Ebree 6 - New Testament

¹ Pʋ-yɔɔ lɛ, ɖɩɖɛɛnɩ ɛsɩndaa nɛ ɖɩkpɛlɩkɩ Krɩstʋ tɔm ɛzɩ mbá papɩ lidaʋ wɛnaʋ taa yɔ. Đɩtaawɛɛ ɖɩnɩɣnɩ ndʋ́ pɛkpɛlɩkɩ-ɖʋ kajalaɣ taa yɔ ti-ɖeke. Pɩtatasɩ pɔzʋʋ se pɛkpɛlɩkɩ-mɩ natʋyʋ ɛzɩ: tʋma wena aawazɩɣ pʋyʋ yɔ a-yebu nɛ Ɛsɔ yɔɔ lidaʋ wɛnaʋ

² nɛ lɩm sɔʋ sɔnzɩ ndɩ ndɩ labʋ nɛ ɛyáa yɔɔ nesi tɩnʋʋ nɛ sɩɖaa fem nɛ tɔm hʋʋ maatɛŋ, pɔ-tɔm.

³ Đɩɖɛɛnɩ ɛsɩndaa! Yee Ɛsɔ ɛha-ɖʋ waɖɛ yɔ, ḿbʋ́ ɖɩlakɩ.

⁴ Nabɛyɛ wɛɛ, Ɛsɔ ñalɩmɩyɛ kɛtɛm pɔ-yɔɔ ñalʋʋ nɛ paɖɩŋ ɛsɔdaa kʋjɔʋ nɛ Fezuu Kiɖeɖeu wɛɛ pɔ-cɔlɔ

⁵ nɛ pana se Ɛsɔtɔm wɛ ɖeu nɛ panɩɩ kedeŋa ɖoŋ weyi ɛkaɣ kɔm yɔ ɛ-taŋ.

⁶ Ɛlɛ́, paha Ɛsɔ siɣ́ye. Paakaɣ patasɩ tɩlʋʋ pa-kɩwɛɛkɩm nɛ pɛlɛɣzɩ wɛtʋ. Mbʋ́ pʋyɔɔ yɔ, paɖaɣnɩɣ Ɛsɔ Pɩyalʋ kam kaamaŋkaɣ yɔɔ nɛ patʋʋ-ɩ ɛyáa ɛsɩndaa.

⁷ Toovenim lɛ, yee tɛʋ ɛnɩ hayɩm nabʋyʋ taa camɩyɛ nɛ tɔɔnaɣ la yɔ, pʋwazɩ mbá pɔ-yɔɔ pahayɩ-kɛ yɔ. Ɛsɔ wazɩɣ hayɩm ḿbʋ́ pʋ-yɔɔ.

⁸ Ɛlɛ́, yee kpaŋsɔɔ nɛ sɔɔ tɩŋ pañɩɣnɩ pɩ-taa yɔ, pɩɩwazɩɣ pʋyʋ. Ɛsɔ tɛŋnɩ-pʋ kpalʋʋ wɩlʋʋ nɛ paɖʋ-pʋ miŋ.

⁹ Mɛ-ɛgbaɣdɩnaa! Paa ɖɩyɔɔdɩ ḿbʋ́ yɔ, ɖɩtaɣ-mɩ liu siŋŋ se ɩwɛ nʋmɔʋ kɩbaŋgʋ taa, ŋ́gʋ́ lɛ ñʋʋ yabʋ nʋmɔʋ.

¹⁰ Ɛsɔ lɛ weyi ɛhʋʋ tɔm nɛ toovenim yɔ. Ɛɛsɔʋ mɩ-camɩyɛ lakasɩ yɔɔ. Ɛɛsɔʋ ɖɔɖɔ sɔɔlɩm mbʋ́ ɩsɔɔlɩ-ɩ nɛ ɩtɩŋɩɣnɩ pʋ-yɔɔ nɛ ɩsɩŋnɩ ɛ-ñɩma yɔ pʋyɔɔ. Ḿbʋ́ ɖɔɖɔ ɩwɛɛ ɩlakɩ lɛɛlɛɛyɔ.

