Maarkɩ 15 - New TestamentPowona Yesu Room wiyaʋ Pilaatɩ tɛ (Mat 27.1-2; 11-26; Luk 23.1-5, 13-25; Yoh 18.28-19.16) 1 Pakpa Yesu nɛ kife tanaŋ cu lɛ, tɔm hʋyaa tɩŋa payɩ kpeɣli ɖama se pala lɩmaɣza. Ḿbá yɔ: Yuda ñɩma cɔjɔnaa sɔsaa nɛ pɛ-ŋgbɛyɛ taa sɔsaa nɛ pa-paɣtʋ wɩlɩyaa. Pɛtɛma lɛ, pɔhɔkɩ Yesu nɛ powoni pɛcɛlɩ Room wiyaʋ Pilaatɩ. 2 Peeɖe ɛ́lɛ́ ñɔpɔzɩ-ɩ se: «Ña lɛ Yuda ñɩma wiyaʋ sɔsɔ naa we?» Yesu cosi-i se: «Ñɔyɔɔdʋʋnɩ ḿbʋ́.» 3 Peeɖe Yuda ñɩma cɔjɔnaa sɔsaa kʋyɩ ɛ-yɔɔ se ɛyʋsɩ tɔm sakɩyɛ. 4 Ɛlɛ́, Pilaatɩ tasɩ-ɩ pɔzʋʋ se: «Ña-tɩ tɩŋa ŋnɩ ɛzɩma mbʋ́ pakʋyʋʋ ñɔ-yɔɔ yɔ. Ŋfɛyɩnɩ natʋyʋ se ŋcosuu yaa we?» 5 Ɛlɛ́, Yesu suma, ɛtatasɩ cosuu natʋyʋ. Peeɖe pɩɖɩɣzɩ Pilaatɩ yem ɖiɣ ɖiɣ. Pakʋ Yesu tɔm nɛ paɖʋ se pakʋʋ-ɩ 6 Paa Yuda ñɩma Paska Kazandʋ ndʋ́ lɛ, Pilaatɩ lɩzɩɣ salaka tɩnaa taa kʋɖʋm weyi ɛyáa samaɣ sɔɔlaa se palɩzɩ-ɩ yɔ. 7 Ŋgʋ́, abalʋ weyi payaɣ se Baraabaasɩ yɔ nɛ ɛyáa nabɛyɛ paawɛ salaka taa. Mbʋ́ pʋyɔɔ yɔ, paakʋ ɛyʋ nɔɔyʋ alɩwaatʋ ndʋ́ tɩ-taa ɛyáa kalɩ Room wiyaʋ wayɩ yɔ. 8 Peeɖe ɛyáa samaɣ kʋyaa nɛ powolo pana Pilaatɩ se ɛlabɩ-wɛ ɛzɩ ɛtɩɩlakʋʋ yɔ. 9 Ɛ́lɛ́ ñɔpɔzɩ-wɛ se: «Ɩcaɣ se meyele Yuda ñɩma wiyaʋ sɔsɔ ɛnɛ yaa we?» 10 Ɛpɔzɩ-wɛ ḿbʋ́, mbʋ́ pʋyɔɔ yɔ, ɛnawa se ɛsɩsɛmɩyɛ cɔjɔnaa sɔsaa laba nɛ pakpa Yesu nɛ powoni-i ɛ-cɔlɔ. 11 Cɔjɔnaa sɔsaa ḿbá pasazaɣnɩ ɛyáa se pɔtɔ se mbʋ́ ɛzɩ Pilaatɩ keyele Yesu lɛ, ɛlɩzɩ-wɛ Baraabaasɩ salaka taa. 12 Peeɖe Pilaatɩ tasɩ ɛyáa samaɣ pɔzʋʋ se: «Ɛbɛ ɩcaɣ se mala ɛyʋ weyi