Efɛɛzɩ 2 - New Testament

Ɛsɔ haɣ-ɖʋ wezuu ɖa nɛ Yesu ɖɛ-kpɛndʋʋ taa

¹ Mɩ lɛ, ɖooo lɛ, ɩɩsɩbɩ mɩ-kɩdɛkɛdɩm nɛ mɩ-kɩwɛɛkɩm pɔ-yɔɔ.

² Ɩcakaɣ wezuu kɩwɛɛkɩm taa ɛzɩ pʋwɛʋ kedeŋa yɔɔ cɩnɛ yɔ nɛ ɩñaŋ ɛsɔdaa nɛ tataa pɛ-hɛkʋ taa ɖoŋ wiyaʋ. Wiyaʋ ɛnʋ lɛ Satanɩ. Ɛnʋ seɣtiɣni mbá paañaŋ Ɛsɔ yɔ lɛɛlɛɛyɔ.

³ Đa ɖɔɖɔ ɖatɩŋa payɩ ɖɩɩwɛ pa-taa. Đɩɖɔŋaɣ ɛzɩ ɖa-maɣmaɣ ɖe-liu wɛʋ yɔ nɛ ɖɩlakɩ mbʋ́ pɩkɛdɩnɩ-ɖʋ yɔ nɛ mbʋ́ ɖɩmaɣzɩɣ yɔ. Pɩɩwɛɛ se Ɛsɔ ɛhʋʋnɩ-ɖʋ ɖɔɖɔ ɛzɩ lɛlaa yɔ wɛtʋ ndʋ́ tɩ-taa ɖɩwɛɛ yɔ tɩ-yɔɔ.

⁴ Ɛlɛ́, ɛnaɣ ɛyáa pʋtɔdɩyɛ pɩŋŋ, ɛsɔɔlɩ-ɖʋ kámaɣ́ fɛyɩ.

⁵ Pʋ-yɔɔ efezi ɖa nɛ Krɩstʋ alɩwaatʋ ndʋ́ ɖɩɩsɩbɩ ɖa-kɩwɛɛkɩm yɔɔ ḿbʋ́ yɔ. Yee ḿbʋ́, lootiye yɔɔ ɛyabɩ mɩ-ñʋʋ.

⁶ Toovenim lɛ Ɛsɔ kpɛndɩ ɖa nɛ ɩ fezuu nɛ ɛcaɣzɩ-ɖʋ ɛsɔdaa ɖa nɛ Krɩstʋ Yesu ɛnʋ ɖɛ-kpɛndʋʋ taa.

⁷ Ḿbʋ́ wɩlɩɣnɩ e-lootiye cee wayɩ. Ńɖɩ́ kɩlɩnɩ pɩtɩŋa payɩ. Đa nɛ Krɩstʋ Yesu ɖɛ-kpɛndʋʋ yɔɔ ɛkaɣ pɩzʋʋ nɛ ɛla camɩyɛ lakasɩ ńzɩ́.

⁸ E-lootiye ńɖɩ́ ɖɩ-yɔɔ ɛtɩŋnɩ lidaʋ ŋgʋ́ ɩwɛnɩ Krɩstʋ yɔɔ yɔ kʋ-yɔɔ nɛ ɛya mɩ-ñʋʋ. Pɩtɛkɛ mɩ-cɔlɔ pɩlɩnaa, Ɛsɔ kʋjɔʋ pɩkɛnaa.

⁹ Pɩtɛkɛ mɩ-tʋma yɔɔ pɩyabɩ mɩ-ñʋʋ. Pɩlabɩ ḿbʋ́ se nɔɔyʋ ɛtaakʋndɩ.

¹⁰ Mbʋ́ pʋyɔɔ yɔ, Ɛsɔ tɩŋnɩnɩ ɖa nɛ Krɩstʋ Yesu ɖɛ-kpɛndʋʋ yɔɔ nɛ ɛlabɩ-ɖʋ-kʋ se ɖɩla tʋma kɩbana wena ɛɛñɔɔzɩ ɖooo lɔŋ se ɖɩlabɩ-yɛ yɔ.

Krɩstʋ sɩm yɔɔ lɛ, Yuda ñɩma nɛ mbá pɛtɛkɛ Yuda ñɩma yɔ, papɩsɩ ɛyáa kʋɖʋmaa

¹¹ Pʋ-yɔɔ lɛ, ɩtɔzɩ se: ɖooo lɛ, mbá mɩ ɩtɛkɛ Yuda ñɩma yɔ, Yuda ñɩma niɣzaɣ-mɩ se ɩkɛ kɩtɛpɛlɩŋ. Ŋgʋ́, pɛlʋʋ wɛʋ yɔ, tomnaɣ yɔɔ yem pɛpɛlɩɣ-pʋ.

