Galaatɩ 4 - New Testament

Krɩstʋ ñɩma tatasɩ kɛʋ yomaa, ɛlɛ́ pɛkɛ Ɛsɔ piya

¹ Ndʋ́ mancaɣ yɔɔdʋʋ yɔ lɛ se: weyi ɛtɩɣyɩɣ ɛ-caa ñɩm yɔ, alɩwaatʋ ndʋ́ ɛtapaɣlɩda yɔ, ɛfɛyɩ ndɩ nɛ yom. Ɛlɛ́, ɛnʋ kɔŋna tɩɣyʋʋ ɛ-caa ñɩm tɩŋa.

² Paa ḿbʋ́ yɔ, alɩwaatʋ ndʋ́ ɛwɛ pɩcatʋ taa yɔ, ɛyáa nabɛyɛ nesi taa ɛwɛɛ nɛ pɔcɔŋnɩ ɛ-yɔɔ nɛ pʋkɔɔ pɩsɩɩnɩ alɩwaatʋ ndʋ́ ɛ-caa kaɖʋwa yɔ.

³ Đa lɛ, ḿbʋ́ ɖɔɖɔ ɖɩɩwɛ alɩwaatʋ ndʋ́ ɖɩɩwɛ ɛzɩ piya yɔ. Đɩɩkɛ kedeŋa yɔɔ cɩnɛ ɖoŋ yomaa.

⁴ Ɛlɛ́, alɩwaatʋ talaa lɛ, Ɛsɔ yele nɛ pɩtɩŋnɩ halʋ nɔɔyʋ yɔɔ nɛ palʋlɩ Ɛsɔ ɛnʋ ɛ-Pɩyalʋ nɛ Yuda ñɩma paɣtʋ wɛnɩ ɖoŋ ɛ́lɛ́ yɔɔ

⁵ se eholi mbá tɩɩwɛnɩ ɖoŋ pɔ-yɔɔ ɖɔɖɔ yɔ. Ḿbʋ́ yekina nɛ ɖɩpɩsɩ Ɛsɔ piya.

⁶ Mbʋ́ pɩwɩlɩɣ se ɖɩkɛ e-piya siŋŋ yɔ lɛ se eyeba nɛ ɛ-Pɩyalʋ Fezuu sʋʋ ɖa-taa nɛ kɩyɔɔdʋʋ se: «Man-Caa!»

⁷ Pʋ-yɔɔ lɛ, ŋtatasɩ kɛʋ yom, ɛlɛ́, ŋpɩsɩ Ɛsɔ pɩɣa. Ŋpɩsɩ ɛ-pɩɣa yɔ, ɛhaɣ-ŋ ñɩm mbʋ́ ɛsɩwa se ɛhaɣ e-piya yɔ.

Yee Galaatɩ ñɩma ɩtala tanaʋ yɔ, paɖaɣnɩɣ pɩsʋʋ paɣtʋ yomaa

⁸ Đooo lɛ, ɩtaasɩ Ɛsɔ nɛ ɩkɛ agɔlɩma yomaa. Ŋgʋ́, atɛkɛ Ɛsɔ.

⁹ Ɛlɛ́, lɛɛlɛɛyɔ, ɩsɩm Ɛsɔ nɛ halɩ ɛ́lɛ́ ñasɩm-mɩ. Pɩlabɩ ɛzɩma nɛ ɩcaɣ se ɩɖaɣnɩ pɩsʋʋ kedeŋa yɔɔ cɩnɛ ɖoŋ weyi ɩɩpɩzɩɣ pʋyʋ nɛ ɩɩwazɩɣ pʋyʋ yɔ ɩ-wayɩ se ɩpɩsɩ-mɩ yomaa?

¹⁰ Mɩ-ɛsɩyɛ kɩlɩɣ sɛnaʋ kɩyakɩŋ nɩɩyɩ nɛ fenasɩ nasɩyɩ nɛ alɩwaatʋ natʋyʋ nɛ pɩnzɩ nasɩyɩ!

¹¹ Ḿbʋ́ yebina nɛ sɔɔndʋ kpaɣ-m se tʋmɩyɛ nɖɩ́ ɖɩtɩŋa malabɩ mɩ-hɛkʋ taa yɔ, ɖɩtaakɔɔ ɖɩla aleɣwondu.

