Maatiyee 10 - New Testament

Yesu tiyiyaa hiu nɛ naalɛ tɔm

¹ Nakʋyʋ wiye Yesu kpeɣli ɛ-tɔmkpɛlɩkɩyaa hiu nɛ naalɛ nɛ ɛha-wɛ ɖoŋ se pɔɖɔɔnɩnɩ aleewaa nɛ pala nɛ ɛyáa kʋdɔmɩŋ tɩŋa nɛ pɛ-ɛjandʋ tɩŋa pɛcɛ.

² Mbá ɛlɩzaa nɛ ɛ́yáa-wɛ se e-tiyiyaa yɔ, ḿbá yɔ: kajalaɣ lɛ, Siimɔɔ weyi payaɣ ɖɔɖɔ se Pɩyɛ yɔ nɛ e-neu Andree nɛ Zebedee pɩyalaa Yakubu nɛ e-neu Yohanɛɛsɩ

³ nɛ Filiipu nɛ Bartelemii nɛ Tomaa nɛ tikee mʋyʋ Maatiyee nɛ Alfee pɩyalʋ Yakubu nɛ Taadee

⁴ nɛ Siimɔɔ weyi payaɣ se Yɔɔ Kandɩyʋ yɔ nɛ Yudaasɩ Iskarɩyɔɔtɩ weyi ekitaa ɛkpa Yesu nɛ ɛ́ɖʋzɩ koyindinaa nesi taa yɔ.

Yesu heyi e-tiyiyaa hiu nɛ naalɛ se powolo posusi laŋhɛzɩyɛ tɔm

⁵ Yesu tiyi ɛ-tɔmkpɛlɩkɩyaa hiu nɛ naalɛ ɛjaɖɛ taa. Pʋcɔ pɛɖɛɛ lɛ, ɛkam pa-ñʋŋ taa siŋŋ se: «itaawolo hɔɔlɩŋ weyi ɩ-taa mbá pɛtɛkɛ Yuda ñɩma yɔ, pɛwɛɛ yɔ. Ɩtaasʋʋ Samaarɩɩ egeetiye hɔɔlʋʋ nakʋyʋ taa ɖɔɖɔ.

⁶ Ɛlɛ́, iwolo Izrɛɛlɩ ñɩma mbá pɛwɛ ɛzɩ heŋ kilebiŋ weyi ɩfɛyɩnɩ ninɖiɣyu yɔ pɔ-cɔlɔ.

⁷ Ɩlɩ nʋmɔʋ taa lɛ, isusi ɛyáa se Ɛsɔ Kewiyaɣ wɩzɩ talʋʋ.

⁸ Ɩla nɛ kʋdɔndɩnaa yɔɔ cɛ. Ifezi sɩɖaa nɛ ɩla nɛ canasɩ pɩsɩ ɛyáa mbá pamʋnaa yɔ nɛ ɩɖɔɔnɩ aleewaa ɛyáa wayɩ. Maha-mɩ ɖoŋ falaa, pʋwɛɛ se ɩha falaa ɖɔɖɔ.

⁹ Ɩɖɛɣ lɛ, ɩtaakpaɣ liidiye naɖɩyɛ kaʋ.

¹⁰ Ɩtaakpaɣ huyuu yaa toko nakʋyʋ nɛ pɩtasɩnɩ mbá pɛwɛ mɩ-yɔɔ yɔ yaa naataŋgbala, ɩtaaɖɔkɩ ɖaʋ. Toovenim lɛ, pʋwɛɛ se pɛcɛlɩ tʋmlaɖʋ mbʋ́ ɛcakɩnɩ wezuu yɔ.

¹¹ Ɩtalɩ tɛtʋ sɔsɔtʋ yaa cikpetu natʋyʋ taa lɛ, ɩñɩnɩ weyi etisiɣ nɛ ɛmʋ-mɩ yɔ. Yee ɛmʋ-mɩ lɛ, ɩcaɣ ɛ-tɛ nɛ pʋkɔɔ pɩsɩɩnɩ kɩyakʋ ŋgʋ́ ɩkʋyʋʋ yɔ.

