Maarkɩ 8 - New TestamentYesu ha tɔɔnaɣ ɛyáa 4000 (Mat 15.32-39; Mrk 6.35-44) 1 Kɩyakɩŋ ɩnʋ ɩ-taa lɛ, ɛyáa samaɣ tasɩ kpeɣluu pɩtɩɩfɛyɩ, ɛlɛ́ pɛfɛyɩnɩ tɔɔnaɣ. Peeɖe Yesu ya ɛ-tɔmkpɛlɩkɩyaa nɛ eheyi-wɛ se: 2 «Ɛyáa panɛ, pɛwɛ-m pʋtɔdɩyɛ. Ɩcɔnɩ ɩna, kɩyakɩŋ naadozo yɔ pɛwɛ mɔn-cɔlɔ cɩnɛ. Lɛɛlɛɛyɔ pɛfɛyɩnɩ nabʋyʋ se pɔtɔɔ. 3 Yee meheyi-wɛ se pekpe ñɔɔsɩ yɔ, pɔtɔlʋʋ nʋmɔʋ taa. Mbʋ́ pʋyɔɔ yɔ, pa-taa lɛlaa lɩnɩ poliŋ.» 4 Peeɖe ɛ-tɔmkpɛlɩkɩyaa cosi-i se: «Le ɛyʋ naɣ tɔɔnaɣ ñɩtʋ taa cɩnɛ nɛ ɛcalɩ ɛyáa samaɣ kanɛ katɩŋa?» 5 Ɛlɛ́, Yesu pɔzɩ-wɛ se: «Tindine hɔɔlasɩ ɛzɩma wɛ mɩ-cɔlɔ?» Pocosi-i se: «Lʋbɛ.» 6 Peeɖe eheyi ɛyáa se pacaɣ tataa. Ɛlɛ́, ɛkpaɣ tindine hɔɔlasɩ ńzɩ́ nɛ ɛsɛɛ Ɛsɔ sɩ-yɔɔ nɛ ɛcɩyɩ-sɩ. Ɛtɛma lɛ, ɛcɛlɩ ɛ-tɔmkpɛlɩkɩyaa se patayɩ-wɛ, nɛ pala ḿbʋ́ ɖɔɖɔ. 7 Paawɛnɩ kpakpasɩ cikpesi pazɩ ɖɔɖɔ. Ɛlɛ́, Yesu sɛɛ Ɛsɔ sɩ-yɔɔ nɛ eheyi ɛ-tɔmkpɛlɩkɩyaa se powolo pamʋ nɛ patayɩ-wɛ ɖɔɖɔ. 8 Patayɩ-wɛ nɛ pɔtɔɔ patɩŋa pahaɣ nɛ pɩkazɩ nɛ ɛ-tɔmkpɛlɩkɩyaa kpeɣli hɔɔlasɩ nzɩ́ sɩkazaa yɔ nɛ pusu ɖɔkɩŋ lʋbɛ. 9 Ɛyáa mbá pɔtɔɔ tɔɔnaɣ ŋ́gá yɔ, patalɩ ɛzɩ kutokiŋ naanza yɔ. Pɛtɛma lɛ, Yesu heyi-wɛ se pekpe. 10 Peeɖe ɛ nɛ ɛ-tɔmkpɛlɩkɩyaa patɩkpa kpɩyʋʋ taa nɛ powolo Dalmanuuta ɛjaɖɛ taa. Farɩsɩ ñɩma pɔzɩ Yesu se ɛla ɛsɔdaa hama lakasɩ nasɩyɩ (Mat 16.1-4) 11 Patalɩ Dalmanuuta peeɖe lɛ, Farɩsɩ ñɩma wolo Yesu cɔlɔ nɛ pa nɛ ɩ pɔhɔŋnɩ ɖama tɔm nɛ pañɩ ɛ-nɔɔ cɔlɔ tɔm. Pɔpɔzɩ-ɩ se ɛla ɛsɔdaa hama lakasɩ nasɩyɩ nɛ pana. 12 Peeɖe Yesu hʋ ɛ-taa pɩŋŋ nɛ emuzi nɛ ɛtɔ se: «Pɩlabɩ ɛzɩma ɛyáa panɛ pañɩnɩɣ Ɛsɔ hama lakasɩ? Toovenim lɛ, meheyiɣ-mɩ se ɩɩkaɣ naʋ hama lakasɩ nasɩyɩ kaʋ.» 13 Ɛlɛ́, Yesu yebi-wɛ nɛ ɛ nɛ ɛ-tɔmkpɛlɩkɩyaa paɖaɣnɩ kpɩyʋʋ taa