Luka 24 - New Testament

Yesu femnɩ sɩm taa

¹ Kujuka wiye tanaŋ tɛɛ cu lɛ, halaa ḿbá pakpaɣ num ndɩ ndɩ nɛ tɩlaaɖɩnaa mbá paañɩnaa yɔ se powoki pɩlaʋ yɔɔ.

² Patalaa lɛ, pamaɣnɩ patʋlɩ pɩyɛ nɖɩ́ paaɖɩɣ pɩlaʋ nɔɔ yɔ.

³ Pasʋ kɩ-taa lɛ, patana Kɩpaɣlʋ Yesu tomnaɣ.

⁴ Ɛlɛ́, pɩɖɩɣzɩ-wɛ siŋŋ. Kpaagbaa ḿbʋ́ lɛ, abalaa naalɛ nabɛyɛ tɩlɩʋ pɔ-yɔɔ. Posu wondu, nɛ tɩñɩlɩzɩɣ pelu pelu.

⁵ Peeɖe sɔɔndʋ kpa halaa ḿbá nɛ paka pɛ-ɛsɛ nɛ tɛtʋ nɛ abalaa ḿbá pɔpɔzʋʋ-wɛ se: «Pɩlabɩ ɛzɩma nɛ ɩñɩnɩɣ weyi ɛwɛnɩ ɛ-ɛsɛ yɔ ɖenɖe sɩɖaa wɛɣ yɔ?

⁶ Ɛfɛyɩ cɩnɛ, efema. Ɩtɔzɩ tɔm ndʋ́ eeheyi-mɩ Galilee egeetiye taa se:

⁷ pʋwɛɛ se paɖʋ Ɛyʋ Pɩyalʋ kɩwɛɛkɩm laɖaa nesi taa nɛ pakam-ɩ kaamaŋkaɣ yɔɔ nɛ ɛsɩ nɛ kɩyakɩŋ naadozo wiye lɛ, Ɛsɔ fezi-i yɔ tɩ-yɔɔ.»

⁸ Peeɖe pɔtɔzɩ tɩ-yɔɔ

⁹ nɛ palɩɩ pɩlaʋ ŋ́gʋ́ kɩ-taa nɛ powolo pɛkɛdɩ Yesu tiyiyaa hiu nɛ kʋɖʋm nɛ ɛ-tɔmkpɛlɩkɩyaa lɛlaa tɩŋa mbʋ́ pɩtɩŋa panawa yɔ.

¹⁰ Halaa ḿbá lɛ: Magdala Maarɩɩ nɛ Yaanɩ nɛ Yakubu ɖoo Maarɩɩ. Halaa lɛlaa mbá paawobi peeɖe ɖɔɖɔ yɔ, peheyi Yesu tiyiyaa ḿbá ɖɔɖɔ ḿbʋ́.

¹¹ Ɛlɛ́, pakpaɣ-tʋ se tɩkɛ kɩmɛlɛndʋ tɔm nɛ petetisi-tʋ. [

¹² Paa ḿbʋ́ yɔ, Pɩyɛ ñaakʋyaa ɛkpaɣ seya nɛ ewolo pɩlaʋ yɔɔ. Ɛtalaa eluŋ nɛ ewili kɩ-taa lɛ, ɛnaɣ pɩsaŋ weyi paahɔkɩ-ɩ ɩ-taa yɔ i-ɖeke. Peeɖe pɩlabɩ-ɩ piti pɩŋŋ nɛ mbʋ́ pɩtɩŋa payɩ pɩlaba yɔ nɛ ɛpɩsɩ ekpe.]

Tiyiyaa naalɛ katɩ Yesu

¹³ Kɩyakʋ kʋɖʋmʋʋ ŋ́gʋ́ ki-wiye Yesu tɔmkpɛlɩkɩyaa naalɛ kʋyaa se powoki tɛtʋ cikpetu ndʋ́ payaɣ se Emayuusɩ yɔ tɩ-taa. Tiiposini Yeruusalɛm ɛzɩ kiloomɛtanaa hiu nɛ kʋɖʋm yɔ.

