Ebree 5 - New Testament

¹ Paa cɔjɔnaa ñʋʋdʋ weyi lɛ, ɛyáa hɛkʋ taa palɩzɩ-ɩ. Ɛ-tʋmɩyɛ lɛ se ewolo Ɛsɔ ɛsɩndaa nɛ ɛlɔ nɔɔ nɛ ɛcɛlɩ-ɩ haɖɛ ndɩ ndɩ nɖɩ́ pahawa yɔ nɛ ɛlaa-ɩ kɩlaŋ nɛ ɛ́lɛ́ kpeɣ-wɛ pa-kɩwɛɛkɩm.

² Ɛpɩzɩɣ ɛnɩɩ mbá paasɩŋ nɛ mbá pelebi nʋmɔʋ yɔ pɔ-tɔm taa. Mbʋ́ pʋyɔɔ yɔ, ɛ-maɣmaɣ ɛwɛnɩ ɛjandʋ ɖɔɖɔ.

³ Ɛjandʋ ńdʋ́ tɩ-yɔɔ pʋwɛɛ se ɛlaa pʋyʋ ɛ-maɣmaɣ ɛ-kɩwɛɛkɩm yɔɔ nɛ ɛlaa ɖɔɖɔ lɛlaa ñɩmbʋ yɔɔ.

⁴ Nɔɔyʋ ɛɛɖʋʋ ɛ-tɩ hɩɖɛ se ɛkɛ cɔjɔnaa ñʋʋdʋ. Ɛlɛ́, Ɛsɔ lɩzɩɣnɩ-ɩ ɛzɩ ɛlɩzʋʋ Aarɔɔnɩ yɔ.

⁵ Ḿbʋ́ ɖɔɖɔ pʋwɛnɩ Krɩstʋ. Pɩtɛkɛ ɛ-maɣmaɣ ɛɖʋnɩ ɛ-tɩ hɩɖɛ se ɛkɛɣ cɔjɔnaa ñʋʋdʋ. Ɛlɛ́, Ɛsɔ lɩzɩnɩ-ɩ alɩwaatʋ ndʋ́ eheyi-i se: «Ña lɛ man-Pɩyalʋ. Pɩkpaɣʋnɩ sɔnɔ yɔ, ma lɛ ña-Caa.»

⁶ Ɛyɔɔdɩ ɖɔɖɔ ɖoli nɔɔyʋ se: «Ŋkɛɣ cɔjɔ tam ɛzɩ Mɛlkisedɛɛkɩ yɔ.»

⁷ Yesu kɛwɛ kedeŋa yɔɔ cɩnɛ lɛ, ɛsɛɣaɣ Ɛsɔ nɛ kubusi nɛ ɛsɩtɛɣlɩm. Etendaɣ-ɩ, mbʋ́ pʋyɔɔ yɔ, e-ɖeke ɛpɩzɩɣnɩ ɛlɩzɩ-ɩ sɩm taa. Ɛ-ñamtʋ siŋŋ yɔɔ lɛ, ɛ́lɛ́ nɩɩnɩ-ɩ.

⁸ Paa ɛkɛ Ɛsɔ Pɩyalʋ yɔ, pɩtɩŋnɩ kʋñɔŋ ŋgʋ́ ɛtɔwaa yɔ kʋ-yɔɔ nɛ ɛkpɛlɩkɩ ñamtʋ.

⁹ Ɛsɔ yeba nɛ ɛtalɩ ɖenɖe ɛñɩnaɣnɩ-ɩ yɔ. Pʋ-yɔɔ ɛpɩsɩ mbá patɩŋa pañaŋ Ɛsɔ ɛnʋ yɔ pa-ñʋʋ yaɖʋ.

¹⁰ Ɛnʋ lɩzɩnɩ-ɩ se ɛkɛ cɔjɔnaa ñʋʋdʋ ɛzɩ Mɛlkisedɛɛkɩ yɔ.

Kɩdɛkɛdɩm mbʋ́ pʋwɛ lidaʋ lɔʋ taa yɔ

¹¹ Đɩwɛnɩ tɔm sakɩyɛ se ɖɩyɔɔdʋʋ Mɛlkisedɛɛkɩ ɛnʋ ɛ-yɔɔ. Ɛlɛ́, pʋwɛ-ɖʋ kaɖɛ se ɖɩlɩzɩ-mɩ tɩ-tɔbʋʋ. Mbʋ́ pʋyɔɔ yɔ, ɩpɩsɩ mbá paanɩɣ lɔŋ yɔ.

¹² Ŋgʋ́, pɩtalʋʋ nɛ sɔnɔ yɔ, pɩɩwɛɛ se ɩkɛ wɩlɩyaa. Ɛlɛ́, pʋpɔzʋʋ se paɖaɣnɩ-mɩ wɩlʋʋ Ɛsɔtɔm kajalaɣ ñɩndʋ ndʋ́ tɩfɛyɩ kaɖɛ yɔ. Pʋ-yɔɔ lɛ, ɩwɛ ɛzɩ mbá pɩɩwɛɛ se pɔtɔɔ tɔɔnaɣ yuŋ ñɩŋga yɔ, ɛlɛ́, iyele ɩnɩɣnɩ hɩlɩm mʋzʋʋ.

¹³ Ŋgʋ́, weyi ɛmʋzʋʋ hɩlɩm yɔ, ɛkɛ pɩɣa. Ɛɛpɩzɩɣ ɛtɩlɩ kɩwɛɛkɩm yaa mbʋ́ pʋtʋʋzaa yɔ.

¹⁴ Sɔsaa lɛ, tɔɔnaɣ yuŋ ñɩŋga paba ñɔtɔkɩ. Mbʋ́ pʋyɔɔ yɔ, pɛkpɛlɩkaa nɛ patɩlɩ kɩbandʋ nɛ ɛzaɣ́tʋ.