Luka 18 - New TestamentLelu nɛ tɔm hʋyʋ kɩdɛkɛdʋ pɔ-tɔm 1 Yesu tasɩ ɛ-tɔmkpɛlɩkɩyaa tuuu eduuye se ɛwɩlɩ-wɛ se pʋwɛɛ se pɛwɛɛ Ɛsɔ sɛʋ yɔɔ tam. Pɩtaatii po-toma taa kaʋ. 2 Eduuye ńɖɩ́ yɔ se: «Wiyaʋ nɔɔyʋ kɛwɛnɩ tɛtʋ natʋyʋ taa, ɛɛñaŋ Ɛsɔ. Đɔɖɔ lɛ, ɛɛcɔŋnɩ nɔɔyʋ se ɛkɛ pʋyʋ. 3 Lelu nɔɔyʋ ñaawɛ peeɖe nɛ ewoki wiyaʋ ɛnʋ ɛ-cɔlɔ tam se ɛhʋʋ ɛ nɛ e-koyindu pɔ-tɔm nɛ eɖezi-i. 4 Ɛlɛ́, eekeŋni-i. Pʋkɔma pɩnɩɩ wiyaʋ ɛnʋ lɛ, ɛtɔ se: ‹Toovenim lɛ, paa maañaŋ Ɛsɔ nɛ maacɔŋnɩ nɔɔyʋ se ɛkɛ pʋyʋ yɔ, 5 ɖenɖe lelu ɛnɛ ɛkɔŋ tam nɛ ɛcɛyɩɣ-m yɔ, manɩɣnɩ-ɩ. Pɩtɛkɛ ḿbʋ́, ɛwɛɣ kɔm yɔɔ ḿbʋ́ nɛ ɛtɛzɩɣ-m cɛyʋʋ.› » 6 Peeɖe Kɩpaɣlʋ heyi-wɛ se: «Iwelesi camɩyɛ nɛ ɩnɩɩ tɔm ndʋ́ wiyaʋ ɛzaɣ́ʋ ɛnɛ ɛyɔɔdaa yɔ. 7 Ɩmaɣzɩɣ se Ɛsɔ ñaaɖeziɣ ɛ-ñɩma mbá pamakɩ kubusi nɛ payaɣ-ɩ wɩsɩ nɛ ɖoó yɔ yaa we? Pileɖiɣ nɛ pʋcɔ eɖezi-wɛ yaa we? 8 Mankaɖɩɣ-mɩ se: eɖeziɣ-wɛ lɔŋ. Ɛlɛ́, alɩwaatʋ ndʋ́ Ɛyʋ Pɩyalʋ kɔŋ kedeŋa yɔɔ cɩnɛ yɔ, ɛnaɣ ɛyáa mbá pɛwɛnɩ lidaʋ Ɛsɔ yɔɔ yɔ yaa we?» Farɩsɩ tʋ nɛ tikee mʋyʋ pɔ-tɔm 9 Yesu tuuu ɖɔɖɔ mbá pamaɣzaɣ se ḿbá lɛ kʋtʋʋzaa Ɛsɔ ɛsɩndaa nɛ pɔcɔŋnɩ lɛlaa se pɛtɛkɛ pʋyʋ yɔ eduuye se: 10 «Ɛyáa naalɛ nabɛyɛ wobina Ɛsɔ ɖɩɣa taa se pɛsɛɣ Ɛsɔ. Lɛlʋ kɛ Farɩsɩ tʋ nɛ lɛlʋ ñɛkɛ tikee mʋyʋ. 11 Peeɖe Farɩsɩ tʋ sɩŋaa nɛ ɛsɛɛ Ɛsɔ se: ‹Hayɩ Ɛsɔ! Mansaŋ-ŋ. Mbʋ́ pʋyɔɔ yɔ, mɛnfɛyɩ ɛzɩ lɛlaa mbá pamɩlɩɣ nɛ palakɩ ɛzaɣ́tʋ nɛ acɛyɛ yɔ. Mansaŋ-ŋ ɖɔɖɔ, mbʋ́ pʋyɔɔ yɔ, mɛnfɛyɩ ɛzɩ tikee mʋyʋ ɛnɛ yɔ. 12 Kpɩtaʋ taa lɛ, kɩyakɩŋ naalɛ mɔhɔkʋʋ nɔɔ. Mbʋ́ pɩtɩŋa mehikiɣ yɔ, mantayɩɣ-pʋ tam hiu nɛ mahaɣ-ŋ hɔɔlʋʋ kʋɖʋmʋʋ.› 13 Alɩwaatʋ ńdʋ́ lɛ, tikee mʋyʋ ñaasɩŋ poliŋ nɛ ɛsɔ ɛ-ñʋʋ nɛ tɛtʋ nɛ ekpiɖiɣ se: ‹Hayɩ Ɛsɔ! Na weyi ma mɛnkɛ kɩwɛɛkɩm laɖʋ yɔ man-pʋtɔdɩyɛ!