Ebree 7 - New Testament

Mɛlkisedɛɛkɩ kɛ cɔjɔ, ɛlɛ́ ɛwɛ ndɩ

¹ Mɛlkisedɛɛkɩ ɛnʋ, ɛɛkɛ Saalɛm wiyaʋ nɛ ɛtɛ ɛkɛ Ɛsɔ Caabiyuu cɔjɔ. Abraham lɩnɩ awiya naayɛ ɖɩwaɖɛ nɛ ɛkɔŋ lɛ, Mɛlkisedɛɛkɩ katɩ-ɩ nɛ ɛwazɩ Abraham ɛnʋ ɛ-yɔɔ.

² Peeɖe ɛ́lɛ́ tayɩ ɛ-ñɩm tɩŋa tam hiu nɛ ɛcɛlɩ-ɩ pʋ-hɔɔlʋʋ kʋɖʋmʋʋ. Mɛlkisedɛɛkɩ tɔbʋʋ se: «Toovenim wiyaʋ.» Đɔɖɔ lɛ, ɛkɛ Saalɛm wiyaʋ. Pʋbʋ tɔbʋʋ se: «Laŋhɛzɩyɛ wiyaʋ.»

³ Ɛfɛyɩnɩ caa yaa ɖoo yaa liɖe. Pɔtɔyɔɔdɩ ɛ-lʋlʋʋ yaa ɛ-sɩm tɔm ɖoli. Ɛnɩɣzɩnɩ Ɛsɔ Pɩyalʋ nɛ ɛkɛ cɔjɔ tam.

⁴ Ɩcɔnɩ ɩna ɛzɩma mbʋ́ ɛkɩlaa kpem yɔ! Đɔ-cɔzɔ Abraham maɣmaɣ hiɣ ñɩm mbʋ́ you taa yɔ, ɛtayɩ-pʋ tam hiu nɛ ɛkpaɣ pʋ-hɔɔlʋʋ kʋɖʋmʋʋ nɛ ɛha-ɩ.

⁵ Leevi liɖe taa ñɩma mbá pɛkɛɣ cɔjɔnaa yɔ, Ɛsɔ kaɖʋ-wɛ paɣtʋ natʋyʋ. Ńdʋ́ lɛ se pɔpɔzɩ Izrɛɛlɩ ñɩma lɛlaa se patayɩ pa-ñɩm tam hiu nɛ pakpaɣ pʋ-hɔɔlʋʋ kʋɖʋmʋʋ nɛ pɛcɛlɩ-wɛ. Palakaɣ ḿbʋ́, ŋgʋ́ paba ɖɔɖɔ kɛ Abraham liɖe taa ñɩma.

⁶ Mɛlkisedɛɛkɩ ɛnʋ, ɛtaakɛ Leevi liɖe taa tʋ. Paa ḿbʋ́ yɔ, Abraham tayɩ ɛ-ñɩm tam hiu nɛ ɛkpaɣ pʋ-hɔɔlʋʋ kʋɖʋmʋʋ nɛ ɛcɛlɩ-ɩ nɛ ɛ́lɛ́ wazɩ ɛ-yɔɔ. Ŋgʋ́ Abraham ɛnʋ, Ɛsɔ kɛtɛm ɖʋʋ se ɛlakɩ-ɩ pʋyʋ.

⁷ Ŋgʋ́, paa weyi ɛsɩm ḿbʋ́ se sɔsɔ wazɩɣnɩ pɩɣa yɔɔ.

⁸ Leevi piya mbá Izrɛɛlɩ ñɩma tayɩɣ pa-ñɩm tam hiu nɛ pɛcɛlɩɣ-wɛ pʋ-hɔɔlʋʋ kʋɖʋmʋʋ yɔ, pasɩkɩ ɖɔɖɔ ɛzɩ ɛyáa lɛlaa yɔ. Piyele Mɛlkisedɛɛkɩ yɔ, ɛ-tɔm pama Ɛsɔtɔm Takayaɣ taa se ɛwɛ wezuu.

