Luka 6 - New Testament

Ɛyʋ pɩyalʋ kɩlɩ kɩyakʋ kɩhɛzʋʋ

¹ Kɩyakʋ kɩhɛzʋʋ nakʋyʋ wiye Yesu nɛ ɛ-tɔmkpɛlɩkɩyaa pɔɖɔŋaɣ hayɩm nabʋyʋ taa. Paahayɩ tɔɔnaɣ nakɛyɛ pɩ-taa nɛ ɛ-tɔmkpɛlɩkɩyaa pɛlɩɣ nɛ nʋmɔʋ nɛ ponuutuu nɛ pasalɩɣ. Tɔɔnaɣ ŋ́gá kɛwɛ ɛzɩ amala yɔ.

² Palakaɣ ḿbʋ́ lɛ, Farɩsɩ ñɩma nabɛyɛ na-wɛ nɛ pɔpɔzɩ-wɛ se: «Pɩlabɩ ɛzɩma ɩlakɩ mbʋ́ paɖʋ Mooyiizi paɣtʋ taa se pataala kɩyakʋ kɩhɛzʋʋ wiye yɔ?»

³ Peeɖe Yesu pɔzɩ-wɛ se: «Ɩtakalɩ mbʋ́ Daaviidi kalabɩ alɩwaatʋ ndʋ́ ñɔɔsɩ wɩɣaɣ ɛ nɛ mbá paawɛ ɛ-cɔlɔ yɔ pʋ-tɔm naa we?

⁴ Ɛsʋ Ɛsɔ ɖɩɣa taa nɛ ɛtɔɔ tindine nɖɩ́ paaha Ɛsɔ yɔ. Ŋgʋ́, pɩfɛyɩ se nɔɔyʋ ɛtɔɔ-ɖɩ yem nɛ ɛtɛkɛ cɔjɔ. Ɛlɛ́, Daaviidi kpaɣ-ɖɩ nɛ ɛ nɛ ɛ-taabalaa pɔtɔɔ»

⁵ Pʋwayɩ lɛ, Yesu tasɩ-wɛ heyuu se: «Ɛyʋ Pɩyalʋ sɩm mbʋ́ pʋwɛɛ se pala kɩyakʋ kɩhɛzʋʋ wiye yɔ.»

Yesu wazɩ ɛyʋ weyi pɩcamɩ e-nesi

⁶ Kɩyakʋ kɩhɛzʋʋ lɛɛkʋ wiye lɛ, Yesu sʋʋ Ɛsɔ ɖɩsɛyɛ taa nɛ ɛpazɩ Ɛsɔtɔm wɩlʋʋ. Puwiye lɛ, abalʋ nɔɔyʋ kɛwɛ peeɖe, e-nesi kɩbanzɩ camaa.

⁷ Paɣtʋ wɩlɩyaa nɛ Farɩsɩ ñɩma paawɛɛ nɛ pɔcɔŋnɩ Yesu se pana se ɛlakɩ nɛ nɔɔyʋ yɔɔ cɛ kɩyakʋ kɩhɛzʋʋ wiye yaa ɛɛlakɩ? Mbʋ́ pʋyɔɔ yɔ, pacaɣ se pehiɣ ndʋ́ paawana nɛ pakpa-ɩ yɔ.

⁸ Yesu na pa-lɩmaɣza ḿbʋ́ lɛ, eheyi abalʋ weyi e-nesi camaa yɔ se: «Kʋyɩ ŋsɩŋ ɛyáa tɩŋa hɛkʋ taa cɩnɛ!» Peeɖe ɛ́lɛ́ kʋyaa ɛsɩŋ.

⁹ Ɛlɛ́, Yesu heyi-wɛ se: «Mɔnpɔzʋʋ-mɩ se ɖa-paɣtʋ taa lɛ, ɛbɛ pʋmʋnaa se pala kɩyakʋ kɩhɛzʋʋ wiye? Kɩbandʋ naa ɛzaɣ́tʋ? Paya ɛyáa ñʋʋ naa pakʋ-wɛ?»