¹⁴ Pɛɖɛɣaɣ lɛ, pɔyɔɔdʋʋ mbʋ́ pɩtɩŋa pɩlaba yɔ pʋ-tɔm.

¹⁵ Pɔyɔɔdaɣnɩ ɖama ḿbʋ́ lɛ, Yesu ɖɔ nɛ ewolo pɔ-cɔlɔ nɛ ɛ nɛ wɛ pɛɖɛɣ.

¹⁶ Ɛlɛ́, patasɩm-ɩ, mbʋ́ pʋyɔɔ yɔ, piihuuzi pɛ-ɛsɛ yɔɔ.

¹⁷ Peeɖe ɛpɔzɩ-wɛ se: «Tɔm ndʋ́ ɩyɔɔdʋʋnɩ ɖama nʋmɔʋ taa ḿbʋ́?» Ɛpɔzɩ-wɛ ḿbʋ́ lɛ, pasɩŋnɩ ɛsɛñɩŋɩyɛ

¹⁸ nɛ pa-taa weyi payaɣ se Kleyoopaasɩ yɔ, ɛpɔzɩ-ɩ se: «Ɛzɩ ñe-ɖeke koŋ ŋwɛnɩ Yeruusalɛm nɛ ŋtanɩɩ mbʋ́ pɩtɩŋa payɩ pɩlabɩ peeɖe kɩyakɩŋ ɩnɛ ɩ-taa yɔ?»

¹⁹ Ɛlɛ́, ɛpɔzɩ-wɛ se: «Ɛbɛ laba tɛ?» Pocosi-i se: «Ɛzɩ ŋtanɩɩ mbʋ́ pɩlabɩ Nazarɛɛtɩ tʋ Yesu yɔ? Ɛɛkɛ náyʋ nɛ ɛlakɩ tʋma nɛ ɛyɔɔdʋʋ tɔm nɛ abalɩtʋ Ɛsɔ nɛ ɛyáa tɩŋa pɛ-ɛsɩndaa.

²⁰ Ɛlɛ́, ɖɔ-cɔjɔnaa sɔsaa nɛ ɖa-ñʋndɩnaa pakpa-ɩ pɛcɛlɩ nɛ pakʋ ɛ-tɔm nɛ pakam-ɩ kaamaŋkaɣ yɔɔ nɛ ɛsɩ.

²¹ Ŋgʋ́, ɖɩtaɣaɣ liu se ɛnʋ kɔŋnɩ yabʋ Izrɛɛlɩ ñɩma ñʋʋ. Ɛlɛ́, pɩtɛm labʋ kɩyakɩŋ naadozo yɔ, pɩtɩŋa pɩlabʋ ḿbʋ́ yɔ.

²² Meheyiɣ-mɩ se ɖa-taa halaa nabɛyɛ yeba nɛ pɩɖɩɣzɩ-ɖʋ pɩŋŋ. Pakʋyɩ tanaŋ kʋnɛ kɩ-tɛɛ cu nɛ powolo pasʋʋ pɩlaʋ taa

²³ ɛlɛ́, patana e-tomnaɣ. Peeɖe papɩsaa peheyi-ɖʋ se Ɛsɔ tiyiyaa lɩ pɔ-yɔɔ nɛ peheyi-wɛ se efema.

²⁴ Pɔyɔɔdɩ ḿbʋ́ lɛ, ɖa-taa lɛlaa wolo pewili pɩlaʋ taa nɛ pamaɣnɩ ɛzɩ paaheyuu-ɖʋ yɔ. Patana Yesu.»

²⁵ Peeɖe Yesu heyi-wɛ se: «Kɩmɛlɛmɩŋ mɩ! Pɩlabɩ ɛzɩma mɩ-laŋa wɛɛ kpɩzɩŋ nɛ iitisiɣ tɔm ndʋ́ náyaa kɔyɔɔdaa yɔ?

²⁶ Pɩtaawɛɛ se Weyi Ɛsɔ Lɩzaa Yɔ, ɛtɔɔ kʋñɔŋ ḿbʋ́ nɛ pʋcɔ ɛsʋʋ e-koboyaɣ taa yaa we?»

