Ebree 3 - New Testament

Pasaŋ Yesu nɛ pɩkɩlɩ Mooyiizi

¹ Pʋ-yɔɔ lɛ, taabalaa Ɛsɔ ñɩma mbá mɩ ɛya-mɩ ɖɔɖɔ yɔ, ɩcɔnɩ Yesu weyi Ɛsɔ tiyaa se ɛkɛ cɔjɔnaa ñʋʋdʋ yɔ. Ɛ-tɔm ɖiheyiɣ ɛyáa, ɛ-yɔɔ ɖɩwɛnɩ lidaʋ.

² Ɛlakaɣ mbʋ́ pɩtɩŋa payɩ Ɛsɔ weyi ɛlɩzɩ-ɩ yɔ eheyaɣ-i yɔ ɛzɩ Mooyiizi kalabʋ ɛ-tʋmɩyɛ camɩyɛ Ɛsɔ ɖɩɣa tɩŋa taa yɔ.

³ Toovenim lɛ, pʋmʋnaa se pasa Yesu kpem nɛ pɩkɩlɩ Mooyiizi. Mbʋ́ pʋyɔɔ yɔ, paɖʋʋ weyi ɛma ɖɩɣa yɔ hɩɖɛ nɛ pɩkɩlɩ ɖɩɣa ŋ́gá ka-maɣmaɣ.

⁴ Paa ɖɩɣa ŋgá lɛ, nɔɔyʋ manɩ-kɛ. Ɛlɛ́, weyi ɛma pɩtɩŋa payɩ yɔ lɛ Ɛsɔ.

⁵ Mooyiizi lɛ, ɛɛlaba ɛ-tʋmɩyɛ camɩyɛ Ɛsɔ ɖɩɣa tɩŋa taa ɛzɩ Ɛsɔ tʋmlaɖʋ yɔ se ɛlɩzɩ tɔm ndʋ́ Ɛsɔ kɔŋ yɔɔdʋʋ yɔ tɩ-aseɣɖe.

⁶ Piyele Krɩstʋ lɛ, ɛ́lɛ́ ñalabɩ ɛ-ñɩnɖɛ camɩyɛ ɛzɩ abalɩbɩɣa ŋgá kɔcɔŋnɩ ka-caa ɖɩɣa yɔɔ yɔ. Yee ɖɩwɛɛ nɛ sɔɔndʋ ɛɛkpaɣ-ɖʋ nɛ ɖɩɖɔkɩ ɖe-lidaʋ wɛnaʋ mbʋ́ pʋkɔŋ labʋ yɔ pɩ-taa yɔ, pʋbʋ, ɖɩkɛ ɛ-ɖɩɣa taa ñɩma. Ḿbʋ́ ɖa-taa hʋlʋmɩnaa.

Ɛsɔ ñɔɔzʋʋ hɛzʋʋ ɖɩjaɣyɛ mbá pɛwɛnɩ lidaʋ ɛ-yɔɔ yɔ

⁷ Pʋ-yɔɔ pʋwɛ ɛzɩ Fezuu Kiɖeɖeu yɔɔdʋʋ yɔ. Kɩyɔɔdaa se: «Yee ɩnɩ Ɛsɔ nɔɔ sɔnɔ sɔnɔ yɔ,

⁸ ɩtaala hɔyɛ ɖoŋ ɛzɩ mɩ-cɔzɔnaa kakʋyʋʋ ɛ-yɔɔ lakʋ taa alɩwaatʋ ndʋ́ pɩtakaɣ-wɛ yɔ.

⁹ Nɛ Kɩpaɣlʋ yɔɔdɩ se: «Mɩ-cɔzɔnaa taka-m se pana se ɛbɛ malakɩ. Ŋgʋ́, pɛtɛm naʋ tʋma wena malaba yɔ

¹⁰ pɩnzɩ nɩɩnaza taa. Pʋ-yɔɔ man-pana kpanɩ-wɛ nɛ mɔntɔŋ se poyotuu yem. Pɔtɔsɔɔlɩ se patɩlɩ ma-nʋmɔŋ.

¹¹ Peeɖe man-pana kpawa nɛ monɖuúu se: ‹Toovenim lɛ, paakɔŋ sʋʋ ɛjaɖɛ nɖɩ́ mɔñɔɔzɩ-wɛ se powolo pɛhɛzɩ yɔ ɖɩ-taa kaʋ.› »

¹² Pʋ-yɔɔ lɛ, taabalaa! Ɩɖɔkɩ mɩ-tɩ camɩyɛ nɛ mɩ-taa nɔɔyʋ ɛtaawɛnɩ kañadɩnaa nɛ mbá paañaŋ Ɛsɔ yɔ pɔ-hɔ nɛ pʋdʋ kɔɔ ɛha Ɛsɔ wezuu tʋ siɣ́ye!

¹³ Ɛlɛ́, ɩsazɩ ɖama kɩyakɩŋ tɩŋa nɛ kɩwɛɛkɩm ɛtaacɛzɩ mɩ-taa nɔɔyʋ nɛ ɛla laŋɩyɛ ɖoŋ. Mbʋ́ pʋyɔɔ yɔ, pɔtɔŋʋʋ se: «Sɔnɔ» yɔ, pʋ-tɔbʋʋ se lootiye alɩwaatʋ ndʋ́ tɩ-taa ɖɩwɛɛ yɔ.

¹⁴ Mbʋ́ pʋyɔɔ yɔ, yee ɖɩɖɔkɩ lidaʋ ŋgʋ́ ɖɩɩwɛna kajalaɣ taa yɔ nesi naalɛ kpam nɛ pʋkɔɔ pɩsɩɩnɩ kɛtɛzaɣ alɩwaatʋ yɔ, pʋbʋ, ɖa nɛ Krɩstʋ ɖɩwɛna wezuu.

¹⁵ Pama Ɛsɔtɔm Takayaɣ taa se: «Yee ɩnɩ Ɛsɔ nɔɔ sɔnɔ sɔnɔ lɛ, ɩtaala laŋɩyɛ ɖoŋ, ɛzɩ mɩ-cɔzɔnaa kakʋyʋʋ ɛ-yɔɔ yɔ.»

¹⁶ Ɛyáa pɩɩma nɩ Ɛsɔ nɔɔ nɛ pakʋyɩ ɛ-yɔɔ? Ḿbá lɛ mbá patɩŋa payɩ Mooyiizi kalɩzɩnɩ Ejiptɩ yɔ.

¹⁷ Ɛyáa pɩɩma Ɛsɔ pana kakpanɩ pɩnzɩ nɩɩnaza? Ḿbá lɛ mbá palabɩ kɩwɛɛkɩm nɛ pasɩ lakʋ taa yɔ.

¹⁸ Ɛsɔ ɖuwaa se: «Toovenim lɛ, paakɔŋ sʋʋ ɛjaɖɛ nɖɩ́ mɔñɔɔzɩ-wɛ se powolo pɛhɛzɩ yɔ ɖɩ-taa kaʋ.» Mbá eɖuuni ḿbʋ́? Ḿbá lɛ kaañamtʋ tɩnaa ḿbá.

¹⁹ Pʋ-yɔɔ lɛ, ɖɩnawa se pɛfɛyɩnɩ lidaʋ Ɛsɔ yɔɔ yɔɔ patapɩzɩ pasʋʋ hɛzʋʋ ḿbʋ́ pɩ-taa.