Ebree 8 - New Testament

Yesu kɛ cɔjɔ sɔsɔ keekee

¹ Tɔm ndʋ́ meheyiɣ-mɩ yɔ, tɩ-taa ndʋ́ tɩkɩlɩ wazaɣ yɔ lɛ se: ɖɩwɛnɩ cɔjɔ sɔsɔ nɔɔyʋ. Ɛcaɣ Ɛsɔ Đoŋ Tɩŋa Tʋ kewiyaɣ kpelaɣ cɔlɔ lone kɩbanɖɛ taa ɛsɔdaa.

² Ɛnʋ lɛ cɔjɔ sɔsɔ weyi ɛlakɩ tʋmɩyɛ ɖenɖe Ɛsɔ wɛɛ yɔ. Lone ńɖɩ́, pɩtɛkɛ nɔɔyʋ labɩnɩ-ɖɩ ɛzɩ paasiɣu kɩɖanɖʋʋ Mooyiizi alɩwaatʋ taa yɔ. Ɛlɛ́, Kɩpaɣlʋ labɩnɩ-ɖɩ, ńɖɩ́ lɛ laŋaɣ siŋŋ.

³ Paa cɔjɔ sɔsɔ weyi lɛ, pasɩ-ɩ se ewoni Ɛsɔ haɖɛ nɛ kpɩna wena palaɣ Ɛsɔ ɛnʋ yɔ. Pʋ-yɔɔ lɛ, pʋwɛɛ se ɖɔ-cɔjɔ sɔsɔ ɖɔɖɔ ehiɣ nabʋyʋ nɛ ewoni ɛha-ɩ.

⁴ Ŋgʋ́, yee ɛɛwɛ kedeŋa yɔɔ yɔ, ɛtaatɩɩkɛʋ cɔjɔ maɣmaɣ nɛ pʋcɔ. Mbʋ́ pʋyɔɔ yɔ, cɔjɔnaa lɛlaa wɛɛ nɛ powokini Ɛsɔ haɖɛ ɛzɩ paɖʋʋ paɣtʋ taa yɔ.

⁵ Tʋmɩyɛ nɖɩ́ cɔjɔnaa ḿbá palakɩ yɔ, ɖɩwɛ ɛzɩ mbʋ́ pʋwɛ ɛsɔdaa yɔ pɩ-kɩlɛmʋʋ yɔ. Palakaɣ ɛzɩ Ɛsɔ keheyuu Mooyiizi alɩwaatʋ ndʋ́ ɛcaɣaɣ se esiɣ-i kɩɖanɖʋʋ yɔ. Eeheyi-i se: «Cɔnɩ ŋna, la pɩtɩŋa payɩ ɛzɩ mawɩlʋʋ-ŋ pʋʋ yɔɔ yɔ.»

⁶ Ɛlɛ́ lɛɛlɛɛyɔ, paɖʋ Krɩstʋ tʋmɩyɛ nɖɩ́ ɖɩkɩlɩ pa-ñɩna yɔ. Mbʋ́ pʋyɔɔ yɔ, ɛnʋ lɛ ceyiyu nɔɔ haʋ mbʋ́ pɩkɩlɩ ɖeu nɛ pʋwɛɛ Ɛsɔ nɛ ɛyáa pɛ-hɛkʋ taa yɔ pɩ-taa. Halɩ mbʋ́ Ɛsɔ ɖʋwa se ɛlakɩ nɔɔ haʋ ḿbʋ́ pɩ-taa yɔ, pɩkɩlɩ ɖeu.

Ɛsɔ tɔm se ɛ nɛ ɛyáa pɔkɔŋ ɖʋʋ ɛgbaɣdɩyɛ kɩfaɖɛ

⁷ Toovenim lɛ, yee kajalaɣ nɔɔ haʋ ɛɛpɩzaɣ se pɩla pɩtɩŋa yɔ, pɩtaapɔzɩ se patasɩ ñɩnʋʋ naalɛ ñɩmbʋ nɛ pɛlɛɣzɩnɩ-pʋ.

⁸ Alɩwaatʋ ndʋ́ Ɛsɔ kalaɣ ɛ-ñɩma yɔ ɛtɔm se: «Ma Kɩpaɣlʋ, mɔntɔŋ se kɩyakɩŋ nɩɩyɩ kaɣ kɔm. Ɩ-taa lɛ, mahaɣ nɔɔ kɩfalaɣ Izrɛɛlɩ ñɩma nɛ Yuda ñɩma.

⁹ Pɩɩwɛɣ ɛzɩ ŋgá maaha pɔ-cɔzɔnaa, kɩyakʋ ŋgʋ́ mɔnɖɔkɩ pe-nesi taa nɛ malɩzɩ-wɛ nɛ Ejiptɩ ɛjaɖɛ taa yɔ. Kɩpaɣlʋ tasɩ yɔɔdʋʋ se: Mbʋ́ pʋyɔɔ yɔ, pa-maɣmaɣ pɔtɔɖɔ mɔ-nɔɔ haʋ ḿbʋ́ pʋ-yɔɔ. Pʋ-yɔɔ mantamaɣzɩ pɔ-yɔɔ.

¹⁰ Kɩpaɣlʋ tasɩ yɔɔdʋʋ se: Ɩɩnaɣ nɔɔ haʋ mbʋ́ mɔnkɔŋ ɖʋʋ ma nɛ Izrɛɛlɩ ñɩma ɖɛ-hɛkʋ taa kɩyakɩŋ ɩnʋ ɩ-wayɩ yɔ. Manɖʋʋ man-paɣtʋ pa-lɩmaɣza taa. Mamaɣ-tʋ ɖɔɖɔ pa-laŋa taa. Mɛnkɛɣ pɛ-Ɛsɔ nɛ ḿbá kɛ ma-ñɩma.

¹¹ Pʋtɔpɔzɩ se pa-taa nɔɔyʋ ɛtasɩ wɩlʋʋ weyi ɛwɛ ɛ-cɔlɔ yɔ yaa ɛ-taabalʋ. Pɩfɛyɩ se patasɩ-ɩ heyuu se: ‹Ña, tɩlɩ Kɩpaɣlʋ!› Toovenim lɛ, pasɩŋ-m patɩŋa payɩ, kpaɣ piya cikpesi nɛ puwolo pɩsɩɩnɩ sɔsaa.

¹² Mbʋ́ pʋyɔɔ yɔ, mɔnkɔŋ-wɛ kpeɣu pa-kɩwɛɛkɩm. Maatasɩɣ tɔzʋʋ pa-kɩwɛɛkɩm yɔɔ kaʋ.»

¹³ Ɛsɔ yɔɔdʋʋ nɔɔ haʋ kɩfam tɔm ḿbʋ́ yɔ, pɩwɩlɩɣ se kajalaɣ ñɩmbʋ pɩnaa. Ŋgʋ́, mbʋ́ pɩpɩnaa nɛ pɩkpadɩyɩ yɔ, pɩwɩzɩ mʋʋ́ʋ.