Galaatɩ 5 - New Testament

Krɩstʋ lakɩ nɛ ɖɩwɛɛ ɖa-tɩ yɔɔ

¹ Krɩstʋ holi-ɖʋ se ɖɩwɛɛ ɖa-tɩ yɔɔ kpem. Pʋ-yɔɔ lɛ, ɩñaɣ pana nɛ ɩwɛɛ mɩ-tɩ yɔɔ ḿbʋ́ nɛ ɩtaatasɩ pɩsʋʋ yomaa.

² Iwelesi nɛ ɩnɩɩ, ma Pɔɔlɩ meheyiɣ-mɩ se: yee itisaa nɛ pɛpɛlɩ-mɩ yɔ, pʋbʋ Krɩstʋ tatasɩ-mɩ wɛʋ wazaɣ nakɛyɛ.

³ Mantasɩɣ-mɩ heyuu se: weyi etisiɣ nɛ pɛpɛlɩ-ɩ yɔ, pʋwɛɛ se ɛɖɔ paɣtʋ tɩŋa yɔɔ camɩyɛ.

⁴ Mbá mɩ ɩɖɔŋ tɩ-yɔɔ se ɩpɩsɩ kʋtʋʋzaa Ɛsɔ ɛsɩndaa yɔ, mɩ nɛ Krɩstʋ mɩ-hɛkʋ taa tayaa, ilesi Ɛsɔ lootiye.

⁵ Đa lɛ, ɖɩtaɣ liu se ɛkɔŋ-ɖʋ pɩsʋʋ kʋtʋʋzaa. Ḿbʋ́ e-Fezuu Kiɖeɖeu yeba nɛ ɖɩɖaŋ nɛ ɖɩwɛnɩ lidaʋ pʋ-yɔɔ.

⁶ Yee ɖa nɛ Krɩstʋ Yesu ɖɩkpɛndaa yɔ, paa pɛpɛlɩ-ɖʋ yaa pɛtɛpɛlɩ-ɖʋ yɔ, pɩfɛyɩnɩ wazaɣ nakɛyɛ: mbʋ́ pʋwɛ wazaɣ yɔ lɛ lidaʋ ŋgʋ́ ɖɩwɛnɩ ɛ-yɔɔ nɛ kiyeki se ɖɩsɔɔlɩ ɖama yɔ.

⁷ Đooo ɩñakaɣ pana nɛ ɩɖɔŋ toovenim nʋmɔʋ taa camɩyɛ lɛ, pɩla ɛzɩma ɩɩtasɩɣ labʋ ḿbʋ́ lɛɛlɛɛyɔ? Acɔlɔ pɩlɩnaa?

⁸ Ɛsɔ weyi ɛyaɣ-mɩ yɔ, pɩtalɩɩnɩ ɛ-cɔlɔ!

⁹ Ɛyáa yɔɔdʋʋ se: «Sɔsɔɔna pazɩ yekina nɛ somtu huúu.»

¹⁰ Paa ḿbʋ́ yɔ, Kɩpaɣlʋ yɔɔ lɛ, mantaɣ-mɩ liu se ɩkɔŋ maɣzʋʋ ɖɔɖɔ ɛzɩ ma yɔ. Ɛlɛ́, weyi eliɣtiɣ-mɩ ḿbʋ́ yɔ, paa ɛtɩɩkɛ anɩ yɔ, Ɛsɔ kɔŋ hɔm ɛ-nɩŋgbaaŋ.

¹¹ Taabalaa! Ma lɛ, yee toovenim maawɛɛ monsusuu se pʋwɛɛ se pɛpɛlɩ ɛyáa yɔ, Yuda ñɩma taawɛɛ ma-wayɩ kaŋ kaŋ ḿbʋ́. Pʋbʋ, tɔm ndʋ́ mɔyɔɔdaɣ Krɩstʋ weyi pakam-ɩ kaamaŋkaɣ yɔɔ yɔ ɛ-yɔɔ yɔ, tɩtaakɛnɩ nɔɔyʋ piti tɔm.

¹² Mbá pɛwɛɛ peliɣtiɣ-mɩ ḿbʋ́ se pɛpɛlɩ-mɩ yɔ, pɛtɛzɩ wobu nɛ palɩzɩ pa-tɩ nɛ sɛsɩ!

Pʋwɛɛ se Galaatɩ ñɩma ɩsɩnɩ ɖama

¹³ Taabalaa! Mɩ lɛ, Ɛsɔ ya-mɩ se ɩwɛɛ mɩ-tɩ yɔɔ. Paa ḿbʋ́, pɩtaha-mɩ waɖɛ se ɩla mbʋ́ mɩ-maɣmaɣ mi-liu wɛɛ yɔ mi-wezuu caɣʋ taa. Ɛlɛ́, ɩsɔɔlɩ ɖama nɛ piyele ɩsɩnɩ ɖama camɩyɛ.

¹⁴ Mbʋ́ pʋyɔɔ yɔ, paɣtʋ natʋyʋ wɛɛ, ɛyʋ ɛɖɔm tɩ-yɔɔ yɔ, pʋbʋ, ɛɖɔm lɛɛtʋ tɩŋa payɩ yɔɔ. Ńdʋ́ lɛ se: «Sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.»

