Maarkɩ 5 - New TestamentYesu ɖɔɔnɩ aleewaa abalʋ nɔɔyʋ wayɩ (Mat 8.28-34; Luk 8.26-39) 1 Puwiye ńɖɩ́ patalɩ Geraazaa ɛjaɖɛ taa Galilee teŋgu kidiiliŋ lɛɛkʋ yɔɔ. 2 Yesu lɩnɩ kpɩyʋʋ taa nɛ etii lɛ, abalʋ nɔɔyʋ tɩlɩʋnɩ pɩlaŋ taa nɛ ewolo ɛ-cɔlɔ. Abalʋ ɛnʋ, aleewaa kɛwɛ ɛ-wayɩ 3 nɛ ɛwɛɛ pɩlaŋ taa, paa paahɔkɩ-ɩ ɛbɛ yɔ, ɛcɛkɩ-pʋ. 4 Pɛwɛɛ pakaŋ-ɩ kpasɩ ɛ-naŋgbanzɩ taa nɛ paɖɩɣ yoŋgbasɩ e-nesi taa nɛ ɛpʋʋtɩ pɩtɩŋa. Nɔɔyʋ fɛyɩ se ɛpɩzɩɣ ɛ-tɔm. 5 Ɛwɛɛ ɛcɔʋ pɩlaŋ nɛ pʋŋ pɔ-yɔɔ wɩsɩ nɛ ɖoó nɛ ɛmakɩ kubusi nɛ ɛhɛdɩɣ ɛ-tɩ nɛ pɛɛ. 6 Elosi Yesu poliŋ taa lɛ, ɛkpaɣ seya nɛ ewolo eluŋ ɛ-tɛɛ. 7 Nɛ ɛyɔɔdɩ ɖoŋ se: «Ɛsɔ Caabiyuu Pɩyalʋ Yesu, ma nɛ ŋ se we? Ɛsɔ ɖoŋ taa lɛ, mentendiɣ-ŋ se ŋtaaɖʋ-m kʋñɔŋ.» 8 Ɛyɔɔdɩ tɔm ńdʋ́, mbʋ́ pʋyɔɔ yɔ, Yesu holini aleewaa ḿbá se: «Ise abalʋ ɛnʋ ɛ-wayɩ.» 9 Peeɖe Yesu pɔzɩ abalʋ ɛnʋ se: «Payaɣ-ŋ se we?» Ecosi-i se: «Payaɣ-m se you laɖaa tikaɣ, mbʋ́ pʋyɔɔ yɔ, ɖɩɖɔwa.» 10 Ɛlɛ́, ewiini Yesu cɔɔɔ se ɛtaaɖɔɔnɩ aleewaa ḿbá Geraazaa ɛjaɖɛ ńɖɩ́ ɖɩ-taa. 11 Ŋgʋ́, afanaa tikaɣ nakɛyɛ kɛwɛ pɔ-cɔlɔ peeɖe pʋʋ yɔɔ nɛ kacazɩɣ tɔɔnaɣ. 12 Peeɖe aleewaa ḿbá petendi Yesu se: «Ha-ɖʋ nʋmɔʋ nɛ ɖiwolo ɖɩsʋʋ afanaa taa.» 13 Peeɖe Yesu tisaa nɛ aleewaa ḿbá pese abalʋ ɛnʋ ɛ-wayɩ nɛ powolo pasʋʋ pa-taa nɛ paba kpaɣ seya nɛ petii pafalɩ teŋgu taa nɛ pɔñɔɔ lɩm nɛ pasɩ. Afanaa ḿbá, patalɩ ɛzɩ kutokiŋ naalɛ yɔ. 14 Peeɖe afanaa ḿbá pɔ-yɔɔ cɔnɩyaa sewa kpaagbaa nɛ powolo peheyi tɛtʋ taa ɛyáa nɛ tɛyɛ yɔɔ ñɩma nɛ patɩŋa powolo se pana mbʋ́ pɩlaba yɔ. 15 Patalɩ Yesu cɔlɔ lɛ, pamaɣnɩ abalʋ weyi aleewaa tikaɣ kɛwɛ ɛ-wayɩ yɔ, esu wondu nɛ ɛcaɣ. Mbʋ́ pʋyɔɔ yɔ, ɛ-kpaaŋ cɛba. Peeɖe sɔɔndʋ kpa-wɛ 16 nɛ mbá paawɛɛ nɛ pana yɔ, pɛkɛdɩ mbá patana yɔ mbʋ́ pɩlaba nɛ aleewaa se ɛ-wayɩ yɔ nɛ mbʋ́ pɩlabɩ afanaa ɖɔɖɔ yɔ. 17 Peeɖe ɛyáa sʋ Yesu tenduu yɔɔ se ɛkʋyɩ pɛ-ɛjaɖɛ taa. 18 Yesu woba se ɛkpaɣ kpɩyʋʋ taa lɛ, abalʋ ɛnʋ etendi-i se ɛtɩŋɩɣ-ɩ nɛ ɛwɛɛ ɛ-cɔlɔ. 19 Ɛlɛ́, Yesu kizi nɛ eheyi-i se: «Pɩsɩ ñɛ-tɛ ña-ñɩma cɔlɔ nɛ ŋkɛdɩ-wɛ mbʋ́ Kɩpaɣlʋ na ña-pʋtɔdɩyɛ nɛ ɛlabɩ-ŋ yɔ.» 20 Ɛɖɛwa lɛ, ɛpazɩ susuu mbʋ́ pɩtɩŋa Yesu labɩ-ɩ yɔ Tɛtʋ Hiu Egeetiye taa nɛ ɛyáa mbá patɩŋa payɩ panɩwa yɔ, pɩlabɩ-wɛ piti. Yesu wazɩ halʋ nɔɔyʋ ɛ-kʋdɔŋ nɛ efezi halɩbɩɣa nakɛyɛ nɛ sɩm taa (Mat 9.18-26; Luk 8.40-56) 21 Yesu sʋ kpɩyʋʋ nɛ ɛpɩsɩ teŋgu kidiiliŋ lɛɛkʋ yɔɔ lɛ, ɛyáa samaɣ kpeɣli ɛ-cɔlɔ lɩm nɔɔ. 22 Pɩkɛdaa lɛ, Ɛsɔ ɖɩsɛyɛ naɖɩyɛ taa ñʋʋdʋ sɔsɔ weyi payaɣ se Yayiruusi yɔ, ɛtalɩ Yesu cɔlɔ nɛ eluŋ ɛ-tɛɛ nɛ 23 ewiini-i cɔɔɔ se ewolo ɛtɩnɩ ɛ-pɩɣa peliɣa yɔɔ nesi nɛ kɔ-yɔɔ cɛ. Mbʋ́ pʋyɔɔ yɔ, kacaɣ sɩbʋ. 24 Peeɖe ɛ nɛ Yesu pakpaɣ nʋmɔʋ se powoki ɛ-tɛ. Pɛɖɛɣaɣ lɛ, ɛyáa sakɩyɛ tɩŋɩɣ pa-wayɩ nɛ pañɩkɩɣ ɖama nɛ pɛkpɛndɩɣnɩ Yesu. 25 Halʋ nɔɔyʋ kɛwɛ ɛyáa taa peeɖe. Calɩm kɛwɛɛ pikpeŋni-i nɛ pɩcɛyɩɣ-ɩ pɩŋŋ pɩnzɩ hiu nɛ naalɛ yɔ. 26 Ɛcɔ fɛɖaa ndɩ ndɩ tɛ nɛ pɩnɩ-ɩ nɛ ɛwɛɛkɩ e-liidiye tɩŋa. Ɛlɛ́, ɛ-kʋdɔŋ tapasɩ, kɩtɛzaɣ kpaʋ ɖoŋ kɩkpaʋ. 27 Ɛyáa yɔɔdaɣ ɛzɩma mbʋ́ Yesu lakaɣ nɛ kʋdɔndɩnaa yɔɔ cɛkɩ yɔ lɛ, halʋ ɛnʋ ɛnɩɩ. Peeɖe ɛsʋ ɛyáa taa nɛ ewolo etukuni Yesu toko nɛ ɛ-wayɩ. 28 Mbʋ́ pʋyɔɔ yɔ, ɛmaɣzaɣ se: «Yee maatɩɩpɩzaɣ se mehiɣ e-toko nɛ montukuna yɔ, mɔ-yɔɔ kɛcɛba.» 