¹² Yee ɩsʋ ɖɩɣa lɛ, ɩsɛɛ ka-taa ñɩma se: ‹Ɩwɛɛ laŋhɛzɩyɛ taa!›

¹³ Yee pamʋ-mɩ lɛ, mɩ-laŋhɛzɩyɛ wɛɛ pɔ-cɔlɔ. Yee patamʋ-mɩ lɛ, ɖɩpɩsɩ mɩ-cɔlɔ.

¹⁴ Yee iwobi ɖɩɣa nakɛyɛ taa yaa tɛtʋ natʋyʋ taa nɛ nɔɔyʋ kizi se ɛɛmʋʋ-mɩ nɛ ewelesi mɩ-tɔm lɛ, ɩlɩɩ ɖɩɣa ŋ́gá ka-taa yaa tɛtʋ ńdʋ́ tɩ-taa nɛ ikpizi mɩ-naŋgbanzɩ yɔɔ mʋzʋʋ nɛ ɩɖɛɛ nɛ pɩwɩlɩ se ɩkɔɔlɩ-wɛ nɛ iyebi-wɛ nɛ pa-sʋʋtʋ.

¹⁵ Toovenim lɛ, meheyiɣ-mɩ se kɩyakʋ ŋgʋ́ Ɛsɔ hʋʋnɩ ɛyáa yɔ, Sodom nɛ Gomɔɔrɩ ñɩma mbá Ɛsɔ kʋ-wɛ nɛ miŋ pa-kɩwɛɛkɩm yɔɔ yɔ, pa-kʋñɔŋ ɛɛtalɩɣ tɛtʋ ńdʋ́ tɩ-taa ñɩma ñɩŋgʋ.»

Mbʋ́ pɩkaɣ talʋʋ Yesu tiyiyaa yɔ

¹⁶ Yesu tasɩ-wɛ heyuu se: «Ɩnɩɩ camɩyɛ se mentiyuu-mɩ yɔ, ɩwɛ ɛzɩ heŋ wɛɣʋ kpemtɔɔyɩsɩ hɛkʋ taa yɔ. Pʋ-yɔɔ lɛ, pʋwɛɛ se ɩwɛɛ lɔŋ ɛzɩ ɖʋmaa yɔ nɛ ɩmʋna ɛzɩ halikukunaa yɔ.

¹⁷ Ɩkpa mɩ-tɩ nɛ ɛyáa, mbʋ́ pʋyɔɔ yɔ, pɔkɔŋ-mɩ wonaʋ tɔm ɖɩhʋyɛ nɛ polu-mɩ agbazɛɛ pɛ-Ɛsɔ ɖɩsɛyɛ ndɩ ndɩ taa.

¹⁸ Pɔkɔŋ-mɩ yaʋ ajɛya ñʋndɩnaa nɛ awiya sɔsɔna pɛ-tɛ mɔ-yɔɔ se ɩkɛ aseɣɖe tɩnaa pa nɛ mbá pɛtɛkɛ Yuda ñɩma yɔ pɔ-cɔlɔ.

¹⁹ Yee pakpa-mɩ powoni tɔm ɖɩhʋyɛ lɛ, ɩtaanɩɣzɩ tɔm ndʋ́ ɩɩyɔɔdɩ yɔ yaa ɛzɩma mbʋ́ ɩɩyɔɔdɩ yɔ pʋ-yɔɔ. Yee pɩtalaa lɛ, ɩyɔɔdɩ ndʋ́ Ɛsɔ ɖʋʋ mɩ-nɔsɩ taa yɔ.

²⁰ Mbʋ́ pʋyɔɔ yɔ, pɩtɛkɛ mɩ-cɔlɔ pɩlɩɣna, ɛlɛ́, mɩ-Caa Ɛsɔ Fezuu Kiɖeɖeu ɖʋʋnɩ-tʋ mɩ-taa.»

²¹ Yesu tasɩ-wɛ heyuu se: «Alɩwaatʋ ńdʋ́ lɛ, ɛyáa kʋyʋʋ nɛ pawɩlɩ pa-ɖalaa yaa pe-newaa maɣmaɣ se pakʋ-wɛ. Caanaa ñalakɩ pe-piya ḿbʋ́ ɖɔɖɔ. Piya ńzɩ́, sɩsɩ kʋyɩ sɩ-ñɩma yɔɔ ɖɔɖɔ nɛ sɩla nɛ pakʋ-wɛ.

