Luka 15 - New Testament

Abalʋ weyi ɛna e-heu kilebu yɔ

¹ Nakʋyʋ wiye tikee mʋyaa nɛ kɩwɛɛkɩm laɖaa lɛlaa powobi Yesu cɔlɔ patɩŋa payɩ se panɩɩ ɛ-tɔm.

² Peeɖe Farɩsɩ ñɩma nɛ paɣtʋ wɩlɩyaa pa-taa wɩnɩ-ɩ nɛ pɔyɔɔdʋʋ pa-taa pe-ɖeke se: «Ɩna ɛzɩma mbʋ́ ɛ nɛ kɩwɛɛkɩm laɖaa pɛkpɛndaa pɔtɔkɩ yɔ!»

³ Ɛlɛ́, Yesu tuu-wɛ eduuye se:

⁴ «Yee mɩ-taa nɔɔyʋ ɛwɛnɩ heŋ mɩnʋʋ nɛ ɩ-taa kʋɖʋm le, eeyeki kʋɖʋm fɛyɩ mɩnʋʋ weyi ɩkazaa yɔ ñɩtʋ ɖɩtɔɔyɛ nɛ ɛɖɛɛ heu ɛnʋ ɛ-ñɩnʋʋ nɛ pʋkɔɔ pɩsɩɩnɩ alɩwaatʋ ndʋ́ ɛna-ɩ yɔ yaa we?

⁵ Ɛnaɣ-ɩ lɛ, ɛ-laŋɩyɛ taa hʋlʋmʋʋ ɖeu nɛ ɛkpaɣ-ɩ ɛhɔɔlɩ ɛ-hazasɩ yɔɔ se ekpeni-i.

⁶ Ɛtalɩɣ ɖɩɣa lɛ, ɛyaɣ ɛ-ɛgbaɣdɩnaa nɛ ɛ-cɔlɔ ñɩma se: ‹Ɩkɔɔ ma nɛ mɩ ɖɩmayɩ amaya. Mbʋ́ pʋyɔɔ yɔ, mana me-heu weyi eeleba yɔ.›

⁷ Meheyiɣ-mɩ se ḿbʋ́ ɖɔɖɔ pʋwɛ ɛsɔdaa: yee kɩwɛɛkɩm laɖʋ kʋɖʋm nɔɔyʋ ɛlɛɣzɩ wɛtʋ yɔ, Ɛsɔ nɛ e-tiyiyaa pa-laŋa hʋlʋmʋʋnɩ-ɩ nɛ pɩkɩlɩ ɛyáa kʋɖʋm fɛyɩ mɩnʋʋ mbá pamaɣzɩɣ se pɛkɛ kʋtʋʋzaa nɛ pʋtɔpɔzɩ se pɛlɛɣzɩ wɛtʋ yɔ.»

Halʋ nɔɔyʋ na e-liidiye pɔɔyaɣ ŋgá keleba yɔ

⁸ Pʋwayɩ lɛ, Yesu tasɩ-wɛ tuuu eduuye se: «Yee halʋ nɔɔyʋ ɛwɛnɩ liidiye pɔɔyɩsɩ hiu nɛ sɩ-taa kʋɖʋmaɣ le, ɛɛsɔkɩ kanɖʋ nɛ ɛhazɩ ɛ-ɖɩɣa tɩŋa nɛ ɛñɩnɩ-kɛ camɩyɛ nɛ pʋkɔɔ pɩsɩɩnɩ alɩwaatʋ ndʋ́ ɛna-kɛ yɔ yaa we?

⁹ Ɛnaɣ-kɛ lɛ, ɛyaɣ ɛ-ɛgbaɣdɩnaa nɛ ɛ-cɔlɔ ñɩma se: ‹Ɩkɔɔ ma nɛ mɩ ɖɩmayɩ amaya. Mbʋ́ pʋyɔɔ yɔ, mana me-liidiye pɔɔyaɣ ŋgá kaaleba yɔ.›

¹⁰ Meheyiɣ-mɩ se ḿbʋ́ ɖɔɖɔ pʋwɛɛ: yee kɩwɛɛkɩm laɖʋ kʋɖʋm nɔɔyʋ ɛlɛɣzɩ wɛtʋ yɔ, Ɛsɔ tiyiyaa laŋa hʋlʋmʋʋ ɖeu.»

