Maatiyee 14 - New TestamentLɩm Sɔʋ Sɔnzɩ Laɖʋ Yohanɛɛsɩ sɩm tɔm (Mrk 6.14-29; Luk 9.7-9) 1 Alɩwaatʋ ńdʋ́ lɛ, wiyaʋ Eroodi cɔŋaɣnɩ Galilee egeetiye yɔɔ. Pɩkɛdaa lɛ, ɛnɩɩ Yesu taŋ. 2 Peeɖe eheyi ɛ-tʋmlaɖaa se: «Lɩm Sɔʋ Sɔnzɩ Laɖʋ Yohanɛɛsɩ weyi ɛɛsɩba yɔ, ɛ-tɔm pɔyɔɔdʋʋ, ɛnʋ femna. Ḿbʋ́ yebina nɛ ɛwɛnɩ Ɛsɔ ɖoŋ nɛ ɛlakɩ hama lakasɩ ḿbʋ́.» 3-4 Lɩm Sɔʋ Sɔnzɩ Laɖʋ Yohanɛɛsɩ sɩm tɔm yɔ. Eroodi kɛlɛɣ e-neu Filiipu halʋ Eroodiyaadɩ. Peeɖe Yohanɛɛsɩ heyi Eroodi se: «Pɩtaha nʋmɔʋ se ŋkpaɣ ñe-neu halʋ.» Pʋyɔɔ eyeba nɛ pakpa Yohanɛɛsɩ, pɔhɔkɩ-ɩ nɛ paɖʋ-ɩ salaka. 5 Eroodi ñɩnaɣ se ɛkʋ Yohanɛɛsɩ. Ɛlɛ́, eseɣaɣ ɛyáa, mbʋ́ pʋyɔɔ yɔ, pɔcɔŋaɣnɩ ɛ́lɛ́ se ɛkɛ náyʋ. 6 Nakʋyʋ wiye pɔtɔkaɣ Eroodi lʋlʋʋ kazandʋ. Pɩkɛdaa lɛ, Eroodiyaadɩ pɛlɛ paa ɛyáa hɛkʋ taa nɛ pɩla Eroodi leleŋ pɩtɩɩfɛyɩ 7 nɛ eɖuu ɛyáa tɩŋa ɛsɩndaa se yee ɛ́lɛ́ ɛpɔzɩ-ɩ paa ɛbɛ yɔ, ɛcɛlɩɣ-ɩ. 8 Peeɖe e-ɖoo tasɩ-ɩ tɔm se ɛyɔɔdɩ. Pʋ-yɔɔ eheyi Eroodi se: «Đʋ Lɩm Sɔʋ Sɔnzɩ Laɖʋ Yohanɛɛsɩ ñʋʋ ñanaɣ taa nɛ ŋcɛlɩ-m.» 9 Eroodi nɩ ḿbʋ́ lɛ, ɛ-laŋɩyɛ wɛɛkɩ. Ŋgʋ́, ɛtɛm ɖuúu ɛyáa hɛkʋ taa se paa pɛlɛ ɛnʋ ɛpɔzɩ-ɩ ɛbɛ yɔ, ɛcɛlɩɣ-ɩ. Pʋ-yɔɔ ɛha nɔɔ se 10 powolo salaka taa nɛ pɛsɛtɩ Yohanɛɛsɩ ñʋʋ. 11 Pɛsɛtɩ-kʋ lɛ, paɖʋ ñanaɣ taa nɛ pɛcɛlɩ pɛlɛ nɛ ɛ́lɛ́ woni ɛcɛlɩ e-ɖoo. 12 Peeɖe Yohanɛɛsɩ tɔmkpɛlɩkɩyaa woba pakpaɣ-ɩ nɛ pepi. Pɛtɛm-ɩ pim lɛ, powolo pɛkɛdɩ Yesu mbʋ́ pɩlaba yɔ. Yesu ha tɔɔnaɣ samaɣ sɔsɔɔ nɛ kɔtɔɔ (Mrk 6.30-44; Luk 9.10-17; Yoh 6.1-14) 13 Yesu