Maarkɩ 7 - New Testament

Caánaʋ́ sɔnzɩ tɔm

¹ Pʋwayɩ lɛ, Farɩsɩ ñɩma nɛ Yuda ñɩma paɣtʋ wɩlɩyaa nabɛyɛ palɩɩnɩ Yeruusalɛm nɛ powolo pekpeɣli Yesu cɔlɔ.

² Peeɖe pana ɛ-tɔmkpɛlɩkɩyaa lɛlaa tɔkaɣ tɔɔnaɣ nɛ patasaŋ pe-nesi ɛzɩ paɖʋʋ pɔ-sɔnzɩ taa se pala yɔ.

³ Ŋgʋ́, Farɩsɩ ñɩma nɛ Yuda ñɩma lɛlaa tɩŋa pɔɖɔkɩ pɔ-cɔzɔnaa sɔnzɩ. Sɔnzɩ ńzɩ́ sɩpɔzʋʋ se pasaŋ camɩyɛ nɛ pʋcɔ pɔtɔɔ.

⁴ Yee palɩnɩ kɩyakʋ nɛ pɔtɔsɔ lɩm yɔ, paatɔkɩ. Pañalɩɣ caɖasɩ nɛ ɖeɣsi nɛ ñɩɣtʋ wondu nɛ palakɩ lakasɩ lɛɛsɩ sakɩyɛ ɛzɩ caánaʋ́ taa ñɩma yɔ.

⁵ Farɩsɩ ñɩma nɛ Yuda ñɩma paɣtʋ wɩlɩyaa ḿbá pɔpɔzɩ Yesu se: «Pɩlabɩ ɛzɩma ñɔ-tɔmkpɛlɩkɩyaa yele ɖɔ-cɔzɔnaa sɔnzɩ? Se we nɛ paasaŋɩɣ pʋcɔ pɔtɔkɩ?»

⁶ Yesu cosi-wɛ se: «Tɛɛ nɛ pʋ-yɔɔ ñɩma mɩ! Mɩ lɛ mbá Ɛsɔ yɔɔdɩ pɔ-tɔm nɛ Ezaayii susi-tʋ camɩyɛ nɛ ɛma ɛ-takayaɣ taa yɔ. Ńdʋ́ lɛ se: ‹Ɛyáa panɛ pasaŋ-m nɛ nɔɔ yem. Pa-laŋa taa lɛ, pɔtɔsɔɔlɩ-m paa ñɩɩɩ.

⁷ Pasaŋ-m nɛ palaɣ-m kɩlaŋ, ɛlɛ́ pɩfɛyɩ-m kɛzɛɣa nakɛyɛ. Mbʋ́ pʋyɔɔ yɔ, paɣtʋ ndʋ́ pawɩlɩɣnɩ abalɩtʋ yɔ, tɩkɛ ɛyáa paɣtʋ nɛ papɩsɩ-tʋ ɛzɩ ma-ñɩndʋ yɔ nɛ pawɩlɩɣ.› »

⁸ Peeɖe Yesu heyi-wɛ se: «Iyebi Ɛsɔ paɣtʋ nɛ ɩnɩɣnɩ ndʋ́ ɛyáa maɣmaɣ ɖʋwa yɔ.»

⁹ Ɛlɛ́, ɛtasɩ-wɛ heyuu se: «Ɩñaɣ pana nɛ iyele Ɛsɔ paɣtʋ kɩbandʋ nɛ ɩpazɩnɩ mɩ-maɣmaɣ mɩ-ñɩndʋ wɩlʋʋ.

¹⁰ Đɔ-cɔzɔ Mooyiizi weyi Ɛsɔ cɛlɩ-ɩ paɣtʋ yɔ, ɛyɔɔdaa se: ‹Pʋwɛɛ se ɛyʋ ɛña ɛ-caa nɛ e-ɖoo.› Ɛyɔɔdaa ɖɔɖɔ se: ‹Yee nɔɔyʋ ɛyɔɔdɩ ɛ-caa yaa e-ɖoo tɔm ɛzaɣ́tʋ yɔ, pʋwɛɛ se pakʋ-ɩ.›

¹¹ Ɛlɛ́, mɩ miheyiɣ ɛyáa se: ‹ŋpɩzɩɣ ŋheyi ña-caa yaa ño-ɖoo se: maasɔɔlaa se maha-ŋ nabʋyʋ nɛ pɩsɩna-ŋ. Kɛlɛ maapɩzɩɣ, mbʋ́ pʋyɔɔ yɔ, pɩkɛ Kɔrbaŋ: pʋ-tɔbʋʋ se mbʋ́ pahaɣ Ɛsɔ yɔ.

