Ebree 9 - New Testament

Kajalaɣ nɔɔ haʋ kɩlaŋ tɔm

¹ Kajalaɣ nɔɔ haʋ kɛwɛnɩ paɣtʋ ndɩ ndɩ ɛzɩma mbʋ́ poluŋuu Ɛsɔ tɛɛ ɛ-ɖɩɣa taa tataa cɩnɛ yɔ pʋ-yɔɔ.

² Paasiɣ ka-taa kɩɖanɖʋʋ nakʋyʋ nɛ patayɩ-kʋ hɔɔlɩŋ naalɛ: payaɣ kajalaɣ ñɩŋgʋ se lone kaɖɛ ñɩnɖɛ. Paasɩ peeɖe mbʋ́ pʋ-yɔɔ pasɩɣ kanɖʋnaa yɔ nɛ taabɩlɩ. Kʋ-yɔɔ wɛ tɔɔnaɣ ŋgá paha Ɛsɔ yɔ.

³ Lone kaɖɛ ñɩnɖɛ ńɖɩ́ ɖɩ-wayɩ lɛ, patasɩ pɩsaʋ ɖɩɣʋ. Kʋ-wayɩ lone nɖɩ́ payaɣ se lone nɖɩ́ ɖɩkɩlɩ kaɖɛ yɔ ɖɩwɛɛ.

⁴ Peeɖe tɩlaaɖɩnaa ɖɩhɔɖɛ nɖɩ́ palabɩnɩ ñɩɣlɩ́m yɔ ɖɩwɛɛ. Nɔɔ haʋ aɖakaɣ ŋgá pohuuzi katɩŋa payɩ ñɩɣlɩ́m yɔ, kɛwɛ peeɖe ɖɔɖɔ. Ka-taa wɛ ñɩɣlɩ́m pɛʋ ŋgʋ́ paɖʋ kɩ-taa tɔɔnaɣ ŋgá kalɩnɩ ɛsɔdaa nɛ payaɣ-kɛ se maanɩ yɔ. Aarɔɔnɩ ɖaʋ ŋgʋ́ kɩɩlɩzɩ hatʋ yɔ nɛ pɩtaahalanzɩ nzɩ́ paama sɩ-yɔɔ Ɛsɔ paɣtʋ yɔ, pɛwɛ peeɖe ɖɔɖɔ.

⁵ Pasɩ Ɛsɔ tiyiyaa lɛzɩŋ sɩʋ kpelisi naalɛ nasɩyɩ aɖakaɣ ŋ́gá kɔ-yɔɔ nɛ pɩwɩlɩɣ se Ɛsɔ wɛ peeɖe. Si-keŋ huuzi lone nɖɩ́ ɖɩ-taa pamɩzɩɣ calɩm Ɛsɔ ɛsɩndaa se ekpeɣ ɛyáa pa-kɩwɛɛkɩm yɔ, ɖɩ-yɔɔ. Tɔm sakɩyɛ wɛɛ se mɔyɔɔdʋʋ pʋ-yɔɔ, ɛlɛ́, pɩtɛkɛ lɛɛlɛɛyɔ pʋwɛɛ se mantazɩ tɩtɩŋa tɩ-taa.

⁶ Paañɔɔzɩ pɩtɩŋa payɩ ḿbʋ́ nɛ pasɩɩ nɛ piyele cɔjɔnaa ñasʋʋ paa ɖooye kɩɖanɖʋʋ kajalaɣ hɔɔlʋʋ taa nɛ palakɩ pa-tʋmɩyɛ.

⁷ Ɛlɛ́, cɔjɔnaa ñʋʋdʋ ɖeke sʋwaɣnɩ kɩɖanɖʋʋ hɔɔlʋʋ naalɛ ñɩŋgʋ taa tam kʋɖʋm pɩnaɣ taa. Pʋwɛɛ se ewoni kpɩna wena ɛhaɣ Ɛsɔ yɔ a-calɩm ɛ-maɣmaɣ ɛ-kɩwɛɛkɩm nɛ mbʋ́ lɛlaa laba nɛ patatɩlɩ yɔ pʋ-yɔɔ.

