Ebree 13 - New Testament

Krɩstʋ ŋgbɛyɛ kɩbanɖɛ tɔm

¹ Ɩwɛɛ ɖama sɔɔlʋʋ yɔɔ ɛzɩ pʋmʋnaʋ yɔ.

² Ɩtaasɔɔ ɛyáa mʋ́ʋ yɔɔ. Mbʋ́ pʋyɔɔ yɔ, nabɛyɛ mʋwaɣ ɛyáa nɛ pɔkɔɔ pamʋ Ɛsɔ tiyiyaa nabɛyɛ pɛ-tɛ nɛ patatɩlɩ.

³ Ɩtɔzɩ salaka tɩnaa yɔɔ ɛzɩ mɩ nɛ wɛ ɩwɛnɩ ka-taa yɔ. Ɩtɔzɩ ɖɔɖɔ mbá panazɩɣ-wɛ yɔ pɔ-yɔɔ ɛzɩ mɩ nɛ wɛ panazɩɣ yɔ.

⁴ Pʋwɛɛ se ɛyáa tɩŋa payɩ ɛɖʋ halɩkpaɣyɛ hɩɖɛ. Abalʋ ɛsʋnɩ ɛ-halʋ ɖeke nɛ halʋ ɖɔɖɔ ḿbʋ́. Mbʋ́ pʋyɔɔ yɔ, Ɛsɔ kɔŋ hʋnaʋ hayitu nɛ acɛyɛ pa-laɖaa.

⁵ Ɩtaawɛnɩ liidiye laɣzaɣ mi-wezuu caɣʋ taa. Mɩ-laŋa ɛhʋlʋmɩnɩ ñɩm mbʋ́ ɩwɛnɩ lɛɛlɛɛyɔ yɔ, mbʋ́ pʋyɔɔ yɔ, Ɛsɔ maɣmaɣ yɔɔdaa se: «Maakaɣ-ŋ lɔʋ, maahaɣ-ŋ siɣ́ye kaʋ.»

⁶ Pʋ-yɔɔ ɖɩpɩzɩɣ ɖɩyɔɔdɩnɩ lidaʋ se: «Kɩpaɣlʋ lɛ weyi ɛsɩŋnɩ-m yɔ. Sɔɔndʋ ɛɛkpaɣ-m kaʋ. Ɛyʋ ɛɛpɩzɩɣ ɛlabɩ-m pʋyʋ!»

⁷ Ɩtɔzɩ mɩ-ñʋndɩnaa mbá paasusi-mɩ Ɛsɔtɔm yɔ pɔ-yɔɔ. Ɩcɔnɩ ɛzɩma mbʋ́ pacaɣ wezuu nɛ pʋkɔɔ pɩsɩɩnɩ pa-sɩm wiye yɔ nɛ ɩwɛnɩ lidaʋ Ɛsɔ yɔɔ ɛzɩ ḿbá yɔ.

⁸ Yesu Krɩstʋ wɛʋ yɔ, ɛɛlɛɣzɩɣ kaʋ. Ɛzɩma mbʋ́ ɛɛwɛ ɖooo lɔŋ yɔ, ḿbʋ́ ɛwɛɛ, ḿbʋ́ ɖɔɖɔ ɛwɛɣ tam.

⁹ Ɛyáa lɩzɩ tɔm ndɩ ndɩ nɛ pawɩlɩɣ. Pʋ-yɔɔ lɛ, itaayele nɛ pepeɣzi-mɩ nɛ tʋ. Mbʋ́ pʋyɔɔ yɔ, pʋwɛ ɖeu se pɩtɩŋnɩ Ɛsɔ lootiye yɔɔ nɛ ɛyʋ kpa ɖoŋ. Ɛlɛ́, pɩtaatɩŋnɩ tɔɔnaɣ paɣtʋ yɔɔ. Mbá pɔɖɔm paɣtʋ ńdʋ́ tɩ-yɔɔ yɔ, pɩtawazɩ-wɛ pʋyʋ.

¹⁰ Đɩwɛnɩ kɩlaʋ lone naɖɩyɛ. Pɩtaha nʋmɔʋ Yuda ñɩma cɔjɔnaa mbá palakɩ tʋmɩyɛ Ɛsɔ ɖɩɣa taa yɔ se pɔtɔɔ mbʋ́ pala ɖɩ-taa yɔ.

