Luka 4 - New Testament

Satanɩ takɩ Yesu lakʋ taa

¹ Fezuu Kiɖeɖeu tibi Yesu yɔɔ lɛ, ɛlɩɩnɩ Yɔɔrdaŋ pɔɔ nɔɔ nɛ ɛpɩsɩɣ. Peeɖe kitolisi-i nɛ kiwoni-i lakʋ taa

² nɛ ɛcaɣ peeɖe kɩyakɩŋ nɩɩnaza nɛ Satanɩ wɛɛ ɛtakɩɣ-ɩ. Ɛtaatɔɔ nabʋyʋ kɩyakɩŋ ɩnʋ ɩ-taa. Ɩ-wayɩ lɛ, ñɔɔsɩ kpa-ɩ

³ nɛ Satanɩ ɛnʋ eheyi-i se: «Yee ŋkɛ Ɛsɔ Pɩyalʋ yɔ, heyi pɩyɛ ɖɩnɛ nɛ ɖɩpɩsɩ tindine nɛ ŋtɔɔ.»

⁴ Yesu cosi-i se: «Pama Ɛsɔtɔm Takayaɣ taa se pɩtɛkɛ tɔɔnaɣ ɖeke ɛyʋ cakɩnɩ wezuu.»

⁵ Pʋwayɩ lɛ, Satanɩ kpaɣ-ɩ nɛ ɛkpazɩ-ɩ ɖenɖe pɩkɩlɩ kʋyʋʋ yɔ nɛ ɛtɩwɩlɩ-ɩ kedeŋa kpeekpe yɔɔ ajɛya

⁶ nɛ eheyi-i se: «Mahaɣ-ŋ kedeŋa kanɛ kɔ-yɔɔ ɖoŋ nɛ ka-ñɩm tɩŋa payɩ. Mbʋ́ pʋyɔɔ yɔ, me-nesi taa paɖʋzɩ pɩtɩŋa nɛ weyi mɔnsɔɔlaa yɔ, ɛnʋ mahaɣ.

⁷ Pʋ-yɔɔ lɛ, yee ŋluŋ mɛn-tɛɛ yɔ, mankpakɩɣ pɩtɩŋa payɩ nɛ manɖʋzɩ ñe-nesi taa.»

⁸ Yesu cosi-i se: «Pama Ɛsɔtɔm Takayaɣ taa se: ‹Ña-Kɩpaɣlʋ Ɛsɔ ɖeke koŋ tɛɛ pʋwɛɛ se ŋluŋ nɛ ŋla ɛ-tʋmɩyɛ.› »

⁹ Satanɩ woni Yesu ɖɔɖɔ Yeruusalɛm nɛ ɛkpazɩ-ɩ Ɛsɔ kuduyuu sɔsɔʋ ñʋʋ taa nɛ eheyi-i se: «Yee ŋkɛ Ɛsɔ Pɩyalʋ yɔ, kʋyɩ ŋmaa tataa.

¹⁰ Mbʋ́ pʋyɔɔ yɔ, pama Ɛsɔtɔm Takayaɣ taa se Ɛsɔ heyiɣ e-tiyiyaa nɛ pohuuzi ñɔ-yɔɔ nɛ nabʋyʋ ɛtaalabɩ-ŋ.

¹¹ Pamawa ɖɔɖɔ se pétéɣ-ŋ nɛ pɔ́ɖɔ́kɩ-ŋ camɩyɛ se ŋtaatɔlɩ pɩyɛ naɖɩyɛ yɔɔ nɛ pʋkʋ ña-naŋgbaŋaɣ.»

¹² Yesu cosi-i se: «Pama ka-taa ɖɔɖɔ se taatakɩ ña-Kɩpaɣlʋ Ɛsɔ se ŋna ɛ-wayɩ.»

¹³ Satanɩ tɛm-ɩ takʋʋ pɩtɩŋa pɩ-taa ḿbʋ́ lɛ, eyebi-i nɛ ɛcaŋ ɛɖɛɛ se pɩlaba wiɖiyi.