Abalʋ nɔɔyʋ na ɛ-pɩɣa abalɩbɩɣa ŋgá keleba yɔ

¹¹ Yesu tasɩ-wɛ tuuu eduuye se: «Abalʋ nɔɔyʋ kɛwɛnɩ pɩyalaa naalɛ.

¹² Nakʋyʋ wiye lɛ, pa-taa cikpelu heyi pa-caa se: ‹Man-caa! Cɛlɩ-m ña-ñɩm mbʋ́ pɩkɛɣ ma-ñɩmbʋ ña-sɩm wayɩ yɔ.› Peeɖe pa-caa tayɩ-wɛ ɛ-ñɩm.

¹³ Pɩtalabɩdɩ pʋyʋ lɛ, cikpelu ɛnʋ ekuu ɛ-ñɩm tɩŋa nɛ ɛɖɛɛ ɖooo ɛjaɖɛ naɖɩyɛ taa. Ɛtalɩ peeɖe lɛ, ɛpazɩ tɩkpayɩtʋ labʋ nɛ ɛwɛɛkɩ ɛ-ñɩm ḿbʋ́ pɩtɩŋa payɩ.

¹⁴ Ɛtɛm-pʋ wɛɛkʋʋ lɛ, ñɔɔsɩ nasɩyɩ lɩɩ ɛjaɖɛ ńɖɩ́ ɖɩ-taa. Ŋgʋ́, ɛɛwɛ kɛdɛɖaɣ taa kpem.

¹⁵ Peeɖe ewobi ɛjaɖɛ ńɖɩ́ ɖɩ-taa tʋ nɔɔyʋ cɔlɔ se ɛ́lɛ́ ɛñɩnɩ-ɩ tʋmɩyɛ nɛ ɛ́lɛ́ kpaɣ-ɩ ewoni tɛyɛ se ɛcɔŋnɩ-ɩ afanaa yɔɔ.

¹⁶ Ɛñɩnaɣ se paa afanaa tɔɔnaɣ maɣmaɣ yɔ ɛtɔɔ. Ɛlɛ́, nɔɔyʋ ɛɛhaɣ-ɩ.

¹⁷ Peeɖe ɛmaɣzɩ ɛ-taa pɩŋŋ nɛ ɛtɔ se: ‹Ŋgʋ́, man-caa wɛnɩ tʋmlaɖaa sakɩyɛ, pɔtɔkɩ paatɛŋ. Piyele ñɔɔsɩ ñakʋʋ-m cɩnɛ yem falaa!

¹⁸ Mankʋyʋʋ manpɩsɩ man-caa cɔlɔ nɛ meheyi-i se: caa! Mayʋsɩnɩ Ɛsɔ nɛ mɛntɛ mayʋsɩnɩ-ŋ.

¹⁹ Mantatasɩ mʋnaʋ se ŋya-m se ña-pɩyalʋ. Ɛlɛ́, kpaɣ-m ɛzɩ ña-tʋmlaɖaa taa lɛlʋ yɔ.›

²⁰ Peeɖe ɛkʋyaa ɛkpaɣ nʋmɔʋ se ekpeŋ ɛ-caa tɛ. Ɛwɩzɩ talʋʋ lɛ, ɛ-caa losi-i poliŋ nɛ pɩlabɩ-ɩ pʋtɔdɩyɛ pɩŋŋ. Peeɖe ɛ́lɛ́ se lɔŋ ɛkatɩ-ɩ nɛ ekpibi-i nɛ laŋhʋlʋmɩyɛ.

