Ebree 2 - New Testament

Ñʋʋ yabʋ mbʋ́ posusi pʋ-tɔm yɔ, pɩwɩlɩ pʋ-wazaɣ

¹ Pʋyɔɔ pʋwɛɛ se ɖɛ-ɛsɩyɛ ɛsɛɛnɩ tɔm ndʋ́ ɖɩnɩwa yɔ nɛ pɩkɩlɩ ɛzɩ pɩtɩɩ yɔ nɛ ɖɩtaakɔɔ ɖile nʋmɔʋ.

² Mbʋ́ pʋyɔɔ yɔ, tɔm ndʋ́ Ɛsɔ tiyiyaa yɔɔdaa yɔ tɩwɛ wazaɣ siŋŋ. Mbá patɩŋa payɩ pɔtɔɖɔ tɩ-yɔɔ yaa patañam-tʋ yɔ, Ɛsɔ hɔm pa-nɩŋgbaaŋ ɛzɩ pʋmʋnaʋ yɔ.

³ Yee ḿbʋ́ pʋwɛɛ lɛ, ɛzɩma ɖa ɖapɩzɩɣ ɖɩlɩɩ pɩ-taa alɩwaatʋ ndʋ́ ɖɩtakpaɣ ñʋʋ yabʋ siŋŋ tɔm tʋnɛ nɛ ɖɩyaa pʋyʋ yɔ? Kɩpaɣlʋ Yesu calɩnɩ pʋ-tɔm yɔɔdʋʋ nɛ mbá panɩ-tʋ yɔ, paɖaɣnɩ-ɖʋ-tʋ heyuu se tɩkɛ toovenim.

⁴ Ɛsɔ ñatɩŋnɩ kawɩlɩsɩ nɛ hama lakasɩ ndɩ ndɩ pɔ-yɔɔ nɛ ɛwɩlɩ se tɔm ndʋ́ pɔyɔɔdaa yɔ, tɩkɛ toovenim. Đɔɖɔ lɛ, ɛtayɩ-wɛ e-Fezuu Kiɖeɖeu haɖɛ ɛzɩ ɛ-maɣmaɣ e-liu wɛʋ yɔ.

Yesu sɩba ɛyáa tɩŋa yɔɔ

⁵ Toovenim lɛ, Ɛsɔ taha e-tiyiyaa waɖɛ se pɔcɔnɩ kedeŋa ŋgá kakaɣ kɔm yɔ kɔ-yɔɔ. Kɔ-tɔm ɖɩɖɔŋ yɔɔdʋʋ.

⁶ Ɛlɛ́, nɔɔyʋ lɩzɩ aseɣɖe Ɛsɔtɔm Takayaɣ hɔɔlʋʋ nakʋyʋ taa se: «Anɩ ɛyʋ nɛ pʋwɛɛ se ŋtɔzɩ ɛ-yɔɔ? Anɩ ɛyʋ kpem nɛ pʋwɛɛ se ŋcɔnɩ ɛ-yɔɔ?

⁷ Ŋyeba nɛ ñe-tiyiyaa kɩlɩ-ɩ alɩwaatʋ pazɩ. Ɛlɛ́, ŋpam-ɩ koboyaɣ hulaɣ nɛ ŋɖʋ-ɩ hɩɖɛ.

⁸ Ŋkpaɣ pɩtɩŋa payɩ nɛ ŋɖʋzɩ e-nesi taa.» Yee pɔtɔm se Ɛsɔ ɖʋzɩ pɩtɩŋa payɩ e-nesi taa yɔ, pɩwɩlɩɣ se nabʋyʋ takazɩ se pɩfɛyɩ ɛ-tɛɛ. Ŋgʋ́ lɛɛlɛɛyɔ, ɖɩnaɣ se pɩtɛkɛ pɩtɩŋa pʋwɛnɩ e-nesi taa.

⁹ Ɛlɛ́, Ɛsɔ yeba nɛ Yesu luzi ɛ-tɩ Ɛsɔ ɛnʋ e-tiyiyaa tɛɛ alɩwaatʋ pazɩ. Ɛlabɩ ḿbʋ́ se pɩtɩŋnɩ e-lootiye yɔɔ nɛ Yesu sɩ ɛyáa tɩŋa payɩ yɔɔ. Ɛnʋ ɖɩnaɣ lɛɛlɛɛyɔ, Ɛsɔ pam-ɩ koboyaɣ hulaɣ nɛ ɛɖʋ-ɩ hɩɖɛ sɩm mbʋ́ ɛlabɩ kʋñɔŋ nɛ ɛsɩ yɔ pʋ-yɔɔ.