kpaʋ nɛ pɛtɛzɩ teŋgu kidiiliŋ lɛɛkʋ yɔɔ. Yesu tɔmkpɛlɩkɩyaa ɩɩnɩɣ natʋyʋ taa (Mat 16.5-12) 14 Pɛtɛzaɣ teŋgu lɛ, ɛ-tɔmkpɛlɩkɩyaa kɔsɔ tɔɔnaɣ yɔɔ. Ɛlɛ́, tindine hɔɔlaɣ kʋɖʋmaɣ kɛwɛnɩ pɔ-cɔlɔ kpɩyʋʋ taa. 15 Peeɖe Yesu paɣ́-wɛ se: «Ɩɖɔkɩ mɩ-tɩ ɖeu nɛ Eroodi nɛ Farɩsɩ ñɩma pɔ-sɔsɔɔna.» 16 Ɛlɛ́, papazɩ ɖama yɔɔdɩnaʋ se: «Yaa ɖɩtakpaɣ tindine yɔɔ ɛkalɩɣ-ɖʋ ḿbʋ́.» 17 Yesu nɩ ḿbʋ́ lɛ, ɛpɔzɩ-wɛ se: «Pɩlabɩ ɛzɩma nɛ ɩyɔɔdʋʋnɩ ɖama se ɩtakpaɣ tindine? Pɩlabɩ ɛzɩma mɩ-laŋa wɛɛ kpɩzɩŋ nɛ halɩ nɛ sɔnɔ ɩɩnɩɣ? 18 Ɩwɛnɩ ɛsɛ, ɛlɛ́ ɩɩnaɣ, ɩwɛnɩ nɩŋgbaaŋ, ɛlɛ́ ɩɩnɩɣ. Ɩsɔ mbʋ́ malaba yɔ pʋ-yɔɔ yaa we? 19 Mancɩyɩ tindine hɔɔlasɩ kagbaanzɩ nɛ abalaa kutokiŋ kagbaanzɩ tɔɔ lɛ, ɖɔkɩŋ ɛzɩma taa iku hɔɔlasɩ nzɩ́ sɩkazaa yɔ?» Pocosi-i se: «Hiu nɛ naalɛ.» 20 Ɛtasɩ-wɛ pɔzʋʋ se: «Alɩwaatʋ ndʋ́ mancɩyɩ tindine hɔɔlasɩ lʋbɛ nɛ ɛyáa kutokiŋ naanza tɔɔ yɔ, ɖɔkɩŋ ɛzɩma taa iku hɔɔlasɩ nzɩ́ sɩkazaa yɔ?» Pocosi-i se: «Đɔkɩŋ lʋbɛ.» 21 Peeɖe ɛpɔzɩ-wɛ se: «Nɛ pɩla ɛzɩma halɩ nɛ sɔnɔ ɩtatɩɩnɩda yɔ?» Yesu kuli yʋlʋm nɔɔyʋ ɛsɛ Bɛtsayɩda tɛtʋ taa 22 Yesu nɛ ɛ-tɔmkpɛlɩkɩyaa pɛtɛzɩ teŋgu lɛ, patalɩ Bɛtsayɩda. Peeɖe powoni yʋlʋm nɔɔyʋ ɛ-cɔlɔ nɛ pewini-i se etukuni-i nɛ ɛ-ɛsɛ kuli. 23 Ɛlɛ́, Yesu kpa e-nesi taa nɛ ɛhɔm-ɩ ɛlɩzɩ-ɩ tɛtʋ kɩjaʋ yɔɔ nɛ elii ndaatʋ nɛ ɛtaa yʋlʋm ɛnʋ ɛ-ɛsɛ nɛ ɛtɩnɩ e-nesi ɛ-yɔɔ nɛ ɛpɔzɩ-ɩ se: «Ɛbɛ ŋnaɣ?» 24 Ɛlɛ́, yʋlʋm kuli ɛ-ɛsɛ nɛ ecosi-i se: «Manaɣ ɛyáa, pɛwɛ ɛzɩ tɩŋ yɔ, pɔɖɔŋ.» 25 Yesu tasɩ e-nesi tɩnʋʋ yʋlʋm ɛnʋ ɛ-ɛsɛ yɔɔ lɛ, atɩkuli nɛ ɛcɔna nɛ ɛnaɣ pɩtɩŋa camɩyɛ kpayɩ kpayɩ. 