nɩ ḿbʋ́ lɛ, ewolo ɛkpa kpɩyʋʋ taa se ɛkɛsɩ ɛ-tɩ ɖenɖe ɛyáa fɛyɩ yɔ. Ɛlɛ́, ɛyáa samaɣ tɛm nɩʋ. Peeɖe palɩ tɛtʋ ndɩ ndɩ taa nɛ pɔcɔlʋʋ teŋgu nɔɔ se pakatɩ-ɩ ɖenɖe ewoki yɔ. 14 Yesu lɩ kpɩyʋʋ taa nɛ ɛna ɛyáa pɩtɩɩfɛyɩ ḿbʋ́ lɛ, pɔ-tɔm labɩ-ɩ pʋtɔdɩyɛ nɛ ɛla nɛ kʋdɔndɩnaa mbá powonaa yɔ, pɔ-yɔɔ cɛ. 15 Đanaɣ ɖanaa lɛ, Yesu tɔmkpɛlɩkɩyaa wolo ɛ-cɔlɔ nɛ peheyi-i se: «Lɛɛlɛɛyɔ, wɩsɩ kpema. Ŋgʋ́, ñɩtʋ hɛkʋ taa ɖɩwɛɛ. Heyi ɛyáa samaɣ ŋgá kɛwɛ cɩnɛ yɔ se kowolo tɛtʋ cikpetu taa nɛ kaya tɔɔnaɣ nɛ kɔtɔɔ.» 16 Peeɖe ecosi-wɛ se: «Pɩtɔpɔzɩ se pɛɖɛɛ. Ɩha-wɛ tɔɔnaɣ mɩ-maɣmaɣ nɛ pɔtɔɔ.» 17 Ɛlɛ́, peheyi-i se tindine hɔɔlasɩ kagbaanzɩ nɛ kpakpasɩ naalɛ ɖeke wɛnɩ pɔ-cɔlɔ. 18 Ɛlɛ́, Yesu cosi-wɛ se: «Ɩkɔnɩ-m kpakpasɩ ńzɩ́ nɛ tindine hɔɔlasɩ ńzɩ́.» 19 Powonaa lɛ, eheyi ɛyáa tɩŋa payɩ se pacaɣ ñɩtʋ yɔɔ. Peeɖe ɛkpaɣ tindine hɔɔlasɩ kagbaanzɩ ńzɩ́ nɛ kpakpasɩ ńzɩ́ sɩ-naalɛ nɛ ɛkpazɩ ɛ-ɛsɛ ɛsɔdaa nɛ ɛsɛɛ pʋ-yɔɔ Ɛsɔ nɛ ɛcɛdɛlɩ nɛ ɛcɛlɩ ɛ-tɔmkpɛlɩkɩyaa nɛ patayɩ ɛyáa tɩŋa payɩ 20 nɛ pɔtɔɔ pahaɣ. Ɛ-tɔmkpɛlɩkɩyaa kpeɣli hɔɔlasɩ nzɩ́ sɩkazaa yɔ lɛ, pusu ɖɔkɩŋ hiu nɛ naalɛ. 21 Mbá pɔtɔɔ tɔɔnaɣ ŋ́gá yɔ, pa-taa abalaa ɖeke kɛkpɛndɩ ɛzɩ kutokiŋ kagbaanzɩ yɔ. Patakalɩnɩ halaa nɛ piya. Yesu ɖɔŋ lɩm yɔɔ (Mrk 6.45-52; Yoh 6.15-21) 22 Pɛtɛm tɔɔʋ lɛ, Yesu heyi ɛ-tɔmkpɛlɩkɩyaa se: «Ɩsʋʋ kpɩyʋʋ taa nɛ ɩɖɛ-m nɔɔ nɛ ɩtɛzɩ kidiiliŋ lɛɛkʋ yɔɔ nɛ meheyi ɛyáa samaɣ se kekpe nɛ mɔnkɔɔ.» 