Maarkɩ 1 - New TestamentLɩm Sɔʋ Sɔnzɩ Laɖʋ Yohanɛɛsɩ susaa se: «Ɩlɛɣzɩ mɩ-laŋa!» (Mat 3.1-12; Luk 3.1-18; Yoh 1.19-28) 1 Ɩna ɛzɩma mbʋ́ Ɛsɔ Pɩyalʋ Yesu Krɩstʋ Laŋhɛzɩyɛ Tɔm pazaa yɔ. 2 Tɩpazɩ ɛzɩ pamaʋ náyʋ Ezaayii Takayaɣ taa yɔ. Pamawa se Ɛsɔ heyi ɛ-Pɩyalʋ se: «Na, mancalɩɣ men-tiyiyu tiyuu nɛ ɛñɔɔzɩ ña-nʋmɔʋ.» 3 Tɩpazɩ ɖɔɖɔ ɛzɩ pamaʋ ka-taa se nɔɔyʋ susuu lakʋ taa se: Pɔñɔɔzɩ Kɩpaɣlʋ nʋmɔʋ! Pala nɛ kʋtʋʋzɩ camɩyɛ» yɔ. 4 Ḿbʋ́ Yohanɛɛsɩ kɔm ɛwɛɛ lakʋ taa nɛ ɛyáa woki ɛ-cɔlɔ nɛ esusuu-wɛ se pɛlɛɣzɩ wɛtʋ nɛ ɛlabɩ-wɛ lɩm sɔʋ sɔnzɩ nɛ Ɛsɔ kpeɣ-wɛ pa-kɩwɛɛkɩm. 5 Peeɖe Yeruusalɛm ñɩma tɩŋa nɛ Yudee egeetiye taa hɔɔlɩŋ tɩŋa taa ñɩma powokaɣ ɛ-cɔlɔ nɛ paa weyi ɛyɔɔdʋʋ ɛ-kɩwɛɛkɩm mbʋ́ ɛlaba yɔ nɛ ɛlakɩ-wɛ lɩm sɔʋ sɔnzɩ Yɔɔrdaŋ pɔɔ taa. 6 Yohanɛɛsɩ ɛnʋ, esuwaɣ toko ŋgʋ́ palʋnɩ kpaŋnɔ siɣá naalɛ tʋ hʋndʋ yɔ. Ɛtɔɔlaɣ tambaɖɛ nɖɩ́ palabɩnɩ tɔnɛ yɔ, nakaŋ nɛ tɩŋ num ɛtɔkaɣ. 7 Ɛyɔɔdɩ ɛyáa samaɣ taa se: «Ma-wayɩ lɛ, weyi ɛkɔŋ yɔ, ɛkɩlɩ-m. Mantatɩɩmʋna se moluŋ nɛ mɛyɛɖɩ ɛ-naataŋgbala tɔnzɩ. 8 Ma lɛ, malakɩ-mɩ lɩm sɔʋ sɔnzɩ, ɛnʋ lɛ, ɛkɔŋ-mɩ labʋ sɔnzɩ nɛ Fezuu Kiɖeɖeu ɖoŋ.» Yesu lɩm sɔʋ sɔnzɩ tɔm (Mat 3.13-4.11; Luk 3.21-22; 4.1-13) 9 Alɩwaatʋ ńdʋ́ tɩ-taa ɖɔɖɔ Yesu lɩnɩ Nazarɛɛtɩ, Galilee egeetiye taa nɛ ewolo Yohanɛɛsɩ cɔlɔ Yɔɔrdaŋ pɔɔ taa nɛ ɛ́lɛ́ labɩ-ɩ lɩm sɔʋ sɔnzɩ. 10 Yesu lɩɣaɣnɩ lɩm taa lɛ, ɛna ɛsɔdaa tʋlaa nɛ Fezuu Kiɖeɖeu lɩɩ nɛ kitiki ɛ-yɔɔ ɛzɩ halikuku yɔ. 11 Peeɖe pʋyɔɔdaɣnɩ ɛsɔdaa se: «Ña lɛ man-Pɩyalʋ kʋsɔɔlʋ, maahʋʋ ñɔ-yɔɔ kaʋ.» Eleeu takɩ Yesu lakʋ taa 12 Kpaagbaa ḿbʋ́ lɛ, Fezuu Kiɖeɖeu ŋ́gʋ́ kitolisi-i nɛ ɛɖɛɛ lakʋ taa. 13 Ɛcaɣ peeɖe kɩyakɩŋ nɩɩnaza nɛ Satanɩ wolo ɛ-cɔlɔ nɛ ɛtakɩɣ-ɩ. Tɛtɛ kpɩna hɛkʋ taa ɛɛwɛɛ nɛ Ɛsɔ tiyiyaa wolo ɛ-cɔlɔ nɛ pasɩŋnɩ-ɩ. Yesu heyi ɛyáa Ɛsɔtɔm Galilee egeetiye taa (Mat 4.12-22; Luk 4.14-15; 5.1-11) 14 Paɖʋ Yohanɛɛsɩ salaka