¹² Alɩwaatʋ ńdʋ́ tɩ-taa lɛ, ɩtaakɛ Krɩstʋ ñɩma. Pɩtaaha-mɩ waɖɛ nɖɩ́ Izrɛɛlɩ ñɩma wɛna yɔ. Ɩtaatɩlɩ nɔsɩ haʋ mbʋ́ Ɛsɔ ɖʋ ɛ nɛ wɛ pɛ-hɛkʋ taa yɔ. Đɔɖɔ lɛ, ɩɩwɛ kedeŋa yɔɔ yem: ɩtaaɖaŋ pʋyʋ, Ɛsɔ taawɛɛ mɩ-cɔlɔ.

¹³ Ɛlɛ́, lɛɛlɛɛyɔ mɩ nɛ Krɩstʋ Yesu mɩ-kpɛndʋʋ yɔɔ lɛ, mbá mɩ iiposini Ɛsɔ yɔ, ɩñɔtɩnɩ-ɩ. Krɩstʋ calɩm mbʋ́ pɩkpɛdaa yɔ, pʋ-yɔɔ pɩtɩŋnaa.

¹⁴ Mbʋ́ pʋyɔɔ yɔ, ɛ-yɔɔ ɖɩwɛ laŋhɛzɩyɛ taa. Ɛnʋ yɔkɩnɩ koloŋa ŋgá kaawɛ Yuda ñɩma nɛ mbá pɛtɛkɛ Yuda ñɩma yɔ pɛ-hɛkʋ taa nɛ piyele pala nɔɔ kʋɖʋmaɣ. Koloŋa ŋ́gá lɛ koyindiye.

¹⁵ Ɛtɩŋnɩ ɛ-maɣmaɣ ɛ-yɔɔ nɛ ɛlɩzɩ paɣtʋ nɛ mbʋ́ pʋwɛ tɩ-taa yɔ pu-ɖoŋ. Ḿbʋ́ yebina nɛ laŋhɛzɩyɛ wɛɛ Yuda ñɩma nɛ mbá pɛtɛkɛ Yuda ñɩma yɔ pɛ-hɛkʋ taa. Ḿbʋ́ ɛpɩsɩ patɩŋa ɛyʋ kʋɖʋm, pʋdʋ kɛ kɩfalʋ.

¹⁶ Đɔɖɔ lɛ, eyeba nɛ pa nɛ Ɛsɔ peceɣ nɛ papɩsɩ kʋɖʋm. Kʋñɔŋ ŋgʋ́ ɛtɔwaa nɛ ɛkɔɔ ɛsɩ kaamaŋkaɣ yɔɔ yɔ, kʋ-yɔɔ ɛtɩŋnaa nɛ eɖezi koyindiye ḿbʋ́.

¹⁷ Ɛkɔm kedeŋa yɔɔ nɛ esusi Laŋhɛzɩyɛ Tɔm mbá mɩ iiposini Ɛsɔ yɔ nɛ Yuda ñɩma mbá paba kɔñɔtɩnɩ-ɩ yɔ ɖɔɖɔ.

¹⁸ Mbʋ́ pʋyɔɔ yɔ, ɛ-yɔɔ pɩtɩŋnaa nɛ pɩha Yuda ñɩma nɛ mbá pɛtɛkɛ Yuda ñɩma yɔ waɖɛ se paa weyi ɛtɩŋnɩ Fezuu Kiɖeɖeu yɔɔ nɛ ewolo Caa cɔlɔ. Fezuu Kiɖeɖeu kʋɖʋmʋʋ kɔŋ wɛna.

¹⁹ Pʋ-yɔɔ lɛ, ɩtatasɩ kɛʋ agɔmaa yaa nʋmɔɖɔnaa. Ɛlɛ́, mɩ nɛ Ɛsɔ ñɩma ɩwɛ ɛjaɖɛ kʋɖʋmɖɩyɛ taa, ɩkɛ ɛ-hɔʋ taa ñɩma.

²⁰ Mɩ lɛ ɖɩɣa ŋgá Yesu tiyiyaa nɛ náyaa pɛkɛ ke-kiɖe yɔ ko-kolonzi. Krɩstʋ Yesu maɣmaɣ lɛ pɩyɛ nɖɩ́ ɖɩkɩlɩ wazaɣ yɔ.

²¹ Ɛ-yɔɔ pama-kɛ nɛ kapaɣlɩ nɛ kɛwɛɛ ɖoŋ katɩŋa payɩ. Ḿbʋ́ kapɩsɩɣ Ɛsɔ ɖɩɣa cɩɖɩcɩɖɩ ñɩŋga ɖa nɛ Kɩpaɣlʋ ɖɛ-kpɛndʋʋ yɔɔ.

²² Ɛ-yɔɔ mɩ ɖɔɖɔ ɩwɛ mbá pamanɩ-kɛ se Ɛsɔ ɛtɩŋnɩ e-Fezuu Kiɖeɖeu yɔɔ nɛ ɛwɛɛ ka-taa yɔ pa-taa.