Ebree 4 - New Testament

¹ Ɛsɔ tɛm ɖʋʋ se ɖɩpɩzɩɣ ɖɩsʋʋ ɖenɖe ɛñɔɔzɩ-ɖʋ ɖɩhɛzɩyɛ yɔ. Pʋ-yɔɔ lɛ, ɩkpa mɩ-tɩ nɛ pɩtaakɔɔ pɩla se pucoɖi mɩ-taa nɔɔyʋ se ɛɛsʋʋ peeɖe.

² Peheyi-ɖʋ Laŋhɛzɩyɛ Tɔm ɖɔɖɔ ɛzɩ paaheyuu mbá paawɛ lakʋ taa yɔ. Ɛlɛ́, tɔm ndʋ́ panɩwa yɔ, tɩtawazɩ-wɛ pʋyʋ, mbʋ́ pʋyɔɔ yɔ, mbá panɩ-tʋ yɔ, pataawɛnɩ lidaʋ tɩ-yɔɔ.

³ Mbá ɖa ɖɩwɛnɩ lidaʋ tɩ-yɔɔ yɔ, ɖɩsʋʋ hɛzʋʋ mbʋ́ Ɛsɔ yɔɔdɩ pʋ-tɔm yɔ pɩ-taa. Ɛtɔm se: «Man-pana kpawa nɛ monɖuúu se: ‹Toovenim lɛ, paakɔŋ sʋʋ ɛjaɖɛ nɖɩ́ mɔñɔɔzɩ-wɛ se powolo pɛhɛzɩ yɔ ɖɩ-taa kaʋ.› » Ɛsɔ kɔyɔɔdɩ tɔm ńdʋ́ ḿbʋ́, ŋgʋ́, ɛɛtɛm ɛ-tʋmɩyɛ labʋ ɖooo alɩwaatʋ ndʋ́ ɛɛlaba kedeŋa yɔ.

⁴ Mbʋ́ pʋyɔɔ yɔ, pama ɖoli nɔɔyʋ Ɛsɔtɔm Takayaɣ taa kɩyakʋ lʋbɛ ñɩŋgʋ tɔm se: «Ɛsɔ tɛm ɛ-tʋma tɩŋa payɩ lɛ, ɛhɛzɩ kɩyakʋ lʋbɛ ñɩŋgʋ wiye.»

⁵ Pama ɖɔɖɔ hɔɔlʋʋ ŋ́gʋ́ kɩ-taa se: «Toovenim lɛ, paakɔŋ sʋʋ ɛjaɖɛ nɖɩ́ mɔñɔɔzɩ-wɛ se powolo pɛhɛzɩ yɔ ɖɩ-taa kaʋ.»

⁶ Mbá pacalɩ Laŋhɛzɩyɛ Tɔm ńdʋ́ nɩʋ yɔ, patasʋʋ hɛzʋʋ ḿbʋ́ pɩ-taa, mbʋ́ pʋyɔɔ yɔ, pɛkɛ kaañamtʋ tɩnaa. Pʋ-yɔɔ lone ńɖɩ́ ɖɩwɛɛ se lɛlaa ɛsʋʋ.

⁷ Ḿbʋ́ labɩna nɛ Ɛsɔ ɖaɣnɩ ɖʋʋ kɩyakʋ lɛɛkʋ. Payaɣ-kʋ se: «Sɔnɔ.» Pʋkɔma pileɖi siŋŋ lɛ, ɛtɩŋnɩ wiyaʋ sɔsɔ Daaviidi yɔɔ nɛ ɛyɔɔdɩ ɛzɩ ɩtɛm nɩʋ yɔ. Ńdʋ́ lɛ se: «Yee ɩnɩ Ɛsɔ nɔɔ sɔnɔ sɔnɔ lɛ, ɩtaala laŋɩyɛ ɖoŋ.»

⁸ Mbʋ́ pʋyɔɔ yɔ, yee Yozuwee eewoni ɛyáa lone kɩhɛzɩyɛ ńɖɩ́ ɖɩ-taa yɔ, Ɛsɔ taatasɩ yɔɔdʋʋ kɩyakʋ lɛɛkʋ tɔm pʋwayɩ.

