Koloosi 2 - New Testament

¹ Mancaɣ se ɩna lʋbɩyɛ sɔsɔɖɛ nɖɩ́ mɛwɛɛ malʋkɩ mɩ nɛ Laodisee ñɩma nɛ mbá patɩŋa payɩ patatɩɩnadɩ ma Pɔɔlɩ mɛ-ɛsɩndaa yɔ mɩ-yɔɔ yɔ.

² Malʋkɩ ḿbʋ́ se pɩlabɩ-wɛ hʋnʋm nɛ pɔsɔɔlɩ ɖama camɩyɛ nɛ papɩsɩ ɛyʋ kʋɖʋm nɛ piyele pɛtɛzɩ wɛnaʋ lɛɣtʋ. Pʋbʋ, patɩlɩɣ mbʋ́ Ɛsɔ kɛmɛsaa yɔ: ḿbʋ́ lɛ Krɩstʋ.

³ Ɛ-cɔlɔ Ɛsɔ lɔŋsɩnɖɛ nɛ ɛ-lɛɣtʋ pa-ñɩm tɩŋa payɩ wɛ mɛsaɣ tɛɛ.

⁴ Meheyiɣ-mɩ ḿbʋ́ se nɔɔyʋ ɛtaakɔɔ ɛcɛtɩ-mɩ nɛ ɛ-nɔɔ leleŋ.

⁵ Paa mɛnfɛyɩ mɩ-hɛkʋ taa yɔ, mɛwɛɛ mamaɣzɩɣ mɩ-yɔɔ. Man-taa hʋlʋmaa, mbʋ́ pʋyɔɔ yɔ, manaɣ ɛzɩma mbʋ́ ɩwɛɛ ɩlakɩ ɛzɩ pʋmʋnaʋ yɔ nɛ ɩɖɔkʋʋ mɩ-tɩ siŋŋ mi-lidaʋ ŋgʋ́ ɩwɛnɩ Krɩstʋ yɔɔ yɔ kɩ-taa yɔ.

Krɩstʋ ɖeke haɣnɩ wezuu

⁶ Pʋ-yɔɔ lɛ, ɖenɖe itisaa se Krɩstʋ Yesu lɛ Kɩpaɣlʋ yɔ, ɩcaɣ wezuu mɩ nɛ ɩ mɩ-kpɛndʋʋ taa.

⁷ Ɩka lila ɛ-yɔɔ nɛ ɩpaɣlɩ nɛ ɩtɛzɩ pɩʋ mi-lidaʋ wɛnaʋ taa ɛzɩ pawɩlʋʋ-mɩ yɔ. Đɔɖɔ lɛ, ɩsam-ɩ siŋŋ.

⁸ Ɩkpa mɩ-tɩ ɖeu nɛ nabɛyɛ ɛtaacɛtɩ-mɩ nɛ pa-maɣmaɣ pɔ-lɔŋsɩnɖɛ tɔm. Cɛtɩm tɔm ńdʋ́, tɩɩwazɩɣ pʋyʋ. Ɛyáa sɔnzɩ nɛ kedeŋa yɔɔ cɩnɛ ɖoŋ pɔ-cɔlɔ tɩlɩnaa. Tɩtɛkɛ Krɩstʋ ñɩndʋ.

⁹ Toovenim lɛ, Krɩstʋ wɛʋ yɔ, Ɛsɔ wɛ e-tomnaɣ taa pilim

¹⁰ nɛ mɩ nɛ ɩ mɩ-kpɛndʋʋ taa lɛ, ihiɣ pɩtɩŋa. Ɛnʋ kɩlɩnɩ awiya nɛ ɖoŋ tɩŋa payɩ.

¹¹ Mɩ nɛ ɩ mɩ-kpɛndʋʋ ḿbʋ́ pɩ-taa pɛpɛlɩ-mɩ. Pɛtɛpɛlɩ-mɩ ɛzɩ ɛyáa pɛlʋʋ yɔ, ɛlɛ́, pɛpɛlɩ-mɩ ɛzɩ Krɩstʋ ɖʋʋ yɔ. Ḿbʋ́ lɛ se ɩsɛtɩ mɩ-kɩwɛɛkɩm nɛ ɩlɔ.

¹² Palabʋ-mɩ lɩm sɔʋ sɔnzɩ yɔ, mɩ nɛ Krɩstʋ pepima. Mɩ nɛ ɩ ifemna ɖɔɖɔ, mbʋ́ pʋyɔɔ yɔ, ɩwɛnɩ lidaʋ ɖoŋ weyi Ɛsɔ fezini-i nɛ sɩɖaa taa yɔ ɛ-yɔɔ.

