Maarkɩ 6 - New Testament

Nazarɛɛtɩ ñɩma kizi Yesu tɔm

¹ Pʋwayɩ lɛ, Yesu nɛ ɛ-tɔmkpɛlɩkɩyaa pakʋyɩ ɖenɖe paawɛɛ yɔ nɛ powolo Nazarɛɛtɩ tɛtʋ ndʋ́ tɩ-taa ɛcaɣaɣ nɛ ɛpaɣlɩ yɔ.

² Pɩtalɩ kɩyakʋ kɩhɛzʋʋ wiye lɛ, ɛpazɩ Ɛsɔtɔm susuu Ɛsɔ ɖɩsɛyɛ taa. Ɛyáa sakɩyɛ nɩ-tʋ lɛ, pɩlabɩ-wɛ piti nɛ pɔtɔŋ se: «Le ɛlɩ lɔŋ ɛnʋ ɛ-yɔɔ nɛ ɛwɩlɩɣnɩ ɛyáa nɛ ɛlakɩ Ɛsɔ hama lakasɩ?

³ Pɩtɛkɛ ɛnʋ lɛ kuduyiŋ kanɖʋ naa we? Pɩtɛkɛ ɛnʋ lɛ Maarɩɩ pɩyalʋ? Yaa pɩtɛkɛ e-newaa lɛ Yakubu nɛ Yoosi nɛ Yuudi nɛ Siimɔɔ? Pɩtɛkɛ ɖa nɛ e-newaa halaa ñɩma ɖɩwɛnɩ cɩnɛ yɔ?» Pa-lɩmaɣza ana ayebina nɛ pa-laŋa wɛɛ kpɩzɩŋ nɛ petetisi Yesu tɔm.

⁴ Peeɖe eheyi-wɛ se: «Pañaŋ náyʋ paa le. Ɛlɛ́, ɛ-tɛtʋ nɛ e-liɖe nɛ ɛ-hɔʋ pa-taa paañaŋ-ɩ.»

⁵ Ḿbʋ́ labɩna nɛ ɛtapɩzɩ se ɛla Ɛsɔ hama lakasɩ sakɩyɛ. Ɛlɛ́, kʋdɔndɩnaa pazɩ yɔɔ ɛtɩnɩ nesi nɛ pɔ-yɔɔ cɛ.

⁶ Peeɖe pɩɖɩɣzɩ-ɩ nɛ ɛzɩma mbʋ́ pɛfɛyɩnɩ lidaʋ ɛ-yɔɔ yɔ. Pʋwayɩ lɛ, Yesu cɔɔ tɛtʋ cikpetu ndɩ ndɩ ndʋ́ tɩwɛ Nazarɛɛtɩ cɔlɔ yɔ tɩ-taa nɛ ɛwɩlɩ nɛ eheyi ɛyáa Ɛsɔtɔm.

Yesu tiyi ɛ-tɔmkpɛlɩkɩyaa hiu nɛ naalɛ

⁷ Peeɖe ɛya ɛ-tɔmkpɛlɩkɩyaa hiu nɛ naalɛ nɛ ɛha-wɛ ɖoŋ se papɩzɩ pɔɖɔɔnɩ aleewaa nɛ etiyi-wɛ naalɛ naalɛ.

^8-9 Etiyaɣ-wɛ lɛ, eheyi-wɛ se: «Ɩɖɛɣ lɛ, ɩɖɔkɩ ɖaʋ nɛ ɩlɛɛ naataŋgbala nɛ isuu wonuu kʋɖʋmʋʋ kʋɖʋmʋʋ. Ɩtaakpaɣ nabʋyʋ nɛ pɩtasɩnɩ-pʋ. Ɩtaakpaɣ tɔɔnaɣ yaa huyuu yaa liidiye.»

¹⁰ Ɛtasɩ-wɛ heyuu se: «Yee iwobi ɖoli nɛ pamʋ-mɩ ɖɩɣa nakɛyɛ taa lɛ, ɩcaɣ peeɖe nɛ pʋkɔɔ pɩsɩɩnɩ kɩyakʋ ŋgʋ́ ɩkʋyʋʋ peeɖe yɔ.

