Luka 5 - New TestamentYesu ya kajalaɣ tiyiyaa (Mat 4.18-22; Mrk 1.16-20) 1 Nakʋyʋ wiye Yesu sɩŋ Jeneezaarɛɛtɩ teŋgu nɔɔ nɛ ɛyáa samaɣ ñɩkɩɣ ɖama ɛ-cɔlɔ se panɩɩ Ɛsɔtɔm. 2 Peeɖe ɛna kpɩyɩŋ naalɛ sɩŋ kidiiliŋ yɔɔ nɛ piyiŋ lɔyaa tii nɛ pañalɩɣ pe-piyiŋ. 3 Ɛlɛ́, Yesu kpa lɛɛkʋ taa, Siimɔɔ tɩnɩ-kʋ. Ɛkpawa lɛ, eheyi-i se etuzi-kʋ lɩm taa pazɩ. Peeɖe ɛcaɣaɣ nɛ ɛpazɩ ɛyáa samaɣ Ɛsɔtɔm wɩlʋʋ. 4 Ɛtɛma lɛ, eheyi Siimɔɔ se: «Tuzi kpɩyʋʋ nɛ ŋwoni-kʋ ɖenɖe lɩm wɛ cukaŋ yɔ nɛ ña nɛ ña-taabalaa ɩlɔ mi-piyiŋ nɛ ɩkpa kpakpasɩ.» 5 Siimɔɔ cosi-i se: «Wɩlɩyʋ, ɖɩtɛm lɔʋ piyiŋ tɛʋ nɛ kifem nɛ ɖɩwɩɩ, ɖɩtakpa pʋyʋ. Ɛlɛ́, ñɔ-yɔɔ lɛ, ɖɩɖaɣnɩɣ-ɩ lɔʋ.» 6 Pɔlɔ-ɩ lɛ, pakpa kpakpasɩ pɩtɩɩfɛyɩ, halɩ pe-piyiŋ caɣ cɛbʋ. 7 Peeɖe pahadɩ nesi pa-taabalaa piyiŋ lɔyaa lɛlaa kpɩyʋʋ lɛɛkʋ taa se powolo pasɩnɩ-wɛ. Powoba lɛ, palɩzɩ kpakpasɩ nɛ paɖʋ kpɩyɩŋ ɩnʋ ɩ-naalɛ ɩ-taa nɛ piwiziɣ-i nɛ ɩcaɣ se ɩsʋʋ lɩm tɛɛ. 8 Siimɔɔ Pɩyɛ na ḿbʋ́ lɛ, ewolo eluŋ Yesu tɛɛ nɛ ɛtɔ se: «Kɩpaɣlʋ! Taakemna-m, mɛnkɛ kɩwɛɛkɩm laɖʋ.» 9 Toovenim lɛ se sɔɔndʋ kpa Siimɔɔ Pɩyɛ nɛ mbá patɩŋa paawɛ ɛ-cɔlɔ yɔ, mbʋ́ pʋyɔɔ yɔ, kpakpasɩ nzɩ́ pakpawa yɔ, sɩɖɔ siŋŋ. 10 Sɔɔndʋ kakpa ɖɔɖɔ Zebedee pɩyalaa: Yakubu nɛ Yohanɛɛsɩ. Patɩŋaɣ Siimɔɔ wayɩ. Ɛlɛ́, Yesu heyi Siimɔɔ ɛnʋ se: «Taasɔɔndɩ! Pɩkpaɣʋnɩ lɛɛlɛɛyɔ yɔ, ɛyáa ŋkaɣ kpaʋ.» 11 Peeɖe palɩzɩ pa-kpɩyɩŋ kidiiliŋ yɔɔ nɛ peyele mbʋ́ pɩtɩŋa payɩ paawɛna yɔ nɛ patɩŋ Yesu wayɩ. Yesu laba nɛ canaɣ nakɛyɛ yɔɔ cɛ (Mat 8.1-4; Mrk 1.40-45) 12 Nakʋyʋ wiye Yesu woba tɛtʋ natʋyʋ taa. Kʋdɔŋ kɩsɛmʋʋ kɔɖɔkɩ abalʋ nɔɔyʋ tɩ-taa peeɖe siŋŋ. Pɩkɛdaa lɛ, ɛna Yesu nɛ ewolo ɛ-cɔlɔ nɛ eluŋ ɛ-ɛsɩndaa nɛ etendi-i se: «Kɩpaɣlʋ! Yee ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.» 13 Peeɖe Yesu posi e-nesi nɛ etukuni-i nɛ eheyi-i se: «Mentisaa, pɩsɩ ɛyʋ weyi ɛmʋnaa yɔ!» Ɛyɔɔdɩ ḿbʋ́ lɛ, ɛ-yɔɔ tɩcɛbʋ. 