¹² Yee iheyi ɛyʋ ḿbʋ́ yɔ, ɩɩtasɩɣ-ɩ haʋ nʋmɔʋ se ɛsɩnɩ ɛ-caa nɛ e-ɖoo.

¹³ Ḿbʋ́ ɩkpakɩɣ mɩ-cɔzɔnaa sɔnzɩ nzɩ́ ɩɖɛzɩɣ ɖama yɔ nɛ ɩwɛɛkɩɣnɩ Ɛsɔtɔm. Ɩlakɩ lakasɩ lɛɛsɩ ndɩ ndɩ ḿbʋ́ ɖɔɖɔ.»

Mbʋ́ pipisiɣ ɛyʋ yɔ

¹⁴ Pʋwayɩ lɛ, Yesu tasɩ ɛyáa samaɣ kpeɣluu nɛ eheyi-kɛ se: «Mɩtɩŋa payɩ iwelesi nɛ ɩnɩɩ mɔn-tɔm camɩyɛ.

¹⁵ Nabʋyʋ fɛyɩ se pitiki ɛyʋ taa nɛ pipisi-i Ɛsɔ ɛsɩndaa. Ɛlɛ́, mbʋ́ pɩlɩɣnɩ ɛ-taa yɔ, ḿbʋ́ pisiɣni-i. [

¹⁶ Weyi ɛwɛnɩ nɩŋgbaaŋ lɛ, ɛnɩɩ.]»

¹⁷ Yesu nɛ ɛ-tɔmkpɛlɩkɩyaa pakʋyɩ ɛyáa samaɣ taa nɛ pekpe lɛ, pɔpɔzɩ-ɩ se ɛlɩzɩ-wɛ eduuye ńɖɩ́ ɖɩ-tɔbʋʋ.

¹⁸ Peeɖe ɛpɔzɩ-wɛ se: «Pɩkpɛndɩnɩ-mɩ ɖɔɖɔ nɛ ɩtapɩzɩ ɩnɩɩ tɔm ndʋ́ mɔyɔɔdʋʋ yɔ tɩ-tɔbʋʋ naa we? Ɩtanɩɩ se pʋyʋ fɛyɩ se ɛyʋ tɔkɩ-pʋ nɛ pipisi-i yaa we?

¹⁹ Mbʋ́ ɛyʋ tɔkɩ yɔ, pitiki e-lotu taa nɛ pʋcɔɔ kʋlɔmɩŋ taa nɛ puwolo pɩlɩɩnɩ ɛ-tɔbʋʋ. Ɛlɛ́, pɩɩsʋʋ ɛ-lɩmaɣza taa.» Yesu yɔɔdʋʋ ḿbʋ́ yɔ, pɩwɩlɩɣ se tɔɔnasɩ tɩŋa mʋnaa se pɔtɔɔ-sɩ.

²⁰ Ɛtasɩ-wɛ heyuu se: «Tɔm ndʋ́ tɩlɩɣnɩ ɛyʋ taa yɔ, ńdʋ́ pisiɣni-i.»

²¹ Mbʋ́ pʋyɔɔ yɔ, ɛyʋ taa lɩmaɣza kɩdɛkɛdɛɛ lɩɣna se ɛla acɛyɛ nɛ ɛmɩlɩ nɛ ɛkʋ ɛyáa

²² nɛ ɛkpaɣ lɛlaa halaa nɛ ɛɖʋ ɛsɩyɛ lɛlaa ñɩm yɔɔ nɛ ɛla kañatʋ nɛ ɛcɛtɩ ɛyáa nɛ ɛla yem yem nɛ ɛwɛɛ ɛsɩsɛmɩyɛ nɛ ɛcɛtɩnɩ lɛlaa taa nɛ ɛkpazɩ ɛ-tɩ nɛ ɛla kɩmɛlɛndʋ.

²³ Ɛzaɣ́tʋ tʋnɛ tɩtɩŋa payɩ tɩlɩɣnɩnɩ ɛyʋ taa nɛ tipisiɣ-i.

Halʋ weyi ɛtɛkɛ Yuda tʋ nɛ ɛwɛnɩ lidaʋ Yesu yɔɔ yɔ

²⁴ Pʋwayɩ lɛ, Yesu wolo ɛjaɖɛ nɖɩ́ ɖɩñɔtɩnɩ Tiiri yɔ ɖɩ-taa nɛ ɛsʋʋ ɖɩɣa nakɛyɛ taa. Ɛlɛ́, ɛtaasɔɔlɩ se nɔɔyʋ ɛna se ɛwɛ peeɖe. Kitefe kutoyu lɛ, ɛyáa tɩŋa tɛm naʋ.

^25-26 Halʋ ɛgɔm weyi ɛlɩnɩ Siirii egeetiye taa nɛ ɛkɛ Fenisii tʋ yɔ, ɛnɩ ḿbʋ́ lɛ, ɛtɩwobu eluŋ Yesu tɛɛ nɛ eheyi-i se: «Mɛwɛnɩ pɩɣa peliɣa nakɛyɛ, eleeu nɔɔyʋ wɛ ka-wayɩ. Mentendiɣ-ŋ se ŋɖɔɔnɩ-ɩ.»

²⁷ Peeɖe Yesu tuuu halʋ ɛnʋ eduuye se: «Pɩtamʋnɩ se pakpaɣ piya tɔɔnaɣ nɛ pɛpɛɖɩ hasɩ. Ɛlɛ́, pʋwɛɛ se piya ɛtɔɔ sɩhaɣ nɛ pʋcɔ.»

²⁸ Halʋ ɛnʋ ecosi-i se: «Kɩpaɣlʋ! Yee piya ɛtɔkɩ nɛ pʋtɔlʋʋ tataa, hasɩ ɛɛtɔzʋʋ yaa we?»

²⁹ Peeɖe Yesu heyi-i se: «Ño-cosuu pʋnɛ pɩwɩlɩɣ pɩŋŋ se ŋwɛnɩ lidaʋ mɔ-yɔɔ: wolo. Eleeu ɛnʋ ese ña-pɩɣa peliɣa ŋ́gá ka-wayɩ.»

³⁰ Ekpema lɛ, ɛmaɣnɩ ɛ-pɩɣa ŋ́gá kɛhɛnɩ ñalʋʋ yɔɔ. Eleeu tɛm ka-wayɩ seu.

Yesu laba nɛ ndam kaayɔɔdaɣ nakɛyɛ yɔɔ cɛ

³¹ Pʋwayɩ lɛ, Yesu kʋyɩ Tiiri egeetiye taa nɛ ɛtɩŋnɩ Sidɔɔ ñɩnɖɛ taa nɛ ewolo ɛsʋʋ Tɛtʋ Hiu ñɩnɖɛ taa se ewoki Galilee teŋgu nɔɔ.

³² Peeɖe powoni ndam kaayɔɔdaɣ nakɛyɛ nɛ pewiini-i se ɛtɩnɩ nesi kɔ-yɔɔ nɛ kɔ-yɔɔ cɛ.

³³ Peeɖe ɛkpaɣ-kɛ nɛ ɛkɛzɩ kɩjaʋ nɛ ɛlɛkɩ e-niwee ka-nɩŋgbaaŋ taa nɛ ɛla ndaatʋ nɛ ɛtaa ka-nzʋlʋmɩyɛ yɔɔ.

³⁴ Ɛtɛma lɛ, ɛkpazɩ ɛ-ɛsɛ ɛsɔdaa nɛ emuzi nɛ ɛtɔ se: «Efata.» Pʋ-tɔbʋʋ se: «Tʋlɩ.»

³⁵ Kpaagbaa ḿbʋ́ lɛ, ndam kaayɔɔdaɣ ŋ́gá, ka-nɩŋgbaaŋ taa tʋlɩ nɛ ka-nzʋlʋmɩyɛ yɛɖɩ nɛ kapazɩ yɔɔdʋʋ camɩyɛ.

³⁶ Ɛlɛ́, Yesu paɣ́ patɩŋa se pataaheyi-tʋ nɔɔyʋ, ɛlɛ́ pamanɩ ɛ-tɔm yɔɔ nɛ posusi-tʋ siŋŋ.

³⁷ Ḿbʋ́ labɩnɩ ɛyáa piti pɩŋŋ nɛ pɔtɔŋ se: «Mbʋ́ ɛlakɩ yɔ, pɩtɩŋa pʋwɛ ɖeu. Ɛlakɩ nɛ ndamaa nɩɣ nɛ kaayɔɔdasɩ yɔɔdʋʋ.»