Efɛɛzɩ 6 - New Testament

Piya nɛ sɩ-ñɩma pɔ-tɔm

¹ Mɩ piya lɛ, ɩña mɩ-ñɩma ɛzɩ Kɩpaɣlʋ liu wɛʋ yɔ. Mbʋ́ pʋyɔɔ yɔ, pʋmʋnɩ ḿbʋ́.

² Ḿbʋ́ pamawa se: «Đʋ ña-caa nɛ ño-ɖoo hɩɖɛ.» Ńdʋ́ lɛ kajalaɣ paɣtʋ ndʋ́ Ɛsɔ tɔm se yee ŋɖɔm tɩ-yɔɔ yɔ, ɛlakɩ-ŋ pʋyʋ yɔ:

³ «Ŋhikiɣ ña-tɩ nɛ ŋcaɣ wezuu kedeŋa yɔɔ cɩnɛ nɛ pileɖi.»

⁴ Mɩ caanaa lɛ, ɩtaala nɛ mi-piya pana kpa. Ɛlɛ́, ɩɖɔkɩ-sɩ nɛ ɩsɩɣzɩ-sɩ lɔŋ nɛ ɩka sɩ-ñʋŋ taa ɛzɩ Kɩpaɣlʋ liu wɛʋ yɔ.

Yomaa nɛ pa-caanaa pɔ-tɔm

⁵ Mɩ yomaa lɛ, ɩña kedeŋa yɔɔ cɩnɛ mɩ-caanaa camɩyɛ nɛ ɩsɔɔndɩ-wɛ toovenim taa, ñamtʋ ndʋ́ ɩñaŋ Krɩstʋ yɔ tɩ-yɔɔ.

⁶ Ɩtaañam-wɛ alɩwaatʋ ndʋ́ pɛwɛ mɩ-cɔlɔ nɛ pɔcɔŋnɩ-mɩ yɔ ti-ɖeke se pasam-mɩ. Ɛlɛ́, ɩla ḿbʋ́ se ɩkɛ Krɩstʋ tʋmlaɖaa mbá palakɩ mbʋ́ Ɛsɔ liu wɛɛ yɔ nɛ pa-laŋɩyɛ tɩŋa pilim yɔ.

⁷ Ɩlabɩ-wɛ tʋma nɛ laŋhʋlʋmɩyɛ ɛzɩ Kɩpaɣlʋ maɣmaɣ ɩlakɩ yɔ. Pɩtaakɛ se ɛyáa ɩlakɩ-yɛ.

⁸ Ɩtɛm naʋ se paa pɩɩkɛ yom yaa weyi ɛwɛ ɛ-tɩ yɔɔ yɔ, ɖeu mbʋ́ ɛlaba yɔ, pʋ-yɔɔ Kɩpaɣlʋ hɛyɩɣ-ɩ.

⁹ Piyele mɩ caanaa lɛ, ɩla mi-yomaa ɖɔɖɔ ḿbʋ́. Ɩɖɔkɩ mɩ-tɩ nɛ ɩtaañazɩ-wɛ. Mbʋ́ pʋyɔɔ yɔ, ɩtɛm sɩm se mɩ nɛ wɛ mɩ-Caa wɛ ɛsɔdaa. Ɛɛcɔŋnɩ nɔɔyʋ ɛsɩndaa nɛ pʋcɔ ɛlabɩ-ɩ pʋyʋ.

Ɖɩkpaɣ Ɛsɔ You wondu

¹⁰ Tɔm ndʋ́ mɛntɛzɩɣna yɔ lɛ se: ɩkpa ɖoŋ mɩ nɛ Kɩpaɣlʋ mɩ-kpɛndʋʋ taa e-ɖoŋ sɔsɔŋ yɔɔ.

¹¹ Ɩkpaɣ you wondu ndʋ́ Ɛsɔ ha-mɩ yɔ tɩtɩŋa payɩ nɛ ɩpɩzɩ ɩkaɖɩnɩ eleeu alɩwaatʋ ndʋ́ ɛñɩkɩ-mɩ ɛ-kpacanaa yɔ.

¹² Pɩtɛkɛ ɛyáa pʋwɛɛ se ɖiyoona. Ɛlɛ́, ɛsɔdaa ɖoŋ tɩŋa payɩ nɛ kedeŋa yɔɔ cɩnɛ cɩkpɛndʋʋ tɛɛ awiya nɛ feziŋ kɩdɛkɛdɩŋ pʋwɛɛ se ɖiyoona.