¹⁰ Peeɖe ɛcɔnɩ patɩŋa pɛ-ɛsɩndaa kpɛɛɛ nɛ eheyi abalʋ ɛnʋ se: «Losi ñe-nesi!» Elosi-si lɛ, sɩ-yɔɔ cɛ.

¹¹ Ɛlɛ́, pa-pana kpa pɩŋŋ nɛ pɔyɔɔdʋʋnɩ ɖama ɛzɩma mbʋ́ paala Yesu yɔ.

Yesu lɩzɩ e-tiyiyaa hiu nɛ naalɛ

¹² Alɩwaatʋ ńdʋ́ tɩ-taa lɛ, Yesu kpa pʋʋ yɔɔ se ɛsɛɣ Ɛsɔ. Ɛsɛɛ-ɩ ḿbʋ́ tɛʋ nɛ kifem.

¹³ Kifema lɛ, ɛ́yáa ɛ-tɔmkpɛlɩkɩyaa nɛ ɛlɩzɩ pa-taa ɛyáa hiu nɛ naalɛ nɛ ɛ́yáa-wɛ se e-tiyiyaa.

¹⁴ Ḿbá yɔ: Siimɔɔ weyi ɛkʋm-ɩ hɩɖɛ se Pɩyɛ yɔ nɛ e-neu Andree nɛ Yakubu nɛ Yohanɛɛsɩ nɛ Filiipu nɛ Bartelemii

¹⁵ nɛ Maatiyee nɛ Tomaa nɛ Alfee pɩyalʋ Yakubu nɛ Siimɔɔ weyi payaɣ se Yɔɔ Kandɩyʋ yɔ

¹⁶ nɛ Yakubu pɩyalʋ Yudaasɩ nɛ Yudaasɩ Iskarɩyɔɔtɩ. Ɛnʋ kitini ɛkpa Yesu nɛ ɛ́ɖʋzɩ koyindinaa nesi taa.

Ɛyáa kɔŋ pewelesiɣ tɔm ndʋ́ Yesu yɔɔdʋʋ yɔ nɛ ɛwazɩɣ-wɛ pa-kʋdɔmɩŋ

¹⁷ Pʋwayɩ lɛ, Yesu nɛ ɛ-tɔmkpɛlɩkɩyaa petiki pʋʋ nɛ patalɩ pasɩŋ kɩ-lalayɛ taa ɖenɖe ɛ-tɔmkpɛlɩkɩyaa sakɩyɛ kɛwɛɛ yɔ. Ɛyáa samaɣ ŋgá kalɩnɩ Yudee egeetiye tɩŋa payɩ taa nɛ Yeruusalɛm nɛ tɛtʋ ndʋ́ tɩwɛ teŋgu nɔɔ: Tiiri nɛ Sidɔɔ pa-taa yɔ, paawɛ peeɖe ɖɔɖɔ.

¹⁸ Paawobi se panɩɩ tɔm ndʋ́ ɛwɩlɩɣ yɔ nɛ ɛla nɛ pa-kʋdɔmɩŋ cɛ. Mbá aleewaa pɩsaɣ-wɛ kpɛndɛɣlɩsɩ yɔ, pɔ-yɔɔ cɛba ɖɔɖɔ.

¹⁹ Paa weyi ɛñɩnaɣ se etukuni-i. Mbʋ́ pʋyɔɔ yɔ, ɖoŋ nɩɩyɩ lɩɣaɣ ɛ-yɔɔ nɛ ɛlakɩ nɛ patɩŋa payɩ pa-kʋdɔmɩŋ cɛkɩ.

Laŋhɛzɩyɛ nɛ siziŋ nɩʋ pɔ-tɔm

²⁰ Pʋwayɩ lɛ, Yesu cɔnɩ ɛ-tɔmkpɛlɩkɩyaa nɛ eheyi-wɛ se: «Mbá mɩ ɩkɛ kʋñɔndɩnaa yɔ, ihiɣ mɩ-tɩ! Mbʋ́ pʋyɔɔ yɔ, ɩkɛ Ɛsɔ Kewiyaɣ taa ñɩma.

