Luka 16 - New Testament

Tʋmlaɖʋ lɛɣtʋ tʋ tɔm

¹ Yesu tasɩ ɛ-tɔmkpɛlɩkɩyaa tuuu eduuye se: «Ñɩm tʋ nɔɔyʋ kɛwɛnɩ tʋmlaɖʋ nɛ ɛcɔŋnɩ-ɩ ɛ-ñɩm yɔɔ. Nakʋyʋ wiye lɛ, powolo peheyi-i se: ‹Ña-tʋmlaɖʋ wɛɛkɩɣ ña-ñɩm.›

² Pʋ-yɔɔ ɛya-ɩ nɛ eheyi-i se: ‹Ña! Manɩɣ pɔyɔɔdʋʋ ñɔ-tɔm se we? Kɛdɩ-m ɛzɩma mbʋ́ ña-tʋmɩyɛ ɖɔŋ yɔ. Ŋŋtasɩɣ kɛʋ man-tʋmlaɖʋ!›

³ Peeɖe tʋmlaɖʋ ɛnʋ ɛhʋ ɛ-taa se: ‹Nɔɔnɔɔ man-caa lɩzɩɣ-m tʋmɩyɛ taa, malakɩ ɛzɩma lee? Mɛnfɛyɩ ɖoŋ se maahayɩ. Ŋgʋ́, sʋlʋmʋʋ ñɛwɛ-m fɛyɛ.

⁴ Tɔɔ! Mansɩm mbʋ́ malakɩ nɛ yee pɔɖɔɔnɩ-m lɛ, ɛyáa kamʋ-m pɛ-tɛ yɔ.›

⁵ Peeɖe etiyaa nɛ payaa ɛ-caa ɛnʋ ɛ-kɩndɩyaa kʋɖʋm kʋɖʋm. Pɔkɔma lɛ, ɛpɔzɩ kajalaɣ tʋ se: ‹Ɛzɩma ŋwɛnɩ man-caa kɩmɩyɛ?›

⁶ Ɛ́lɛ́ se: ‹Num kɩpam ŋgbaŋ mɩnʋʋ mɛwɛnɩ-ɩ kɩmɩyɛ.› Peeɖe tʋmlaɖʋ ɛnʋ eheyi-i se: ‹Ŋŋnaɣ ña-kɩmɩyɛ takayaɣ! Caɣ lɔŋ nɛ ŋma se ŋgbaŋ nɩɩnʋwa.›

⁷ Ɛkʋyɩ ɛ-yɔɔ lɛ, ɛmaa lɛlʋ yɔɔ se: ‹Nɛ ña-yɔ, ɛzɩma ña-ñɩnɖɛ kɛnaa?› Ɛ́lɛ́ cosi-i se: ‹Mɩla kutokiŋ mɩnʋʋ.› Peeɖe eheyi-i se: ‹Ŋŋnaɣ ña-kɩmɩyɛ takayaɣ! Ma se kutokiŋ nɩɩnʋwa nɛ niidozo.›

⁸ Pʋwayɩ lɛ, tʋmlaɖʋ ɛzaɣ́ʋ ɛnʋ ɛ-caa yɩɣyɩ-ɩ. Mbʋ́ pʋyɔɔ yɔ, ɛwɛnɩ lɛɣtʋ. Kedeŋa kanɛ kɔ-yɔɔ ñɩma wɛnɩ lɛɣtʋ pa-lakasɩ taa nɛ pɩkɩlɩ ñalɩmɩyɛ taa ñɩma.

Nɔɔyʋ ɛɛpɩzɩɣ ɛsɔɔlɩ Ɛsɔ nɛ ɛtɛ ɛwɛnɩ liidiye laɣzaɣ

⁹ Ma meheyiɣ-mɩ se: ɩkpaɣ kedeŋa yɔɔ cɩnɛ ñɩm mbʋ́ ɩwɛna yɔ nɛ ɩñɩnɩnɩ ɛgbaɣdɩnaa nɛ yee pʋkɔma pɩtɛɖɩɣ-mɩ lɛ, Ɛsɔ kamʋ-mɩ ɛ-ɖɩɣa ŋgá kaayɔkʋʋ kaʋ yɔ ka-taa.

