Luka 7 - New TestamentYesu laba nɛ Room sɔɔja sɔsɔ nɔɔyʋ tʋmlaɖʋ yɔɔ cɛ (Mat 8.5-13) 1 Yesu tɛm tɔm ńdʋ́ tɩtɩŋa yɔɔdʋʋ lɛ, ɛkʋyɩ ewolo Kapɛrnayum. 2 Room sɔɔja sɔsɔ nɔɔyʋ kɛwɛ peeɖe. Ɛɛwɛnɩ tʋmlaɖʋ nɛ ɛ-tɔm kɛdɩnɩ-ɩ pɩŋŋ. Tʋmlaɖʋ ɛnʋ, pɩwɩɣaɣ-ɩ sɩbʋ yɔɔ sɩbʋ yɔɔ. 3 Ŋgʋ́, sɔɔja sɔsɔ ɛnʋ, ɛɛnɩ pɔyɔɔdɩ Yesu tɔm se ɛlakɩ nɛ kʋdɔndɩnaa yɔɔ cɛkɩ. Pʋ-yɔɔ etiyi Yuda ñɩma sɔsaa nabɛyɛ ɛ-cɔlɔ se pewini-i nɛ ɛkɔɔ ɛya ɛ-tʋmlaɖʋ ñʋʋ. 4 Powoba lɛ, pewini-i cɔɔɔ se: «Abalʋ ɛnʋ ɛmʋnaa se ŋsɩnɩ-ɩ. 5 Mbʋ́ pʋyɔɔ yɔ, ɛsɔɔlɩ Yuda ñɩma ɖa nɛ ɛma-ɖʋ Ɛsɔ ɖɩsɛyɛ.» 6 Peeɖe Yesu tɩŋ-wɛ nɛ ɛ nɛ wɛ pɛɖɛɛ. Pɔñɔtɩnɩ ɖɩɣa lɛ, sɔɔja ɛnʋ etiyi ɛ-taabalaa se peheyi Yesu se: «Kɩpaɣlʋ, taakʋ ña-tɩ yem, mantamʋna se ŋsʋʋ man-ɖɩɣa taa. 7 Ḿbʋ́ labɩna nɛ mantatalɩ man-tɩ tɩŋa ñɔ-cɔlɔ. Pʋ-yɔɔ lɛ, ha nɔɔ nɛ man-tʋmlaɖʋ yɔɔ cɛ. 8 Mbʋ́ pʋyɔɔ yɔ, ma lɛ, ma-ñʋʋ yɔɔ ñɩma wɛɛ nɛ mañaŋ-wɛ, mɛn-tɛɛ ñɩma wɛɛ ɖɔɖɔ. Meheyi pa-taa nɔɔyʋ se ewolo peeɖe yɔ yɔ, ewoki. Maya nɔɔyʋ se ɛkɔɔ yɔ, ɛkɔŋ. Meheyi man-tʋmlaɖʋ se ɛla nabʋyʋ yɔ, ɛ́lɛ́ ñalakɩ-pʋ.» 9 Powoba nɛ peheyi Yesu ḿbʋ́ lɛ, ɛyɩɣyɩ sɔɔja sɔsɔ ɛnʋ nɛ ɛkɛzɩ ɛ-tɩ nɛ ɛyáa samaɣ ŋgá katɩŋaɣ-ɩ yɔ kɔ-yɔɔ nɛ ɛtɔ se: «Mankaɖɩɣ-mɩ se paa Izrɛɛlɩ ñɩma taa maɣmaɣ, mantanada weyi ɛwɛnɩ lidaʋ nɛ pɩtalɩ-ɩ yɔ.» 10 Sɔɔja ɛnʋ e-tiyiyaa pɩsɩ ɖɩɣa lɛ, pamaɣnɩ ɛ-tʋmlaɖʋ ɛnʋ ɛ-yɔɔ cɛba. Lelu nɔɔyʋ pɩyalʋ sɩba nɛ Yesu fezi-i 11 Tɛʋ fema lɛ, Yesu kʋyɩ se ewoki tɛtʋ ndʋ́ payaɣ se Nayɩnɩ yɔ tɩ-taa. Ewokaɣ lɛ, ɛ-tɔmkpɛlɩkɩyaa nɛ ɛyáa samaɣ sɔsɔɔ nakɛyɛ patɩŋɩɣ ɛ-wayɩ. 12 Pɔñɔtɩnɩ-tʋ lɛ, pakatɩ ɛyáa samaɣ nakɛyɛ, kowokaɣnɩ sɩɖʋ nɔɔyʋ pim, ɛɛkɛ lelu nɔɔyʋ pɩɣa ɛgbamɩyɛ. 