Maarkɩ 11 - New TestamentYesu sʋ Yeruusalɛm tɛtʋ taa (Mat 21.1-11; Luk 19.28-40; Yoh 12.12-19) 1 Yesu nɛ ɛyáa samaɣ ŋgá katɩŋaɣ-ɩ yɔ, pɔñɔtɩnɩ Yeruusalɛm Bɛtfaajee nɛ Betaanii pɔ-hɔɔlʋʋ taa Somiŋ Pʋʋ liu tɛɛ lɛ, etiyi ɛ-tɔmkpɛlɩkɩyaa naalɛ se: 2 «Iwolo tɛtʋ cikpetu ndʋ́ tɩwɛ ɛsɩndaa yɔ tɩ-taa. Ɩtalɩɣ lɛ, ɩmakɩnɩ paɖɩ kpaŋaɣ piye naɖɩyɛ. Nɔɔyʋ tacaɣdɩ ɖɩ-yɔɔ. Ɩkpɛzɩ-ɖɩ nɛ ɩkɔna. 3 Yee nɔɔyʋ ɛpɔzɩ-mɩ se: ‹Pɩlabɩ ɛzɩma nɛ ɩkpɛzɩɣ-ɖɩ› lɛ, iheyi-i se: ‹Kɩpaɣlʋ liu wɛ-ɖɩ, ɛpɩsɩɣnɩ-ɖɩ lɛɛlɛɛyɔ.› » 4 Ɛ-tɔmkpɛlɩkɩyaa woba lɛ, pamaɣnɩ paɖɩ-ɖɩ nʋmɔʋ nɔɔ ɖɩɣa nakɛyɛ nɔnɔɔ taa nɛ pacaɣ se pɛkpɛzɩ-ɖɩ. 5 Ɛlɛ́, mbá pɛwɛ peeɖe yɔ, pa-taa nabɛyɛ pɔzɩ-wɛ se: «Ɛbɛ ɩlakɩ peeɖe yɔ? Ɩkpɛzɩɣ kpaŋaɣ piye ńɖɩ́ se ɩlabɩnɩ we?» 6 Ɛlɛ́, pocosi ɛzɩ Yesu keheyuu-wɛ yɔ nɛ peyebi-wɛ nɛ pɛɖɛnɩ-ɖɩ. 7 Patanɩ kpaŋaɣ piye ńɖɩ́ Yesu cɔlɔ lɛ, pɔhɔzɩ po-wondu lɛɛtʋ nɛ pɔpɔ ɖɩ-yɔɔ nɛ ɛkpa ɛcaɣ. 8 Ɛyáa sakɩyɛ hɔzɩ po-wondu lɛɛtʋ nɛ pɔpɔ nʋmɔʋ taa nɛ lɛlaa pɔ hatʋ ndʋ́ paacɛbɩ hayɩm taa yɔ se paɖʋ-ɩ hɩɖɛ. 9 Mbá paawɛ Yesu ɛsɩndaa nɛ mbá patɩŋaɣ ɛ-wayɩ yɔ, pokou se: «Ozaana! Ɛsɔ ɛ́wazɩ weyi ɛkɔŋ Kɩpaɣlʋ lone taa yɔ ɛ-yɔɔ. 10 Ɛsɔ ɛ́wazɩ weyi ɛtɔkɩ ɖɔ-cɔzɔ Daaviidi kewiyaɣ yɔ ɛ-yɔɔ. Ozaana! Đooo ɛsɔdaa.» 11 Yesu nɛ ɛ-tɔmkpɛlɩkɩyaa hiu nɛ naalɛ patalɩ Yeruusalɛm lɛ, ɛsʋʋ Ɛsɔ ɖɩɣa taa. Ɛna mbʋ́ pɩtɩŋa payɩ pɩlakaɣ yɔ lɛ, ɛlɩɩ nɛ pɛɖɛɛ Betaanii. Mbʋ́ pʋyɔɔ yɔ, wɩsɩ kpeŋaɣ. Hiyuú ŋgʋ́ kɩɩlʋlʋʋ yɔ (Mat 21.18-19) 12 Tɛʋ fema nɛ palɩɩ Betaanii tɛtʋ wayɩ lɛ, ñɔɔsɩ wɩɣ Yesu. 13 Peeɖe elosi hiyuú poliŋ taa, kʋlɔba kpemm nɛ ewolo kʋ-cɔlɔ se ɛna se yee kʋlʋlaa yɔ, ɛtɔɔ. Ɛtalɩ kɩ-tɛɛ lɛ, ɛmaɣnɩ hatʋ ɖeke, kɩtalʋlɩ. Mbʋ́ pʋyɔɔ yɔ, pɩtɛkɛ kʋ-lʋlʋʋ alɩwaatʋ. 