¹¹ Ɛlɛ́, ɖe-liu wɛɛ se paa mɩ-taa weyi lɛ, ɛñaɣ pana ḿbʋ́ siŋŋ nɛ pʋkɔɔ pɩsɩɩnɩ ɛ-kɛtɛzaɣ kɩyakʋ wiye. Yee ɩlabɩ ḿbʋ́ yɔ, ihikiɣ mbʋ́ ɩɖaŋaa yɔ.

¹² Pʋbʋ, ɩɩpɩsɩɣ fendinaa. Ɛlɛ́, ɩlakɩ ɛzɩ mbá pɛwɛnɩ lidaʋ Ɛsɔ yɔɔ nɛ pɔɖɔkʋʋ pa-tɩ se pehiɣ kʋjɔʋ ŋgʋ́ ɛ́lɛ́ ɖʋwa se ɛlakɩ-wɛ yɔ.

Mbʋ́ Ɛsɔ ɖʋwa se ɛlakɩ yɔ, ɛɛlɛɣzɩɣ-pʋ

¹³ Nɔɔyʋ takɩlɩ Ɛsɔ se eeɖuuni pʋdʋ. Pʋ-yɔɔ eɖuuni ɛ-tɩ alɩwaatʋ ndʋ́ ɛɖʋwa se ɛlakɩ Abraham pʋyʋ yɔ

¹⁴ nɛ ɛtɔ se: «Toovenim lɛ, mɔnkɔŋ ñɔ-yɔɔ wazʋʋ nɛ meyele ñe-liɖe taa ñɩma huúú siŋŋ.»

¹⁵ Ḿbʋ́ yebina nɛ Abraham ɖɔkɩ ɛ-tɩ nɛ ɛwɛɛ ɖaŋʋʋ yɔɔ nɛ ɛkɔɔ ɛmʋ mbʋ́ Ɛsɔ kaɖʋwa se ɛlakɩ-ɩ yɔ.

¹⁶ Ɛyáa ɖukuni weyi ɛkɩlɩ-wɛ yɔ. Đuuu ḿbʋ́ pɩwɩlɩɣnɩ se pɔyɔɔdɩ toovenim nɛ pɩfɛyɩ se nɔɔyʋ ɛkpɛzɩ.

¹⁷ Ɛsɔ liu ñaawɛɛ se ɛwɩlɩ ɛ-ɛyáa kaŋŋ se mbʋ́ ɛɖʋwa yɔ, ɛɛlɛɣzɩ-pʋ kaʋ. Pʋ-yɔɔ eɖuuni ɛ-tɩ nɛ pɩtasɩnɩ mbʋ́ ɛɖʋwa se ɛlakɩ yɔ.

¹⁸ Paapɩzɩɣ pɛlɛɣzɩ lakasɩ ńzɩ́ sɩ-naalɛ kaʋ. Ɛsɔ ɛɛpɩzɩɣ ɛcɛtɩnɩ sɩ-taa. Pʋ-yɔɔ lɛ, mbá ɖa ɖihiɣ ɖɩcɔzɩyɛ Ɛsɔ cɔlɔ yɔ, pɩlakɩ-ɖʋ hʋnʋm siŋŋ se ɖɩtaa liu mbʋ́ ɛɖʋwa se ɛhaɣ-ɖʋ yɔ.

¹⁹ Liu taʋ ḿbʋ́ pʋɖɔkɩnɩ ɖa-ciyamnaa kpam. Ḿbʋ́ sʋʋnɩ pɩsaʋ ŋgʋ́ pakaɣ lone kaɖɛ ñɩnɖɛ taa ɛsɔdaa yɔ kʋ-wayɩ.

²⁰ Đɔ-yɔɔ Yesu ɖɛ nɔɔ nɛ ɛsʋʋ ɖɩ-taa nɛ ɛpɩsɩ cɔjɔnaa ñʋʋdʋ tam ɛzɩ Mɛlkisedɛɛkɩ yɔ.