¹⁰ Weyi ɛlakɩ mbʋ́ pʋpɔzʋʋ yɔ cikpem taa yɔ, ɛlakɩ ɖɔɖɔ mbʋ́ pʋpɔzʋʋ yɔ sɔsɔm taa. Weyi ɛ́lɛ́ muluu cikpem taa yɔ, emuluu ɖɔɖɔ sɔsɔm taa.

¹¹ Yee ɩtalabɩnɩ kedeŋa yɔɔ cɩnɛ ñɩm mbʋ́ pʋpɔzʋʋ yɔ lɛ, acɛlɩɣ-mɩ ñɩm maɣmaɣ siŋŋ yɔ?

¹² Yee ɩtalabɩnɩ lɛlʋ ñɩm mbʋ́ pʋpɔzʋʋ yɔ lɛ, acɛlɩɣ-mɩ mɩ-ñɩmbʋ yɔ?

¹³ Tʋmlaɖʋ nɔɔyʋ ɛɛpɩzɩɣ ɛla caanaa naalɛ tʋma. Yee ɛlakɩ ḿbʋ́ yɔ, ɛpaɖɩɣ lɛlʋ nɛ ɛsɔɔlɩ lɛlʋ. Yaa pʋtɔmaɣ yɔ, ɛnɩɣnɩ lɛlʋ nɛ eyele lɛlʋ. Ḿbʋ́ ɖɔɖɔ pʋwɛɛ: ɩɩpɩzɩɣ ɩsɔɔlɩ Ɛsɔ nɛ ɩtɛ ɩwɛɛ ñɩm laɣzaɣ.»

Yesu tɔm natʋyʋ

¹⁴ Yesu yɔɔdaɣ ḿbʋ́ lɛ, Farɩsɩ ñɩma nɩɩ tɔm ńdʋ́ tɩtɩŋa. Peeɖe powoŋ-i, mbʋ́ pʋyɔɔ yɔ, pɛwɛ liidiye laɣzaɣ.

¹⁵ Pʋ-yɔɔ Yesu heyi-wɛ se: «Ɩcaɣ se ɛyáa ɩna-mɩ se ɩkɛ kʋtʋʋzaa, ɛlɛ́, Ɛsɔ ñasɩm mɩ-lɩmaɣza tɩŋa. Mbʋ́ ɛyáa maɣzɩɣ se pɩkɩlɩ pɩtɩŋa payɩ yɔ, Ɛsɔ ɛɛcaɣ se ɛna-pʋ ɛ-ɛsɩndaa kpem.

¹⁶ Paawɩlɩ Mooyiizi paɣtʋ nɛ náyaa takayɩsɩ taa tɔm nɛ pʋkɔɔ pɩtalɩ Lɩm Sɔʋ Sɔnzɩ Laɖʋ Yohanɛɛsɩ alɩwaatʋ. Đooo alɩwaatʋ ńdʋ́ʋ́ papazɩ Ɛsɔ Kewiyaɣ Laŋhɛzɩyɛ Tɔm susuu nɛ paa weyi ɛlʋkɩ se ɛsʋʋ ka-taa.

¹⁷ Paa ḿbʋ́ yɔ, ɛsɔdaa nɛ tɛtʋ pa-mʋʋ́ʋ fɛyɩ kaɖɛ nɛ pɩtalɩ paɣtʋ ńdʋ́ tɩ-mayaɣ nakɛyɛ mʋʋ́ʋ.»

¹⁸ Pʋwayɩ lɛ, Yesu tasɩ-wɛ heyuu se: «Yee nɔɔyʋ ɛɖɔɔnɩ ɛ-halʋ nɛ ɛkpaɣ kɩfalʋ yɔ, ɛlabɩ acɛyɛ. Đɔɖɔ lɛ, yee pekizi halʋ nɛ nɔɔyʋ kpaɣ-ɩ yɔ, pʋdʋ labɩ acɛyɛ.»

Ñɩm tʋ nɛ Lazaarɩ pɔ-tɔm

¹⁹ Pʋwayɩ lɛ, Yesu tuu-wɛ eduuye se: «Abalʋ ñɩm tʋ nɔɔyʋ kɛwɛnɩ ḿbʋ́, esuu awiitokonaa ɖeu ñɩlɩ ñɩlɩ nɛ ɛtɔkɩ leleŋ leleŋ paa ɖooye.

²⁰ Kʋñɔndʋ nɔɔyʋ ñaawɛɛ, payaɣ-ɩ se Lazaarɩ. Ɛtɩŋa ɛ-yɔɔ nɛ heŋ tɔ tɔ nɛ ɛhɛnɩɣ ñɩm tʋ ɛnʋ ɛ-nɔnɔɔ taa.

