Koloosi 4 - New Testament

¹ Mɩ caanaa lɛ, ɩtɔzɩ se mɩ ɖɔɖɔ ɩwɛnɩ Caa nɔɔyʋ ɛsɔdaa. Pʋ-yɔɔ lɛ, ɩla mi-yomaa mbʋ́ pʋtʋʋzaa nɛ pɩtɛ pʋmʋna yɔ.

Lɛɣtʋ tasʋʋ

² Mɩ-ɛsɩyɛ ɛsɛɛnɩ Ɛsɔ sɛʋ nɛ piyele ɩcaɣnɩ mɩ-ɛsɛ nɛ ɩsam-ɩ.

³ Itendi-i ɖɔɖɔ ɖɔ-yɔɔ nɛ ɛha-ɖʋ nʋmɔʋ nɛ ɖisusi ɛ-tɔm nɛ ɖɩpɩzɩ ɖɩlɩzɩ Krɩstʋ tɔm ndʋ́ tɩwɛ ɛyáa tɩŋa mɛsaɣ tɛɛ yɔ tɩ-tɔbʋʋ. Tɩ-yɔɔ mɛwɛ salaka taa lɛɛlɛɛyɔ.

⁴ Itendi-i se eyele nɛ monsusi-tʋ kpayɩ kpayɩ ɛzɩ pʋpɔzʋʋ yɔ.

⁵ Ɩɖɔmnɩ lɔŋsɩnɖɛ mbá pɛtɛkɛ Krɩstʋ ñɩma yɔ pɔ-cɔlɔ. Ɩtaayele alɩwaatʋ nɛ tɩɖɛɛ yem.

⁶ Mɩ-nɔɔ taa tɔm ɛwɛɛ leleŋ nɛ tɩwɛnɩ kɛzɛɣa siŋŋ nɛ piyele ɩtɩlɩ ɛzɩma mbʋ́ pʋwɛɛ se icosi paa weyi yɔ.

Sɛtʋ

⁷ Piyele mɔn-tɔm lɛ, man-taabalʋ kʋsɔɔlʋ Ticiiki kɔŋnɩ-mɩ tɩtɩŋa payɩ kɛdʋʋ. Ma nɛ ɩ ɖɩlakɩ tʋmɩyɛ ɖa nɛ Kɩpaɣlʋ ɖɛ-kpɛndʋʋ yɔɔ. Ɛlakɩ mbʋ́ ɛɖʋwa yɔ.

⁸ Mentiyiɣni-mɩ-ɩ faŋŋ se eheyi-mɩ mbʋ́ pɩ-taa ɖɩwɛɛ yɔ nɛ ɛhɛzɩ mɩ-laŋa.

⁹ Ɛ nɛ mɩ-tɛ tʋ Onezim mentiyiɣ. Ɛkɛ man-taabalʋ kʋsɔɔlʋ, ɛlakɩ mbʋ́ ɛɖʋwa yɔ. Ḿbá kɔŋnɩ-mɩ kɛdʋʋ mbʋ́ pɩtɩŋa payɩ pɩlakɩ cɩnɛ yɔ.

¹⁰ Aristaarkɩ weyi ma nɛ ɩ ɖɩwɛ salaka taa yɔ, ɛsɛ-mɩ. Barnaabaasɩ ɖɛtʋ Maarkɩ sɛ-mɩ ɖɔɖɔ. Ɛ-tɔm paaheyi-mɩ se ɛtalɩ mɩ-tɛ lɛ, ɩmʋ-ɩ camɩyɛ.

¹¹ Yesu weyi payaɣ ɖɔɖɔ se Yustuusi yɔ, ɛsɛ-mɩ ɖɔɖɔ. Yuda ñɩma taa lɛ, pa-naadozo pe-ɖeke pasɩŋnɩnɩ-m Ɛsɔ Kewiyaɣ tʋmɩyɛ labʋ nɛ piyele pɩlabɩ-m hʋnʋm.

¹² Epafraasɩ weyi ɛ-tɛ mɩ-tɛ ɖɔɖɔ yɔ, ɛsɛ-mɩ. Ɛkɛ Krɩstʋ Yesu tʋmlaɖʋ, ɛwɛɛ ɛlʋkɩ mɩ-yɔɔ ɛ-Ɛsɔ sɛtʋ taa se ɩsɩŋ mi-ɖeɖe ḿbʋ́ mi-lidaʋ wɛnaʋ taa nɛ ɩtɛzɩ pɩʋ nɛ ɩtɩlɩ mbʋ́ Ɛsɔ liu wɛɛ yɔ siŋŋ.

¹³ Malɩzɩɣ ɛ-aseɣɖe se ɛñakɩ pana siŋŋ mɩ nɛ Laodisee nɛ Iyerapoolisi ñɩma mɩ-yɔɔ.

¹⁴ Taabalʋ kʋsɔɔlʋ Luka weyi ɛkɛ ɖɔkɔtɔ yɔ nɛ Demaasɩ pɛsɛ-mɩ ɖɔɖɔ.

¹⁵ Ɩsɛɛ taabalaa mbá pɛwɛ Laodisee yɔ. Ɩsɛɛ ɖɔɖɔ Nimfaa nɛ Krɩstʋ ŋgbɛyɛ taa ñɩma mbá pekpeɣliɣ ɛ-ɖɩɣa taa yɔ.

¹⁶ Ɩtɛm takayaɣ kanɛ kalʋʋ mɩ-ŋgbɛyɛ taa ñɩma ɛsɩndaa lɛ, iyele nɛ Laodisee ñɩma kalɩ-kɛ ɖɔɖɔ ḿbʋ́. Mɩ mɩkalɩ ɖɔɖɔ ŋgá paba tiyiɣni-mɩ yɔ.

¹⁷ Iheyi Arciipu se ɛ́ɖɔ́kɩ ɛ-tɩ nɛ tʋmɩyɛ nɖɩ́ etisaa nɛ Kɩpaɣlʋ ɖʋzɩ e-nesi taa yɔ nɛ ɛpɩzɩ ɛlabɩ-ɖɩ.

¹⁸ Ma Pɔɔlɩ, ma-maɣmaɣ mamaɣnɩ tɔm pee anɛ nɛ me-nesi. Ana lɛ se: mɛnsɛ-mɩ. Ɩtɔzɩ se mɛwɛ salaka taa. Ɛsɔ ɛlabɩ-mɩ lootiye!