¹² Taabalaa! Mentendiɣ-mɩ se mɩ-wɛtʋ ɛwɛɛ ɛzɩ ma-ñɩndʋ yɔ, mbʋ́ pʋyɔɔ yɔ, ma ɖɔɖɔ mɛwɛ ɛzɩ mɩ yɔ. Ɩtalabɩ-m kɩdɛkɛdɩm nabʋyʋ.

¹³ Ɩtɔzɩ se kʋdɔŋ taa maawɛɛ yɔɔ mancalɩ-mɩ susuu Laŋhɛzɩyɛ Tɔm.

¹⁴ Alɩwaatʋ ndʋ́ pɩwɩɣaɣ-m ḿbʋ́ yɔ, ɩlabɩ kʋñɔŋ mɔ-yɔɔ siŋŋ, iteniɣzi-m yaa ɩtɔlɔ-m yem. Ɛlɛ́, ɩmʋ-m ɛzɩ Ɛsɔ tiyiyu nɔɔyʋ yɔ, halɩ ɩmʋ-m ɛzɩ Krɩstʋ Yesu maɣmaɣ yɔ.

¹⁵ Mɩ-taa kɛwɛ leleŋ pɩtɩɩfɛyɩ alɩwaatʋ ńdʋ́ lɛ, pɩla ɛzɩma lɛɛlɛɛyɔ? Mɩ-tɔm taa lɛ, manpɩzaɣ mɔntɔ se: paa mɩ-ɛsɛ yɔ, ɩpɩzaɣ se ɩhɔɔzɩ-yɛ nɛ ɩcɛlɩ-m.

¹⁶ Meheyiɣ-mɩ toovenim yɔɔ manpɩsɩ mi-koyindu naa we?

¹⁷ Ɛyáa ḿbá, pɛ-ɛsɩyɛ sɛnɩ mbʋ́ palakɩ-mɩ yɔ, ɛlɛ́, pɩfɛyɩ ɖeu. Mbʋ́ pʋyɔɔ yɔ, pañɩnɩɣ se ɩha-m siɣ́ye nɛ ɩnɩɩnɩ pe-ɖeke.

¹⁸ Toovenim lɛ, pɩwɛ ɖeu se ɛyáa ɛsɩyɛ ɛsɛɛnɩ camɩyɛ lakasɩ tam. Pɩtaakɛ alɩwaatʋ ndʋ́ mɛwɛ mɩ-hɛkʋ taa yɔ, ti-ɖeke.

¹⁹ Men-piya! Mantasɩɣ nɩʋ siziŋ mɩ-yɔɔ ɛzɩ halʋ lʋlʋʋ yɔ nɛ pʋkɔɔ pɩsɩɩnɩ alɩwaatʋ ndʋ́ ɩtɛzɩ pɩʋ nɛ ɩwɛɛ ɛzɩ Krɩstʋ yɔ.

²⁰ Me-liu wɛɛ siŋŋ se mɛwɛɛ mɩ-cɔlɔ alɩwaatʋ tʋnɛ tɩ-taa nɛ mana ɛzɩma mbʋ́ maayɔɔdɩnɩ-mɩ yɔ. Mbʋ́ pʋyɔɔ yɔ, pɩcɛyɩɣ-m mɩ-tɔm taa!

Agaarɩ nɛ Saara wɩlɩɣnɩ nɔsɩ naalɛ haʋ mbʋ́ Ɛsɔ ɖʋwa yɔ

²¹ Mbá mɩ mi-liu wɛɛ se paɣtʋ ɛwɛnɩ ɖoŋ mɩ-yɔɔ yɔ, iheyi-m nɛ mana se ɩnɩ ndʋ́ paɖʋ tɩ-taa yɔ yaa ɩtanɩɩ?

²² Pama tɩ-takayaɣ taa se Abraham wɛnɩ piya naalɛ: halʋ weyi ɛkɛ yom nɛ payaɣ-ɩ se Agaarɩ yɔ, ɛnʋ lʋlɩnɩ lɛɛka nɛ weyi payaɣ se Saara nɛ ɛ́lɛ́ wɛ ɛ-tɩ yɔɔ yɔ, ɛ́lɛ́ ñalʋlɩ lɛɛka.