²⁷ Pʋwayɩ lɛ, ɛkɛdɩ-wɛ ɖenɖe ɖenɖe paama ɛ-tɔm Ɛsɔtɔm Takayaɣ taa yɔ nɛ ɛlɩzɩ-wɛ tɩ-tɔbʋʋ. Ɛpazɩnɩ Mooyiizi takayɩsɩ nɛ ɛkɔɔ ɛtɛzɩnɩ náyaa ñɩnzɩ tɩŋa.

²⁸ Pɔñɔtɩnɩ tɛtʋ ndʋ́ powokaɣ tɩ-taa yɔ lɛ, Yesu la ɛzɩ ɛɖɛɣ poliŋ yɔ.

²⁹ Ɛlɛ́, pɛcɛyɩ-ɩ se: «Kɔɔ ɖa nɛ ŋ ɖɩsʋʋ cɩnɛ. Mbʋ́ pʋyɔɔ yɔ, ɖanaɣ ɖanaa nɛ pɩcaɣ yuu.» Peeɖe ewoba nɛ ɛ nɛ wɛ pɛwɛɛ.

³⁰ Pɩkɛdaa lɛ, ɛ nɛ wɛ pacaɣ tɔɔnaɣ ɖɩtɔɔyɛ nɛ ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ.

³¹ Peeɖe pɩcɛbɩ pɛ-ɛsɛ yɔɔ nɛ pasɩm-ɩ. Ɛlɛ́, ɛmʋʋ pɛ-ɛsɩndaa.

³² Pɩlabɩ ḿbʋ́ lɛ, pɔyɔɔdɩnɩ ɖama se: «Naze ḿbʋ́ eheyaɣ-ɖʋ Ɛsɔtɔm nʋmɔʋ taa nɛ ɛlɩzɩɣ-ɖʋ tɩ-tɔbʋʋ nɛ ɖa-laŋa hʋlʋmʋʋ pɩtɩɩfɛyɩ!»

³³ Kpaagbaa ḿbʋ́ lɛ, pakʋyɩ papɩsɩ Yeruusalɛm nɛ pamaɣnɩ tiyiyaa ḿbá pe-hiu nɛ kʋɖʋm nɛ pa-taabalaa. Paakpeɣlaa

³⁴ nɛ pɔtɔŋ se: «Kɩpaɣlʋ fema toovenim nɛ ɛlɩzɩ ɛ-tɩ ɛwɩlɩ Siimɔɔ.»

³⁵ Peeɖe ɛ-tɔmkpɛlɩkɩyaa ḿbá pa-naalɛ pɛkɛdɩ-wɛ mbʋ́ pɩtɩŋa pɩlabɩ-wɛ nʋmɔʋ taa yɔ, nɛ ɛzɩma mbʋ́ paasɩm-ɩ alɩwaatʋ ndʋ́ ɛcɩyaɣ tindine yɔ.

Yesu wɩlɩ ɛ-tɩ e-tiyiyaa

³⁶ Pɛkɛdaɣ-wɛ ḿbʋ́ lɛ, Yesu lɩɩ pɔ-yɔɔ [nɛ eheyi-wɛ se: «Ɩwɛɛ laŋhɛzɩyɛ taa.»]

³⁷ Peeɖe sɔɔndʋ kpa-wɛ pɩŋŋ, mbʋ́ pʋyɔɔ yɔ, paasɩm se ñazɩñazʋʋ nakʋyʋ.

³⁸ Ɛlɛ́, ɛpɔzɩ-wɛ se: «Ɛbɛ yɔɔ piliɣtiɣ-mɩ ḿbʋ́ nɛ ɩpʋtʋʋ mɩ-taa? Ɛbɛ lakɩ-mɩ?

³⁹ Ɩcɔnɩ me-nesi nɛ ma-naŋgbanzɩ nɛ ɩna. Toovenim lɛ, ma! Itukuni-m nɛ ɩna, mɩ-maɣmaɣ ɩtɛm sɩm se ñazɩñazʋʋ fɛyɩnɩ tomnaɣ ɛzɩ ma yɔ.» [

⁴⁰ Ɛyɔɔdɩ ḿbʋ́ lɛ, ɛwɩlɩ-wɛ e-nesi nɛ ɛ-naŋgbanzɩ.]