²¹ Ɛlɛ́, ɛ-pɩyalʋ ɛnʋ eheyi-i se: ‹Caa! Mayʋsɩnɩ Ɛsɔ nɛ mɛntɛ mayʋsɩnɩ-ŋ. Mantatasɩ mʋnaʋ se ŋya-m se ña-pɩyalʋ.›

²² Patalɩ ɖɩɣa lɛ, ɛ-caa heyi ɛ-tʋmlaɖaa se: ‹Iwolo lɛɛlɛɛ ɩkpaɣ toko kitibuu ŋgʋ́ kɩkɩlɩ ɖeu yɔ nɛ ɩkɔnɩ isuu-i. Ɩlɛɛ-ɩ kokooye nɛ naataŋgbala.

²³ Ɩkɔnɩ neɣye nɖɩ́ ɖɩwɛ num camɩyɛ yɔ nɛ ɩkʋ nɛ ɖɩtɔɔ kazandʋ.

²⁴ Mbʋ́ pʋyɔɔ yɔ, man-pɩyalʋ ɛnɛ, pʋwɛ ɛzɩ ɛsɩba nɛ efe yɔ. Eeleba nɛ manɖaɣnɩ-ɩ naʋ.› Peeɖe papazɩ kazandʋ tɔɔʋ.

²⁵ Pɩlakaɣ ḿbʋ́ lɛ, ɛ-pɩyalʋ sɔsɔ ñaawɛnɩ tɛyɛ. Ɛ́lɛ́ kpeŋaɣ nɛ ɛwɩzɩnɩ ɖɩɣa lɛ, ɛnɩɩ soo nɛ payɛ pa-taŋ.

²⁶ Peeɖe ɛya ɛ-caa tʋmlaɖʋ nɔɔyʋ nɛ ɛpɔzɩ-ɩ se: ‹Ɛbɛ palakɩ ḿbʋ́?›

²⁷ Ɛ́lɛ́ cosi-i se: ‹Ñe-neu pɩsɩnɩ ɛkɔɔ nɛ ña-caa kʋ neɣye nɖɩ́ ɖɩwɛ num camɩyɛ yɔ, mbʋ́ pʋyɔɔ yɔ, ɛtasɩ-ɩ naʋ nɛ ɛ-alaafɩya.›

²⁸ Peeɖe ɛ-pɩyalʋ sɔsɔ ɛnʋ ɛmʋ pana nɛ ekizi ɖɩɣa sʋʋ. Ɛlɛ́, ɛ-caa lɩɩ ɛ́yáa-ɩ se ɛsʋʋ.

²⁹ Ɛlɛ́, ɛpɩsɩnɩ ɛ-caa se: ‹Welesi nɛ ŋnɩɩ, pɩnzɩ sakɩyɛ yɔ, mɛwɛɛ malakɩ-ŋ tʋmɩyɛ nɛ paa ŋyɔɔdɩ ndʋ́ yɔ, maakiziɣ.› Wiɖiyi ŋtatɩɩtɔm se: ‹Kpaɣ pimbiɣa kanɛ nɛ ña nɛ ña-taabalaa ɩla kpanzʋʋ.›

³⁰ Ŋgʋ́, ña-pɩyalʋ ɛnɛ, ɛkpaɣ ña-ñɩm nɛ ɛwɛɛkɩ halaa nʋmɔʋ taa. Sɔnɔ ɛkɔma lɛ, ŋyele pakʋ-ɩ ɖe-neɣye nɖɩ́ ɖɩwɛ num camɩyɛ yɔ.

³¹ Peeɖe ɛ-caa cosi-i se: ‹Man-pɩɣa! Ñɛwɛnɩ mɔn-cɔlɔ tam. Mbʋ́ pɩtɩŋa mɛwɛna yɔ, ñatɩnɩ-pʋ.

³² Ɛlɛ́, pʋmʋnaa se ɖɩla kazandʋ nɛ laŋhʋlʋmɩyɛ. Mbʋ́ pʋyɔɔ yɔ, pʋwɛ ɛzɩ ñe-neu kasɩba nɛ efe yɔ, eeleba nɛ manɖaɣnɩ-ɩ naʋ.› »