²¹ Mbá mɩ ñɔɔsɩ wɩɣ-mɩ lɛɛlɛɛyɔ yɔ, ihiɣ mɩ-tɩ! Mbʋ́ pʋyɔɔ yɔ, ɩkɔŋ haɣʋ! Mbá mɩ iwiɣ lɛɛlɛɛyɔ yɔ, ihiɣ mɩ-tɩ! Mbʋ́ pʋyɔɔ yɔ, ɩkɔŋ woŋuu.

²² Yee ɛyáa ɛpaɖɩɣ-mɩ yaa, pekiziɣ-mɩ yaa, patʋʋ-mɩ yaa, pɛwɛɛkɩɣ mɩ-hɩla Ɛyʋ Pɩyalʋ yɔɔ yɔ, ihiɣ mɩ-tɩ!

²³ Alɩwaatʋ ńdʋ́ tɩtalaa lɛ, mɩ-laŋa ɩhʋlʋmɩ nɛ ɩmayɩ amaya siŋŋ, mbʋ́ pʋyɔɔ yɔ, mɩ-kɩhɛyʋʋ ɖɔ ɛsɔdaa! Ḿbʋ́ ɖɔɖɔ pɔ-cɔzɔnaa kalabɩ kɩdɛkɛdɩm náyaa mbá Ɛsɔ tiyi-wɛ yɔ.

²⁴ Mbá mɩ ɩwɛnɩ ñɩm yɔ, pʋtɔɔ-mɩ, Mbʋ́ pʋyɔɔ yɔ, ɩtɛm mɩ-tɩ hiɣu!

²⁵ Pʋtɔɔ-mɩ! Mbá mɩ ɩwɛnɩ pɩtɩŋa pɩtɩŋa lɛɛlɛɛyɔ yɔ, Mbʋ́ pʋyɔɔ yɔ, ñɔɔsɩ kaɣ-mɩ wɩʋ! Mbá mɩ iwoŋuu lɛɛlɛɛyɔ yɔ, pʋtɔɔ-mɩ! Mbʋ́ pʋyɔɔ yɔ, mɩ-laŋa kaɣ wɛɛkʋʋ nɛ iwili!

²⁶ Pʋtɔɔ-mɩ! Mbá mɩ ɛyáa tɩŋa yɩɣyɩɣ-mɩ yɔ! Mbʋ́ pʋyɔɔ yɔ, ḿbʋ́ pɔ-cɔzɔnaa lakaɣ mbá pɛcɛtaɣ ɖɔɖɔ se pɛkɛ náyaa yɔ.»

Koyindinaa sɔɔlʋʋ tɔm

²⁷ Pʋwayɩ lɛ, Yesu tasɩ yɔɔdʋʋ se: «Mbá mɩ iwelesiɣni-m yɔ, meheyiɣ-mɩ se ɩsɔɔlɩ mi-koyindinaa nɛ ɩla mbá papaɖɩɣ-mɩ yɔ camɩyɛ.

²⁸ Ɩwazɩ mbá pawɩlɩɣ-mɩ kpalʋʋ yɔ pɔ-yɔɔ nɛ ɩsɛɛ Ɛsɔ mbá panazɩɣ-mɩ yɔ paba yɔɔ.

²⁹ Yee nɔɔyʋ ɛcɛbɩ ña-laɣzaɣ kadaŋa yɔ, kɛzɩ lɛɛka nɛ ɛtɛzɩ-kɛ cɛbʋ. Yee nɔɔyʋ ɛmʋ ño-toko sɔsɔʋ yɔ, yele nɛ ɛtɛzɩ cikpeluu mʋ́ʋ.

³⁰ Yee nɔɔyʋ ɛsʋlʋmɩ-ŋ nabʋyʋ yɔ, taapɛm-ɩ. Yee nɔɔyʋ ɛkpaɣ ña-ñɩm yɔ, taapɔzɩ-ɩ se ɛcɛlɩ-ŋ-pʋ.

³¹ Mbʋ́ ɩcaɣ se ɛyáa ɛlabɩ-mɩ yɔ, ɩlabɩ-wɛ ɖɔɖɔ ḿbʋ́ ɖeyi ɖeyi.