¹¹ Yee nabɛyɛ ɛtamʋ-mɩ ɖoli yaa patanɩɩnɩ-mɩ lɛ, ikpizi-wɛ mɩ-naŋgbanzɩ yɔɔ mʋzʋʋ nɛ ɩɖɛɛ nɛ pɩwɩlɩ se ɩkɔɔlɩ-wɛ nɛ iyebi-wɛ nɛ pa-sʋʋtʋ.»

¹² Peeɖe Yesu tɔmkpɛlɩkɩyaa ḿbá pɛɖɛwa nɛ papazɩ ɛyáa Ɛsɔtɔm susuu se pɛlɛɣzɩ wɛtʋ.

¹³ Pɔɖɔɔnaɣ aleewaa ɛyáa sakɩyɛ wayɩ nɛ pataɣ kʋdɔndɩnaa sakɩyɛ num nɛ pa-kʋdɔmɩŋ cɛkɩ.

Wiyaʋ Eroodi nɛ Yesu pɔ-tɔm

¹⁴ Alɩwaatʋ ńdʋ́ʋ́ Yesu hɩɖɛ sɛ paa le nɛ wiyaʋ Eroodi nɩɩ ɛ-taŋ nɛ ɛyáa lɛlaa tɔŋ se: «Lɩm Sɔʋ Sɔnzɩ Laɖʋ Yohanɛɛsɩ femna. Mbʋ́ pʋyɔɔ yɔ, ɛwɛnɩ ɖoŋ nɛ ɛlakɩ Ɛsɔ hama lakasɩ.»

¹⁵ Lɛlaa se: «Náyʋ Elii weyi paaɖaŋaa yɔ, ɛnʋ kɔmna» nɛ lɛlaa ñɔtɔŋ ɖɔɖɔ se: «Lɔndaa náyaa taa nɔɔyʋ.»

¹⁶ Eroodi nɩ ḿbʋ́ lɛ, ɛtɔ se: «Manaɣ se Lɩm Sɔʋ Sɔnzɩ Laɖʋ Yohanɛɛsɩ weyi meyebi pɛsɛtɩ ɛ-ñʋʋ yɔ, ɛnʋ femna.»

Lɩm Sɔʋ Sɔnzɩ Laɖʋ Yohanɛɛsɩ sɩm tɔm

^17-18 Lɩm Sɔʋ Sɔnzɩ Laɖʋ Yohanɛɛsɩ sɩm tɔm yɔ. Eroodi Antipasɩ kɛlɛɣ e-neu Filiipu halʋ Eroodiyaadɩ. Yohanɛɛsɩ heyi Eroodi se: «Pɩtaha nʋmɔʋ se ŋkpaɣ ñe-neu halʋ.» Peeɖe Eroodi ɛnʋ ɛ-maɣmaɣ eyeba nɛ pakpa Yohanɛɛsɩ, pɔhɔkɩ-ɩ nɛ paɖʋ-ɩ salaka.

¹⁹ Eroodiyaadɩ taasɔɔlɩ Yohanɛɛsɩ tɔm. Ɛñɩnaɣ se ɛkʋ-ɩ. Ɛlɛ́, ɛtapɩzɩɣ.

²⁰ Wiyaʋ Eroodi seɣaɣ Yohanɛɛsɩ nɛ ɛɖaŋɩɣ ɛ-yɔɔ. Mbʋ́ pʋyɔɔ yɔ, ɛsɩm-ɩ se ɛkɛ Ɛsɔ ñɩnʋ weyi ɛtʋʋzaa yɔ. Ɛyɔɔdʋʋ tɔm nɛ Eroodi nɩɣ lɛ, pɩcɛyɩɣ-ɩ. Ŋgʋ́, e-liu kɛwɛɛ se ewelesini-i siŋŋ.

²¹ Wiyaʋ Eroodi lʋlʋʋ kazandʋ kɩyakʋ talaa lɛ, ɛ́yáa e-kewiyaɣ taa sɔsaa nɛ sɔɔjanaa sɔsaa nɛ Galilee egeetiye ñʋndɩnaa. Kazandʋ ńdʋ́ tɩhanɩ halʋ ɛnʋ waɖɛ.

