʋʋ pa-kanɖʋnaa

⁸ nɛ kɩmɛlɛmɩŋ ɩnʋ, ɩpɔzʋʋ lɔŋsɩnɖaa se: ‹Ɩha-ɖʋ mɩ-kaɖɩsɩm pazɩ nɛ ɖɩɖʋ ɖa-kanɖʋnaa taa: pacaɣ ɖem.›

⁹ Paba ñocosi-wɛ se: ‹Aayɩ! Đa-kaɖɩsɩm makɩnɩ-ɖʋ, pɩɩkazɩɣ se ɖɩha-mɩ. Iwolo pɛdɩyaa cɔlɔ nɛ ɩcɛ.›

¹⁰ Pɛɖɛ cɛbʋ lɛ, pɛlɛ walʋ talɩ. Peeɖe ɛ nɛ mbá pɔñɔɔzɩ pa-tɩ nɛ paɖaŋ-ɩ yɔ, pasʋ halɩkpaɣyɛ kuduyuu tɛɛ nɛ paɖɩɣ pakaɖɩ.

¹¹ Pɩkɛdaa lɛ, kɩmɛlɛmɩŋ ɩnʋ ɩtalaa nɛ ɩmakɩ kubusi se: ‹Kɩpaɣlʋ! Kɩpaɣlʋ! Tʋlɩ-ɖʋ!›

¹² Peeɖe pɛlɛ walʋ cosi-wɛ se: ‹Toovenim lɛ, meheyiɣ-mɩ se mantasɩm-mɩ ɖoli.› »

¹³ Ɛlɛ́, Yesu tasɩ-wɛ heyuu se: «Pʋ-yɔɔ lɛ, ɩcaɣnɩ mɩ-ɛsɛ nɛ ɩɖaŋ kpam, mbʋ́ pʋyɔɔ yɔ, ɩtatɩlɩ kɩyakʋ ŋgʋ́ yaa ñɩ́ɣ́yʋ́ʋ ŋgʋ́ kʋ-yɔɔ mɔnkɔŋ yɔ.»

Tʋmlaɖaa naadozo eduuye

¹⁴ Yesu tasɩ ɛ-tɔmkpɛlɩkɩyaa heyuu se: «Ɛzʋnɔ Ɛsɔ Kewiyaɣ kɔŋ wɛʋ ɖɔɖɔ: abalʋ nɔɔyʋ wɛnɩ ḿbʋ́ nɛ ɛɖʋ se ewoki nʋmɔʋ. Ɛɖɛɣaɣ lɛ, ɛ́yáa ɛ-tʋmlaɖaa nɛ ɛtayɩ-wɛ ɛ-ñɩm.

¹⁵ Ɛcɛlɩ kajalaɣ tʋ sika pɔɔyɩsɩ kapʋsɩ kagbaanzɩ nɛ naalɛ tʋ kapʋsɩ naalɛ nɛ tozo tʋ kʋɖʋmaɣ. Ɛcɛlɩ-wɛ ḿbʋ́ nɛ ɛmaɣzɩnɩ paa weyi e-ɖoŋ nɛ piyele ɛcaŋ ɛɖɛɛ.

¹⁶ Ɛɖɛwa lɛ, tʋmlaɖʋ weyi ɛmʋ kapʋsɩ kagbaanzɩ yɔ, ɛtɩwobu nɛ ɛlabɩnɩ-sɩ tadɩyɛ nɛ pɩsɛɛ-ɩ kapʋsɩ kagbaanzɩ ɖɔɖɔ.

¹⁷ Weyi ɛ́lɛ́ ñamʋ kapʋsɩ naalɛ yɔ, ɛ́lɛ́ la ɖɔɖɔ ḿbʋ́ nɛ pɩsɛɛ-ɩ kapʋsɩ naalɛ ɖɔɖɔ.

¹⁸ Weyi ɛ́lɛ́ ñamʋ ɛ-caa sika pɔɔyɩsɩ kapʋwa kʋɖʋmaɣ yɔ, ewolo ehuyi pɔʋ nɛ epim-kɛ.