³² Yee mbá pɔsɔɔlɩ-mɩ yɔ pe-ɖeke ɩsɔɔlʋʋ lɛ, kʋjɔʋ ŋgʋ́ ɩɖaŋɩɣ se Ɛsɔ ɛlabɩ-mɩ yɔ? Halɩ kɩwɛɛkɩm laɖaa maɣmaɣ ñɔsɔɔlɩ mbá pɔsɔɔlɩ-wɛ yɔ.

³³ Yee mbá palakɩ-mɩ camɩyɛ yɔ pe-ɖeke ɩlakɩ camɩyɛ lɛ, kʋjɔʋ ŋgʋ́ ɖɔɖɔ ɩɖaŋɩɣ se Ɛsɔ ɛlabɩ-mɩ yɔ? Halɩ kɩwɛɛkɩm laɖaa maɣmaɣ ñalakɩ ḿbʋ́.

³⁴ Yee ɩkɩndɩɣ mbá ɩɖaŋɩɣ se paahɛyɩ-mɩ pu-lone taa yɔ pe-ɖeke lɛ, kʋjɔʋ ŋgʋ́ ɩɖaŋɩɣ se Ɛsɔ ɛlabɩ-mɩ yɔ? Halɩ kɩwɛɛkɩm laɖaa maɣmaɣ ñakɩndɩɣ pa-taabalaa lɛlaa se paahɛyɩ-wɛ ɖɔɖɔ ɛzɩ paakɩndʋʋ-wɛ yɔ.

³⁵ Mɩ lɛ, pʋwɛɛ se ɩsɔɔlɩ mi-koyindinaa nɛ ɩla ɛyáa camɩyɛ. Ɩkɩndɩ-wɛ, ɛlɛ́, ɩtaaɖaŋ se paahɛyɩ-mɩ. Peeɖe ɩmʋʋ kɩhɛyʋʋ sɔsɔʋ nɛ pɩwɩlɩ se ɩkɛ Ɛsɔ Caabiyuu piya. Mbʋ́ pʋyɔɔ yɔ, ɛlakɩ mbá pɛfɛyɩnɩ ɛsɩmɩyɛ yɔ nɛ kañadɩnaa camɩyɛ lakasɩ.

Ɩtaahʋʋ lɛlaa tɔm

³⁶ Ɩna ɛyáa pʋtɔdɩyɛ ɛzɩ mɩ-Caa Ɛsɔ yɔ.»

³⁷ Yesu tasɩ-wɛ heyuu se: «Ɩtaahʋʋnɩ nɔɔyʋ nɛ Ɛsɔ ɛɛhʋʋnɩ-mɩ. Ɩtaakʋ nɔɔyʋ tɔm nɛ Ɛsɔ ɛɛkʋʋ mɩ-ñɩndʋ. Ikpeɣ nɛ Ɛsɔ kpeɣ-mɩ.

³⁸ Ɩha lɛlaa nɛ Ɛsɔ ha-mɩ. Mbʋ́ ɩmaɣzɩɣna nɛ ɩɖʋʋ lɛlaa yɔ, ḿbʋ́ ɖɔɖɔ Ɛsɔ kɔŋ-mɩ maɣzɩnaʋ. Ɛɖʋʋ-mɩ nɛ eciɣdi nɛ pɩñɩɣ ɖeu nɛ pusu pɩwadɩ waaa.»

³⁹ Pʋwayɩ lɛ, Yesu tuu-wɛ eduuye se: «Yʋlʋmaa ɛɛhɔŋ ɖama. Pɩtɛkɛ ḿbʋ́, pɔtɔlʋʋ patɩŋa pɔʋ nakʋyʋ taa.

⁴⁰ Tʋmɩyɛ tɔmkpɛlɩkɩyʋ nɔɔyʋ ɛɛkɩlɩɣ ɛ-wɩlɩyʋ. Ɛlɛ́, tɔmkpɛlɩkɩyʋ ɛnʋ ɛkɔm ɛsɩ tʋmɩyɛ ɖeu yɔ, ɛ nɛ ɛ-wɩlɩyʋ ɛnʋ pɛwɛɣ kɩmaŋ.»