²² Mbʋ́ pʋyɔɔ yɔ, ɛ-pɛlɛ sʋ ɖenɖe ɛyáa caɣaɣ yɔ nɛ ɛpaa nɛ pɩla wiyaʋ Eroodi nɛ ɛyáa ḿbá leleŋ. Peeɖe Eroodi heyi pɛlɛ ɛnʋ se: «Pɔzɩ-m mbʋ́ ŋsɔɔlaa yɔ, mahaɣ-ŋ-pʋ.»

²³ Ɛlɛ́, eɖuu ɛyáa tɩŋa ɛsɩndaa se: «Paa men-kewiyaɣ hɔɔlʋʋ ŋpɔzɩ-m yɔ, mahaɣ-ŋ.»

²⁴ Peeɖe pɛlɛ ɛnʋ ɛlɩ tamɩyɛ nɛ ewolo ɛpɔzɩ e-ɖoo se: «Mɔnpɔzɩ-ɩ ɛbɛ?» Ɛ́lɛ́ cosi-i se: «Pɔzɩ-ɩ se ɛha-ŋ Lɩm Sɔʋ Sɔnzɩ Laɖʋ Yohanɛɛsɩ ñʋʋ.»

²⁵ Ɛtɩpɩsɩ wiyaʋ cɔlɔ lɛ, eheyi-i se: «Mancaɣ se ŋɖʋ Lɩm Sɔʋ Sɔnzɩ Laɖʋ Yohanɛɛsɩ ñʋʋ ñanaɣ taa lɛɛlɛɛyɔ nɛ ŋcɛlɩ-m.»

²⁶ Wiyaʋ Eroodi nɩ tɔm ńdʋ́ lɛ, ɛ-taa tala leleŋ. Ŋgʋ́, ɛtɛm ɖuúu agɔmaa tɩŋa ɛsɩndaa. Pɩfɛyɩ se ekizi.

²⁷ Peeɖe etiyi ɛ-sabaabi lɛlʋ kpaagbaa se: «Wolo ŋsɛtɩ Yohanɛɛsɩ ñʋʋ nɛ ŋkɔna.» Ɛ́lɛ́ wolo salaka taa nɛ ɛsɛtɩ-kʋ

²⁸ nɛ ɛɖʋ ñanaɣ taa nɛ ewoni ɛcɛlɩ pɛlɛ ɛnʋ nɛ ɛ́lɛ́ woni ɛcɛlɩ e-ɖoo.

²⁹ Yohanɛɛsɩ tɔmkpɛlɩkɩyaa nɩ ḿbʋ́ lɛ, powolo pakpaɣ-ɩ nɛ pepi.

Yesu ha tɔɔnaɣ samaɣ sɔsɔɔ nɛ kɔtɔɔ

³⁰ Pʋwayɩ lɛ, Yesu tiyiyaa pɩsɩ pekpeɣli ɛ-cɔlɔ nɛ pɛkɛdɩ-ɩ mbʋ́ pɩtɩŋa payɩ palaba yɔ nɛ tɔm ndʋ́ pawɩlaa yɔ.

³¹ Mbá powokaɣ ɛ-cɔlɔ nɛ pɛɖɛɣ yɔ, pɔɖɔwa pɩtɩɩfɛyɩ lɛ, ɛ nɛ ɛ-tɔmkpɛlɩkɩyaa petehiɣ nʋmɔʋ se pɔtɔɔ tɔɔnaɣ. Pʋ-yɔɔ eheyi-wɛ se: «Ɩkɔɔ ɖɩkɛzɩ ɖa-tɩ ɖenɖe ɛyáa fɛyɩ yɔ nɛ ɖɩhɛzɩ pazɩ.»

³² Peeɖe pasʋ kpɩyʋʋ taa se pɛɖɛɣ.