¹⁹ «Pileɖaa lɛ, abalʋ ɛnʋ ɛpɩsɩ ɛkɔɔ nɛ ɛ́yáa ɛ-tʋmlaɖaa ḿbá se powolo peheyi-i mbʋ́ palabɩnɩ sika pɔɔyɩsɩ kapʋsɩ nzɩ́ ɛɛcɛlɩ-wɛ yɔ.

²⁰ Pʋ-yɔɔ tʋmlaɖʋ weyi ɛmʋ sika pɔɔyɩsɩ kapʋsɩ kagbaanzɩ yɔ, ewobi ɛ-caa ɛnʋ ɛ-cɔlɔ nɛ ɛwɩlɩ-ɩ kapʋsɩ kagbaanzɩ lɛɛsɩ nɛ eheyi-i se: ‹Kɩpaɣlʋ! Ŋŋcɛlɩ-m sika pɔɔyɩsɩ kapʋsɩ kagbaanzɩ. Na! Pɩsɛ-m kagbaanzɩ ɖɔɖɔ.›

²¹ Peeɖe ɛ-caa yɩɣyɩ-ɩ nɛ eheyi-i se: ‹Pʋwɛ ɖeu. Ŋkɛ tʋmlaɖʋ kɩbanʋ. Mɛncɛlɩ-ŋ mbʋ́ pʋwɛɛ ñɩɩɩ yɔ nɛ ŋɖɔkɩ-pʋ camɩyɛ nɛ ŋlabɩnɩ-pʋ mbʋ́ pʋpɔzʋʋ yɔ. Pʋ-yɔɔ lɛ, meyekini-ŋ mbʋ́ pʋɖɔwa pɩtɩɩfɛyɩ yɔ. Kɔɔ nɛ ma nɛ ŋ ɖɩwɛɛ laŋhʋlʋmɩyɛ taa.›

²² Weyi ɛ́lɛ́ ñaamʋ kapʋsɩ naalɛ yɔ, ewolo ɖɔɖɔ ɛ-cɔlɔ nɛ eheyi-i se: ‹Kɩpaɣlʋ! Ŋŋcɛlɩ-m sika pɔɔyɩsɩ kapʋsɩ naalɛ. Na! Pɩsɛ-m ɖɔɖɔ naalɛ.›

²³ Peeɖe ɛ-caa yɩɣyɩ-ɩ nɛ eheyi-i se: ‹Pʋwɛ ɖeu. Ŋkɛ tʋmlaɖʋ kɩbanʋ. Mɛncɛlɩ-ŋ mbʋ́ pʋwɛɛ ñɩɩɩ yɔ nɛ ŋɖɔkɩ-pʋ camɩyɛ nɛ ŋlabɩnɩ-pʋ mbʋ́ pʋpɔzʋʋ yɔ. Pʋ-yɔɔ lɛ, mɛncɛlɩɣ-ŋ mbʋ́ pʋɖɔwa yɔ. Kɔɔ nɛ ma nɛ ŋ ɖɩwɛɛ laŋhʋlʋmɩyɛ taa.›

²⁴ Pɩɖɩɣnɩ weyi ɛ́lɛ́ mʋ kʋɖʋmaɣ yɔ lɛ, ewolo ɛ-cɔlɔ nɛ eheyi-i se: ‹Kɩpaɣlʋ! Manawa se ñɔ-tɔm wɛ kaɖɛ pɩtɩɩfɛyɩ. Đenɖe ŋtoɖuu yaa ŋtamɩzɩ yɔ, peeɖe ŋkʋŋ.

²⁵ Pʋ-yɔɔ sɔɔndʋ kpa-m nɛ mowoni ñe-sika pɔɔyɩsɩ kapʋwa ŋgá ŋcɛlɩ-m yɔ nɛ mɛmɛsɩ tɛtɛɛ. Ŋ́gá yɔ, mʋ!›

²⁶ Peeɖe ɛ-caa cosi-i se: ‹Tʋmlaɖʋ ɛzaɣ́ʋ, fendu tʋ ña! Ŋsɩm ḿbʋ́ se ɖenɖe montoɖúú yaa mantamɩzɩ yɔ, peeɖe mankʋŋ nɛ ɖenɖe mantamɩzɩ yɔ, peeɖe monkuu.

²⁷ Yee ḿbʋ́, pɩɩwɛɛ se ŋwoni men-sika pɔɔyɩsɩ kapʋwa nɛ ŋɖʋ liidiye koozaɣ taa. Yee ŋŋlabɩ ḿbʋ́ yɔ, mɔnkɔm ɛzʋnɔ yɔ, maawobi mamʋ-kɛ nɛ kɛ-kɛzɛɣa.›

²⁸ Peeɖe eheyi tʋmlaɖaa lɛlaa se: ‹Ɩmʋ kapʋwa ŋ́gá lɔŋ e-nesi taa nɛ ɩsɔzɩ weyi ɛwɛnɩ kapʋsɩ hiu yɔ.

²⁹ Mbʋ́ pʋyɔɔ yɔ, weyi ɛwɛna pʋɖɔɔ yɔ, pɔsɔzʋʋ-ɩ nɛ puhuuni-i. Ɛlɛ́, weyi ɛ́lɛ́ fɛyɩnɩ pʋyʋ yɔ, halɩ pɛtɛzɩɣ lɛɣʋ mbʋ́ ɛmaɣzɩɣ se ɛwɛna yɔ.

³⁰ Piyele tʋmlaɖʋ wazaɣ fɛyɩ tʋ ɛnɛ lɛ, ɩkpaɣ-ɩ nɛ ɩlɔ-ɩ awayɩ cɩkpɛndʋʋ taa. Peeɖe ewiliɣ nɛ ɛsalɩ e-kela.› »

Ɛyʋ Pɩyalʋ kaɣ kɔm nɛ ɛhʋʋ ɛyáa tɔm ɛjaɖɛ yɔɔ

³¹ Yesu tasɩ-wɛ heyuu se: «Puwiye nɖɩ́ Ɛyʋ Pɩyalʋ nɛ Ɛsɔ tiyiyaa tɩŋa pɛkpɛndɩɣnɩ e-koboyaɣ nɛ pɔkɔɔ yɔ, ɛcakɩ e-kewiyaɣ kpelaɣ yɔɔ.

³² Pɔkɔŋ ajɛya kpeekpe taa ɛyáa kpeɣluu ɛ-ɛsɩndaa nɛ ɛkɛzɩ lɛlaa hɔɔlʋʋ nɛ piyele lɛlaa hɔɔlʋʋ lɛɛkʋ ɛzɩ ninɖiɣyu kpeɣluu heŋ nɛ pʋŋ nɖeke nɖeke yɔ.

³³ Ɛkɛzɩɣ lɛlaa ɛ-nɩwaŋ yɔɔ nɛ piyele lɛlaa ɛ-nɩmɩyɛ yɔɔ.

³⁴ Peeɖe eheyiɣ ɛ-nɩwaŋ yɔɔ ñɩma se: ‹Mbá mɩ man-Caa Ɛsɔ wazɩ mɩ-yɔɔ yɔ, ɩkɔɔ ɩtɔɔ Kewiyaɣ ŋgá ɛñɔɔzɩ-mɩ ɖooo alɩwaatʋ ndʋ́ ɛlabɩ kedeŋa yɔ.

³⁵ Mbʋ́ pʋyɔɔ yɔ, ñɔɔsɩ wɩɣaɣ-m nɛ ɩha-m tɔɔnaɣ mɔntɔɔ. Lɔkɔtʋ kɛɖɛ-m, ɩha-m lɩm mɔñɔɔ. Maakɛ ɛgɔm nɛ ɩmʋ-m mɩ-tɛ.