› 14 Meheyiɣ-mɩ se Ɛsɔ kpeɣ abalʋ ɛnɛ ɛ-kɩwɛɛkɩm nɛ pʋcɔ ɛpɩsɩ ɛ-tɛ. Ɛlɛ́, eteɖezi Farɩsɩ tʋ. Mbʋ́ pʋyɔɔ yɔ, weyi ɛkpazɩɣ ɛ-tɩ yɔ, petisiɣ-i. Weyi ɛ́lɛ́ ñetisiɣ ɛ-tɩ yɔ, pakpazɩɣ-ɩ.» Mbá pɛwɛ ɛzɩ piya cikpesi yɔ, ḿbá kaɣnɩ sʋʋ Ɛsɔ kewiyaɣ taa (Mat 19.13-15; Mrk 10.13-16) 15 Pɩkɛdaa lɛ, ɛyáa wokini piya ajamaa Yesu cɔlɔ se ɛtɩnɩ sɩ-yɔɔ nesi nɛ ɛwazɩ sɩ-yɔɔ. Ɛ-tɔmkpɛlɩkɩyaa na-wɛ ḿbʋ́ lɛ, paɖaŋ-wɛ. 16 Peeɖe Yesu tiyaa payaa piya ńzɩ́ nɛ ɛtɔ se: «Iyele piya ajamaa nɛ pɔkɔɔ mɔn-cɔlɔ, ɩtaaɖaŋ-wɛ. Mbʋ́ pʋyɔɔ yɔ, mbá pɛwɛ ɛzɩ piya ajamaa ḿbá yɔ lɛ Ɛsɔ Kewiyaɣ taa ñɩma. 17 Toovenim lɛ, meheyiɣ-mɩ se: yee nɔɔyʋ etetisi se Ɛsɔ tɔkɩnɩ kewiyaɣ ɛzɩ piya cikpesi tisuu yɔ yɔ, ɛɛsʋʋ Ɛsɔ ɛnʋ e-Kewiyaɣ taa.» Ñɩm tʋ nɔɔyʋ nɛ Yesu pɔ-tɔm (Mat 19.16-30; Mrk 10.17-31) 18 Alɩwaatʋ natʋyʋ Yuda ñɩma wiyaʋ nɔɔyʋ pɔzɩ Yesu se: «Wɩlɩyʋ kɩbanʋ! Ɛbɛ pʋwɛɛ se mala nɛ mehiɣ wezuu maatɛŋ?» 19 Ɛlɛ́, ecosi-i se: «Pɩlabɩ ɛzɩma ŋyaɣ-m se kɩbanʋ? Nɔɔyʋ tɛkɛ kɩbanʋ nɛ pɩtasɩnɩ Ɛsɔ. 20 Paa pɩɩla ɛzɩma ŋsɩm Ɛsɔ paɣtʋ ndʋ́ paɖʋwa se: taala acɛyɛ, taakʋ ɛyʋ, taamɩlɩ, taacɛtɩnɩ lɛlʋ taa nɛ ŋña ña-caa nɛ ño-ɖoo yɔ?» 21 Peeɖe abalʋ ɛnʋ eheyi-i se: «Mɔnɖɔm paɣtʋ ńdʋ́ tɩtɩŋa tɩ-yɔɔ ɖooo me-evebutu taa.» 22 Eheyi Yesu ḿbʋ́ lɛ, ɛ́lɛ́ heyi-i se: «Pʋyʋ kʋɖʋm koŋ pɩkazaa se ŋtɛzɩ labʋ. Wolo ŋpɛdɩ mbʋ́ ŋwɛna yɔ pɩtɩŋa payɩ nɛ ŋtayɩ kʋñɔndɩnaa pi-liidiye nɛ ŋwɛnɩ ñɩm ɛsɔdaa. Yee ŋlabɩ ḿbʋ́ lɛ, ŋkɔɔ ŋtɩŋ-m.» 23 Eheyi-i ḿbʋ́ lɛ, ɛ́lɛ́ laŋɩyɛ wɛɛkɩ pɩŋŋ, mbʋ́ pʋyɔɔ yɔ, ɛɛwɛnɩ ñɩm pɩtɩɩfɛyɩ. 24 Yesu nawa se ɛ-laŋɩyɛ wɛɛkaa lɛ, ɛtɔ se: «Pʋwɛ kaɖɛ pɩtɩɩfɛyɩ se ñɩm tɩnaa ɛsʋʋ Ɛsɔ Kewiyaɣ taa! 25 Pʋcɔ ñɩm tʋ nɔɔyʋ sʋʋ ka-taa lɛ, pʋwɛ kaɖɛ nɛ pɩkɩlɩ ɛzɩ kpaŋnɔ siɣá naalɛ tʋ sʋʋnɩ ɛjɔʋ pɔʋ taa yɔ.» 26 Peeɖe mbá pewelesaɣnɩ-ɩ yɔ, pɔpɔzɩ-ɩ se: «Yee ḿbʋ́, apɩzɩɣ ehiɣ ñʋʋ yabʋ yɔ?» 27 Ɛlɛ́, Yesu cosi-wɛ se: «Mbʋ́ ɛyáa ɛɛpɩzɩɣ labʋ yɔ, Ɛsɔ ñapɩzɩɣ ɛlabɩ-pʋ.» 28 Ɛyɔɔdɩ ḿbʋ́ lɛ, Pɩyɛ heyi-i se: «Cɔnɩ ŋna ɖa ɖeyebu mbʋ́ pɩtɩŋa ɖɩwɛna yɔ nɛ ɖɩtɩŋ ña-wayɩ.» 29 Ɛlɛ́, Yesu cosi-wɛ se: «Toovenim lɛ, meheyiɣ-mɩ se yee nɔɔyʋ eyebi ɛ-ɖɩɣa yaa ɛ-halʋ yaa ɛ-ɖalaa yaa e-newaa yaa ɛ-caa nɛ e-ɖoo yaa e-piya Ɛsɔ Kewiyaɣ yɔɔ yɔ, 30 Ɛsɔ yeki nɛ ehiɣ alɩwaatʋ tʋnɛ tɩ-taa nɛ pɩkɩlɩ mbʋ́ eyeba yɔ. Piyele ndʋ́ tɩkɔŋ yɔ tɩ-taa lɛ, ehikiɣ wezuu maatɛŋ.» Yesu tasɩ yɔɔdʋʋ se ɛsɩkɩ nɛ efemni sɩm taa (Mat 20.17-19; Mrk 10.32-34) 31 Pɩkɛdaa lɛ, Yesu kɛsɩ ɛ-tɔmkpɛlɩkɩyaa hiu nɛ naalɛ nɛ eheyi-wɛ se: «Ɩna, ɖɩkpaɣ Yeruusalɛm. Peeɖe Ɛyʋ Pɩyalʋ tɔm ndʋ́ tɩtɩŋa payɩ náyaa kamawa yɔ, tɩkɔŋ labʋ. 32 Pɔkɔŋ-ɩ kpaʋ nɛ paɖʋzɩ mbá pɛtɛkɛ Yuda ñɩma yɔ pe-nesi taa nɛ powoŋ-i nɛ patʋʋ-ɩ nɛ pɔtɔ ɛ-yɔɔ ndaatʋ. 33 Pɔkɔŋ-ɩ luu agbazɛɛ nɛ pakʋ-ɩ. Kɩyakɩŋ naadozo wiye lɛ, Ɛsɔ fezi-i.» 34 Yesu yɔɔdɩ ḿbʋ́ lɛ, ɛ-tɔmkpɛlɩkɩyaa tatɩɩnɩʋ tɔm ńdʋ́ tɩ-tɔbʋʋ. Mbʋ́ pʋyɔɔ yɔ, tɩɩwɛ-wɛ mɛsaɣ tɛɛ. Pataaɖiɣzini mbʋ́ pʋ-tɔm ɛyɔɔdaɣ yɔ. Yesu laba nɛ yʋlʋm nɔɔyʋ yɔɔ cɛ Yeriikoo tɛtʋ taa (Mat 20.29-34; Mrk 10.46-52) 35 Yesu ɖɛɣaɣ Yeruusalɛm ḿbʋ́ lɛ, ɛñɔtɩnɩ Yeriikoo. Yʋlʋm nɔɔyʋ kacaɣ nʋmɔʋ nɔɔ nɛ ɛsʋlʋmʋʋ. 36 Ɛyáa samaɣ ɖɛɣaɣ lɛ, ɛnɩɩ ka-taŋ nɛ ɛpɔzɩ se: «Ɛbɛ lakɩɣ?» 37 Ɛlɛ́, peheyi-i se: «Nazarɛɛtɩ tʋ Yesu ɖɛɣna.» 38 Peeɖe ɛmabɩ kubuka se: «Wiyaʋ Daaviidi Sayɩ Yesu! Na man-pʋtɔdɩyɛ!» 39 Ɛlɛ́, mbá paawɛ nɔɔ yɔ, pakalɩ-ɩ se: «Su peeɖe!» Pɔyɔɔdɩ ḿbʋ́ lɛ, ɛtɛzɩ mabʋ kubuka se: «Wiyaʋ Daaviidi Sayɩ! Na man-pʋtɔdɩyɛ!» 40 Peeɖe Yesu sɩŋaa nɛ ɛha nɔɔ se powolo pɔhɔm-ɩ nɛ powoni-i ɛ-cɔlɔ. Powoni-i lɛ, Yesu pɔzɩ-ɩ se: 41 «Ŋcaɣ se malabɩ-ŋ we?» Ecosi-i se: «Kɩpaɣlʋ! La nɛ mɛ-ɛsɛ kuli.» 42 Peeɖe Yesu heyi-i se: «Ñɛ-ɛsɛ ekuli! Lidaʋ ŋgʋ́ ŋwɛnɩ mɔ-yɔɔ yɔ, kɩyabɩ ña-ñʋʋ.» 43 Kpaagbaa ḿbʋ́ lɛ, ɛ-ɛsɛ kuli nɛ ɛtɩŋɩɣ Yesu wayɩ nɛ ɛsaŋ Ɛsɔ. Ɛyáa samaɣ tɩŋa na ḿbʋ́ lɛ, kasʋʋ Ɛsɔ sam yɔɔ ɖɔɖɔ. |