Filiipu 1 - New Testament

Sɛtʋ

¹ Ma Pɔɔlɩ, ma nɛ Timootee ɖɩkɛ Krɩstʋ Yesu tʋmlaɖaa. Ɖamaɣnɩ takayaɣ kanɛ. Đɩmaɣ-kɛ mbá mɩ ɩkɛ Ɛsɔ ñɩma mɩ nɛ Krɩstʋ Yesu mɩ-kpɛndʋʋ yɔɔ nɛ ɩwɛɛ Filiipu tɛtʋ taa yɔ mɩtɩŋa payɩ. Đɩmaɣ-kɛ mɩ nɛ mɩ-ŋgbɛyɛ taa ñɩma yɔɔ cɔnɩyaa nɛ mbá pɛkɛ tayɩyaa ɖɩ-taa yɔ.

² Đɩsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.

Pɔɔlɩ sɛɣ Ɛsɔ

³ Alɩwaatʋ ndʋ́ tɩtɩŋa payɩ mɔntɔzʋʋ mɩ-yɔɔ yɔ, mansaŋ Ɛsɔ mɩ-yɔɔ.

⁴ Alɩwaatʋ ndʋ́ tɩtɩŋa payɩ mɛnsɛɣ Ɛsɔ mɩtɩŋa mɩ-yɔɔ yɔ, mɛnsɛɣ-ɩ nɛ laŋhʋlʋmɩyɛ.

⁵ Mbʋ́ pʋyɔɔ yɔ, kpaɣ kɩyakʋ ŋgʋ́ ɩpɩsɩ Krɩstʋ ñɩma yɔ, ɩwɛ sɩnaʋ yɔɔ nɛ pʋkɔɔ pɩsɩɩnɩ alɩwaatʋ tʋnɛ nɛ ɛ-Laŋhɛzɩyɛ Tɔm tɛzɩɣ cɔʋ.

⁶ Manawa se paa pɩɩla ɛzɩma yɔ, Ɛsɔ weyi ɛpazɩ tʋmɩyɛ kɩbanɖɛ mɩ-taa yɔ, ɛlakɩ-ɖɩ ḿbʋ́ nɛ ɛkɔɔ ɛtɛm-ɖɩ kɩyakʋ ŋgʋ́ Krɩstʋ Yesu kɔŋ yɔ.

⁷ Pʋmʋnaa se mamaɣzɩ mɩtɩŋa mɩ-yɔɔ ḿbʋ́. Mɔnsɔɔlɩ-mɩ siŋŋ, mbʋ́ pʋyɔɔ yɔ, lootiye nɖɩ́ Ɛsɔ labɩ-mɩ yɔ, ma nɛ mɩtɩŋa payɩ ɛlabɩ-ɖɩ paa lɛɛlɛɛyɔ mɛwɛʋ salaka taa yɔ, yaa maawɛʋ man-tɩ yɔɔ nɛ malʋkɩ Laŋhɛzɩyɛ Tɔm yɔɔ nɛ mawɩlɩɣ ɛyáa se tɩkɛ toovenim yɔ.

⁸ Ɛsɔ na sɔɔlɩm mbʋ́ mɔnsɔɔlɩ mɩtɩŋa siŋŋ yɔ. Ḿbʋ́ lɛ Krɩstʋ Yesu sɔɔlɩm kpem.

⁹ Mentendiɣ Ɛsɔ se eyele nɛ ɩtɛzɩ ɖama sɔɔlʋʋ nɛ ɩpɩzɩ ɩtɩlɩ toovenim nɛ ɩtɛzɩ nɩʋ pɩtɩŋa pɩ-taa

¹⁰ nɛ ɩpɩzɩ ɩlɩzɩ mbʋ́ pɩkɩlɩ ɖeu yɔ. Ḿbʋ́ yekina nɛ ɩwɛɛ cɩɖɩcɩɖɩ nɛ paanaɣ kawanaɣ nakɛyɛ mɩ-yɔɔ puwiye nɖɩ́ Krɩstʋ lɩzɩɣ ɛ-tɩ nɛ ɛwɩlɩ yɔ

¹¹ nɛ ɛ-lakasɩ kʋtʋʋzasɩ tɛzɩ ɖɔʋ mɩ-taa nɛ siyele pasa Ɛsɔ nɛ paɖʋ-ɩ hɩɖɛ.

Laŋhɛzɩyɛ Tɔm yɛlɩɣ

¹² Taabalaa! Mancaɣ se ɩtɩlɩ se mbʋ́ pɩtalɩ-m yɔ, halɩ piyeba nɛ ɖɩtɛzɩɣ Laŋhɛzɩyɛ Tɔm susuu.

¹³ Ḿbʋ́ yebina nɛ wiyaʋ sɔsɔ ɖɩɣa yɔɔ ɖaŋɩyaa nɛ ɛyáa lɛlaa, patɩŋa payɩ patɩlɩ se malakɩ Krɩstʋ tʋmɩyɛ yɔɔ paɖʋ-m salaka.

¹⁴ Đɔɖɔ lɛ, mbá pɛkɛ ɖa-taabalaa pa nɛ Kɩpaɣlʋ pɛ-kpɛndʋʋ yɔɔ yɔ, pa-taa sakɩyɛ nawa se mɛwɛ salaka taa lɛ, pɩlabɩ-wɛ hʋnʋm nɛ pɛtɛzɩɣ susuu Ɛsɔtɔm kaalɛyɩtʋ.