Yesu pɩsaa ɛkɔɔ Galilee egeetiye taa

¹⁴ Pʋwayɩ lɛ, Yesu pɩsɩ Galilee egeetiye taa nɛ Fezuu Kiɖeɖeu ɖoŋ nɛ ɛ-hɩɖɛ sɛɛ egeetiye ńɖɩ́ ɖɩtɩŋa ɖɩ-taa.

¹⁵ Ɛwɩlaɣ Ɛsɔtɔm Ɛsɔ ɖɩsɛyɛ ndɩ ndɩ taa nɛ ɛyáa tɩŋa payɩ yɩɣyɩɣ-ɩ.

Yesu heyiɣ ɛyáa Ɛsɔtɔm

¹⁶ Pʋwayɩ lɛ, Yesu wolo Nazarɛɛtɩ ɖenɖe pɔɖɔkɩ-ɩ nɛ ɛpaɣlɩ yɔ nɛ ɛsʋʋ Ɛsɔ ɖɩsɛyɛ taa kɩyakʋ kɩhɛzʋʋ wiye ɛzɩ ɛtɩɩlakʋʋ yɔ. Peeɖe ɛkʋyaa ɛsɩŋ se ɛkalɩɣ Ɛsɔtɔm

¹⁷ nɛ pɛcɛlɩ-ɩ náyʋ Ezaayii takayaɣ nɛ ekuli ɖoli nɔɔyʋ nɛ ɛkalɩ. Pama peeɖe se:

¹⁸ «Kɩpaɣlʋ lɩzɩ-m nɛ ɛha-m e-Fezuu Kiɖeɖeu. Toovenim, ɛlɩzɩ-m nɛ etiyi-m se monsusi kʋñɔndɩnaa Laŋhɛzɩyɛ Tɔm. Etiyi-m se meheyi salaka tɩnaa se pɛwɛ pa-tɩ yɔɔ! Meheyi ɖɔɖɔ yʋlʋmaa se pɔkɔŋ pɛ-ɛsɛ kuluu! Etiyi-m se moholi ajamaa mbá panazɩɣ-wɛ yɔ.

¹⁹ Etiyi-m ɖɔɖɔ se meheyi ɛyáa tɩŋa pɩnaɣ ŋgá Ɛsɔ naɣ pa-pʋtɔdɩyɛ yɔ kɔ-tɔm.»

²⁰ Yesu tɛm kalʋʋ lɛ, esuli-kɛ nɛ ɛcɛlɩ tʋmɩyɛ sɩnɩyʋ nɛ pɩsɛɣ ɛcaɣ se ɛpazɩ-wɛ wɩlʋʋ. Ɛlɛ́, ɛyáa mbá pɛwɛ Ɛsɔ ɖɩsɛyɛ taa peeɖe yɔ, patɩŋa pɛkpɛzɩ ɛsɛ nɛ pɔcɔŋnɩ-ɩ.

²¹ Peeɖe Yesu pazɩ-wɛ heyuu se: «Tɔm ndʋ́ mankalɩ lɛɛlɛɛyɔ yɔ, tɩlabɩ alɩwaatʋ ndʋ́ ɩnɩɣaɣ-tʋ yɔ.»

²² Ɛyɔɔdɩ ḿbʋ́ lɛ, patɩŋa payɩɣyɩ-ɩ nɛ pɩlabɩ-wɛ piti nɛ lootiye tɔm ndʋ́ eheyi-wɛ yɔ nɛ pɔtɔŋ se: «Pɩtɛkɛ Yozɛɛfʋ pɩyalʋ yɔ?»