¹³ Pʋ-yɔɔ pʋwɛɛ se ɩkpaɣ Ɛsɔ you wondu tɩŋa payɩ nɛ ɩpɩzɩ ɩkaɖɩnɩ-wɛ kɩyakɩŋ kɩdɛkɛdɩŋ taa. Ḿbʋ́ yekina nɛ ɩwɛɛ mi-ɖeɖe ḿbʋ́ alɩwaatʋ ndʋ́ ɩtɛŋ patɩŋa payɩ yonaʋ yɔ.

¹⁴ Pʋ-yɔɔ lɛ, ɩwɛɛ mi-ɖeɖe ḿbʋ́: ɩkpaɣ toovenim ɛzɩ tambaɖɛ nɖɩ́ sɔɔja tɔɔlʋʋ yɔ nɛ tʋʋzʋʋ ɛzɩ ñɩ́ɣ́yʋ́ʋ ŋgʋ́ ehuuzuu e-lotu yɔɔ yɔ.

¹⁵ Ɩkpaɣ mi-kpekpeka ŋgá ɩwɛnɩ Laŋhɛzɩyɛ Tɔm ɖisusiye yɔ ɛzɩ naataŋgbala wena ɩlɛɣ yɔ.

¹⁶ Pʋnɛ pɩtɩŋa pʋ-wayɩ lɛ, ɩkpaɣ mi-lidaʋ alɩwaatʋ kpeekpe ɛzɩ kpayʋʋ ŋgʋ́ ɩmʋʋnɩ ñɩma wena Satanɩ tɔʋ nɛ a-nɔsɩ taa nɛ miŋ sɔsɔŋ yɔ.

¹⁷ Ɩkpaɣ ɖɔɖɔ mɩ-ñʋʋ yabʋ ɛzɩ you hulaɣ yɔ nɛ Ɛsɔtɔm ɛzɩ you sɩɣa ŋgá e-Fezuu Kiɖeɖeu cɛlɩ-mɩ yɔ.

¹⁸ Đɔɖɔ lɛ, ɩtɩŋnɩ Fezuu Kiɖeɖeu yɔɔ nɛ ɩsɛɛ-ɩ nɛ itendi-i alɩwaatʋ tɩŋa pɩtɩŋa pɩ-taa. Ɩtaaɖoo pʋ-yɔɔ, ɩñaɣ pana nɛ itendi-i ɛ-ñɩma tɩŋa yɔɔ.

¹⁹ Itendi-i ɖɔɖɔ mɔ-yɔɔ se eyele nɛ monkuli mɔ-nɔɔ lɛ, mantɩlɩ ndʋ́ maawɩlɩnɩ kaalɛyɩtʋ mbʋ́ pʋwɛ mɛsaɣ tɛɛ Laŋhɛzɩyɛ Tɔm taa yɔ.

²⁰ Ńdʋ́ Ɛsɔ tiyi-m se monsusi, tɩ-yɔɔ mɛwɛ salaka taa yɔ. Itendi-i nɛ manpɩzɩ monsusi-tʋ kaalɛyɩtʋ ɛzɩ pʋpɔzʋʋ yɔ.

Sɛtʋ

²¹ Pʋcɔ mɩ ɖɔɖɔ ɩtɩlɩ mbʋ́ mɛnkɛnaa nɛ mbʋ́ malakɩ yɔ lɛ, taabalʋ kʋsɔɔlʋ Ticiiki weyi ɛkɛ Kɩpaɣlʋ tʋmlaɖʋ nɛ ɛlakɩ mbʋ́ ɛɖʋwa yɔ, ɛkɔŋnɩ-mɩ kɛdʋʋ pɩtɩŋa payɩ.

²² Pɩ-maɣmaɣ pʋ-yɔɔ kpem mentiyi-i mɩ-cɔlɔ se ɛkɛdɩ-mɩ mbʋ́ pɩ-taa ɖɩwɛɛ yɔ nɛ ɛhɛzɩ mɩ-laŋa.

²³ Caa Ɛsɔ nɛ Kɩpaɣlʋ Yesu Krɩstʋ pɛhɛzɩ taabalaa tɩŋa laŋa nɛ peyele pɔsɔɔlɩ ɖama nɛ pɛwɛnɩ lidaʋ.

²⁴ Ɛsɔ ɛla mbá patɩŋa payɩ pɔsɔɔlɩ ɖa-Kɩpaɣlʋ Yesu Krɩstʋ kámaɣ́ fɛyɩ yɔ lootiye!