14 Peeɖe Yesu wɩlɩ-kʋ kpalʋʋ se: «Ña! Ŋtasɩ lʋlʋʋ nɛ nɔɔyʋ tɔɔ lɛ, maana.» Ɛlɛ́, ɛ-tɔmkpɛlɩkɩyaa nɩɩ tɔm ńdʋ́ ḿbʋ́. Yesu sʋ Ɛsɔ ɖɩɣa taa (Mat 21.12-17; Luk 19.45-48; Yoh 2.13-22) 15 Papɩsɩ Yeruusalɛm lɛ, Yesu sʋʋ Ɛsɔ ɖɩɣa kadaɣ taa nɛ ɛpazɩ ɖɔɔnʋʋ pɛdɩyaa nɛ yaɖaa. Etuzi liidiye yɔkɩyaa taabɩlɩnaa nɛ halikukunaa pɛdɩyaa kpelisi nɛ ɛpɛɖɩ. 16 Etetisiɣ se nɔɔyʋ ɛsɩɣlɩ pʋyʋ nɛ ɛtɩŋnɩ Ɛsɔ ɖɩɣa taa. 17 Peeɖe eheyi mbá pɛwɛ peeɖe yɔ se: «Ɛsɔ yɔɔdaa nɛ pama ɛ-takayaɣ taa se: ‹Man-ɖɩɣa kɛɣnɩ ajɛya kpeekpe Ɛsɔ ɖɩsɛyɛ.› Ŋgʋ́, mɩ mɩpɩsɩ-kɛ mɩ́láa ñɩŋga.» 18 Yuda ñɩma cɔjɔnaa sɔsaa nɛ pa-paɣtʋ wɩlɩyaa panɩ ḿbʋ́ lɛ, pañɩnɩɣ nʋmɔʋ ŋgʋ́ paatɩŋ nɛ pakʋ-ɩ yɔ. Ŋgʋ́ peseɣaɣ-ɩ, mbʋ́ pʋyɔɔ yɔ, tɔm ndʋ́ ɛyɔɔdaɣ yɔ, tɩɩkɛdɩnɩ ɛyáa samaɣ pɩtɩɩfɛyɩ. 19 Wɩsɩ wokaɣ ɖʋʋ lɛ, Yesu nɛ ɛ-tɔmkpɛlɩkɩyaa pakʋyɩ Yeruusalɛm peeɖe nɛ pɛɖɛɛ. Lidaʋ nɛ Ɛsɔ sɛʋ pɔ-tɔm (Mat 21.20-22) 20 Tɛʋ fem tanaŋ tɛɛ nɛ pɛɖɛɣ lɛ, ɛ-tɔmkpɛlɩkɩyaa na hiyuú ŋ́gʋ́, kɩwɩlɩ wɔɔɔ nɛ pɩkpɛndɩnɩ ki-lila. 21 Peeɖe Pɩyɛ tɔzɩ mbʋ́ pɩɩlaba yɔ pʋ-yɔɔ nɛ ɛtɔ se: «Wɩlɩyʋ, cɔnɩ ŋna hiyuú ŋgʋ́ ŋwɩlɩ kpalʋʋ yɔ kɩwɩlʋʋ wɔɔɔ.» 22 Ɛlɛ́, Yesu heyi ɛ-tɔmkpɛlɩkɩyaa se: «Ɩwɛnɩ lidaʋ Ɛsɔ yɔɔ. 23 Toovenim lɛ, meheyiɣ-mɩ se yee nɔɔyʋ eheyi pʋʋ kʋnɛ se: ‹Pʋʋ ña, kpɛzɩ nɛ ŋwolo ŋtɔlɩ teŋgu