¹³ Đooo lɛ, ɩɩkɛ sɩɖaa mɩ-kɩwɛɛkɩm yɔɔ. Ɩɩkɛ ɖɔɖɔ sɩɖaa mbʋ́ pʋyɔɔ yɔ, pataapɛlɩ-mɩ. Ɛlɛ́, lɛɛlɛɛyɔ Ɛsɔ tɩŋnɩ Krɩstʋ yɔɔ nɛ ɛha-mɩ wezuu: ekpeɣ-ɖʋ ɖa-kɩwɛɛkɩm tɩŋa payɩ.

¹⁴ Ɛkpaɣ takayaɣ ŋgá pama ka-taa kɩwɛɛkɩm mbʋ́ paɣtʋ wɩlaa se ɖɩlaba yɔ nɛ ɛkam-kɛ kaamaŋkaɣ yɔɔ nɛ eɖizini-kɛ.

¹⁵ Ḿbʋ́ Ɛsɔ lɩzɩ mbʋ́ pɩtɩŋa payɩ pʋwɛ ɛsɔdaa nɛ tataa yɔ pu-ɖoŋ nɛ eyele nɛ ɛyáa tɩŋa na-pʋ nɛ pɩwɩlɩ se ɛtɩŋnɩ kaamaŋkaɣ yɔɔ nɛ ɛwabɩ-pʋ.

¹⁶ Pʋ-yɔɔ lɛ, ɩtaaha nɔɔyʋ waɖɛ se ɛkpɛzɩnɩ-mɩ mbʋ́ ɩtɔkɩ yaa ɩñɔʋ yɔ pʋ-yɔɔ yaa mbʋ́ pʋwɛɛ se ɩla kazandʋ natʋyʋ wiye yaa ɩla alɩwaatʋ ndʋ́ fenaɣ kɩfalaɣ lɩɣ yɔ yaa kɩyakʋ kɩhɛzʋʋ wiye yɔ pʋ-yɔɔ.

¹⁷ Pɩtɩŋa payɩ pɩkɛ mbʋ́ pɩkaɣ kɔm yɔ pɩ-kɩlɛmʋʋ. Ḿbʋ́ lɛ Krɩstʋ.

¹⁸ Ɩtaayele nɛ mbá pawaɣnɩ se poluzuu pa-tɩ nɛ poluŋuu Ɛsɔ tiyiyaa tɛɛ yɔ, pa-taa nɔɔyʋ kʋ mɩ-tɔm. Mbʋ́ pʋyɔɔ yɔ, pakpakɩɣ po-ɖozee payaɣ pʋyʋ nɛ pakpazɩɣ pa-tɩ nɛ pa-maɣmaɣ pa-lɩmaɣza. Ŋgʋ́, akɛ ɛyáa lɩmaɣza yem.

¹⁹ Weyi ɛlakɩ ḿbʋ́ yɔ, ɛ nɛ Krɩstʋ pɛfɛyɩ ɖama taa. Ŋgʋ́, ɛ́lɛ́ lɛ tomnaɣ ñʋʋ. Ñʋʋ ŋ́gʋ́ kiyekina nɛ hola nɛ ɖɩtanɛ pɛkpɛndɩ ɖama nɛ papaɣlɩ ɛzɩ Ɛsɔ liu wɛʋ yɔ.

²⁰ Mɩ nɛ Krɩstʋ ɩsɩbɩna nɛ pɩlɩzɩ-mɩ kedeŋa yɔɔ cɩnɛ ɖoŋ nesi taa. Yee ḿbʋ́ lɛ, pɩlabɩ ɛzɩma nɛ ɩɖaɣnɩɣ wezuu caɣʋ ɛzɩ kedeŋa yɔɔ cɩnɛ ñɩma nɛ iyeki mɩ-tɩ nɛ paɖʋʋ-mɩ paɣtʋ se:

²¹ «Taakpaɣ pʋnɛ» «Taaɖɩŋ ḿbʋ́ yɔ» Yaa «Taatukuni pʋnɛ yɔ»?

²² Pʋnɛ pɩtɩŋa payɩ, palakɩnɩ-pʋ tʋmɩyɛ nɛ pɩtɛmnɩ mʋʋ́ʋ. Ɛyáa yem ɖʋnɩ-pʋ nɛ pawɩlɩɣ.

²³ Toovenim lɛ, tɩwɛ ɛsɛ yɔɔ ɛzɩ lɔŋsɩnɖɛ yɔ. Mbʋ́ pʋyɔɔ yɔ, tiyeki nɛ poluŋuu Ɛsɔ tɛɛ ɛzɩ pa-maɣmaɣ paɖʋʋ yɔ. Đɔɖɔ lɛ, poluzuu pa-tɩ nɛ paɖʋʋ pa-tɩ kʋñɔŋ. Ɛlɛ́, pɩfɛyɩnɩ wazaɣ nakɛyɛ, pa-maɣmaɣ pɩkɛdɩɣna.