⁸ Ḿbʋ́ Fezuu Kiɖeɖeu wɩlaa se: alɩwaatʋ ndʋ́ Ɛsɔ kɩɖanɖʋʋ kajalaɣ hɔɔlʋʋ wɛɣ yɔ, nɔɔyʋ ɛɛpɩzɩɣ ɛsʋʋ lone nɖɩ́ ɖɩkɩlɩ kaɖɛ yɔ ɖɩ-taa.

⁹ Ḿbʋ́ wɩlɩɣnɩ alɩwaatʋ ndʋ́ ɖɩwɛ tɩ-taa lɛɛlɛɛyɔ yɔ. Pʋ-tɔbʋʋ se haɖɛ nɛ kpɩna wena palaɣ Ɛsɔ yɔ, paapɩsɩɣ mbá palakɩ kʋjɔŋ ɩnʋ yɔ kʋtʋʋzaa Ɛsɔ ɛsɩndaa.

¹⁰ Pɩtɩŋa payɩ pɩkɛnɩ paɣtʋ yem. Tomnaɣ yɔɔ paɖʋ-tʋ: paɖʋ-tʋ tɔɔnasɩ nɛ sʋlʋm nɛ cɩɖɩcɩɖɩ wɛtʋ sɔnzɩ ndɩ ndɩ pɔ-yɔɔ, nɛ tɩwɛnɩ ɖoŋ nɛ pʋkɔɔ pɩsɩɩnɩ alɩwaatʋ ndʋ́ Ɛsɔ lɛɣzɩ pɩtɩŋa payɩ yɔ.

Krɩstʋ la ɛ-tɩ

¹¹ Ɛlɛ́, Krɩstʋ ñɔkɔm se ɛkɛ ñɩm mbʋ́ pʋwɛ lɛɛlɛɛyɔ yɔ pʋ-cɔjɔnaa ñʋʋdʋ. Kɩɖanɖʋʋ ŋgʋ́ ɛlakɩ ɛ-tʋmɩyɛ kɩ-tɛɛ yɔ, ŋ́gʋ́ kɩlɩnɩ wazaɣ nɛ kʋmʋna kpem. Pɩtɛkɛ ɛyáa siɣni-kʋ. Pʋ-tɔbʋʋ se kɩtɛkɛ kedeŋa kanɛ kɔ-yɔɔ pʋyʋ.

¹² Krɩstʋ sʋ kpaagbaa sʋʋ lone nɖɩ́ ɖɩkɩlɩ kaɖɛ yɔ ɖɩ-taa. Ɛsʋwaɣ lɛ, ɛtɛkpɛndɩnɩ tuliŋ nɛ neɣna pa-calɩm. Ɛlɛ́, ɛ-maɣmaɣ ɛ-calɩm ɛsʋnaa. Ḿbʋ́ ɛlaba nɛ ɖihiɣ ñʋʋ yabʋ maatɛŋ.

¹³ Sɔnzɩ taa lɛ, paɖʋwa se yee nɔɔyʋ ɛlabɩ kɩwɛɛkɩm yɔ, pʋwɛɛ se pataa-ɩ tuluŋ nɛ naŋ abalaa pa-calɩm nɛ nɔ halɩñɩnʋ weyi paɖʋ-ɩ miŋ nɛ ɛñaɣ yɔ ɛ-tɔlɩma nɛ ɛpɩsɩ cɩɖɩcɩɖɩ tʋ.