taa› nɛ yee ɛwɛnɩ lidaʋ se ndʋ́ ɛyɔɔdaa yɔ tɩlakɩ nɛ ɛtapʋtɩ ɛ-taa yɔ, pɩlakɩ ḿbʋ́ ɖɔɖɔ. 24 Pʋ-yɔɔ meheyiɣ-mɩ se mbʋ́ pɩtɩŋa ɩsʋlʋmʋʋ Ɛsɔ yɔ, ɩwɛnɩ lidaʋ se paa pɩɩla ɛzɩma, ɛhaɣ-mɩ-pʋ. Pʋbʋ, pɩlakɩ ḿbʋ́ ɖɔɖɔ. 25 Alɩwaatʋ ndʋ́ ɩkʋyʋʋ se ɩsɛɣ Ɛsɔ yɔ, yee mɩ nɛ nɔɔyʋ ɩwɛ tɔm yɔ, ikpeɣ pʋdʋ. Peeɖe mɩ-Caa weyi ɛwɛ ɛsɔdaa yɔ, ekpeɣiɣ-mɩ mɩ-kɩwɛɛkɩm ɖɔɖɔ. [ 26 Ɛlɛ́, yee lɛlaa ɛyʋsʋʋnɩ-mɩ nɛ iikpeɣiɣ-wɛ pa-kɩwɛɛkɩm yɔ, mɩ-Caa weyi ɛwɛ ɛsɔdaa yɔ, ɛ́lɛ́ eekpeɣiɣ-mɩ ɖɔɖɔ mɩ-ñɩmbʋ.]» Aha Yesu waɖɛ se ɛla mbʋ́ ɛlakɩ yɔ? (Mat 21.23-27; Luk 20.1-8) 27 Pʋwayɩ lɛ, Yesu nɛ ɛ-tɔmkpɛlɩkɩyaa patasɩ Yeruusalɛm pɩsʋʋ. Patalaa lɛ, ɛsʋʋ Ɛsɔ ɖɩɣa kadaɣ taa nɛ ɛcɔʋ. Peeɖe Yuda ñɩma cɔjɔnaa sɔsaa nɛ pa-paɣtʋ wɩlɩyaa nɛ pɛ-ŋgbɛyɛ taa sɔsaa powobi ɛ-cɔlɔ 28 nɛ pɔpɔzɩ-ɩ se: «Aha-ŋ nɔɔ se ŋɖɔɔnɩ ɛyáa? Aha-ŋ waɖɛ se ŋla ḿbʋ́?» 29 Peeɖe Yesu heyi-wɛ se: «Mɔnpɔzʋʋ-mɩ tɔm kʋɖʋmtʋ koŋ nɛ yee icosi-m lɛ, meheyi-mɩ weyi ɛha-m nɔɔ se mala ḿbʋ́ yɔ. 30 Mɔnpɔzʋʋ-mɩ se: atiyi Yohanɛɛsɩ se ɛla ɛyáa lɩm sɔʋ sɔnzɩ? Ɛsɔ yaa ɛyáa tiyini-i? Icosi nɛ manɩɩ.» 31 Ɛlɛ́, pɔyɔɔdɩnɩ ɖama se: «Yee ɖicosaa se: ‹Ɛsɔ tiyini-i› yɔ, ɛpɔzʋʋ-ɖʋ se: ‹Nɛ pɩla ɛzɩma ɖɩtamʋ ɛ-tɔm yɔ?› 32 Ŋgʋ́, ɖɩtɔm se: ‹Ɛyáa tiyini-i› yɔ, pɩɩlakɩ.» Pahʋwaɣ pa-taa ḿbʋ́, mbʋ́ pʋyɔɔ yɔ, peseɣaɣ ɛyáa mbá paawɛ peeɖe yɔ, mbʋ́ pʋyɔɔ yɔ, paba sɩm Yohanɛɛsɩ se ɛkɛ náyʋ siŋŋ. 33 Ɛlɛ́, papɩsɩnɩ Yesu se: «Đɩɩsɩŋ.» Peeɖe ɛ́lɛ́ ñocosi-wɛ se: «Yee ḿbʋ́ ma ɖɔɖɔ maaheyiɣ-mɩ weyi ɛha-m nɔɔ ŋ́gá yɔ.» |