³³ Pɛɖɛɣaɣ lɛ, ɛyáa sakɩyɛ losi-wɛ nɛ pasɩm-wɛ kpaagbaa. Peeɖe pakpaɣ seya nɛ tɛtʋ ndɩ ndɩ taa nɛ pɛlɛyɩ-wɛ talʋʋ ɖenɖe powokaɣ yɔ.

³⁴ Yesu lɩnɩ kpɩyʋʋ taa nɛ etii lɛ, ɛmaɣnɩ ɛyáa samaɣ nɛ pɩlabɩ-ɩ pʋtɔdɩyɛ pɩŋŋ. Mbʋ́ pʋyɔɔ yɔ, ɛmaɣzɩnɩ-wɛ nɛ heŋ weyi ɩfɛyɩnɩ ninɖiɣyu yɔ. Peeɖe ɛpazɩ-wɛ wɩlʋʋ Ɛsɔtɔm ndɩ ndɩ.

³⁵ Pʋkɔma ɖanaɣ yɔɔ lɛ, ɛ-tɔmkpɛlɩkɩyaa wolo ɛ-cɔlɔ nɛ peheyi-i se: «Lɛɛlɛɛyɔ wɩsɩ kpema, ŋgʋ́ ñɩtʋ hɛkʋ taa ɖɩwɛɛ.

³⁶ Yebi-wɛ powolo tɛyɛ yɔɔ nɛ tɛtʋ cikpetu taa nɛ paya tɔɔnaɣ nɛ pɔtɔɔ.»

³⁷ Yesu cosi-wɛ se: «Pʋwɛɛ se mɩhaɣnɩ-wɛ tɔɔnaɣ mɩ-maɣmaɣ.» Ɛlɛ́, pɔpɔzɩ-ɩ se: «Yee ɖiwoba ɖɩya tɔɔnaɣ ɛzɩ kɩyakɩŋ nasɩlɛ tʋmɩyɛ liidiye yɔ, pɩtalɩɣ-wɛ yaa we?»

³⁸ Yesu heyi-wɛ se: «Iwolo iwili nɛ mana se tindine hɔɔlasɩ ɛzɩma ɩwɛna.» Pewilaa lɛ, peheyi-i se tindine hɔɔlasɩ kagbaanzɩ nɛ kpakpasɩ naalɛ pɛwɛna.

³⁹ Peeɖe Yesu heyi-wɛ se: «Iheyi ɛyáa tɩŋa se pacaɣ tataa ñɩtʋ yɔɔ cabɩ cabɩ.»

⁴⁰ Pacaɣ cabɩ cabɩ, lɛlaa mɩnʋʋ nɛ lɛlaa nɩɩnʋwa.

⁴¹ Ɛlɛ́, Yesu kpaɣ tindine hɔɔlasɩ kagbaanzɩ ńzɩ́ nɛ kpakpasɩ ńzɩ́ sɩ-naalɛ nɛ ɛkpazɩ ɛsɛ ɛsɔdaa nɛ ɛsɛɛ Ɛsɔ pʋ-yɔɔ. Pʋwayɩ lɛ, ɛcɩyɩ nɛ ɛcɛlɩ ɛ-tɔmkpɛlɩkɩyaa se patayɩ ɛyáa tɩŋa.

⁴² Ɛlɛ́, pala ḿbʋ́ ɖɔɖɔ nɛ ɛyáa ḿbá pɔtɔɔ pahaɣ.

⁴³ Ɛ-tɔmkpɛlɩkɩyaa kpeɣli hɔɔlasɩ nzɩ́ sɩkazaa yɔ lɛ, pusu ɖɔkɩŋ hiu nɛ naalɛ.

⁴⁴ Mbá pɔtɔɔ tɔɔnaɣ ŋ́gá yɔ, abalaa ɖeke kɛwɛ kutokiŋ kagbaanzɩ.

Yesu ɖɔŋ lɩm yɔɔ

⁴⁵ Patɩtɛm tɔɔʋ lɛ, Yesu heyi ɛ-tɔmkpɛlɩkɩyaa se: «Ɩsʋʋ kpɩyʋʋ taa nɛ ɩɖɛ-m nɔɔ nɛ ɩtɛzɩ kidiiliŋ lɛɛkʋ yɔɔ Bɛtsayɩda kiŋ nɛ meheyi ɛyáa samaɣ se kekpe nɛ mɔnkɔɔ.»