²³ Ɛlɛ́, Yesu heyi-wɛ se: «Toovenim lɛ, ɩkaɣ-m tuuu eduuye se: ‹Fɛɖʋ, fɛ ña-tɩ ña-maɣmaɣ.› Halɩ ɩkaɣ-m tɔm ɖɔɖɔ se: ‹Đɩnɩ mbʋ́ pɩtɩŋa ŋlabɩ Kapɛrnayum yɔ, la ḿbʋ́ ña-tɩ tɩŋa ñɛ-tɛ cɩnɛ.› »

²⁴ Peeɖe ɛtasɩ-wɛ heyuu se: «Toovenim lɛ, mankaɖɩɣ-mɩ se patakpaɣ náyʋ se ɛkɛ pʋyʋ ɛ-maɣmaɣ ɛ-tɛ.

²⁵ Toovenim tɔm meheyiɣ-mɩ se Elii alɩwaatʋ taa lɛ, lelaa sakɩyɛ kɛwɛ Izrɛɛlɩ ɛjaɖɛ taa. Alɩwaatʋ ńdʋ́ lɛ, tɛʋ tanɩɩ pɩnzɩ naadozo nɛ fenasɩ loɖo nɛ ñɔɔsɩ sɔsɔsɩ nasɩyɩ lɩɩ ɛjaɖɛ tɩŋa.

²⁶ Ŋgʋ́, Ɛsɔ taatiyi Elii lelaa ḿbá pa-taa nɔɔyʋ cɔlɔ. Ɛlɛ́, lelu nɔɔyʋ cɔlɔ etiyi-i. Ɛ́lɛ́ tɛkɛ Yuda tʋ, ɛɛwɛ Sarɛptaa, Sidɔɔ egeetiye taa.

²⁷ Canasɩ sakɩyɛ kɛwɛ ɖɔɖɔ Izrɛɛlɩ ɛjaɖɛ taa náyʋ Eliizee alɩwaatʋ taa. Ŋgʋ́, sɩ-taa nakɛyɛ yɔɔ taacɛ, ɛlɛ́, Siirii ɛjaɖɛ taa tʋ Naamaɣ yɔɔ ɖeke kɛcɛbɩna.»

²⁸ Mbá patɩŋa paawɛ Ɛsɔ ɖɩsɛyɛ taa peeɖe yɔ, panɩ ḿbʋ́ lɛ, pɩwɩzɩ-wɛ pɩŋŋ.

²⁹ Peeɖe pakʋyaa pakpa Yesu nɛ palɩzɩ-ɩ nɛ pɛ-tɛtʋ wayɩ nɛ pakpanɩ-ɩ pʋʋ ŋgʋ́ kʋ-yɔɔ pɛ-tɛtʋ wɛɛ yɔ kʋ-ñʋʋ taa se potuzi-i nɛ ɛtɔlɩ kajalaŋa taa.

³⁰ Ɛlɛ́, Yesu tɩŋnɩ pɛ-hɛkʋ taa hɛɛɛ nɛ ɛcaŋ ɛɖɛɛ.

Yesu wazɩ abalʋ weyi eleeu nɔɔyʋ wɛ ɛ-wayɩ yɔ

³¹ Yesu ɖɛwa lɛ, ewolo Kapɛrnayum Galilee egeetiye taa nɛ ɛwɩlɩɣ ɛyáa Ɛsɔtɔm Ɛsɔ ɖɩsɛyɛ taa kɩyakʋ kɩhɛzʋʋ wiye.

³² Peeɖe pɩlabɩ-wɛ piti nɛ ɛzɩma mbʋ́ ɛwɩlaɣ-wɛ yɔ, mbʋ́ pʋyɔɔ yɔ, ɛwɩlaɣ-wɛ nɛ abalɩtʋ.

³³ Puwiye lɛ, abalʋ nɔɔyʋ kɛwɛ peeɖe, eleeu nɔɔyʋ kɛwɛ ɛ-wayɩ. Pɩkɛdaa lɛ, ɛma kubuka se:

³⁴ «Ou! Yesu Nazarɛɛtɩ tʋ, ɛbɛ ŋcaɣnɩ-ɖʋ? Ŋkɔm se ŋkʋ-ɖʋ yaa we? Mansɩm mbʋ́ ŋkɛnaa yɔ ɖeu. Ŋkɛ Ɛsɔ Ɛyʋ.»