^15-17 Toovenim lɛ, pa-taa nabɛyɛ taa wɛnɩ-m nɛ posusuu Krɩstʋ tɔm nɛ ɛsɩsɛmɩyɛ. Ɛlɛ́, pa-taa lɛlaa ñosusaɣ-tʋ nɛ lɩmaɣza kɩbana. Paba lakɩ ḿbʋ́ nɛ sɔɔlɩm, mbʋ́ pʋyɔɔ yɔ, pɛtɛm naʋ se Ɛsɔ ɖʋnɩ-m cɩnɛ se malʋ Laŋhɛzɩyɛ Tɔm yɔɔ. Piyele kajalaɣ ñɩma yɔ, paasusuu Krɩstʋ tɔm nɛ lɩmaɣza kɩbana. Pañɩnɩɣ se pala mɔ-yɔɔ ɛsɩsɛmɩyɛ nɛ piyele mɛntɛzɩ labʋ kʋñɔŋ salaka taa.

¹⁸ Pɩna-m nɛ we! Paa pɛwɛnɩ lɩmaɣza kɩdɛkɛdɛɛ yaa wena amʋnaa yɔ yɔ, Krɩstʋ tɔm posusuu. Pʋ-yɔɔ lɛ, man-taa hʋlʋmaa. Halɩ pʋhʋlʋmʋʋ ḿbʋ́ tam.

¹⁹ Mbʋ́ pʋyɔɔ yɔ, manawa se mɩ-Ɛsɔ sɛʋ nɛ Yesu Krɩstʋ Fezuu sɩnaʋ pɔ-yɔɔ lɛ, pɩtɩŋa payɩ pʋkɔŋ yabʋ ma-ñʋʋ.

²⁰ Mbʋ́ me-liu wɛɛ siŋŋ nɛ manɖaŋ-pʋ yɔ lɛ se fɛyɛ ɛtaatɩɩkpaʋ-m kpem. Ɛlɛ́, lɛɛlɛɛyɔ paa mansɩba yaa mɛwɛ wezuu yɔ, pɩtɩŋɩɣnɩ mɔ-yɔɔ ɛzɩ pɩpam labʋ yɔ nɛ Krɩstʋ hɩɖɛ sɛɛ nɛ paa weyi ɛna kaŋŋ.

²¹ Mbʋ́ pʋyɔɔ yɔ, Krɩstʋ kɩlɩnɩ-m wazaɣ me-wezuu caɣʋ taa nɛ sɩm ñɛkɛnɩ-m kɛzɛɣa.

²² Ɛlɛ́, yee mɛwɛ wezuu nɛ manpɩzɩɣ se mantasɩ tʋmɩyɛ wazaɣ ñɩnɖɛ naɖɩyɛ labʋ yɔ, pʋbʋ maanaɣ se malɩzɩ wezuu naa sɩm.

²³ Mɛwɛ cenje: me-liu wɛɛ se meyele kedeŋa yɔɔ wezuu kʋnɛ nɛ mowolo ma nɛ Krɩstʋ ɖɩwɛɛ. Ḿbʋ́ kɩlɩnɩ ɖeu kpem.

²⁴ Ɛlɛ́, mɩ-yɔɔ lɛ, pɩkɩlɩ wazaɣ se mantasɩ caɣʋ wezuu.

²⁵ Ḿbʋ́ manawa kpem. Manawa se mantasɩɣ caɣʋ wezuu nɛ mɛwɛɛ mɩtɩŋa payɩ mɩ-cɔlɔ nɛ mansɩnɩ-mɩ nɛ ɩɖɛɛnɩ ɛsɩndaa nɛ mɩ-laŋa hʋlʋmɩ mi-lidaʋ wɛnaʋ taa.

²⁶ Yee ḿbʋ́, alɩwaatʋ ndʋ́ manpɩsɩɣ mɩ-cɔlɔ yɔ, ɩtɛzɩɣ-m kʋndɩnaʋ mɩ nɛ Krɩstʋ Yesu mɩ-kpɛndʋʋ taa.

Laŋhɛzɩyɛ Tɔm susuu lʋbɩyɛ

²⁷ Mbʋ́ pʋwɛɛ yɔ lɛ se: ɩɖɔ camɩyɛ ɛzɩ Krɩstʋ Laŋhɛzɩyɛ Tɔm pɔzʋʋ yɔ. Yee ḿbʋ́, paa mɔnkɔm se mana-mɩ yaa mɔntɔkɔɔ yɔ, manɩɩ se ɩɖɔkɩ mɩ-tɩ kpam ḿbʋ́ nɛ ɩwɛnɩ lɩmaɣza kʋɖʋmɛɛ nɛ laŋɩyɛ kʋɖʋmɖɩyɛ, tʋmɩyɛ nɖɩ́ ɩlakɩ se ɛyáa etisi Laŋhɛzɩyɛ Tɔm ńdʋ́ yɔ ɖɩ-taa.

²⁸ Pʋbʋ, sɔɔndʋ ɛɛkpaɣ-mɩ nɛ mi-koyindinaa nabʋyʋ taa. Ḿbʋ́ wɩlɩɣnɩ-wɛ se nʋmɔʋ kilebuu taa pɛwɛɛ nɛ pɩwɩlɩ-mɩ se mɩ mɩwɛ ñʋʋ yabʋ nʋmɔʋ taa, Ɛsɔ cɔlɔ pɩlɩnaa.

²⁹ Ɛsɔ ha-mɩ se ɩwɛnɩ lidaʋ Krɩstʋ yɔɔ nɛ ɩtɛ ɩtɔɔ kʋñɔŋ ɛ-yɔɔ ɖɔɖɔ

³⁰ nɛ ɩlʋ lʋbɩyɛ nɖɩ́ ɩna malʋkaɣ yɔ. Ńɖɩ́ mɔnɖɔŋ lʋbʋ lɛɛlɛɛyɔ nɛ ɩnɩɣ ɖɩ-taŋ.