¹⁴ Yee ḿbʋ́ pʋwɛɛ lɛ, ɛzɩma Krɩstʋ calɩm mbʋ́ pɩkɩlɩ ɖoŋ yɔ, pɩɩpɩzɩɣ pɩñalɩ ɛyáa kɩwɛɛkɩm! Fezuu Kiɖeɖeu ŋgʋ́ kɩwɛ tam yɔ, kɩ-yɔɔ pɩtɩŋnaa nɛ ɛha ɛ-maɣmaɣ ɛ-tɩ Ɛsɔ se palaa-ɩ nɛ pɩkɛnɩ kɩlaʋ kɩbaŋgʋ siŋŋ. Kɩlaʋ ŋ́gʋ́ kɩñalɩɣnɩ lakasɩ nzɩ́ sɩɩwazɩɣ pʋyʋ yɔ ɖa-taa se ɖɩpɩzɩ ɖɩla Ɛsɔ wezuu tʋ tʋmɩyɛ.

Krɩstʋ calɩm wɩlɩɣnɩ ɖa nɛ Ɛsɔ ɖɛ-ɛgbaɣdɩyɛ

¹⁵ Pʋ-yɔɔ Krɩstʋ kɛ ceyiyu nɔɔ haʋ kɩfam mbʋ́ pʋwɛ Ɛsɔ nɛ ɛyáa pɛ-hɛkʋ taa yɔ pɩ-taa. Ɛlabɩ ḿbʋ́ se mbá Ɛsɔ ya-wɛ se pɛkɛ ɛ-ñɩma yɔ, papɩzɩ pehiɣ ñɩm maatɛŋ mbʋ́ ɛɖʋwa se ɛhaɣ-wɛ yɔ. Krɩstʋ ɛnʋ, ɛ-sɩm yɔɔ pɩtɩŋnaa nɛ pehiɣ-pʋ. Ḿbʋ́ ɖɔɖɔ lɩzɩnɩ-wɛ kɩwɛɛkɩm mbʋ́ paalabɩ alɩwaatʋ ndʋ́ paawɛ kajalaɣ nɔɔ haʋ paɣtʋ tɛɛ yɔ pi-nesi taa.

¹⁶ Yee nɔɔyʋ ɛɖʋwa se ñakaɣnɩ kpaɣʋ ɛ-ñɩm ɛ-sɩm wayɩ yɔ, pʋmʋnaa se ŋna siŋŋ se ɛsɩba nɛ pʋcɔ.

¹⁷ Toovenim lɛ, mbʋ́ ɛɖʋwa yɔ, pɩfɛyɩ wazaɣ alɩwaatʋ ndʋ́ ɛwɛnɩ ɛ-ɛsɛ yɔ. Ɛlɛ́, ɛ-sɩm wayɩ pʋwɛɣ wazaɣ.

¹⁸ Ḿbʋ́ ɖɔɖɔ pʋwɛɛ: pʋwɛɛ se palaa nɛ pɛkpɛdɩ calɩm nɛ pʋcɔ kajalaɣ nɔɔ haʋ maɣmaɣ wɛɛ wazaɣ.

¹⁹ Alɩwaatʋ ńdʋ́ lɛ, Mooyiizi calɩ kalʋʋ paɣtʋ tɩŋa payɩ ɛyáa tɩŋa ɛsɩndaa ɛzɩ paɖʋʋ tɩ-taa yɔ. Nabʋlɛ ɖeɖe lɛ, ɛkpaɣ neɣna nɛ tuluŋ pa-calɩm nɛ lɩm nɛ esidi. Ɛkpaɣ ɖɔɖɔ kpɛm kɩsɛmɩm nɛ ñɩyʋʋ ŋgʋ́ payaɣ se Iizoopu yɔ nɛ eliɣ nɛ ɛmɩzɩɣ paɣtʋ takayaɣ nɛ ɛyáa tɩŋa pɔ-yɔɔ.

