Maatiyee 11 - New Testament

¹ Yesu tɛm ɛ-tɔmkpɛlɩkɩyaa hiu nɛ naalɛ kɛdʋʋ mbʋ́ etiyiɣ-wɛ se pala yɔ lɛ, ɛɖɛɛ nɛ ɛcɔʋ tɛtʋ ndɩ ndɩ ndʋ́ tɩwɛ egeetiye ńɖɩ́ ɖɩ-taa yɔ tɩ-taa nɛ ɛwɩlɩɣ nɛ esusuu ɛyáa Ɛsɔtɔm.

Lɩm Sɔʋ Sɔnzɩ Laɖʋ Yohanɛɛsɩ tɔm pɔzʋʋ

² Alɩwaatʋ ńdʋ́ lɛ, Lɩm Sɔʋ Sɔnzɩ Laɖʋ Yohanɛɛsɩ kɛwɛ salaka taa. Peeɖe ɛnɩ tʋmɩyɛ nɖɩ́ Krɩstʋ lakaɣ yɔ ɖɩ-taŋ nɛ ɛkʋsɩ ɛ-tɔmkpɛlɩkɩyaa taa lɛlaa nɛ etiyi-wɛ se powolo

³ pɔpɔzɩ-ɩ nɛ pana se ɛnʋ lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ?

⁴ Peeɖe Yesu cosi-wɛ se: «Iwolo iheyi-i mbʋ́ ɩnawa nɛ ndʋ́ ɩnɩwa yɔ:

⁵ yʋlʋmaa naɣ, tala tɩnaa ɖɔŋ camɩyɛ, canasɩ yɔɔ cɛkɩ, ndamaa nɩɣ, sɩɖaa feŋ nɛ posusuu kʋñɔndɩnaa Laŋhɛzɩyɛ Tɔm.

⁶ Weyi eelesiɣ e-lidaʋ mɔ-yɔɔ yɔ, ehiɣ ɛ-tɩ!»

Yesu yɔɔdʋʋ Lɩm Sɔʋ Sɔnzɩ Laɖʋ Yohanɛɛsɩ tɔm

⁷ Eheyi Yohanɛɛsɩ tɔmkpɛlɩkɩyaa ḿbʋ́ lɛ, pacaŋ pɛɖɛɛ. Peeɖe ɛpazɩ ɛyáa samaɣ kɛdʋʋ Yohanɛɛsɩ ɛnʋ ɛ-tɔm nɛ ɛpɔzɩ-wɛ se: «Ɛbɛ iwobi naʋ lakʋ taa? Kañɩŋ́gbayaɣ́ ŋgá heɣlim ciɣdaɣ yɔ yaa we?

⁸ Ɛlɛ́, ɛbɛ iwobi naʋ kpem? Nɔɔyʋ suni ñɩɣlɩ́m wondu nɛ ɛwɛɛ peeɖe naa wɛ? Ŋgʋ́, mbá posuu ñɩɣlɩ́m wondu yɔ, pɛwɛɣ awiya ɖɩsɩ taa.

⁹ Ɛbɛ kpem iiwobi naʋ? Náyʋ nɔɔyʋ yaa we? Toovenim lɛ, meheyiɣ-mɩ se ɩna weyi yɔ, ɛkɩlɩ náyʋ.

¹⁰ Mbʋ́ pʋyɔɔ yɔ, Yohanɛɛsɩ tɔm Ɛsɔ yɔɔdaa nɛ pama Ɛsɔtɔm Takayaɣ taa se: ‹Na, mancalɩɣ men-tiyiyu tiyuu nɛ ɛñɔɔzɩ ña-nʋmɔʋ.› »

¹¹ Yesu tasɩ yɔɔdʋʋ se: «Toovenim lɛ, mankaɖɩɣ-mɩ se ɖooo yɔ, patalʋlɩdɩ nɔɔyʋ nɛ ɛkɩlɩ Lɩm Sɔʋ Sɔnzɩ Laɖʋ Yohanɛɛsɩ. Paa ḿbʋ́ yɔ, weyi ɛwɛ Ɛsɔ Kewiyaɣ taa nɛ patakpaɣ-ɩ payaa pʋyʋ yɔ, ɛ́lɛ́ kɩlɩ-ɩ.