²² «Ɛyáa tɩŋa kɔŋ-mɩ paɖʋʋ mɔ-yɔɔ. Ɛlɛ́, weyi ɛɖɔkʋʋ ɛ-tɩ camɩyɛ nɛ pʋkɔɔ pɩtalɩ kɛtɛzaɣ kɩyakʋ wiye yɔ, Ɛsɔ yakɩ ɛ-ñʋʋ.

²³ Yee pɛwɛ mɩ-wayɩ kaŋ kaŋ tɛtʋ natʋyʋ taa lɛ, ise nɛ iwolo lɛɛtʋ taa. Toovenim lɛ, meheyiɣ-mɩ se ɩɩtɛŋ cɔʋ Izrɛɛlɩ tɛtʋ tɩŋa payɩ nɛ pʋcɔ Ɛyʋ Pɩyalʋ kɔɔ.

²⁴ «Tɔmkpɛlɩkɩyʋ nɔɔyʋ ɛɛkɩlɩɣ ɛ-wɩlɩyʋ, ɖɔɖɔ lɛ tʋmlaɖʋ nɔɔyʋ ñaakɩlɩɣ ɛ́lɛ́ caa.

²⁵ Ɛlɛ́, yee tɔmkpɛlɩkɩyʋ ɛñɩtaa ɛtalɩ ɛ-wɩlɩyʋ nɛ tʋmlaɖʋ ñatalɩ ɛ́lɛ́ caa yɔ, pɩmaɣaɣ. Petekizi weyi ma mɛnkɛ mɩ-caa yɔ yaʋ se Belzeebuuli nɛ pɩcandɩnɩ mbá mɩ ɩkɛ men-piya yɔ?»

Ɛsɔ yɔɔ lidaʋ wɛnaʋ

²⁶ Yesu tasɩ-wɛ heyuu se: «Pʋ-yɔɔ lɛ, sɔɔndʋ ɛɛtaakpa-mɩ nɛ ɛyáa. Mbʋ́ pʋyɔɔ yɔ, mbʋ́ pɩtɩŋa payɩ pʋwɛ mɛsaɣ tɛɛ yɔ, pɔkɔŋ pʋ-yɔɔ kuluu nɛ paa weyi ɛna.

²⁷ Tɔm ndʋ́ meheyiɣ-mɩ mɛsaɣ tɛɛ yɔ, isusi-tʋ ɛyáa tɩŋa nɛ ndʋ́ mɛwɛɛtɩɣ-mɩ yɔ, isusi tʋtʋ paa le nɛ paa weyi ɛnɩɩ.

²⁸ Ɩtaasɔɔndɩ mbá pakʋʋ tomnaɣ nɛ paapɩzɩɣ pakʋ kalɩzaɣ yɔ. Ɛlɛ́, ɩsɔɔndɩ Ɛsɔ, mbʋ́ pʋyɔɔ yɔ, ɛpɩzɩɣ ɛkʋ ɛyʋ nɛ ɛtɛ ɛɖʋ e-tomnaɣ nɛ ɛ-kalɩzaɣ ɖenɖe kʋñɔŋ maatɛŋ wɛɛ yɔ.

²⁹ Paapɛdɩɣ sumasɩ cɩʋcɩʋwaa naalɛ koba yaa we? Paa ḿbʋ́ yɔ, sɩ-taa nakɛyɛ ɛɛsɩkɩ yem nɛ pɩtalɩɩnɩ mɩ-Caa Ɛsɔ cɔlɔ.

³⁰ Halɩ mɩ-ñʋŋ taa ñɔsɩ wɛʋ yɔ, Ɛsɔ kalɩ sɩtɩŋa payɩ.

³¹ Pʋ-yɔɔ lɛ, ɩtaasɔɔndɩ. Ɩkɩlɩ sumasɩ cɩʋcɩʋwaa sakɩyɛ wazaɣ.»