²¹ Ɛɛsɔɔlaa siŋŋ se ɛtɔzɩ mbʋ́ ñɩm tʋ ɛnʋ ɛtɔkɩ nɛ pʋtɔlʋʋ tataa yɔ nɛ ɛtɔɔ. Đɔɖɔ lɛ, hasɩ wokaɣ nɛ sineziɣ e-heŋ taa.

²² Nakʋyʋ wiye lɛ, kʋñɔndʋ ɛnʋ ɛsɩ nɛ Ɛsɔ tiyiyaa kpaɣ-ɩ powoni-i lone kɩbanɖɛ taa Abraham cɔlɔ. Pʋwayɩ lɛ, ñɩm tʋ ɛnʋ ɛsɩ ɖɔɖɔ nɛ pebim-i

²³ nɛ ɛsʋʋ tɛtɛɛ ɖenɖe kʋñɔŋ maatɛŋ wɛɛ yɔ. Ɛwɛ peeɖe ḿbʋ́ lɛ, ɛkʋsɩ ɛ-ɛsɛ nɛ elosi Abraham poliŋ taa, Lazaarɩ wɛ ɛ-cɔlɔ.

²⁴ Peeɖe ɛmabɩ kubuka se: ‹Hayɩ mɔn-cɔzɔ Abraham! Na man-pʋtɔdɩyɛ nɛ ŋtiyi Lazaarɩ nɛ elii lɩm e-niye nɔɔ taa nɛ elizi me-liu tɛɛ nɛ piniɣdi-m. Mbʋ́ pʋyɔɔ yɔ, malakɩ kʋñɔŋ pɩŋŋ miŋ ɛnɛ ɛ-taa.›

²⁵ Ɛlɛ́, Abraham cosi-i se: ‹Man-sayɩ! Tɔzɩ se Lazaarɩ lakaɣ kʋñɔŋ kedeŋa yɔɔ lɛ, ñaawɛɛ ŋtɔkɩ leleŋ. Lɛɛlɛɛyɔ Lazaarɩ laŋɩyɛ ñɛhɛ cɩnɛ lɛ, ñalakɩ kʋñɔŋ.

²⁶ Đɔɖɔ lɛ, pɔʋ sɔsɔʋ nakʋyʋ wɛ ɖa nɛ mɩ ɖɛ-hɛkʋ taa se paa nɔɔyʋ ɛcaɣ se ɛtɛzɩ mɩ-cɔlɔ yɔ, ɛtaapɩzɩ. Kʋ-yɔɔ ɖɔɖɔ mɩ-cɔlɔ tʋ nɔɔyʋ ɛɛpɩzɩɣ ɛlɩɩ ɛtɛzɩ ɖɔ-cɔlɔ cɩnɛ.›

²⁷ Ɛlɛ́, abalʋ ɛnʋ ɛtasɩ-ɩ heyuu se: ‹Caa! Yee ḿbʋ́ mentendiɣ-ŋ se ŋtiyi Lazaarɩ man-caa ɖɩɣa taa.

²⁸ Mɛwɛnɩ newaa kagbaanzɩ. Ewolo ɛka pa-ñʋŋ taa ɖeu nɛ pataakɔɔ pasʋʋ kʋñɔŋ kʋnɛ kɩ-taa ɖɔɖɔ.›

²⁹ Abraham cosi-i se: ‹Ñe-newaa wɛnɩ Mooyiizi nɛ náyaa pa-takayɩsɩ. Pakalɩ-sɩ nɛ panɩɩ.›

³⁰ Peeɖe abalʋ ɛnʋ eheyi-i se: ‹Caa Abraham! Yee sɩɖaa taa nɔɔyʋ ɛpɩsɩna nɛ ɛmaɣnɩ-wɛ yɔ, pɛlɛɣzɩɣ wɛtʋ.›

³¹ Ɛlɛ́, Abraham tasɩ-ɩ heyuu se: ‹Yee patanɩɩ Mooyiizi nɛ náyaa pa-takayɩsɩ taa tɔm yɔ, paa sɩɖaa taa nɔɔyʋ efema nɛ ewolo eheyi-wɛ yɔ, paatisiɣ ɛ-tɔm ɖɔɖɔ.› »