⁴¹ Ɛlɛ́, ɛzɩma mbʋ́ pa-laŋa kahʋlʋmaa siŋŋ nɛ pɩlabɩ-wɛ piti yɔ, pʋ-yɔɔ lɛ, patapɩzɩ pɛwɛnɩ lidaʋ ɛ-yɔɔ kpaagbaa. Peeɖe ɛpɔzɩ-wɛ se: «Ɩwɛnɩ tɔɔnaɣ nakɛyɛ cɩnɛ yaa we?»

⁴² Peeɖe pɛcɛlɩ-ɩ kpakpayaɣ ŋgá pɔhɔbɩ-kɛ yɔ ke-titiɖe

⁴³ nɛ ɛmʋ-ɖɩ ɛtɔɔ pɛ-ɛsɩndaa.

⁴⁴ Ɛlɛ́, eheyi-wɛ se: «Mbʋ́ pʋ-tɔm maaheyi-mɩ alɩwaatʋ ndʋ́ ma nɛ mɩ ɖɩɩwɛɛ yɔ, ḿbʋ́ labɩnɩ ɛzʋnɔ yɔ. Mbʋ́ pʋyɔɔ yɔ, pɩɩwɛɛ se mɔn-tɔm ndʋ́ tɩtɩŋa paama Mooyiizi nɛ náyaa nɛ keɣsi maɖaa pa-takayɩsɩ taa yɔ, tɩla.»

⁴⁵ Peeɖe ekuli pa-lɩmaɣza yɔɔ se panɩɩ Ɛsɔtɔm Takayaɣ taa tɔm tɔbʋʋ

⁴⁶ nɛ eheyi-wɛ se: «Ndʋ́ pama ka-taa yɔ lɛ se pʋwɛɛ se Weyi Ɛsɔ Lɩzaa Yɔ, ɛtɔɔ kʋñɔŋ nɛ ɛsɩ nɛ pepim-i. Kɩyakʋ naadozo ñɩŋgʋ wiye lɛ, pefezi-i nɛ ɛlɩɩnɩ pɩlaʋ taa.

⁴⁷ Pʋwɛɛ ɖɔɖɔ se posusini ɛ-nɔɔ ajɛya kpeekpe taa ɛyáa se pɛlɛɣzɩ wɛtʋ nɛ Ɛsɔ kpeɣ-wɛ pa-kɩwɛɛkɩm. Ɛlɛ́, pʋwɛɛ se papazɩnɩ Yeruusalɛm.

⁴⁸ Mɩ lɛ mbʋ́ pɩlaba yɔ pɩ-aseɣɖe tɩnaa.

⁴⁹ Meheyiɣ-mɩ se ma lɛ, mentiyiɣni-mɩ ɖoŋ weyi man-Caa ɖʋwa se ɛhaɣ-mɩ yɔ. Ɛlɛ́, pʋwɛɛ se ɩcaɣ Yeruusalɛm nɛ pʋkɔɔ pɩsɩɩnɩ alɩwaatʋ ndʋ́ ɖoŋ ɛnʋ etibi mɩ-yɔɔ yɔ.»

Yesu kʋyɩ e-tiyiyaa cɔlɔ

⁵⁰ Pʋwayɩ lɛ, Yesu woni-wɛ Betaanii tɛtʋ cɔlɔ. Peeɖe ɛkpazɩ e-nesi nɛ ɛwazɩɣ pɔ-yɔɔ.

⁵¹ Ɛwazaɣ pɔ-yɔɔ ḿbʋ́ lɛ, pʋkʋsɩ-ɩ pɔ-cɔlɔ peeɖe yem nɛ pɩkpazɩ-ɩ ɛsɔdaa.

⁵² Peeɖe poluŋaa nɛ paɖʋ-ɩ hɩɖɛ nɛ pacaŋ papɩsɩ Yeruusalɛm nɛ laŋhʋlʋmɩyɛ pɩtɩɩfɛyɩ

⁵³ nɛ powoki Ɛsɔ ɖɩɣa taa paa ɖooye nɛ pasaŋ Ɛsɔ.