ɩyaɣ se Yuda ñɩma wiyaʋ sɔsɔ yɔ?» 13 Ɛlɛ́, pama kubusi se: «Kam-ɩ kaamaŋkaɣ yɔɔ!» 14 Ɛtasɩ-wɛ pɔzʋʋ se: «Ɛlɛ́ kɩwɛɛkɩm mbʋ́ kpem ɛlaba?» Ɛlɛ́, pɛtɛzɩ kubusi mabʋ ɖoŋ se: «Kam-ɩ kaamaŋkaɣ yɔɔ!» 15 Pilaatɩ sɔɔlaa se ɛyáa samaɣ taa ɛla leleŋ. Pʋ-yɔɔ ɛlɩzɩ Baraabaasɩ nɛ eyele polu Yesu agbazɛɛ nɛ ɛkpaɣ-ɩ ɛcɛlɩ-wɛ se powoni-i pakam-ɩ kaamaŋkaɣ yɔɔ. Sɔɔjanaa pɛŋ Yesu tɛtɛ (Mat 27.27-31; Yoh 19.2-3) 16 Pʋwayɩ lɛ, sɔɔjanaa woni Yesu Pilaatɩ tɛ kadaɣ taa. Peeɖe paya ɖama patɩŋa 17 nɛ posuu-i awiitoko kɩsɛmʋʋ nakʋyʋ waaa nɛ palʋʋ awiya hulaɣ nɛ sɔɔɔ nɛ papam-ɩ. 18 Ɛlɛ́, papazɩ-ɩ sɛʋ nɛ woŋa se: «Yuda ñɩma wiyaʋ sɔsɔ! Sɛɛ ɖeu!» 19 Ɛlɛ́, pamakɩ ɛ-ñʋʋ taa ɖaʋ nɛ pɔtɔʋ ɛ-yɔɔ ndaatʋ nɛ poluŋuu ɛ-ɛsɩndaa. 20 Pɛtɛm-ɩ tɛtɛ pɛŋʋʋ ḿbʋ́ lɛ, pɔhɔzɩ toko kɩsɛmʋʋ ŋ́gʋ́ nɛ papɩsɩnɩ e-wondu posuu-i. Pʋwayɩ lɛ, pakpaɣ-ɩ se powokini tɛtʋ wayɩ nɛ pakam-ɩ kaamaŋkaɣ yɔɔ. Sɔɔjanaa kam Yesu kaamaŋkaɣ yɔɔ (Mat 27.32-44; Luk 23.26-43; Yoh 19.17-27) 21 Pɛɖɛɣaɣnɩ Yesu lɛ, pakatɩ Alɛksandrɩ nɛ Ruufuusi pa-caa, ɛ-tɛ Siirɛɛnɩ egeetiye taa, payaɣ-ɩ se Siimɔɔ. Ɛɛlɩnɩ tɛyɛ yɔɔ nɛ ekpeŋ. Peeɖe sɔɔjanaa kpa-ɩ nɛ ɖoŋ se ɛhɔɔlɩ Yesu kaamaŋkaɣ. 22 Powoni Yesu ɖenɖe payaɣ se Goligota yɔ, pʋ-tɔbʋʋ se «ñʋmbɔɔyaɣ lone». 23 Patanɩ Yesu lɛ, pɛcɛlɩ-ɩ sʋlʋm mbʋ́ pesidi pɩ-taa kɔyɛ nɖɩ́ payaɣ se miiri yɔ se ɛñɔɔ. Ɛlɛ́, ekizi. 