³² Đɔɖɔ lɛ, Yesu yɔɔdaa se: «Yee nɔɔyʋ ɛkaɖɩ ɛyáa taa se mantɩnɩ-ɩ yɔ, mankaɖɩɣ man-Caa weyi ɛwɛ ɛsɔdaa yɔ ɛ-ɛsɩndaa ɖɔɖɔ se mantɩnɩ-ɩ.

³³ Ɛlɛ́, weyi ɛkpɛzɩɣ ɛyáa ɛsɩndaa se pɩtɛkɛ mantɩnɩ-ɩ yɔ, mɛnkpɛzɩɣ man-Caa weyi ɛwɛ ɛsɔdaa yɔ ɛ-ɛsɩndaa ɖɔɖɔ se pɩtɛkɛ mantɩnɩ-ɩ.»

Yesu tɔkɔnɩ laŋhɛzɩyɛ, ɛlɛ́ you ɛkɔnaa

³⁴ Ɛtasɩ-wɛ heyuu se: «Ɩtaamaɣzɩ se laŋhɛzɩyɛ mɔnkɔnɩ kedeŋa yɔɔ cɩnɛ. Ɛlɛ́, you mɔnkɔnaa.

³⁵ Mɔnkɔm se moyozi caja nɛ ɛ-pɩyalʋ, nɛ pɛlɛ nɛ e-ɖoo, nɛ wolu nɛ ɛ-waŋ,

³⁶ nɛ ɛyʋ hɔʋ taa ñɩma maɣmaɣ pɩsɩ e-koyindinaa.

Pʋwɛɛ se Yesu tiyiyaa etisi nɛ pasɩ ɛzɩ ɛnʋ yɔ

³⁷ «Weyi ɛsɔɔlʋʋ e-ɖoo yaa ɛ-caa nɛ pɩkɩlɩ-m yɔ, ɛtamʋna se ɛkɛ mɔn-tɔmkpɛlɩkɩyʋ. Weyi ɛ́lɛ́ sɔɔlʋʋ ɛ-pɩyalʋ yaa ɛ-pɛlɛ nɛ pɩkɩlɩ-m yɔ, ɛtamʋna se ɛkɛ mɔn-tɔmkpɛlɩkɩyʋ.

³⁸ Weyi etetisi nɛ ɛtɔɔ kʋñɔŋ siŋŋ ɛzɩ ma yɔ yɔ, ɛtamʋna se ɛkɛ mɔn-tɔmkpɛlɩkɩyʋ.

³⁹ Weyi ɛñɩnɩɣ se ɛcaɣ wezuu tam yɔ, ɛtɛŋnɩ-kʋ lesuu. Weyi ɛ́lɛ́ sɩkɩ mɔ-yɔɔ yɔ, ɛcakɩ wezuu tam.»

Weyi ɛmʋʋ Yesu tiyiyaa yɔ, Yesu maɣmaɣ ɛmʋwa

⁴⁰ Yesu tasɩ-wɛ heyuu se: «Weyi ɛmʋʋ-mɩ yɔ, ɛmʋʋ-m. Weyi ɛ́lɛ́ mʋ́ʋ-m yɔ, ɛmʋʋ ɖɔɖɔ weyi etiyi-m yɔ.

⁴¹ Weyi ɛmʋʋ náyʋ mbʋ́ pʋyɔɔ yɔ ɛkɛ náyʋ yɔ, Ɛsɔ kɔŋ pʋdʋ hɛyʋʋ ɛzɩ náyaa yɔ. Đɔɖɔ lɛ, weyi ɛmʋʋ kʋtʋʋzʋ se ɛlakɩ mbʋ́ pʋtʋʋzɩ Ɛsɔ ɛsɩndaa yɔ, Ɛsɔ kɔŋ-ɩ hɛyʋʋ ɛzɩ weyi ɛlakɩ mbʋ́ pʋtʋʋzaa yɔ.

⁴² Mɩ mɔn-tɔmkpɛlɩkɩyaa lɛ, patakpaɣ-mɩ payaa pʋyʋ. Ɛlɛ́, meheyiɣ-mɩ se yee nɔɔyʋ ɛha mɩ-taa nɔɔyʋ lɩkpadaɣ maɣmaɣ mɔ-yɔɔ yɔ, paa pɩɩla ɛzɩma, Ɛsɔ kɔŋ pʋdʋ hɛyʋʋ.»