¹⁰ Toovenim lɛ, Ɛsɔ labɩnɩ pɩtɩŋa payɩ nɛ pʋwɛɛ e-nesi taa. Yesu lɛ weyi ɛpazɩ ñʋʋ yabʋ tʋmɩyɛ yɔ. Pʋ-yɔɔ lɛ, pɩɩmʋnɩ ḿbʋ́ se ɛla kʋñɔŋ nɛ pʋcɔ ɛsʋʋ e-koboyaɣ taa. Ɛlabɩ ḿbʋ́ se ɛyáa sakɩyɛ ɛsʋʋ ka-taa ɖɔɖɔ.

¹¹ Mbʋ́ pʋyɔɔ yɔ, ɛnʋ Yesu weyi ɛñalɩɣ ɛyáa kɩwɛɛkɩm yɔ nɛ mbá ɛñalɩɣ-wɛ-pʋ yɔ, patɩŋa payɩ pa nɛ ɩ pa-Caa kʋɖʋm. Pʋ-yɔɔ fɛyɛ ɛɛkpaɣ-ɩ se ɛ́yáa-wɛ se ɛ-ñɩma.

¹² Halɩ ɛtɔm se: «Hayɩ Ɛsɔ! Mankaɣ heyuu ma-ñɩma ñɔ-tɔm. Mankaɣ-ŋ sam alɩwaatʋ ndʋ́ pekpeɣliɣ se pasam-ŋ yɔ.»

¹³ Ɛtasɩ yɔɔdʋʋ se: «Mɔnkɔŋ Ɛsɔ taʋ liu.» Ɛtasɩ ɖɔɖɔ se: «Ɩna ma nɛ ɛyáa mbá Ɛsɔ cɛlɩ-m yɔ!»

¹⁴ Yee ḿbʋ́, ɛzɩma mbʋ́ ɛyáa ḿbá pɛkɛ kedeŋa yɔɔ cɩnɛ ñɩma yɔ, ḿbʋ́ ɖɔɖɔ Yesu ɛnʋ ɛ-maɣmaɣ ɛkɔm ɛzɩ ɛyʋ yɔ nɛ ɛkɔɔ ɛsɩ. Ɛlabɩ ḿbʋ́ se ɛpɩsɩ weyi ɛɛɖɔkɩ sɩm ɖoŋ yɔ ɛjam: ɛnʋ lɛ Satanɩ.

¹⁵ Ḿbʋ́ ɛlaba nɛ eholi mbá peseɣaɣ sɩm alɩwaatʋ kpeekpe pe-wezuu caɣʋ taa nɛ pɛwɛɛ ɛzɩ yomaa yɔ.

¹⁶ Toovenim lɛ, pɩtɛkɛ Ɛsɔ tiyiyaa Yesu sɩŋna. Ɛlɛ́, Abraham liɖe taa ñɩma ɛsɩŋna.

¹⁷ Pʋ-yɔɔ pɩɩkɛnɩ-ɩ kɩcɛyʋʋ se ɛpɩsɩ ɛ-tɩ kpem ɛzɩ ɛ-ñɩma yɔ pɩtɩŋa pɩ-taa. Ɛlabɩ ḿbʋ́ se ɛpɩsɩ cɔjɔ sɔsɔ weyi ɛnaɣ pa-pʋtɔdɩyɛ nɛ ɛlakɩ Ɛsɔ tʋmɩyɛ camɩyɛ se ɛ́lɛ́ ekpeɣ ɛyáa pa-kɩwɛɛkɩm yɔ.

¹⁸ Ɛ-maɣmaɣ ɛlabɩ kʋñɔŋ alɩwaatʋ ndʋ́ pɩtakɩ-ɩ yɔ. Pʋ-yɔɔ ɛpɩzɩɣ ɛsɩnɩ mbá pɩtakɩɣ-wɛ yɔ.