24 Peeɖe pakam-ɩ kaamaŋkaɣ yɔɔ. Pɛtɛma lɛ, papazɩ ɖama e-wondu tayʋʋ. Peeɖe paɖʋ miika se pana ŋgʋ́ paa weyi ɛkpakɩɣ yɔ. 25 Pakaŋaɣ-ɩ lɛ, pɩmakaɣ ɛzɩ tanaŋ tɛɛ ñɩɣtʋ nakʋ yɔ. 26 Paama kpata nakʋyʋ yɔɔ mbʋ́ pʋ-yɔɔ pakam-ɩ yɔ nɛ paka kaamaŋkaɣ yɔɔ ɛ-ñʋʋ taa. Pamawa se: «Ɛnɛ lɛ Yuda ñɩma wiyaʋ sɔsɔ.» 27 Paakam ɖɔɖɔ mɩ́láa naalɛ nabɛyɛ ɛ-cɔlɔ: lɛlʋ ɛ-nɩwaŋ yɔɔ nɛ lɛlʋ ɛ-nɩmɩyɛ yɔɔ. [ 28 Ḿbʋ́ tɔm ndʋ́ paama Ɛsɔtɔm Takayaɣ taa yɔ, tɩlaba. Ńdʋ́ lɛ se: «Azaɣ́a hɛkʋ taa paɖʋʋ-ɩ.»] 29 Nʋmɔɖɔnaa mbá pɛɖɛɣaɣnɩ peeɖe yɔ, pekpiɣyiɣ-i ñʋŋ nɛ patʋʋ-ɩ se: «Hei! Weyi ña ŋtɔŋaɣ se ŋyɔkʋʋ Ɛsɔ ɖɩɣa nɛ ŋɖaɣnɩ-kɛ maʋ nɛ kɩyakɩŋ naadozo yɔ, 30 ya ña-maɣmaɣ ña-ñʋʋ! Tibini kaamaŋkaɣ yɔɔ nɛ ɖɩna.» 31 Yuda ñɩma cɔjɔnaa sɔsaa nɛ pa-paɣtʋ wɩlɩyaa pɛpɛŋaɣ Yesu tɛtɛ ḿbʋ́ ɖɔɖɔ nɛ pɔpɔzʋʋ ɖama se: «Ɛyabɩ lɛlaa ñʋʋ ɛzɩma tɛ ɛɛpɩzɩɣ se ɛya ɛ-maɣmaɣ ɛ-ñɩŋgʋ! 32 Weyi ña ŋheyiɣ se ña lɛ Izrɛɛlɩ wiyaʋ sɔsɔ nɛ Weyi Ɛsɔ Lɩzaa Yɔ, yee ŋtibini kaamaŋkaɣ yɔɔ nɛ ɖɩna yɔ, pʋbʋ ɖɩwɛɣnɩ lidaʋ ñɔ-yɔɔ.» Halɩ pɩkpɛndɩnɩ mbá paakam-wɛ ɛ-cɔlɔ yɔ nɛ patʋʋ-ɩ ɖɔɖɔ. Yesu sɩm tɔm (Mat 27.45-56; Luk 23.44-49; Yoh 19.28-30) 33 Puwiye ńɖɩ́ wɩsɩ siɣaa lɛ, cɩkpɛndʋʋ yu ɛjaɖɛ tɩŋa kpemm nɛ pʋkɔɔ pɩsɩɩnɩ ɖanaɣ ñɩɣtʋ naadozo. 34 Peeɖe Yesu mabɩ kubusi se: «Eloyi, Eloyi! Lamaa sapaktanɩɩ?» Pʋ-tɔbʋʋ se: «Mɛ-Ɛsɔ, mɛ-Ɛsɔ! Pɩlabɩ ɛzɩma nɛ ŋlɔ-m?» 35 Mbá paawɛ peeɖe yɔ, pa-taa lɛlaa nɩ ḿbʋ́ lɛ, pɔtɔŋ se: «Ɩnɩɩ ɛyaɣʋ Elii!» 36 Peeɖe pa-taa lɛlʋ sewa nɛ ewolo ɛkpaɣ kʋca nɛ ewoni elii sʋlʋm kɩñɩŋɩm nabʋyʋ taa nɛ ɛtʋʋ ɖaʋ nakʋyʋ nɔɔ taa nɛ ɛwɩlɩɣ Yesu se ɛmʋzɩ nɛ ɛtɔŋ se: «Iyele ɖɩna se Elii kɔŋ etisi-i yaa we?» 37 Pʋwayɩ lɛ, Yesu ma kubuka ɖoŋ nɛ ɛhɛɛ. 38 Alɩwaatʋ ńdʋ́ tɩ-yɔɔ pɩsaʋ sɔsɔʋ ŋgʋ́ paakaɣ Ɛsɔ ɖɩɣa taa yɔ, kɩkpaɣnɩ ñʋʋ taa faɣʋ nɛ kitii kɩkaɖɩnɩ pɩ-tɛɛ hɔɔlɩŋ naalɛ. 