13 Kɩpaɣlʋ na lelu ɛnʋ lɛ, pɩlabɩ-ɩ pʋtɔdɩyɛ nɛ eheyi-i se: «Taawii!» 14 Peeɖe Yesu woba etukuni sɩɖʋ kpataya nɛ sɩɣlɩyaa sɩŋ nɛ ɛtɔ se: «Evebu ña! Meheyiɣ-ŋ se ŋkʋyɩ!» 15 Ɛlɛ́, ɛkʋyɩ ɛcaɣ nɛ ɛpazɩ yɔɔdʋʋ nɛ Yesu cɛlɩ-ɩ e-ɖoo. 16 Peeɖe sɔɔndʋ kpa patɩŋa nɛ pasaŋ Ɛsɔ nɛ pɔtɔŋ se: «Náyʋ sɔsɔ nɔɔyʋ kɔm ɖɛ-hɛkʋ taa, Ɛsɔ kɔm ɛlɩzɩ ɛ-ɛyáa pɩ-taa.» 17 Mbʋ́ Yesu laba yɔ, pʋ-tɔm cɔɔ Yudee egeetiye tɩŋa taa nɛ ɖɩ-cɔlɔ hɔɔlɩŋ tɩŋa taa payɩ. Lɩm Sɔʋ Sɔnzɩ Laɖʋ Yohanɛɛsɩ tɔm pɔzʋʋ (Mat 11.2-19) 18 Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa nɩ mbʋ́ pɩtɩŋa payɩ Kɩpaɣlʋ lakaɣ yɔ nɛ powolo peheyi pa-caa. Peeɖe ɛya pa-taa naalɛ. 19 Etiyi-wɛ Kɩpaɣlʋ cɔlɔ se pɔpɔzɩ-ɩ se: «Ña lɛ Ñʋʋ Yaɖʋ weyi paayɔɔdɩ ɛ-tɔm se ɛkaɣ kɔm yɔ, yaa nɔɔyʋ wɛnɩ wayɩ?» 20 Patalɩ Yesu cɔlɔ lɛ, peheyi-i se: «Lɩm Sɔʋ Sɔnzɩ Laɖʋ Yohanɛɛsɩ tiyi-ɖʋ se ɖɩkɔɔ ɖɩpɔzɩ-ŋ nɛ ɖɩna se ña lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ?» 21 Ŋgʋ́, alɩwaatʋ ńdʋ́ tɩ-yɔɔ ɖeyi ɖeyi Yesu laba nɛ ɛyáa sakɩyɛ kʋdɔmɩŋ ndɩ ndɩ cɛ nɛ ɛɖɔɔnɩ aleewaa nɛ ekuli yʋlʋmaa sakɩyɛ ɛsɛ. 22 Pʋwayɩ lɛ, ecosi-wɛ se: «Iwolo iheyi-i mbʋ́ ɩnawa nɛ ndʋ́ ɩnɩwa yɔ: yʋlʋmaa naɣ nɛ tala tɩnaa ɖɔŋ camɩyɛ nɛ canasɩ yɔɔ cɛkɩ nɛ ndamaa nɩɣ nɛ sɩɖaa feŋ, posusuu kʋñɔndɩnaa Laŋhɛzɩyɛ Tɔm. 23 Weyi eekiziɣ mɔn-tɔm yɔ, ehiɣ ɛ-tɩ.» Yesu yɔɔdʋʋ Lɩm Sɔʋ Sɔnzɩ Laɖʋ Yohanɛɛsɩ tɔm 24 Peeɖe Yohanɛɛsɩ tɔmkpɛlɩkɩyaa ḿbá pɛɖɛwa nɛ Yesu pazɩ ɛyáa samaɣ kɛdʋʋ Yohanɛɛsɩ ɛnʋ ɛ-tɔm nɛ ɛpɔzɩ-wɛ se: «Ɛbɛ iwobi naʋ lakʋ taa? Kañɩŋ́gbayaɣ́ ŋgá heɣlim ciɣdaɣ yɔ yaa we? Mantasa. 