³⁶ Mɔnɖɔŋaɣ ndaakpeɖe nɛ ɩha-m wondu monsuu. Pɩwɩɣaɣ-m nɛ ɩcɔnɩ mɔ-yɔɔ. Maawɛ salaka taa nɛ ɩkɔɔ ɩna-m peeɖe.›

³⁷ Peeɖe mbá patʋʋzaa yɔ, pocosuu-i se: ‹Kɩpaɣlʋ! Đooye ɖɩna-ŋ ñɔɔsɩ wɩɣaɣ-ŋ nɛ ɖɩha-ŋ tɔɔnaɣ yaa ɖooye lɔkɔtʋ ɖɛ-ŋ nɛ ɖɩha-ŋ lɩm?

³⁸ Đooye ɖɩmʋ-ŋ ɛgɔndʋ ɖɛ-tɛ? Đooye ɖɩna-ŋ ndaakpeɖe nɛ ɖisu-ŋ wondu?

³⁹ Đooye ɖɩna pɩwɩɣaɣ-ŋ yaa ŋwɛ salaka taa nɛ ɖɩkɔɔ ɖɩna-ŋ?›

⁴⁰ Wiyaʋ kaɣ-wɛ cosuu se: ‹Toovenim lɛ, mankaɖɩɣ-mɩ se: alɩwaatʋ ndʋ́ ɩlabɩ-pʋ mɛ-ɛyáa mbá patakpaɣ-wɛ payaa pʋyʋ yɔ pa-taa nɔɔyʋ yɔ, man-tɩ tɩŋa ɩlaba.›

⁴¹ «Ɛkaɣ heyuu ɖɔɖɔ ɛ-nɩmɩyɛ yɔɔ ñɩma se: ‹Ɩkʋyɩ mɔn-cɔlɔ cɩnɛ nɛ ɩɖɛɛ poliŋ, Ɛsɔ wɩlɩ-mɩ kpalʋʋ! Iwolo miŋ weyi eeɖeŋ kaʋ yɔ ɛ-taa. Peeɖe Ɛsɔ ñɔɔzaa nɛ ɛɖaŋnɩ Satanɩ nɛ e-tiyiyaa!

⁴² Mbʋ́ pʋyɔɔ yɔ, ñɔɔsɩ wɩɣaɣ-m, ɩtaha-m tɔɔnaɣ se mɔntɔɔ. Lɔkɔtʋ ɖɛ-m, ɩtaha-m lɩm se mɔñɔɔ.

⁴³ Mɔnkɔm ɛgɔndʋ, ɩtamʋ-m mɩ-tɛ. Maawɛ ndaakpeɖe, ɩtaha-m wondu se monsuu, pɩwɩɣaɣ-m, ɩtɔcɔnɩ mɔ-yɔɔ. Maawɛ salaka taa, ɩtɔkɔɔ se ɩna-m.›

⁴⁴ Ɛlɛ́, pakaɣ-ɩ cosuu se: ‹Kɩpaɣlʋ! Đooye ɖɩna-ŋ ñɔɔsɩ wɩɣaɣ-ŋ yaa lɔkɔtʋ ɖɛ-ŋ yaa ŋkɔm ɛgɔndʋ yaa ŋɖɔŋaɣ ndaakpeɖe yaa pɩwɩɣaɣ-ŋ yaa ŋwɛ salaka taa nɛ ɖɩtasɩnɩ-ŋ?›

⁴⁵ Wiyaʋ kaɣ-wɛ cosuu se: ‹Toovenim lɛ, mankaɖɩɣ-mɩ se: yee ɩtalabɩ-pʋ mɛ-ɛyáa mbá patakpaɣ-wɛ payaa pʋyʋ yɔ, pa-taa nɔɔyʋ yɔ, ma ɖɔɖɔ ɩtalabɩ-pʋ.›

⁴⁶ Powokini-wɛ ɖenɖe kʋñɔŋ maatɛŋ wɛɛ yɔ nɛ piyele mbá patʋʋzaa yɔ, paba ñowolo ɖenɖe wezuu maatɛŋ wɛɛ yɔ.»