¹⁵ Ɛlɛ́, yee ɩwɛɛ nɛ ɩlakɩ ɛzɩ tɛtɛ kpɩna nɛ ɩpaŋ ɖama kela nɛ ɩnazɩɣ ɖama yɔ, pʋbʋ, ɩkpa mɩ-tɩ. Pɩtɛkɛ ḿbʋ́, ɩkɔŋ ɩtɛ mɩtɩŋa yem.

¹⁶ Pʋ-yɔɔ lɛ, meheyiɣ-mɩ se: iyele nɛ Fezuu Kiɖeɖeu wɩlɩ-mɩ nʋmɔʋ mi-wezuu caɣʋ taa. Yee itisi ḿbʋ́ yɔ, ɩɩtasɩɣ tɩŋʋʋ nʋmɔŋ kɩdɛkɛdɩŋ weyi mɩ-maɣmaɣ ɩsɔɔlaa yɔ.

¹⁷ Mbʋ́ mɩ-maɣmaɣ mi-liu wɛɛ yɔ, pɩtɛkɛ ḿbʋ́ Fezuu Kiɖeɖeu liu wɛɛ. Mbʋ́ Fezuu Kiɖeɖeu liu ñɛwɛɛ yɔ, pɩtɛkɛ ḿbʋ́ mi-liu ñɛwɛɛ. Mbʋ́ ki-liu wɛɛ yɔ nɛ kɩdɛkɛdɩm mbʋ́ ɛyʋ sɔɔlɩ labʋ yɔ, pɩtata. Pʋ-yɔɔ ɩɩpɩzɩɣ ɩla mbʋ́ mɩ-maɣmaɣ mi-liu wɛɛ yɔ.

¹⁸ Yee ɩlakɩ mbʋ́ Fezuu Kiɖeɖeu wɩlɩɣ-mɩ yɔ yɔ, pʋbʋ, paɣtʋ tatasɩ wɛnaʋ ɖoŋ mɩ-yɔɔ.

¹⁹ Kɩdɛkɛdɩm mbʋ́ ɛyʋ sɔɔlɩ labʋ yɔ, pɩnaɣ keɣlee. Ḿbʋ́ yɔ: acɛyɛ nɛ mbʋ́ pipisiɣ ɛyáa yɔ nɛ yem yem lakasɩ

²⁰ nɛ agɔlɩma tɛɛ luŋuu nɛ fadɩŋ labʋ nɛ koyindiye nɛ you nɛ ɛsɩsɛmɩyɛ nɛ pana kɔʋ kadadayaɣ nɛ ɖama yɔɔ kʋyʋʋ nɛ tayʋʋ

²¹ nɛ lɛlaa ñɩm yɔɔ ɛsɩyɛ ɖʋʋ nɛ sʋlʋm kpaŋʋʋ nɛ kazandʋ labʋ kadadayaɣ nɛ lakasɩ kɩdɛkɛdɩsɩ lɛɛsɩ ndɩ ndɩ ɖɔɖɔ. Maatɛm-mɩ heyuu nɛ lɛɛlɛɛyɔ mantasɩɣ-mɩ heyuu se: mbá patɩŋa payɩ palakɩ pɩtɛ lakasɩ ńzɩ́ yɔ, pa-taa nɔɔyʋ ɛɛkaɣ sʋʋ Ɛsɔ Kewiyaɣ taa kaʋ.

²² Ɛlɛ́, mbʋ́ Fezuu Kiɖeɖeu ñahaɣ yɔ lɛ: sɔɔlɩm nɛ laŋhʋlʋmɩyɛ nɛ laŋhɛzɩyɛ nɛ hɔyɛ ɖɔkʋʋ nɛ ɖeu labʋ nɛ camɩyɛ lakasɩ nɛ mbʋ́ ɛyʋ ɖʋwa se ɛlakɩ yɔ pʋ-yɔɔ labʋ

²³ nɛ hɛɛɛ wɛtʋ nɛ tɩ ɖɔkʋʋ. Paɣtʋ tekizi pɩtɛ wɛtʋ ńdʋ́.

²⁴ Mbá pɛkɛ Krɩstʋ Yesu ñɩma yɔ, pɛtɛm kpaɣʋ pa-lakasɩ kɩdɛkɛdɩsɩ nzɩ́ paasɔɔlɩ labʋ kpem yɔ sɩtɩŋa payɩ nɛ paka kaamaŋkaɣ yɔɔ.

²⁵ Fezuu Kiɖeɖeu haɣnɩ-ɖʋ wezuu. Pʋ-yɔɔ lɛ, pʋwɛɛ se ɖiyele nɛ kɩwɩlɩ-ɖʋ nʋmɔʋ ɖɔɖɔ.

Mbʋ́ ɛyʋ ɖúu yɔ, ḿbʋ́ ɛkʋŋ

²⁶ Đɩtaakpazɩ ɖa-tɩ, ɖɩɖɔkɩ ɖa-tɩ nɛ ɖa-pana ɛtaakpanɩ ɖama yaa ɖɩtaaɖʋ ɛsɩyɛ ɖama yɔɔ.