14 Ɛlɛ́, Yesu ka ɛ-ñʋʋ taa se: «Taaheyi-tʋ nɔɔyʋ, wolo cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ Mooyiizi kaɖʋʋ yɔ nɛ pɩwɩlɩ ɛyáa tɩŋa se ñɔ-yɔɔ cɛba.» 15 Yesu hɩɖɛ tɛzaɣ sɛʋ paa le nɛ ɛyáa samaɣ sɔsɔɔ kpeɣliɣ ɛ-cɔlɔ se kanɩɩ ndʋ́ eheyiɣ-kɛ yɔ nɛ ɛla nɛ pɛ-ɛyáa kʋdɔmɩŋ cɛ. 16 Ɛlɛ́, Yesu yeki-wɛ nɛ ɛɖɛɣ lakʋ taa nɛ ɛsɛɣ Ɛsɔ. Yesu laba nɛ kalɩkalaɣ nakɛyɛ yɔɔ cɛ (Mat 9.1-8; Mrk 2.1-12) 17 Kɩyakʋ nakʋyʋ Yesu wɩlaɣ Ɛsɔtɔm. Farɩsɩ ŋgbɛyɛ taa ñɩma nɛ paɣtʋ wɩlɩyaa mbá palɩnɩ Galilee nɛ Yudee pɛ-tɛtʋ tɩŋa taa nɛ Yeruusalɛm yɔ, paacaɣ ɛ-cɔlɔ. Kɩpaɣlʋ ɖoŋ kɛwɛ ɛ-yɔɔ se ɛla nɛ kʋdɔndɩnaa yɔɔ cɛ. 18 Peeɖe nabɛyɛ kpaɣ kalɩkalaɣ nakɛyɛ nɛ ka-ñalʋʋ nɛ pañɩnɩɣ se powoni-kɛ Yesu cɔlɔ kuduyuu tɛɛ ɖenɖe ɛɛwɛɛ yɔ. 19 Ɛyáa samaɣ yɔɔ lɛ, paanaɣ se patɩŋnɩ le nɛ patanɩ-kɛ. Ɛlɛ́, pakpanɩ-kɛ kuduyuu ñʋʋ taa nɛ pakʋ pɔʋ nɛ petisi-kɛ nɛ ka-ñalʋʋ ɛyáa samaɣ hɛkʋ taa Yesu cɔlɔ. 20 Peeɖe Yesu nawa se pɛwɛnɩ lidaʋ ɛ-yɔɔ nɛ eheyi kalɩkalaɣ ŋ́gá se: «Man-taabalʋ! Menkpeɣ-ŋ ña-kɩwɛɛkɩm.» 21 Ɛlɛ́, paɣtʋ wɩlɩyaa nɛ Farɩsɩ ñɩma papazɩ miduu pe-liŋ tɛɛ nɛ pɔpɔzʋʋ ɖama se: «Ɛnɛ ɛkɛ anɩ nɛ ɛwɛɛkɩɣ Ɛsɔ hɩɖɛ ḿbʋ́? Apɩzɩɣ nɛ ekpeɣ kɩwɛɛkɩm nɛ pɩtasɩnɩ Ɛsɔ?» 22 Yesu na pa-lɩmaɣza ḿbʋ́ lɛ, ɛpɔzɩ-wɛ se: «Pɩlabɩ ɛzɩma ɩhʋʋ mɩ-taa ḿbʋ́? 23 Yee meheyi kalɩkalaɣ ŋ́gá se menkpeɣ-kɛ ka-kɩwɛɛkɩm yaa kakʋyɩ kɔɖɔ, tɩ-naalɛ tɩ-taa lɛ, ndʋ́ tɩfɛyɩ kaɖɛ? 24 Mancaɣ mawɩlɩ-mɩ se Ɛyʋ Pɩyalʋ wɛnɩ ɖoŋ se ekpeɣ ɛyáa pa-kɩwɛɛkɩm kedeŋa yɔɔ cɩnɛ.» Peeɖe eheyi kalɩkalaɣ ŋ́gá se: «Ña! Kʋyɩ ŋkpaɣ ña-ñalʋʋ nɛ ŋkpe.» 25 Peeɖe katɩkʋyɩ patɩŋa pɛ-ɛsɩndaa nɛ kakpaɣ ka-ñalʋʋ nɛ kasaŋ Ɛsɔ kpem yɔɔ. 26 Ɛyáa ḿbá pana ḿbʋ́ lɛ, pɩɖɩɣzɩ patɩŋa payɩ nɛ sɔɔndʋ kpa-wɛ nɛ pasaŋ Ɛsɔ nɛ pɔyɔɔdʋʋ se: «Sɔnɔ ɖɩna