⁹ Pʋ-yɔɔ lɛ, hɛzʋʋ nabʋyʋ wɛɛ nɛ pɩɖaŋ Ɛsɔ ñɩma ɛzɩ Ɛsɔ hɛzʋʋ kɩyakʋ lʋbɛ ñɩŋgʋ wiye yɔ.

¹⁰ Weyi ɛsʋʋ hɛzʋʋ ḿbʋ́ pɩ-taa yɔ, ɛkɔŋ hɛzʋʋ. Ɛhɛzɩɣnɩ ɛ-tʋma ɖɔɖɔ ɛzɩ Ɛsɔ hɛzʋʋnɩ ɛ-ñɩma yɔ.

¹¹ Pʋ-yɔɔ lɛ, ɖikpedesi nɛ ɖɩsʋʋ hɛzʋʋ ḿbʋ́ pɩ-taa nɛ ɖa-taa nɔɔyʋ ɛtaakɔɔ ɛtɔlɩ se ɛlabɩ kaañamtʋ ɛzɩ ɖɔ-cɔzɔnaa yɔ.

¹² Mbʋ́ pʋyɔɔ yɔ, Ɛsɔtɔm wɛ wezuu nɛ tɩwɛɛ ɖoŋ ɖɔɖɔ. Tɩwɛ lɔŋ nɛ pɩkɩlɩ sɛsɩ nzɩ́ sɩwɛ lɔŋ cenje yɔ. Tɩsʋʋ ɛyʋ fɩŋ fɩŋ nɛ tɩtalɩ e-ciyam nɛ ɛ-kalɩzaɣ pa-ɖɩtanɛ nɛ tɩtayɩ-wɛ. Tɩtalɩɣ ɖɔɖɔ ɛ-mɔɔ nɛ a-taa num nɛ tɩtayɩ-wɛ. Ńdʋ́ tayɩɣnɩ ɖɔɖɔ ɛ-lɩmaɣza: kɩbana hɔɔlʋʋ nɛ kɩdɛkɛdɛɛ hɔɔlʋʋ.

¹³ Mbʋ́ pɩtɩŋa payɩ pʋwɛ kedeŋa yɔɔ yɔ, nabʋyʋ fɛyɩ Ɛsɔ mɛsaɣ tɛɛ. Pukuli pɩtɩŋa payɩ pʋ-yɔɔ nɛ pile ɛ-ɛsɩndaa nɛ ɛnaɣ-pʋ. Ɛnʋ pʋwɛɛ se ɖatɩŋa payɩ ɖiheyi mbʋ́ ɖɩlaba yɔ.

Ɛsɔ lɩzɩnɩ Yesu se ɛkɛ cɔjɔnaa ñʋndɩnaa taa sɔsɔ

¹⁴ Ɛsɔ Pɩyalʋ Yesu lɛ cɔjɔnaa ñʋndɩnaa taa sɔsɔ, ɛnʋ wobina Ɛsɔ cɔlɔ. Pʋ-yɔɔ lɛ, pʋwɛɛ se ɖɩɖɔkɩ lidaʋ ŋgʋ́ ɖɩwɛnɩ ɛ-yɔɔ nɛ ɖisusuu ɛyáa kʋ-tɔm yɔ nesi naalɛ kpam.

¹⁵ Mbʋ́ pʋyɔɔ yɔ, cɔjɔnaa ñʋndɩnaa taa sɔsɔ ɛnʋ, ɛtɛkɛ weyi ɛɛpɩzɩɣ se ɛsɩnɩ-ɖʋ ɖɛ-ɛjandʋ taa yɔ: pɩtakɩ-ɩ ɛzɩ ɖa yɔ pɩtɩŋa pɩ-taa. Ɛlɛ́, ɛtala kɩwɛɛkɩm nabʋyʋ.

¹⁶ Pʋ-yɔɔ lɛ, pʋwɛɛ se ɖɩñɔtɩnɩ Ɛsɔ kewiyaɣ kpelaɣ kaalɛyɩtʋ, kɔ-cɔlɔ lootiye wɛɛ. Đɩlabɩ ḿbʋ́ yɔ, ɛnaɣ ɖa-pʋtɔdɩyɛ nɛ ɛlabɩ-ɖʋ lootiye nɛ ɛsɩnɩ-ɖʋ alɩwaatʋ ndʋ́ pʋpɔzʋʋ yɔ.