39 Room sɔɔja sɔsɔ weyi ɛɛsɩŋ Yesu ɛsɩndaa yɔ, ɛna ɛzɩma mbʋ́ Yesu mabɩ kubuka nɛ ɛhɛɛ yɔ lɛ, ɛtɔ se: «Toovenim, ɛnɛ ɛɛkɛ Ɛsɔ Pɩyalʋ!» 40 Halaa nabɛyɛ kɛwɛ poliŋ nɛ pɔcɔŋna ɖɔɖɔ. Pa-taa lɛlaa yɔ: Yoosi nɛ Yakubu cikpelu po-ɖoo Maarɩɩ nɛ Magdala tɛtʋ taa Maarɩɩ nɛ Saloomee. 41 Halaa ḿbá patɩŋaɣnɩ Yesu alɩwaatʋ ndʋ́ ɛɛwɛ Galilee egeetiye taa yɔ nɛ pasɩŋnɩ-ɩ. Halaa lɛlaa sakɩyɛ mbá ɛ nɛ wɛ paawobi Yeruusalɛm yɔ, paawɛ peeɖe ɖɔɖɔ. Yozɛɛfʋ pim Yesu (Mat 27.57-61; Luk 23.50-56; Yoh 19.38-42) 42 Kɩyakʋ ŋgʋ́ pʋwɛɛ se pɔñɔɔzɩ pɩtɩŋa payɩ nɛ pʋcɔ kife kɩyakʋ kɩhɛzʋʋ yɔ ki-wiye wɩsɩ tibi ɖʋʋ lɛ, 43 Ariimatee tʋ weyi payaɣ se Yozɛɛfʋ, ɛkɛ Yuda ñɩma tɔm hʋyaa taa lɛlʋ nɛ ɛɛɖaŋ Ɛsɔ Kewiyaɣ nɛ ɛyáa tɩŋa ñaŋ-ɩ yɔ, ɛkaɖɩ nɛ ewolo Pilaatɩ cɔlɔ. Ewoba lɛ, etendi-i se yee etisiɣ yɔ, ɛcɛlɩ-ɩ Yesu nɛ ewona epi. 44 Peeɖe pɩɖɩɣzɩ Pilaatɩ se Yesu tɛm sɩbʋ, ɛlɛ́ ɛ́yáa sɔɔja sɔsɔ nɛ ɛpɔzɩ-ɩ se: «Yesu sɩbʋ yɔ, pɩtɛm leɖuu naa we?» 45 Sɔɔja ɛnʋ ecosi-i lɛ, ɛha Yozɛɛfʋ nʋmɔʋ se ewolo etisi-i. 46 Pʋwayɩ lɛ, ɛ́lɛ́ ya pɩsaʋ kɩfalʋʋ kʋhʋlʋmʋʋ nakʋyʋ nɛ etisi Yesu nɛ kaamaŋkaɣ yɔɔ nɛ ɛhɔkɩ-ɩ kɩ-taa nɛ ewoni-i epi pɩlaʋ ŋgʋ́ pɛcɛsɩ ɛwaɣ taa yɔ kɩ-taa nɛ epilisi pɩyɛ sɔsɔɖɛ naɖɩyɛ nɛ ɛɖɩɣ kʋ-nɔɔ. 47 Yoosi nɛ Yakubu po-ɖoo Maarɩɩ nɛ Magdala Maarɩɩ paawɛɛ nɛ pɔcɔŋnɩ ɖenɖe pepiŋaɣ-ɩ yɔ. |