⁹ Ɖɔɖɔ lɛ, papɩzɩɣ pɔtɔ se Abraham katayʋʋ ɛ-ñɩm nɛ ɛha Mɛlkisedɛɛkɩ yɔ, Leevi weyi e-liɖe taa ñɩma Izrɛɛlɩ ñɩma tayɩɣ pa-ñɩm nɛ pɛcɛlɩɣ-wɛ yɔ ɛ́lɛ́ kahawa ɖɔɖɔ.

¹⁰ Mbʋ́ pʋyɔɔ yɔ, paa pataalʋlɩdɩ-ɩ yɔ, ɛɛwɛ Abraham calɩm taa alɩwaatʋ ndʋ́ Mɛlkisedɛɛkɩ katɩ-ɩ yɔ.

¹¹ Ɛsɔ ɖʋ Izrɛɛlɩ ñɩma paɣtʋ se pala pɩtɩŋa ɛzɩ pʋmʋnaʋ yɔ. Ŋgʋ́, yee Leevi liɖe taa ñɩma ɛɛlaba ḿbʋ́ yɔ, pɩtaapɔzɩ ɖɔɖɔ se cɔjɔ nɔɔyʋ ɛtasɩ lɩʋ ɛzɩ Mɛlkisedɛɛkɩ yɔ nɛ ɛtalɩɩnɩ Aarɔɔnɩ liɖe taa.

¹² Mbʋ́ pʋyɔɔ yɔ, yee pɛlɛɣzɩ cɔjɔnaa liɖe yɔ, pʋwɛɛ se pɛlɛɣzɩ ɖɔɖɔ paɣtʋ.

¹³ Đa-Kɩpaɣlʋ weyi pɔyɔɔdʋʋ ɛ-tɔm cɩnɛ yɔ, e-cejewiye kɛwɛnɩ ndɩ. Đɩ-taa tʋ nɔɔyʋ taalakɩ cɔjɔtʋ tʋmɩyɛ tɩlaaɖɩnaa ɖɩhɔɖɛ kaʋ.

¹⁴ Mbʋ́ pʋyɔɔ yɔ, ɖɩsɩm ɖeu se ɖa-Kɩpaɣlʋ kɛ Yuda liɖe taa tʋ. Mooyiizi tɔyɔɔdɩ pe-cejewiye taa cɔjɔnaa tɔm natʋyʋ alɩwaatʋ ndʋ́ ɛyɔɔdaɣ cɔjɔnaa tɔm yɔ.

Yesu kɛ cɔjɔ ɛzɩ Mɛlkisedɛɛkɩ yɔ

¹⁵ Lɛɛlɛɛyɔ ɖɩnɩɣ tɔm ndʋ́ pɔyɔɔdaa yɔ tɩ-taa camɩyɛ: ńdʋ́ lɛ se cɔjɔ lɛlʋ weyi ɛnɩɣzɩnɩ Mɛlkisedɛɛkɩ yɔ, ɛlɩwa.

¹⁶ Pɩtɛkɛ paɣtʋ ndʋ́ ɛyáa ɖʋwa yɔ ńdʋ́ hanɩ-ɩ waɖɛ se ɛpɩsɩ cɔjɔ. Ɛlɛ́, wezuu ŋgʋ́ kɩfɛyɩ tɩnaɣ yɔ, ku-ɖoŋ taa ɛkɛ ḿbʋ́.

¹⁷ Mbʋ́ pʋyɔɔ yɔ, pama ɛ-tɔm Ɛsɔtɔm Takayaɣ taa se: «Ŋkɛɣ cɔjɔ tam ɛzɩ Mɛlkisedɛɛkɩ yɔ.»

¹⁸ Ḿbʋ́ peyebi paɣtʋ kɩbɩndʋ se tɩfɛyɩ ɖoŋ, tɩɩwazɩɣ pʋyʋ.