²³ Yom ñaalʋlɩ ɛ-pɩɣa ɛzɩ halaa tɩŋa lʋlʋʋ yɔ. Piyele weyi ɛwɛ ɛ-tɩ yɔɔ yɔ, Ɛsɔ ɖʋna nɛ ɛ́lɛ́ ñalʋlɩ ɛ-ñɩŋga.

²⁴ Tɔm tʋnɛ tɩwɩlɩɣ nabʋyʋ, ḿbʋ́ lɛ: nɔsɩ naalɛ haʋ mbʋ́ Ɛsɔ ɖʋwa yɔ. Agaarɩ nɛ Saara pawɩlɩɣnɩ-sɩ. Yom Agaarɩ ñawɩlɩɣ nɔɔ haʋ mbʋ́ Ɛsɔ labɩ Sinayii pʋʋ ñʋʋ taa yɔ, e-piya lɛ yomaa.

²⁵ Ɛwɛ ɛzɩ Araabii pʋʋ ŋgʋ́ payaɣ se Sinayii yɔ. Ɛwɛ ɖɔɖɔ ɛzɩ tɛtʋ ndʋ́ tɩwɛ lɛɛlɛɛyɔ nɛ payaɣ-tʋ se Yeruusalɛm yɔ. Mbʋ́ pʋyɔɔ yɔ, tɩ nɛ tɩ-taa ñɩma tɩŋa pɛwɛ ɛzɩ yomaa yɔ.

²⁶ Ɛlɛ́, Yeruusalɛm ŋgʋ́ kʋkʋ wɛ ɛsɔdaa yɔ kɩ-taa ñɩma lɛ mbá pɛwɛ pa-tɩ yɔɔ yɔ, ŋ́gʋ́ wɛna ɛzɩ ɖo-ɖoo yɔ.

²⁷ Ḿbʋ́ pama Ɛsɔtɔm Takayaɣ taa se: «Halʋ weyi ña ŋkɛ kaalʋlaɣ nɛ ŋtanɩɩ lʋlʋʋ siziŋ yɔ, ña-taa ɛla leleŋ nɛ ŋtee hendu nɛ ŋmayɩ amaya! Mbʋ́ pʋyɔɔ yɔ, halʋ weyi ña pekizi-ŋ yɔ, ŋkɔŋ wɛnaʋ piya nɛ pɩkɩlɩ weyi ɛwɛ ɛ-walʋ cɔlɔ yɔ.»

²⁸ Taabalaa! Toovenim lɛ, Ɛsɔ ɖʋna nɛ ɩkɛ e-piya ɛzɩ ɛɖʋʋ ɖɔɖɔ nɛ palʋlɩ Izaakɩ yɔ.

²⁹ Izaakɩ ɛnʋ, paalʋlɩ-ɩ nɛ Fezuu Kiɖeɖeu ɖoŋ. Piyele lɛɛka lɛ, palʋlɩ-kɛ ɛzɩ palʋlʋʋ ɛyáa lɛlaa yɔ. Kaawɛ Izaakɩ ɛnʋ ɛ-wayɩ kaŋ kaŋ. Ḿbʋ́ ɖɔɖɔ pʋwɛ sɔnɔ yɔ.

³⁰ Ɛlɛ́, pama Ɛsɔtɔm Takayaɣ taa se we? Pamawa se: «Đɔɔnɩ halʋ weyi ɛkɛ yom yɔ nɛ ɛ-pɩɣa. Pɩtaha nʋmɔʋ se yom nɛ halʋ weyi ɛwɛ ɛ-tɩ yɔɔ yɔ pe-piya ɛkpɛndɩ patɩɣyɩ pa-caa ñɩm.»

³¹ Taabalaa! Yee ḿbʋ́, ɖɩtɛkɛnɩ halʋ weyi ɛkɛ yom yɔ e-piya, ɛlɛ́, weyi ɛwɛ ɛ-tɩ yɔɔ yɔ, ɛ-ñɩnzɩ ɖɩkɛnaa.