29 Calɩm mbʋ́ pikpeŋaɣnɩ-ɩ yɔ, pɩtɩŋ pɩsɩŋ nɛ ɛna se ɛ-yɔɔ cɛba. 30 Ɛlɛ́, Yesu na kpaagbaa se ɖoŋ nɩɩyɩ lɩ ɛ-yɔɔ nɛ ɛkɛzɩ ɛ-tɩ nɛ ɛyáa samaɣ yɔɔ nɛ ɛpɔzɩ-wɛ se: «Atukuni mon-toko?» 31 Ɛ-tɔmkpɛlɩkɩyaa cosi-i se: «Ŋnaɣ ɛyáa ñɩkɩɣ-ŋ ḿbʋ́ nɛ ŋɖaɣnɩɣ pɔzʋʋ se atukuni-ŋ?» 32 Peeɖe Yesu cɔnɩ ɛ-cɔlɔ kpɛɛɛ se ɛna weyi etukuni-i yɔ. 33 Halʋ ɛnʋ ɛna mbʋ́ pɩlabɩ-ɩ yɔ lɛ, ɛ-laŋɩyɛ maa nɛ ɛ-nandʋ pazɩ paʋ nɛ ewolo eluŋ Yesu tɛɛ nɛ ɛkɛdɩ-ɩ ɛ-tɔm tɩŋa. 34 Ɛlɛ́, Yesu heyi-i se: «Mɛn-pɛlɛ! Lidaʋ ŋgʋ́ ŋwɛnɩ mɔ-yɔɔ yɔ, kɩyabɩ ña-ñʋʋ. Kpemni laŋhɛzɩyɛ, ña-kʋdɔŋ cɛba kɩtɩŋa.» 35 Yesu yɔɔdaɣ ḿbʋ́ lɛ, petiyi nabɛyɛ nɛ Yayiruusi ɛnʋ ɛ-tɛ se powolo peheyi-i se: «Ña-pɩɣa peleɣa sɩba, taaɖʋ Wɩlɩyʋ kʋñɔŋ yem falaa.» 36 Yesu nɩ ḿbʋ́ lɛ, eheyi Yayiruusi se: «Ña-laŋɩyɛ ɛtaamaa, ñɩtɩ ŋwɛnɩ lidaʋ.» 37 Peeɖe ɛya Pɩyɛ nɛ Yakubu nɛ e-neu Yohanɛɛsɩ se pasɩɩ-ɩ. Ɛlɛ́, eteyele se lɛlaa ɛsɩɩ-ɩ. 38 Patalɩ Yayiruusi ɛnʋ ɛ-tɛ lɛ, Yesu maɣnɩ ɛyáa makaɣ kubusi nɛ pependiɣ nɛ pewiliɣ. 39 Ɛlɛ́, ɛsʋʋ ɖɩɣa nɛ ɛpɔzɩ-wɛ se: «Pɩlabɩ ɛzɩma nɛ ipeendiɣ nɛ iwiɣ ḿbʋ́? Pɩɣa kanɛ koɖou kuɖou, katasɩ kɩsɩbʋ.» 40 Ɛlɛ́, powoŋ-i. Peeɖe ɛɖɔɔnɩ patɩŋa nɛ palɩɩnɩ awayɩ nɛ ɛ́yáa pɩɣa caa nɛ ko-ɖoo nɛ ɛ-tɔmkpɛlɩkɩyaa ḿbá pa-naadozo nɛ ɛ nɛ wɛ pasʋʋ ɖenɖe pɛhɛzɩ pɩɣa ŋ́gá yɔ. 41 Peeɖe Yesu ɖɔkɩ ke-nesi taa nɛ ɛtɔ se: «Taliita kum.» Pʋ-tɔbʋʋ se: «Pɩɣa ña! Meheyiɣ-ŋ se ŋkʋyɩ.» 42 Kpaagbaa ḿbʋ́ lɛ, pɩɣa peleɣa ŋ́gá kakʋyɩ kɔɖɔ nɛ kapazɩ ɖɔm. Kaawɛnɩ pɩnzɩ hiu nɛ naalɛ. Ɛyáa mbá paawɛ peeɖe yɔ, pɩɖɩɣzɩ-wɛ pɩŋŋ. 43 Ɛlɛ́, Yesu paɣ́ ka-ñɩma se: «Itaala nɛ nɔɔyʋ nɩɩ tɔm tʋnɛ.» Pʋwayɩ lɛ, eheyi-wɛ se: «Iha-kɛ tɔɔnaɣ.» |