¹⁹ Toovenim lɛ, Mooyiizi paɣtʋ teɖezi nabʋyʋ Ɛsɔ ɛsɩndaa. Ɛlɛ́, Ɛsɔ lɛɣzɩ tu-lone taa liu taʋ mbʋ́ pɩkɩlɩ-tʋ ɖeu siŋŋ yɔ. Ḿbʋ́ haɣnɩ-ɖʋ waɖɛ se ɖɩñɔtɩnɩ-ɩ.

²⁰ Yesu cɔjɔtʋ wɛ ndɩ nɛ lɛlaa ñɩndʋ. Mbʋ́ pʋyɔɔ yɔ, Ɛsɔ ɖuwaa nɛ pʋcɔ ɛkɛ cɔjɔ. Piyele lɛlaa yɔ, etoɖuu.

²¹ Yesu tɔm taa lɛ, ɛɛtɔm se: «Ma Kɩpaɣlʋ, monɖuwaa se: ‹ŋkɛɣ cɔjɔ tam.› Maalɛɣzɩɣ-pʋ kaʋ.»

²² Pʋ-yɔɔ Yesu pɩsɩ nɔɔ haʋ mbʋ́ pɩkɩlɩ ɖeu yɔ pʋ-yʋsaɣ.

²³ Đɔɖɔ lɛ, cɔjɔnaa lɛlaa ñaaɖɔ sakɩyɛ, mbʋ́ pʋyɔɔ yɔ, sɩm tahaɣ-wɛ waɖɛ se pala pa-tʋmɩyɛ tam.

²⁴ Ɛlɛ́, Yesu ñɛwɛ wezuu tam. Pɩɩpɔzʋʋ se pɛcɛlɩ nɔɔyʋ ɛ-cɔjɔtʋ tʋmɩyɛ.

²⁵ Pʋ-yɔɔ ɛpɩzɩɣ ɛya mbá patɩŋɩɣnɩ ɛ-yɔɔ nɛ pañɩnɩɣ Ɛsɔ yɔ pa-ñʋʋ kpem. Mbʋ́ pʋyɔɔ yɔ, ɛwɛ wezuu tam nɛ etendiɣ Ɛsɔ pɔ-yɔɔ.

²⁶ Toovenim lɛ, Yesu lɛ cɔjɔ sɔsɔ weyi pʋmʋnaa se ɖɩwɛna yɔ: ɛwɛ cɩɖɩcɩɖɩ, paanaɣ ndʋ́ paawanɩ-ɩ yɔ, ɛtala kɩwɛɛkɩm nabʋyʋ. Ɛ nɛ kɩwɛɛkɩm laɖaa pɛfɛyɩ ɖoli kʋɖʋm, ɛwɛ ɖooo ɛsɔdaa.

²⁷ Ɛfɛyɩ ɛzɩ cɔjɔnaa ñʋndɩnaa lɛlaa yɔ. Mbʋ́ pʋyɔɔ yɔ, pʋpɔzʋʋ se palaɣ Ɛsɔ kɩyakɩŋ tɩŋa. Kajalaɣ lɛ, palaɣ pa-maɣmaɣ pa-kɩwɛɛkɩm yɔɔ. Pʋwayɩ lɛ, palaa ɛyáa tɩŋa ñɩmbʋ yɔɔ. Piyele Yesu lɛ, tam kʋɖʋm koŋ ɛla alɩwaatʋ ndʋ́ ɛkpaɣ ɛ-maɣmaɣ ɛ-tɩ nɛ ɛha ɛyáa kɩwɛɛkɩm yɔɔ yɔ.

²⁸ Mbá Mooyiizi paɣtʋ kapɩsɩ-wɛ cɔjɔnaa ñʋndɩnaa yɔ, paawɛnɩ ɛjandʋ ɖɔɖɔ ɛzɩ ɛyáa lɛlaa yɔ. Ɛlɛ́, ɖuúu mbʋ́ Ɛsɔ ñaaɖuúu paɣtʋ wayɩ yɔ, pɩpɩsɩ ɛ-Pɩyalʋ kʋtʋʋzʋ cɔjɔnaa ñʋʋdʋ tam.