26 Ɛlɛ́, Yesu heyi-i se: «Đɛɛ ŋkpe, taapɩsɩ tɛtʋ taa.» Pɩyɛ yɔɔdaa se Yesu lɛ Weyi Ɛsɔ Lɩzaa Yɔ (Mat 16.13-20; Luk 9.18-21) 27 Pʋwayɩ lɛ, Yesu nɛ ɛ-tɔmkpɛlɩkɩyaa pakʋyɩ se powoki tɛtʋ cikpetu ndɩ ndɩ ndʋ́ tɩwɛ Sezaaree Filiipu tɛtʋ cɔlɔ yɔ tɩ-taa. Palɩ nʋmɔʋ taa lɛ, ɛpɔzɩ-wɛ se: «Ɛyáa maɣzɩɣ se ma lɛ anɩ?» 28 Pocosi-i se: «Nabɛyɛ tɔŋ se ña lɛ Lɩm Sɔʋ Sɔnzɩ Laɖʋ Yohanɛɛsɩ. Lɛlaa se ña lɛ Elii weyi paaɖaŋaa yɔ nɛ lɛlaa se ña lɛ náyaa taa lɛlʋ.» 29 Peeɖe ɛpɔzɩ-wɛ se: «Mɩ yɔ, mɩhʋʋ se ma lɛ anɩ?» Ɛlɛ́, Pɩyɛ cosi-i se: «Ña lɛ Weyi Ɛsɔ Lɩzaa Yɔ.» 30 Ɛlɛ́, Yesu paɣ́-wɛ se pataaheyi-tʋ nɔɔyʋ kaʋ. Yesu yɔɔdaa se ɛsɩkɩ nɛ efemnɩ sɩm taa (Mat 16.21-28; Luk 9.22-27) 31 Yesu wɩlaɣ ɛ-tɔmkpɛlɩkɩyaa se peɖiɣzini se ɛnʋ Ɛyʋ Pɩyalʋ lɛ, pʋwɛɛ se ɛtɔɔ kʋñɔŋ siŋŋ nɛ Yuda ñɩma sɔsaa nɛ cɔjɔnaa sɔsaa nɛ pa-paɣtʋ wɩlɩyaa pekizi ɛ-tɔm nɛ pakʋ-ɩ ɛsɩ. Kɩyakʋ naadozo ñɩŋgʋ wiye lɛ, Ɛsɔ fezi-i. 32 Eheyi-wɛ-tʋ camɩyɛ yayɩ yayɩ lɛ, Pɩyɛ yaa-ɩ nɛ pɛkɛɛ kɩjaʋ nɛ ekizini-i-tʋ. 33 Peeɖe Yesu kisini ɛ-tɔmkpɛlɩkɩyaa yɔɔ nɛ ɛkalɩ Pɩyɛ se: «Satanɩ ña! Đɛɛ mɔ-yɔɔ. Ña-lɩmaɣza tɛkɛ Ɛsɔ ñɩna, ɛyáa ñɩna akɛnaa.» Pʋwɛɛ se Yesu tiyiyaa itisi nɛ pasɩ ɛzɩ ɛnʋ yɔ 34 Pʋwayɩ lɛ, Yesu yaa ɛyáa samaɣ nɛ ɛ-tɔmkpɛlɩkɩyaa nɛ eheyi-wɛ se: «Weyi e-liu wɛɛ se ɛtɩŋɩɣ ma-wayɩ yɔ, pʋwɛɛ se ɛsɔɔ ɛ-maɣmaɣ ɛ-yɔɔ nɛ etisi nɛ ɛtɔɔ kʋñɔŋ siŋŋ. 35 Mbʋ́ pʋyɔɔ yɔ, weyi ɛñɩnɩɣ se ɛcaɣ wezuu tam yɔ, ɛtɛŋnɩ-kʋ lesuu. Weyi ɛ́lɛ́ sɩkɩ ma nɛ Laŋhɛzɩyɛ Tɔm ɖɔ-yɔɔ yɔ, ɛcakɩ wezuu tam. 36 Yee ɛyʋ ehiɣ kedeŋa yɔɔ cɩnɛ ñɩm tɩŋa payɩ nɛ elesi e-wezuu lɛ, pɩwazɩɣ-ɩ we? 37 Ɛbɛ ɛpɩzɩɣ ɛkpaɣ nɛ ɛlɛɣzɩ ku-lone taa? 38 Yee fɛyɛ ɛkpa nɔɔyʋ ma nɛ mɔn-tɔm ɖɔ-yɔɔ lɛɛlɛɛyɔ ɛyáa mbá pɛkɛ kɩwɛɛkɩm laɖaa nɛ palakɩ acɛyɛ yɔ pɔ-cɔlɔ yɔ, ɖɩkaɣ kpaʋ ɖɔɖɔ Ɛyʋ Pɩyalʋ pʋdʋ yɔɔ, alɩwaatʋ ndʋ́ ɛ nɛ Ɛsɔ tiyiyaa pɛkpɛndɩɣnɩ ɛ-Caa Ɛsɔ koboyaɣ nɛ pɔkɔɔ yɔ.» |