⁴¹ Yesu tasɩ-wɛ tuuu eduuye se: «Pɩlabɩ ɛzɩma nɛ ŋnaɣ kemaɣ ŋgá kɛwɛ ña-taabalʋ ɛsɩyɛ taa yɔ nɛ ŋŋnaɣ ɖaʋ ŋgʋ́ kɩwɛ ña-ñɩnɖɛ taa yɔ?

⁴² Ɛzɩma ŋpɩzɩɣ ŋheyi ña-taabalʋ se: ‹Sɩŋ malɩzɩ-ŋ ñɛ-ɛsɩyɛ taa kemaɣ› nɛ ŋŋnaɣ ɖaʋ ŋgʋ́ kɩwɛ ña-ñɩnɖɛ taa yɔ? Tɛɛ nɛ pʋ-yɔɔ tʋ ña! Lɩzɩ ɖaʋ ŋgʋ́ kɩwɛ ñɛ-ɛsɩyɛ taa yɔ nɛ pʋcɔ ŋna camɩyɛ nɛ ŋlɩzɩ kemaɣ ŋgá kɛwɛ ña-taabalʋ ñɩnɖɛ taa yɔ.»

Tɩʋ nɛ ki-pee pɔ-tɔm

⁴³ Yesu tasɩ-wɛ tuuu eduuye se: «tɩʋ kɩbaŋgʋ ɛɛlʋlʋʋ pee kɩdɛkɛdɛɛ nɛ tɩʋ kɩdɛkɛdʋʋ ñaalʋlʋʋ pee kɩbana.

⁴⁴ Pasɩŋ paa tɩʋ ŋgʋ́ nɛ ki-pee. Paakoyuu hiyikajásɩ sɔɔ tɩʋ yɔɔ, paakoyuu ɖɔɖɔ leemiŋ ŋgone yɔɔ.

⁴⁵ Ɛyʋ kɩbanʋ yɔɔdʋʋ tɔm kɩbandʋ ndʋ́ tɩhaɣ ɛ-taa yɔ. Piyele kɩdɛkɛdʋʋ ñɔyɔɔdʋʋ kɩdɛkɛdɩtʋ ndʋ́ tɩhaɣ kʋkʋ taa yɔ. Mbʋ́ pʋyɔɔ yɔ, tɔm ndʋ́ tɩhaɣ ɛyʋ taa yɔ, ńdʋ́ lɩɣnɩ ɛ-nɔɔ taa.»

Ɖɩsɩ naalɛ tɔm

⁴⁶ Pʋwayɩ lɛ, Yesu pɔzɩ-wɛ se: «Ɛbɛ yɔɔ ɩyaɣ-m se “Kɩpaɣlʋ! Kɩpaɣlʋ!” nɛ ɩɩlakɩ mbʋ́ mɔnpɔzʋʋ-mɩ yɔ?

⁴⁷ Mɛnkɛdɩɣ-mɩ weyi ɛkɔŋ mɔn-cɔlɔ nɛ ewelesiɣ mɔn-tɔm nɛ ɛɖɔŋ tɩ-yɔɔ yɔ ɛ-tɔm.

⁴⁸ Ɛwɛ ɛzɩ weyi ɛmawaɣ kuduyuu nɛ ehuyi pilimi nɛ ɛtalɩ ɛwaɣ nɛ pʋcɔ ɛsɩɩ tigiɖe yɔ. Pɔɔ kɔɔ kosu, lɩm wadɩ nɛ pɩmakɩ kuduyuu ŋ́gʋ́, ɛlɛ́, kɩtañamsɩ nɛ pʋcɔ paatɔ se kɩtɔlaa. Mbʋ́ pʋyɔɔ yɔ, pama-kʋ camɩyɛ.

⁴⁹ Weyi ɛ́lɛ́ welesiɣ mɔn-tɔm nɛ ɛɛɖɔŋ tɩ-yɔɔ yɔ, ɛ́lɛ́ wɛ ɛzɩ weyi ɛma kuduyuu tataa yem nɛ ɛtasɩɩ tigiɖe yɔ. Pɔɔ kɔɔ kosu nɛ lɩm wadɩ nɛ pɩmabɩ-kʋ nɛ kʋtɔlɩ kpaagbaa nɛ kʋyɔkɩ naŋa naŋa.»