25 Ɛlɛ́, ɛbɛ iwobi naʋ kpem? Nɔɔyʋ suni wondu kɩbandʋ nɛ ɛwɛɛ peeɖe naa we? Ŋgʋ́, mbá posuu ñɩɣlɩ́m wondu nɛ pɛwɛnɩ pɩtɩŋa yɔ, pɛwɛɣ awiya ɖɩsɩ taa. 26 Ɛbɛ kpem iiwobi naʋ? Náyʋ nɔɔyʋ yaa we? Toovenim lɛ, meheyiɣ-mɩ se ɩna weyi yɔ, ɛkɩlɩ náyʋ. 27 Yohanɛɛsɩ ɛnʋ, ɛ-tɔm Ɛsɔ yɔɔdaa nɛ pama ɛ-Takayaɣ taa se: ‹Na! Mancalɩɣ men-tiyiyu tiyuu nɛ ɛñɔɔzɩ ña-nʋmɔʋ.› » 28 Yesu tasɩ yɔɔdʋʋ se: «Mankaɖɩɣ-mɩ se ɖooo yɔ, patalʋlɩdɩ nɔɔyʋ nɛ ɛkɩlɩ Yohanɛɛsɩ ɛnʋ. Paa ḿbʋ́ yɔ, weyi ɛwɛ Ɛsɔ Kewiyaɣ taa nɛ patakpaɣ-ɩ payaa pʋyʋ yɔ, ɛ́lɛ́ kɩlɩ-ɩ. 29 Izrɛɛlɩ ɛjaɖɛ taa ɛyáa tɩŋa welesaɣ Yohanɛɛsɩ tɔm, halɩ pɩkpɛndɩnɩ tikee mʋyaa maɣmaɣ. Pʋ-yɔɔ petisaa nɛ palabɩ-wɛ lɩm sɔʋ sɔnzɩ. Palabɩ ḿbʋ́ nɛ pɩwɩlɩ se Ɛsɔ tʋʋzaa. 30 Ɛlɛ́, Farɩsɩ ñɩma nɛ paɣtʋ wɩlɩyaa pekizi se ɛtaalabɩ-wɛ-sɩ. Ḿbʋ́ pawɩlɩnaa se pekizi mbʋ́ Ɛsɔ ñɩnaɣnɩ-wɛ yɔ.» 31 Yesu tasɩ yɔɔdʋʋ ɖɔɖɔ se: «Ɛbɛ mɛnkɛdɩɣnɩ pɩtɛ ɛyáa ḿbá lee? Ɛzɩma pɛwɛɛ? 32 Pɛwɛ ɛzɩ piya nzɩ́ sɩcaɣ ɛyáa samaɣ ɖikpeɣliye nɛ sikou ɖama yɔɔ se: ‹Đɩhʋlɩ-mɩ hɩsɩ se ɩpaa nɛ ikizi. Đitee kʋñɔŋ hendu nɛ itewii.› 33 Ḿbʋ́ pʋwɛɛ: ‹Lɩm Sɔʋ Sɔnzɩ Laɖʋ Yohanɛɛsɩ kɔma, ɛɛtɔkɩ tɔɔnaɣ, ɛɛñɔʋ sʋlʋm. Ɛlɛ́, ɩtɔŋ se ekem aleewaa.› 34 Piyele Ɛyʋ Pɩyalʋ ñɔkɔma nɛ ɛtɔkɩ nɛ ɛñɔʋ lɛ, ɩɖaɣnɩɣ yɔɔdʋʋ se: ‹Ɩnaɣʋ ɛyʋ ɛnɛ yɔ, tɔkɩyɛ nɛ ñɔtʋ pɔ-yɔɔ ɖeke ɛmaɣzɩɣ. Ɛkɛ ɖɔɖɔ tikee mʋyaa nɛ kɩwɛɛkɩm laɖaa lɛlaa pa-taabalʋ.› 35 Ɛlɛ́, mbá patɩŋa palakɩ mbʋ́ Ɛsɔ liu wɛɛ yɔ, pa-lakasɩ wɩlɩɣnɩ se Ɛsɔ ɛnʋ, ɛwɛnɩ lɔŋ siŋŋ.» Yesu woba Siimɔɔ Farɩsɩ tʋ tɛ 36 Nakʋyʋ wiye Farɩsɩ tʋ nɔɔyʋ ya Yesu se ewolo ɛ-tɛ nɛ pɔtɔɔ tɔɔnaɣ. Ɛlɛ́, Yesu wolo nɛ ɛcaɣ tɔɔnaɣ ɖɩtɔɔyɛ. 37 Halʋ kɩwɛɛkɩm laɖʋ nɔɔyʋ kɛwɛ tɛtʋ ńdʋ́ tɩ-taa nɛ ɛnɩɩ ḿbʋ́. Peeɖe ɛkpaɣ tɩlaaɖɩ fiɣa kɩñɩlɩsaɣ nakɛyɛ taa ɖo 38 nɛ ewolo ɛsɩŋ nɛ wayɩ Yesu naŋgbanzɩ cɔlɔ nɛ ewiɣ nɛ ɛ-ɛsɩtɛɣlɩm kpeŋ sɩ-yɔɔ. Pikpema lɛ, ɛhɛzɩ-pʋ nɛ ɛ-ñɔsɩ nɛ ɛkpa-sɩ, nɛ pɩwɩlɩ se ɛñam-ɩ nɛ ɛpɩyɩ sɩ-yɔɔ tɩlaaɖɩ. 