²⁰ Ɛmɩzaa lɛ, ɛtɔ se: «Calɩm pʋnɛ pɩwɩlɩɣnɩ nɔɔ haʋ mbʋ́ Ɛsɔ ɖʋ mɩ nɛ ɩ mɩ-hɛkʋ taa se ɩɖɔ pʋ-yɔɔ yɔ.»

²¹ Đɔɖɔ lɛ, ɛmɩzɩ Ɛsɔ kɩɖanɖʋʋ nɛ wondu ndʋ́ tɩtɩŋa payɩ palakɩnɩ tʋmɩyɛ alɩwaatʋ ndʋ́ poluŋuu ɛ-tɛɛ yɔ pɔ-yɔɔ calɩm.

²² Paɖʋ paɣtʋ taa se calɩm ñalɩɣ wondu sakɩyɛ nɛ tɩwɛɛ cɩɖɩcɩɖɩ. Calɩm ɛtɛkpɛdɩ yɔ, kpeɣu ɛɛwɛɣ.

Krɩstʋ la ɛ-tɩ Ɛsɔ kpaagbaa laʋ

²³ Yee ḿbʋ́, ḿbʋ́ pʋwɛɛ se pañalɩ mbʋ́ pɩwɩlɩɣ ɛzɩma mbʋ́ pɩlakɩ ɛsɔdaa yɔ nɛ pʋwɛɛ cɩɖɩcɩɖɩ. Ɛlɛ́, mbʋ́ pʋwɛ ɛsɔdaa yɔ, pʋpɔzʋʋ-pʋ kɩlaŋ weyi ɩkɩlɩ ḿbʋ́ yɔ.

²⁴ Mbʋ́ pʋyɔɔ yɔ, Krɩstʋ tasʋʋ kɩɖanɖʋʋ ŋgʋ́ ɛyáa siɣaa yɔ kɩ-tɛɛ. Ŋ́gʋ́ lɛ ɛsɔdaa ñɩŋgʋ lɛzʋʋ. Ɛlɛ́, ɛkpa ɛsɔdaa maɣmaɣ se ewolo Ɛsɔ cɔlɔ lɛɛlɛɛyɔ nɛ ɖɔ-nɔɔ.

²⁵ Ɛtasʋʋ kɩ-tɛɛ se ɛlaa ɛ-tɩ tam sakɩyɛ ɛzɩ cɔjɔnaa ñʋʋdʋ kpɛndʋʋnɩ kpɩnɛ calɩm paa pɩnaɣ ŋ́gá nɛ ɛsʋʋ yɔ.

²⁶ Yee ḿbʋ́ pɩɩwɛɛ yɔ, ɖooo ɛzɩ palabʋ kedeŋa yɔ, Krɩstʋ kalabɩ kʋñɔŋ tam sakɩyɛ. Toovenim lɛ, lɛɛlɛɛyɔ ɛlɩ kpaagbaa lɩʋ kɛtɛzaɣ alɩwaatʋ tʋnɛ tɩ-taa se ɛha ɛ-tɩ nɛ palaa-ɩ nɛ Ɛsɔ hɛzɩ ɛyáa kɩwɛɛkɩm.

²⁷ Pʋwɛɛ se paa weyi ɛsɩ tam kʋɖʋm koŋ nɛ pʋwayɩ lɛ, Ɛsɔ hʋʋnɩ-ɩ tɔm.

²⁸ Ḿbʋ́ ɖɔɖɔ Krɩstʋ ha ɛ-tɩ kpaagbaa haʋ se palaa-ɩ nɛ Ɛsɔ kpeɣ ɛyáa sakɩyɛ pa-kɩwɛɛkɩm. Pʋ-yɔɔ lɛ, ɛkɔŋʋʋ nabʋlɛ ɖeɖe yɔ, kɩwɛɛkɩm tɔm ɛɛtasɩɣ wɛʋ. Ɛlɛ́, ɛkɔŋ se ɛya mbá paɖaŋ-ɩ kpam yɔ pa-ñʋʋ.