¹² Pɩkpaɣʋnɩ alɩwaatʋ ndʋ́ Yohanɛɛsɩ ɛnʋ esusi tɔm nɛ pʋkɔɔ pɩsɩɩnɩ lɛɛlɛɛyɔ yɔ, ɛyáa wɛɛ pɛtɛzɩɣ kʋyʋʋ Ɛsɔ Kewiyaɣ yɔɔ nɛ pañɩnɩɣnɩ ɖoŋ se pehiɣ-kɛ.

¹³ Náyaa tɩŋa nɛ Mooyiizi pɔyɔɔdɩ Ɛsɔ Kewiyaɣ ŋ́gá kɔ-tɔm nɛ pʋkɔɔ pɩsɩɩnɩ alɩwaatʋ ndʋ́ Yohanɛɛsɩ ɛnʋ ɛkɔma yɔ.

¹⁴ Yee mi-liu ɛwɛɛ se itisiɣ mɔn-tɔm yɔ, Yohanɛɛsɩ ɛnʋ lɛ Elii weyi paayɔɔdaa se ɛkɔŋ yɔ.

¹⁵ Weyi ɛwɛnɩ nɩŋgbaaŋ lɛ, ɛnɩɩ!

¹⁶ «Ɛbɛ mɛnkɛdɩɣnɩ lɛɛlɛɛyɔ ɛyáa panɛ lee? Pɛwɛ ɛzɩ piya nzɩ́ sɩcaɣ mʋzʋʋ taa ɛyáa samaɣ ɖikpeɣliye nɛ sikou ɖama yɔɔ se:

¹⁷ ‹Đɩhʋlɩ-mɩ hɩsɩ se ɩpaa nɛ ikizi. Đitee kʋñɔŋ hendu nɛ itewii.›

¹⁸ Toovenim lɛ, Yohanɛɛsɩ kɔma, ɛɛtɔkɩ tɔɔnaɣ, ɛɛñɔʋ sʋlʋm. Ɛlɛ́, ɩtɔŋ se ekem aleewaa.

¹⁹ Ɛyʋ Pɩyalʋ ñɔkɔma nɛ ɛtɔkɩ nɛ ɛñɔʋ lɛ, ɩɖaɣnɩɣ yɔɔdʋʋ se: ‹Ɩnaɣʋ ɛyʋ ɛnɛ yɔ, tɔkɩyɛ nɛ ñɔtʋ pɔ-yɔɔ ɖeke ɛmaɣzɩɣ. Ɛkɛ ɖɔɖɔ tikee mʋyaa nɛ kɩwɛɛkɩm laɖaa lɛlaa pa-taabalʋ.› Ɛlɛ́, pasɩŋ Ɛsɔ lɔŋsɩnɖɛ nɛ ɛ-lakasɩ kɩbanzɩ.»

Tɛtʋ ndʋ́ tɩ-taa ñɩma kizi Yesu tɔm yɔ 11:19:

²⁰ Pʋwayɩ lɛ, Yesu pazɩ kalʋʋ tɛtʋ ndɩ ndɩ ndʋ́ tɩ-taa ɛɛkɩlɩ labʋ hama lakasɩ yɔ tɩ-taa ñɩma. Mbʋ́ pʋyɔɔ yɔ, pɛtɛlɛɣzɩ wɛtʋ, ɛkalɩ-wɛ se:

²¹ «Koraazɛɛ nɛ Bɛtsayɩda ñɩma mɩ! Pʋtɔɔ-mɩ! Mbʋ́ pʋyɔɔ yɔ, palabɩ Ɛsɔ hama lakasɩ nzɩ́ mɩ-hɛkʋ taa yɔ, yee paalabɩ-sɩ Tiiri nɛ Sidɔɔ ñɩma pɔ-cɔlɔ yɔ, paatɛm caɣʋ tɔlɩma taa nɛ posuu kutokiŋ nɛ pɩwɩlɩ se pɛlɛɣzɩ wɛtʋ.