39 Farɩsɩ tʋ weyi ɛya Yesu yɔ, ɛna ḿbʋ́ lɛ, ɛmaɣzɩ ɛ-taa se: «Yee abalʋ ɛnɛ ɛɛkɛ náyʋ yɔ, ɛɛsɩm halʋ weyi etukuuni-i ḿbʋ́ yɔ nɛ ɛzɩma mbʋ́ ɛ-wɛtʋ wɛɛ yɔ: ɛkɛ kɩwɛɛkɩm laɖʋ.» 40 Ɛlɛ́, Yesu heyi Farɩsɩ tʋ ɛnʋ se: «Siimɔɔ! Mɛwɛnɩ tɔm natʋyʋ se meheyiɣ-ŋ.» Siimɔɔ cosi-i se: «Wɩlɩyʋ! Yɔɔdɩ.» 41 Peeɖe Yesu kɛdɩ-ɩ se: «Abalʋ nɔɔyʋ kɛwɛnɩ kɩndɩyaa naalɛ nabɛyɛ: kajalaɣ tʋ kɩndɩ liidiye pɔɔyɩsɩ taŋga nɛ lɛlʋ pɔɔyɩsɩ nɩɩnʋwa. 42 Pa-taa nɔɔyʋ tapɩzɩɣ se ɛhɛyɩ-ɩ nɛ ɛtɛzɩ pa-naalɛ kpeɣu se pataatasɩ-ɩ hɛyʋʋ. Pa-naalɛ pa-taa lɛ, akɩlɩɣ-ɩ sɔɔlʋʋ?» 43 Peeɖe Siimɔɔ cosi-i se: «Mamaɣzɩɣ se weyi ɛ-kɩmɩyɛ kɩlɩ paɣlʋʋ yɔ.» Ɛlɛ́, Yesu heyi-i se: «Ŋwɛnɩ toovenim.» 44 Pʋwayɩ lɛ, ɛkɛzɩ ɛ-tɩ nɛ halʋ ɛnʋ ɛ-yɔɔ nɛ eheyi Siimɔɔ se: «Ŋnaɣ halʋ ɛnɛ? Mansʋʋ ña-ɖɩɣa taa cɩnɛ yɔ, ŋtaha-m lɩm se pɔkɔ ma-naŋgbanzɩ. Ɛlɛ́, halʋ ɛnɛ ɛ́lɛ́ kɔ ma-naŋgbanzɩ nɛ ɛ-ɛsɩtɛɣlɩm nɛ ɛhɛzɩ sɩ-yɔɔ nɛ ɛ-ñɔsɩ. 45 Mɔnkɔm ñɛ-tɛ yɔ, ŋtamʋ-m nɛ ŋsɛ-m ɛzɩ pʋpɔzʋʋ yɔ. Ɛlɛ́, halʋ ɛnɛ ɛ́lɛ́ mʋ-m nɛ halɩ ɛwɛɛ ɛkpaɣ ma-naŋgbanzɩ. 46 Ŋtataa ma-ñʋʋ taa sɔzɩŋ num. Ɛlɛ́, halʋ ɛnɛ ɛ́lɛ́ pɩyɩ ma-naŋgbanzɩ yɔɔ tɩlaaɖɩ. 47 Pʋ-yɔɔ mankaɖɩɣ-ŋ se sɔɔlɩm sɔsɔm tʋmɩyɛ nɖɩ́ ɛlaba yɔ, ɖɩwɩlɩɣ se pɛtɛm-ɩ kpeɣu ɛ-kɩwɛɛkɩm sakɩyɛ mbʋ́ ɛlaba yɔ. Ɛlɛ́, weyi pekpeɣiɣ-i kɩwɛɛkɩm pazɩ yɔ, ɛwɛɣnɩ sɔɔlɩm pazɩ.» 48 Peeɖe Yesu heyi halʋ ɛnʋ se: «Menkpeɣ-ŋ ña-kɩwɛɛkɩm.» 49 Ɛlɛ́, ɛ nɛ mbá paawɛ ɖɩtɔɔyɛ yɔ, pamaɣzɩɣ pa-taa se: «Anɩ lɛ ɛnɛ nɛ ɛkatɩ nɛ ɛtɔŋ se ekpeɣ kɩwɛɛkɩm?» 50 Ɛlɛ́, Yesu heyi halʋ ɛnʋ se: «Lidaʋ ŋgʋ́ ŋwɛna yɔ, kɩyabɩ ña-ñʋʋ. Kpemni laŋhɛzɩyɛ.» |