⁴⁶ Pʋwayɩ lɛ, ɛkʋyɩ pɔ-cɔlɔ nɛ ewolo ɛkpa pʋʋ yɔɔ se ɛsɛɣ Ɛsɔ.

⁴⁷ Pɩlɛdaa lɛ, patalɩ teŋgu hɛkʋ taa. Ŋgʋ́, Yesu ñaawɛ pʋʋ yɔɔ e-ɖeke.

⁴⁸ Elosi-wɛ lɛ, pasaɣaɣ kpɩyʋʋ nɛ kiiwoki lɛɛlɛɛ. Mbʋ́ pʋyɔɔ yɔ, heɣlim makaɣ tuliŋa. Pʋkɔma ɛzɩ kalɩmaŋ kou yɔ lɛ, ɛkʋyɩ se ewoki pɔ-cɔlɔ. Ɛlɛ́, lɩm yɔɔ ɛɖɔŋaɣ. Ɛcaɣaɣ se ɛɖɛɛ pɔ-yɔɔ.

⁴⁹ Tɔmkpɛlɩkɩyaa na-ɩ ɛɖɔŋaɣ lɩm yɔɔ ḿbʋ́ lɛ, pɛwɛ yem se ñazɩñazʋʋ nakʋyʋ. Peeɖe papazɩ kubusi mabʋ.

⁵⁰ Mbʋ́ pʋyɔɔ yɔ, patɩŋa pana-ɩ lɛ, sɔɔndʋ kpa-wɛ siŋŋ. Ɛlɛ́, Yesu heyi-wɛ kpaagbaa se: «Ɩɖɔkɩ mɩ-tɩ kpam, sɔɔndʋ ɛtaakpa-mɩ, ma Yesu.»

⁵¹ Ɛyɔɔdɩ ḿbʋ́ lɛ, ɛkpa pɔ-cɔlɔ kpɩyʋʋ taa nɛ ɛcaɣ nɛ heɣlim hɛɛ kpaagbaa. Peeɖe pɩlabɩ ɛ-tɔmkpɛlɩkɩyaa piti pɩŋŋ.

⁵² Mbʋ́ pʋyɔɔ yɔ, pa-laŋa wɛ kpɩzɩŋ nɛ pataanɩɩ hama lakasɩ nzɩ́ ɛlaba nɛ tindine huúu nɛ ɛcalɩnɩ ɛyáa yɔ sɩ-tɔbʋʋ.

Yesu laba nɛ kʋdɔndɩnaa yɔɔ cɛ Jeneezaarɛɛtɩ egeetiye taa

⁵³ Pɛtɛzɩ teŋgu nɛ patalɩ Jeneezaarɛɛtɩ ɛjaɖɛ taa lɛ, paɖɩ pa-kpɩyʋʋ nimiye kidiiliŋ liu tɛɛ.

⁵⁴ Palɩwa nɛ ɛyáa na Yesu lɛ, patɩlɩ-ɩ kpaagbaa.

⁵⁵ Peeɖe pakpaɣ seya nɛ pɔcɔʋ ɛjaɖɛ tɩŋa nɛ pakpakɩɣ kʋdɔndɩnaa pa-ñalɩŋ yɔɔ nɛ powokini-wɛ ɖenɖe panɩɣaɣ se ɛwɛɛ yɔ.

⁵⁶ Paa ewobi tɛtʋ cikpetu taa yaa sɔsɔtʋ taa yaa tɛyɛ yɔɔ yɔ, ɛyáa wokini pa-kʋdɔndɩnaa ɖenɖe ɛyáa kpeɣliɣ yɔ. Paɖaŋaɣ-ɩ se pewiini-i nɛ eyele potukuni e-toko nɔɔ maɣmaɣ. Toovenim mbá potukaɣnɩ-kʋ yɔ, patɩŋa pɔ-yɔɔ cɛkaɣ.