²² Pʋ-yɔɔ mankaɖɩɣ-mɩ se Tiiri nɛ Sidɔɔ pɛ-tɛtʋ taa ñɩma kʋñɔŋ ɛɛtalɩɣ mɩ-ñɩŋgʋ kɩyakʋ ŋgʋ́ Ɛsɔ hʋʋnɩ ɛyáa yɔ.

²³ Mɩ Kapɛrnayum ñɩma lɛ, ɩmaɣzɩɣ se ɩkpaɣ ɛsɔdaa yaa we? Meheyiɣ-mɩ se ɩɩkpaɣ kaʋ. Ɛlɛ́, itiki tɛtɛɛ ɖenɖe kʋñɔŋ maatɛŋ wɛɛ yɔ. Mbʋ́ pʋyɔɔ yɔ, yee Ɛsɔ hama lakasɩ nzɩ́ palabɩ mɩ-tɛ yɔ, paalabɩ-sɩ Sodom yɔ, tɛtʋ ńdʋ́ tɩɩwɛ halɩ nɛ sɔnɔ.

²⁴ Ḿbʋ́ mankaɖɩɣ-mɩ se kɩyakʋ ŋgʋ́ Ɛsɔ hʋʋnɩ ɛyáa tɔm yɔ, Sodom ñɩma kʋñɔŋ ɛɛtalɩɣ mɩ-ñɩŋgʋ.»

Yesu lɩzɩ ɛ-caa nɛ ɛwɩlɩ piya ajamaa

²⁵ Alɩwaatʋ ńdʋ́ tɩ-taa Yesu tɔm se: «Man-Caa! Ɛsɔdaa nɛ tataa Kɩpaɣlʋ! Mansaŋ-ŋ. Mbʋ́ pʋyɔɔ yɔ, ŋkuli tɔm ndʋ́ ŋmɛsɩ lɔŋsɩnɖaa nɛ lɛɣsɩnɖaa yɔ tɩ-yɔɔ nɛ piya ajamaa nɩɩ tɩ-tɔbʋʋ.

²⁶ Man-Caa! Ñɔsɔɔlɩna se pɩla ḿbʋ́ nɛ pɩla ɖɔɖɔ.»

²⁷ Pʋwayɩ lɛ, Yesu heyi ɛyáa se: «Pɩtɩŋa payɩ lɛ, man-Caa cɛlɩnɩ-m. Nɔɔyʋ tasɩ mbʋ́ mɛnkɛnaa yɔ nɛ pɩtasɩnɩ man-Caa. Đɔɖɔ lɛ, nɔɔyʋ tasɩm-ɩ nɛ pɩtasɩnɩ ɛ-Pɩyalʋ ma nɛ mbá mɔnsɔɔlaa nɛ mawɩlɩ-ɩ-wɛ yɔ.

Ɩkɔɔ Yesu cɔlɔ nɛ ihiɣ hɛzʋʋ

²⁸ «Mbá mɩ mɩtɩŋa payɩ pasʋʋ-mɩ sʋʋtʋ nɛ pɩnɩɩ-mɩ yɔ, ɩkɔɔ mɔn-cɔlɔ nɛ mansʋʋ-mɩ nɛ ɩhɛzɩ.

²⁹ Peeɖe ɩkpakɩɣ mbʋ́ mawɩlɩɣ-mɩ yɔ se pɩkɛ mɩ-sʋʋtʋ nɛ ɩhɛzɩnɩ-pʋ. Mbʋ́ pʋyɔɔ yɔ, mɛwɛ leleŋ, mɔn-tɔm fɛyɩ kaɖɛ.

³⁰ Sʋʋtʋ ndʋ́ mansʋkɩ-mɩ yɔ, tɩ-sɩɣlʋʋ fɛyɩ kaɖɛ, tɩfɛyɩ yuŋ.»