mbʋ́ wiɖiyi ɖɩtana kaʋ yɔ.» Yesu ya Leevi se ɛtɩŋ ɛ-wayɩ (Mat 9.9-13; Mrk 2.13-17) 27 Pʋwayɩ lɛ, Yesu lɩɩ nɛ ɛna tikee mʋyʋ weyi payaɣ se Leevi yɔ, ɛcaɣ ɛ-tʋmɩyɛ taa. Peeɖe Yesu heyi-i se: «Kʋyɩ ŋtɩŋ-m.» 28 Ɛ́lɛ́ kʋyɩ eyele pɩtɩŋa nɛ ɛtɩŋ-ɩ. 29 Pʋwayɩ lɛ, Leevi la kazandʋ ɛ-tɛ nɛ ɛ́yáa Yesu nɛ tikee mʋyaa sakɩyɛ nɛ ɛyáa lɛlaa sakɩyɛ nɛ powolo pacaɣ tɔɔnaɣ ɖɩtɔɔyɛ. 30 Peeɖe pɩtɛkɛdɩnɩ Farɩsɩ ñɩma nɛ paɣtʋ wɩlɩyaa mbá pɛkɛ pɔ-hɔɔlʋʋ taa ñɩma yɔ nɛ pɔpɔzɩ Yesu tɔmkpɛlɩkɩyaa se: «Pɩlabɩ ɛzɩma mɩ nɛ tikee mʋyaa nɛ kɩwɛɛkɩm laɖaa lɛlaa ɩkpɛndɩ ɩtɔkɩ nɛ ɩñɔʋ?» 31 Yesu cosi-wɛ se: «Pɩtɛkɛ alaafɩya tɩnaa pʋpɔzʋʋ se powolo fɛɖaa tɛ, kʋdɔndɩnaa pʋpɔzʋʋ se powolo. 32 Pɩtɛkɛ mbá pamaɣzɩɣ se pɛkɛ kʋtʋʋzaa yɔ, pa-wayɩ mɔnkɔma. Ɛlɛ́, mbá pasɩm pa-tɩ se pɛkɛ kɩwɛɛkɩm laɖaa yɔ, pa-wayɩ mɔnkɔm se pɛlɛɣzɩ wɛtʋ.» Yesu yɔɔdʋʋ nɔɔ hɔkʋʋ tɔm (Mat 9.14-17; Mrk 2.18-22) 33 Pʋwayɩ lɛ, ɛyáa ḿbá paɖaɣnɩ Yesu pɔzʋʋ se: «Pɩlabɩ ɛzɩma Farɩsɩ ñɩma tɔmkpɛlɩkɩyaa nɛ Lɩm Sɔʋ Sɔnzɩ Laɖʋ Yohanɛɛsɩ ñɩma pɔhɔkʋʋ nɔɔ ɖoŋ ɖoŋ nɛ pɛsɛɣ Ɛsɔ nɛ ña-ñɩma ñaahɔkʋʋ?» 34 Peeɖe Yesu cosi-wɛ se: «Ɩmaɣzɩɣ se ɩpɩzɩɣ ɩcɛyɩ ɛyáa mbá payaɣ-wɛ se powolo halɩkpaɣyɛ kazandʋ ɖeɖe yɔ se pacaɣ ñɔɔsɩ halʋ kɩfalʋ walʋ ɛsɩndaa yaa we? Pɩɩlakɩ ḿbʋ́. 35 Ɛlɛ́, pɔkɔŋ lɩzʋʋ walʋ ɛnʋ pɛ-hɛkʋ taa alɩwaatʋ natʋyʋ. Tɩ-taa pɔkɔŋ nɔɔ hɔkʋʋ.» 36 Pʋwayɩ lɛ, etuu-wɛ eduuye se: «Paacɩyɩɣ wonuu kɩfalʋʋ hɔɔlaɣ nɛ pɔtɔnɩ kɩbɩnʋʋ. Palabɩ ḿbʋ́ yɔ, pɛwɛɛkɩɣ kɩfalʋʋ. Piyele hɔɔlaɣ kɩfalaɣ ɛɛmʋʋnɩ wonuu kɩbɩnʋʋ ɖɔɖɔ. 37 Paasuu sʋlʋm pɛŋ weyi ɩtɔwaa yɔ ɩ-taa. Pɩtɛkɛ ḿbʋ́, pʋkɔŋ se pɩpɩɣ yɔ, pɩyasɩɣ-ɩ nɛ sʋlʋm wɛɛkɩ pikpe tataa yem nɛ pɛŋ ñala asɛyʋʋ ɖɔɖɔ. 38 Pɛŋ weyi ɩtɔtɔɔ yɔ, ɩ-taa posuu. 39 Nɔɔyʋ fɛyɩ se ɛñɔʋ sʋlʋm kɩpɩbɩm nɛ ɛtasɩ awula. Mbʋ́ pʋyɔɔ yɔ, ɛtɔŋ se kɩpɩbɩm kɩlɩ ɖeu.» |