wayɩ lɛ, Yesu wolo Galilee egeetiye taa nɛ ɛpazɩ ɛyáa heyuu Ɛsɔ Laŋhɛzɩyɛ Tɔm. 15 Ɛtɔŋaɣ se: «Lɛɛlɛɛyɔ, alɩwaatʋ talaa se Ɛsɔ Kewiyaɣ ɛkɔɔ. Pʋ-yɔɔ lɛ, ɩlɛɣzɩ wɛtʋ nɛ itisi ɛ-Laŋhɛzɩyɛ Tɔm.» Yesu ya ɛ-kajalaɣ tiyiyaa 16 Kɩyakʋ nakʋyʋ Yesu cɔlaɣ Galilee teŋgu. Pɩkɛdaa lɛ, ɛna kpakpasɩ kpayaa naalɛ: Siimɔɔ nɛ e-neu Andree, pɔlɔwaɣ piyuu. 17 Ɛlɛ́, ɛ́yáa-wɛ nɛ eheyi-wɛ se: «Ɩkɔɔ ɩtɩŋ-m nɛ manpɩsɩ-mɩ ɛyáa kpayaa ɛzɩ ɩkpaʋ kpakpasɩ yɔ.» 18 Peeɖe peyebi pe-piyiŋ kpaagbaa nɛ patɩŋ-ɩ. 19 Ɛtasɩ wobu ɛsɩndaa pazɩ lɛ, ɛna Zebedee nɛ ɛ-pɩyalaa: Yakubu nɛ e-neu Yohanɛɛsɩ, pɛwɛ pa-kpɩyʋʋ taa nɛ paɖaɣnɩɣ pe-piyiŋ. 20 Ɛlɛ́, ɛtɩyaʋ Zebedee pɩyalaa ḿbá nɛ peyele pa-caa nɛ tʋmlaɖaa kpɩyʋʋ taa nɛ patɩŋ ɛ-wayɩ. Yesu wazɩ ɛyʋ weyi eleeu pɩsɩ-ɩ kpɛndɛɣlɩsɩ (Luk 4.31-37) 21 Yesu ya ɛyáa ḿbá lɛ, ɛ nɛ wɛ powolo Kapɛrnayum. Kɩyakʋ kɩhɛzʋʋ talaa lɛ, pasʋʋ Ɛsɔ ɖɩsɛyɛ taa nɛ ɛpazɩ ɛyáa Ɛsɔtɔm wɩlʋʋ. 22 Ɛyáa mbá pewelesaɣ ɛ-tɔm yɔ, pɩlabɩ-wɛ piti nɛ ɛzɩma mbʋ́ ɛwɩlaɣ tɔm yɔ. Mbʋ́ pʋyɔɔ yɔ, ɛtawɩlɩɣ-wɛ ɛzɩ pa-paɣtʋ wɩlɩyaa yɔ. Ɛlɛ́, ɛwɩlaɣ-wɛ nɛ abalɩtʋ. 23 Abalʋ nɔɔyʋ kɛwɛ peeɖe, eleeu wɛ ɛ-wayɩ nɛ ɛpɩsɩɣ-ɩ kpɛndɛɣlɩsɩ. Alɩwaatʋ ńdʋ́ tɩ-yɔɔ ɖeyi ɖeyi lɛ, ɛma kubuka se: 24 «Yesu Nazarɛɛtɩ tʋ, ɛbɛ ŋcaɣnɩ-ɖʋ? Ŋkɔm se ŋkʋ-ɖʋ yaa we? Mansɩm mbʋ́ ŋkɛnaa yɔ ɖeu, ŋkɛ Ɛsɔ Ɛyʋ.» 25 Peeɖe Yesu holini-i se: «Hei! Su peeɖe nɛ ŋse abalʋ ɛnʋ ɛ-wayɩ.» 26 Eleeu ɛnʋ ɛma kubuka nɛ ɛñamsɩ abalʋ ɛnʋ pɩŋŋ nɛ ese ɛ-wayɩ. 27 Peeɖe pɩlabɩ ɛyáa tɩŋa piti pɩŋŋ nɛ pɔpɔzʋʋ ɖama se: «Ɛbɛ lɛ ḿbʋ́? Ɛwɩlɩɣ tɔm kɩfatʋ nɛ abalɩtʋ! Halɩ pɩkpɛndɩnɩ aleewaa nɛ pañaŋ-ɩ.» 28 Kpaagbaa ḿbʋ́ lɛ, Yesu hɩɖɛ sɛɛ Galilee egeetiye tɩŋa taa payɩ. Yesu wazɩ Pɩyɛ yɔsɔ kʋdɔŋ (Mat 8.14-15; Luk 4.38-39) 29 Yesu nɛ Yakubu nɛ Yohanɛɛsɩ nɛ Siimɔɔ nɛ Andree palɩ Ɛsɔ ɖɩsɛyɛ taa lɛ, patɩŋ Siimɔɔ nɛ Andree pɛ-tɛ. 30 Kɩnamɩyɛ kakpa Siimɔɔ yɔsɔ nɛ ɛhɛnɩ. Patalaa lɛ, pakpaɣ halʋ ɛnʋ ɛ-wɩzasɩ tɔm nɛ peheyi Yesu. 31 Peeɖe Yesu woba ɛ-cɔlɔ nɛ ɛ́ɖɔ́kɩ e-nesi taa ɛkʋsɩ-ɩ nɛ ɛ-kʋdɔŋ ŋ́gʋ́ kɩcɛ nɛ ɛkʋyɩ ɛha-wɛ lɩm. Yesu wazɩ kʋdɔndɩnaa sakɩyɛ pa-kʋdɔmɩŋ 32 Wɩsɩ ɖʋwa lɛ, pakpaɣ kʋdɔndɩnaa nɛ ɛyáa mbá pa-wayɩ wɛ aleewaa yɔ nɛ powoni-wɛ Yesu cɔlɔ Siimɔɔ nɛ Andree pɛ-tɛ peeɖe. 33 Tɛtʋ taa ɛyáa tɩŋa payɩ kpeɣli ɖɩɣa ŋ́gá kɔ-nɔnɔɔ taa lɛ, 34 Yesu la nɛ kʋdɔndɩnaa sakɩyɛ ndɩ ndɩ yɔɔ cɛ nɛ ɛɖɔɔnɩ aleewaa tɩŋa payɩ. Ɛzɩma mbʋ́ ɛtɛm naʋ se aleewaa sɩma se ɛnʋ lɛ Weyi Ɛsɔ Lɩzaa Yɔ lɛ, etetisi se pokuli ɛ-wayɩ. Yesu kʋyɩ Kapɛrnayum nɛ ɛɖɛɛ Ɛsɔtɔm susuu (Luk 4.42-44) 35 Yesu fem kajalaɣ kalɩmaŋ kou nɛ ɛlɩɩ lɛ, ewolo ɖenɖe ɛyáa fɛyɩ yɔ nɛ ɛpazɩ Ɛsɔ sɛʋ. 36 Peeɖe Siimɔɔ nɛ ɛ-taabalaa papazɩ-ɩ ñɩnʋʋ. 37 Pana-ɩ lɛ, peheyi-i se: «Ɛyáa tɩŋa ñɩnɩɣ-ŋ.» 38 Ɛlɛ́, Yesu cosi-wɛ se: «Đɩcɔɔ tɛtʋ lɛɛtʋ taa nɛ monsusi Ɛsɔtɔm ɖɔɖɔ. Pɩ-maɣmaɣ pʋ-yɔɔ mɔnkɔma.» 39 Peeɖe ɛpazɩ cɔʋ Galilee egeetiye tɩŋa taa nɛ esusuu Ɛsɔtɔm Ɛsɔ ɖɩsɛyɛ ndɩ ndɩ taa nɛ ɛɖɔɔnʋʋ aleewaa ɖɔɖɔ ɛyáa wayɩ. Yesu laba nɛ canaɣ nakɛyɛ yɔɔ cɛ (Mat 8.1-4; Luk 5.12-16) 40 Pʋwayɩ lɛ, canaɣ nakɛyɛ wolo Yesu cɔlɔ nɛ koluŋ ɛ-tɛɛ nɛ ketendi-i se: «Yee ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.» 41 Peeɖe kɔ-tɔm labɩ Yesu pʋtɔdɩyɛ pɩŋŋ nɛ ɛkʋsɩ e-nesi nɛ etukuni-kɛ nɛ eheyi-kɛ se: «Mentisaa, pɩsɩ ɛyʋ weyi ɛmʋnaa yɔ.» 42 Ɛlɛ́, canaɣ ŋ́gá kɔ-yɔɔ tɩcɛbʋ nɛ kapɩsɩ ɛyʋ weyi ɛmʋnaa yɔ 43 nɛ Yesu heyi-i se ɛɖɛɛ. Ɛlɛ́, ɛka ɛ-ñʋʋ taa se: 44 «Taaheyi-tʋ nɔɔyʋ. Ɛlɛ́, wolo cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ Mooyiizi kaɖʋʋ yɔ nɛ pɩwɩlɩ ɛyáa tɩŋa se ñɔ-yɔɔ cɛba.» 45 Ɛɖɛwa lɛ, ɛpazɩ Yesu tɔm susuu paa le. Ḿbʋ́ labɩna nɛ Yesu tapɩzɩɣ se ɛtasɩ sʋʋ tɛtʋ natʋyʋ taa keɣlee. Pɩtɛkɛ ḿbʋ́, ɛyáa kɩlɩɣ-ɩ cɛyʋʋ. Peeɖe ɛcaɣ lakʋ taa nɛ ɛyáa lɩɣnɩ paa le nɛ powoki ɛ-cɔlɔ. |