Galaatɩ 6 - New Testament

¹ Taabalaa! Mbá mɩ Fezuu Kiɖeɖeu wɛ mɩ-cɔlɔ yɔ, yee nɔɔyʋ ɛlakɩ kɩwɛɛkɩm nabʋyʋ nɛ ɩna-ɩ yɔ, ɩlabɩ-ɩ hɛɛɛ nɛ ɩsɩnɩ-ɩ nɛ ɩwɩlɩ-ɩ nʋmɔʋ kɩbaŋgʋ. Ɛlɛ́, meheyiɣ mɩ-taa paa anɩ se ɛcɔnɩ ɛ-maɣmaɣ ɛ-tɩ yɔɔ camɩyɛ nɛ pɩtaakɔɔ pɩtakɩ-ɩ.

² Ɩsɩnɩ ɖama mɩ-kʋñɔmɩŋ taa. Yee ɩlakɩ ḿbʋ́ yɔ, pɩwɩlɩɣ se ɩɖɔŋ Krɩstʋ paɣtʋ yɔɔ.

³ Yee nɔɔyʋ ɛmaɣzɩɣ se ɛ-wayɩ lɛ, nɔɔyʋ fɛyɩ nɛ pʋdʋ fɛyɩ wazaɣ nakɛyɛ yɔ, ɛcɛtɩ ɛ-maɣmaɣ ɛ-tɩ kpem.

⁴ Pʋwɛɛ se paa weyi ɛcɔnɩ ɛ-maɣmaɣ ɛ-lakasɩ nɛ ɛna. Yee ɛnawa se sɩwɛ ɖeu yɔ, ɛkʋndɩnɩ ɛ-maɣmaɣ ɛ-tɩ. Pɩfɛyɩ se ɛkɛdɩ ɛ-tɩ nɛ lɛlaa.

⁵ Mbʋ́ pʋyɔɔ yɔ, pʋwɛɛ se paa weyi ɛsɩɣlɩ ɛ-maɣmaɣ ɛ-sʋʋtʋ.

⁶ Weyi pawɩlɩɣ Ɛsɔtɔm yɔ, pʋwɛɛ se ɛsɩnɩ weyi ɛwɩlɩɣ-ɩ yɔ nɛ ñɩm mbʋ́ ɛwɛna yɔ.

⁷ Ɩtaacɛtɩ mɩ-tɩ yem: paawoŋuu Ɛsɔ. Mbʋ́ ɛyʋ ɖúu yɔ, ḿbʋ́ ɛkʋŋ:

⁸ yee nɔɔyʋ ɛlakɩ lakasɩ kɩdɛkɛdɩsɩ nzɩ́ ɛ-maɣmaɣ ɛsɔɔlaa yɔ yɔ, siyeki nɛ ɛsɩ. Ɛlɛ́, yee nɔɔyʋ ɛlakɩ mbʋ́ Fezuu Kiɖeɖeu liu wɛɛ yɔ yɔ, kiyeki nɛ ehiɣ wezuu maatɛŋ.

⁹ Pɩtaaɖɛɛ-ɖʋ nɛ camɩyɛ lakasɩ labʋ. Yee ɖɩwɛ sɩ-labʋ yɔɔ ḿbʋ́ yɔ, alɩwaatʋ talɩɣ lɛ, paa weyi ɛkʋ mbʋ́ eɖuwa yɔ.

¹⁰ Pʋ-yɔɔ lɛ, yee pɩha-ɖʋ waɖɛ yɔ, ɖɩsɩnɩ ɛyáa tɩŋa, kɔzɩkɔzɩ mbá pɛwɛnɩ lidaʋ Krɩstʋ yɔɔ yɔ.

Sɛtʋ

¹¹ Ɩcɔnɩ ɩna ɛzɩma mbʋ́ lɛɛlɛɛyɔ ma-maɣmaɣ mamanɩ me-nesi nɛ pɩpaɣlɩ camɩyɛ kpooluu kpooluu yɔ.

¹² Mbá patɩŋa payɩ pe-liu wɛɛ se payaa-wɛ se kɩbama yɔ, ḿbá cɛyɩɣnɩ-mɩ se pʋwɛɛ se pɛpɛlɩ-mɩ. Palakɩ ḿbʋ́ kpem se ɛyáa ɛtaawɛɛ pa-wayɩ kaŋ kaŋ. Yee posusuu Krɩstʋ sɩbʋ kaamaŋkaɣ yɔɔ yɔ pʋ-tɔm yɔ, pʋbʋ, pɛwɛɣ pa-wayɩ kaŋ kaŋ.

¹³ Ɛyáa ḿbá, pa-maɣmaɣ paaɖɔŋ paɣtʋ yɔɔ. Ɛlɛ́, pe-liu wɛɛ se pɛpɛlɩ-mɩ nɛ pakʋndɩ se itisi yʋsaɣ ŋ́gá mɩ-yɔɔ.

¹⁴ Ma lɛ, ɖa-Kɩpaɣlʋ Yesu Krɩstʋ sɩbʋ kaamaŋkaɣ yɔɔ yɔ, pi-ɖeke mankʋndʋʋna, nabʋyʋ fɛyɩ nɛ pɩtasɩnɩ-pʋ. Sɩm ḿbʋ́ pʋ-yɔɔ pɩtɩŋnaa nɛ kɩdɛkɛdɩm mbʋ́ pʋwɛ kedeŋa yɔɔ yɔ, pɩtatasɩ ɖoŋ nɩɩyɩ wɛnaʋ mɔ-yɔɔ nɛ ma ɖɔɖɔ mɛnkɛ sɩɖʋ pɩ-ɛsɩndaa.

¹⁵ Paa pɛpɛlɩ nɔɔyʋ yaa pɛtɛpɛlɩ-ɩ yɔ, pɩfɛyɩ wazaɣ nakɛyɛ. Ɛlɛ́, mbʋ́ pʋwɛ wazaɣ yɔ lɛ se: ɖɩkɛ ɛyáa kɩfama.

¹⁶ Mbá patɩŋa payɩ pɔɖɔŋ tɔm tʋnɛ tɩ-yɔɔ pe-wezuu caɣʋ taa yɔ, Caa Ɛsɔ ɛna pa-pʋtɔdɩyɛ nɛ ɛhɛzɩ pa-laŋa nɛ pɩkpɛndɩnɩ ɛ-ñɩma, ḿbá lɛ Izrɛɛlɩ ñɩma!

¹⁷ Pɩkpaɣʋnɩ sɔnɔ yɔ, nɔɔyʋ ɛtaatasɩ-m cɛyʋʋ, mbʋ́ pʋyɔɔ yɔ, tɔndɔlɩŋ weyi ɩwɛ mɔ-yɔɔ yɔ, ɩwɩlɩɣ se mɔntɔɔ kʋñɔŋ Yesu yɔɔ.

¹⁸ Taabalaa! Đa-Kɩpaɣlʋ Yesu Krɩstʋ ɛlabɩ-mɩ lootiye! Pɩla ḿbʋ́!