³⁵ Peeɖe Yesu holini-i se: «Hei! Su peeɖe nɛ ŋse abalʋ ɛnʋ ɛ-wayɩ. Ɛlɛ́, eleeu co abalʋ ɛnʋ nɛ ɛyaɣ-ɩ nɛ tɛtʋ ɛyáa ɛsɩndaa nɛ ɛcaŋ ese. Ɛlɛ́, pɩtala abalʋ ɛnʋ pʋyʋ.»

³⁶ Peeɖe pɩɖɩɣzɩ ɛyáa tɩŋa nɛ pɔpɔzʋʋ ɖama se: «Tɔm ndʋ́ lɛ ḿbʋ́? Abalʋ ɛnɛ, ɛñazɩɣ aleewaa nɛ abalɩtʋ nɛ peseɣ.»

³⁷ Ḿbʋ́ labɩna nɛ Yesu hɩɖɛ sɛɛ Galilee egeetiye tɩŋa payɩ taa.

Yesu wazɩ kʋdɔndɩnaa sakɩyɛ pa-kʋdɔmɩŋ

³⁸ Yesu lɩnɩ Ɛsɔ ɖɩsɛyɛ taa lɛ, ewolo Siimɔɔ tɛ. Kɩnamɩyɛ kɔɖɔkɩ Siimɔɔ yɔsɔ siŋŋ nɛ petendi Yesu se ɛla nɛ ɛ-yɔɔ cɛ.

³⁹ Peeɖe Eluzi ɛ-tɩ nɛ eholini kɩnamɩyɛ ńɖɩ́ se ɖɩcɛ nɛ ɖɩcɛ ɖɔɖɔ halʋ ɛnʋ ɛ-yɔɔ nɛ ɛtɩkʋyɩ ɛha-wɛ lɩm.

⁴⁰ Wɩsɩ ɖʋwa lɛ, mbá patɩŋa paawɛnɩ kʋdɔndɩnaa ndɩ ndɩ yɔ, powoni-wɛ Yesu cɔlɔ nɛ ɛtɩnɩ e-nesi paa weyi ɛ-yɔɔ nɛ ɛ-yɔɔ cɛ.

⁴¹ Ɛɖɔɔnɩ aleewaa ɖɔɖɔ ɛyáa sakɩyɛ wayɩ nɛ pamakɩ kubusi se: «Ŋkɛ Ɛsɔ Pɩyalʋ.» Ɛlɛ́, Yesu paɣ́-wɛ se pataakuli ɛ-wayɩ. Mbʋ́ pʋyɔɔ yɔ, pasɩm-ɩ se ɛnʋ lɛ Weyi Ɛsɔ Lɩzaa Yɔ.

Yesu woba Yudee egeetiye taa se esusi Ɛsɔtɔm

⁴² Tɛʋ tɩfema lɛ, Yesu lɩɩ ewolo lakʋ taa. Peeɖe ɛyáa samaɣ pazɩ-ɩ ñɩnʋʋ. Pana-ɩ lɛ, powolo ɛ-cɔlɔ nɛ palaɣzɩɣ-ɩ se ɛtaaɖɛɛ.

⁴³ Ɛlɛ́, Yesu heyi-wɛ se: «Pʋwɛɛ se monsusi ɖɔɖɔ Ɛsɔ Kewiyaɣ Laŋhɛzɩyɛ Tɔm tɛtʋ lɛɛtʋ taa. Mbʋ́ pʋyɔɔ yɔ, pɩ-maɣmaɣ pʋ-yɔɔ Ɛsɔ tiyi-m.»

⁴⁴ Peeɖe ɛɖɛwa nɛ esusuu Ɛsɔtɔm Yudee egeetiye taa Ɛsɔ ɖɩsɛyɛ ndɩ ndɩ taa.