23 Ɛyáa kpem patɩŋa lɛ, ɛkʋyɩ ɛkpa pʋʋ yɔɔ se ɛsɛɣ Ɛsɔ. Ɛɛwɛɛ peeɖe ḿbʋ́ e-ɖeke nɛ ɖoó yu-i. 24 Alɩwaatʋ ńdʋ́ tɩ-taa lɛ, kpɩyʋʋ ŋ́gʋ́ kɩtɛm talʋʋ poliŋ nɛ lɩm cɔzʋʋ-kʋ, mbʋ́ pʋyɔɔ yɔ, heɣlim makaɣ tuluŋa. 25 Pʋkɔma ɛzɩ kalɩmaŋ kou yɔ lɛ, Yesu kʋyɩ se ewoki ɛ-tɔmkpɛlɩkɩyaa cɔlɔ, ɛlɛ́, lɩm yɔɔ ɛɖɔŋaɣ. 26 Pana-ɩ ḿbʋ́ lɛ, pɩɖɩɣzɩ-wɛ yem ɖɩɣ ɖɩɣ nɛ peheyiɣ ɖama se ñazɩñazʋʋ nakʋyʋ! Peeɖe sɔɔndʋ kpa-wɛ siŋŋ nɛ pamakɩ kubusi. 27 Kpaagbaa ḿbʋ́ lɛ, eheyi-wɛ se: «Ɩɖɔkɩ mɩ-tɩ kpam, sɔɔndʋ ɛtaakpa-mɩ, ma.» 28 Peeɖe Pɩyɛ cosi-i se: «Kɩpaɣlʋ! Yee pɩkɛ ña toovenim yɔ, ŋyele nɛ mɔnɖɔ lɩm yɔɔ nɛ mankatɩ-ŋ.» 29 Ɛlɛ́, Yesu heyi-i se: «Kɔɔ!» Peeɖe Pɩyɛ lɩwa nɛ ɛɖɔŋ lɩm yɔɔ se ɛkatɩ-ɩ. 30 Ɛɖɔŋaɣ ḿbʋ́ lɛ, ɛna se heɣlim sɔsɔm makɩ nɛ sɔɔndʋ kpa-ɩ nɛ pɩcaɣ se pʋsʋzɩ-ɩ lɩm tɛɛ. Pʋ-yɔɔ ɛmabɩ kubuka se: «Kɩpaɣlʋ! Ya ma-ñʋʋ!» 31 Peeɖe Yesu tisezaa ɛkpa e-nesi taa nɛ ɛpɔzɩ-ɩ se: «Lidaʋ ñɩɩɩ tʋ ña! Pɩlabɩ ɛzɩma nɛ ŋpʋtʋʋ ña-taa ḿbʋ́?» 32 Peeɖe pakpa kpɩyʋʋ taa pa-naalɛ nɛ heɣlim yele mabʋ 33 nɛ Yesu tɔmkpɛlɩkɩyaa mbá paawɛ kɩ-taa yɔ, powolo poluŋ ɛ-tɛɛ nɛ pɔtɔŋ se: «Toovenim lɛ, ña lɛ Ɛsɔ Pɩyalʋ!» Yesu laba nɛ kʋdɔndɩnaa yɔɔ cɛ Jeneezaarɛɛtɩ egeetiye taa (Mrk 6.53-56) 34 Pɛtɛzɩ teŋgu nɛ patalɩ Jeneezaarɛɛtɩ ɛjaɖɛ taa lɛ, 35 ɖɩ-taa ñɩma sɩm-ɩ nɛ petiyi ɛyáa paa le nɛ peheyi se ewobi hɔɔlʋʋ ŋ́gʋ́ kɩ-taa. Peeɖe pakpaɣ kʋdɔndɩnaa tɩŋa nɛ powoni-wɛ ɛ-cɔlɔ 36 nɛ petendiɣ-i se eyele nɛ potukuni e-toko ndomiye maɣmaɣ. Mbá patɩŋa payɩ potukaɣnɩ-ɩ yɔ, pɔ-yɔɔ cɛkaɣ. |