¹¹ Mbʋ́ pʋyɔɔ yɔ, kpɩna wena cɔjɔ sɔsɔ kpɛdɩ a-calɩm kɩwɛɛkɩm yɔɔ lone kaɖɛ ñɩnɖɛ taa yɔ, paɖʋʋ-yɛ miŋ nɛ tɛtʋ wayɩ.

¹² Pʋ-yɔɔ Yesu ñasɩbɩ tɛtʋ koloŋa wayɩ se ɛñalɩ ɛyáa kɩwɛɛkɩm nɛ ɛ-maɣmaɣ ɛ-calɩm nɛ pɛwɛɛ cɩɖɩcɩɖɩ.

¹³ Pʋ-yɔɔ lɛ, ɖɩlɩɩ ɖiwolo ɛ-cɔlɔ tɛtʋ koloŋa wayɩ peeɖe nɛ ɖa nɛ ɩ ɖɩkpɛndɩ ɖɩtɔɔ ɛ-fɛyɛ.

¹⁴ Mbʋ́ pʋyɔɔ yɔ, ɖɩfɛyɩnɩ tataa cɩnɛ tɛtʋ ndʋ́ tɩwɛɣ tam yɔ. Ɛlɛ́, ɖɩñɩnɩɣ ndʋ́ tɩkaɣ kɔm yɔ.

¹⁵ Đɩtɩŋnɩ Yesu yɔɔ nɛ ɖɩsa Ɛsɔ tam. Samtʋ ndʋ́ tɩlɩɣnɩ ɖɔ-nɔɔ taa alɩwaatʋ ndʋ́ ɖɩyɔɔdʋʋ se ɛnʋ lɛ Kɩpaɣlʋ yɔ, tɩwɛ ɛzɩ kɩlaʋ yɔ. Pʋ-tɔbʋʋ se ɖɩsam-ɩ paa ɖooye.

¹⁶ Ɛlɛ́, ɩtaasɔɔ camɩyɛ lakasɩ nɛ ɖama sɩnaʋ pɔ-yɔɔ. Mbʋ́ pʋyɔɔ yɔ, lakasɩ ńzɩ́ sɩwɛnɩ ɛzɩ kɩlaŋ weyi ɩkɛdɩnɩ Ɛsɔ yɔ.

¹⁷ Ɩña mɩ-ñʋndɩnaa nɛ itisi mɩ-tɩ pɛ-tɛɛ. Mbʋ́ pʋyɔɔ yɔ, ḿbá cɔŋnɩnɩ mi-ciyamnaa yɔɔ. Ḿbá kɔŋnɩ Ɛsɔ heyuu ɛzɩma mbʋ́ pɔcɔnɩ mɩ-yɔɔ yɔ. Yee ɩñaŋ-wɛ yɔ, palakɩ pa-tʋmɩyɛ nɛ laŋhʋlʋmɩyɛ. Ɛlɛ́, yee ɩtañam-wɛ yɔ, palakɩ-ɖɩ nɛ hɔpɩsɩyɛ nɛ pɩɩwazɩɣ-mɩ pʋyʋ.

¹⁸ Ɩsɛɣ Ɛsɔ ɖɔ-yɔɔ tam. Mbʋ́ pʋyɔɔ yɔ, ɖɩnawa se ɖa-taa wɛ ɖeu. Đe-liu wɛɛ se ɖɩɖɔ ɖɔnɛ kɩbanɖɛ pɩtɩŋa pɩ-taa.

¹⁹ Mentendiɣ-mɩ se ɩsɛɛ-ɩ nɛ ɛha-m nʋmɔʋ nɛ manpɩsɩ mɩ-cɔlɔ lɔŋ.

Ɛsɔ sɛʋ

²⁰ Ɛsɔ lɛ laŋhɛzɩyɛ tʋ. Mentendiɣ-i se ɛtɩŋnɩ calɩm mbʋ́ ɖa-Kɩpaɣlʋ Yesu kpɛdaa nɛ piyele nɔɔ haʋ wɛɛ tam yɔ pʋ-yɔɔ nɛ efezi-i nɛ sɩɖaa taa. Yesu ɛnʋ lɛ heŋ ɖiyiyu sɔsɔ.

²¹ Ɛsɔ ɛnʋ, eyele nɛ ɩpɩzɩ ɩla mbʋ́ pɩtɩŋa payɩ pʋwɛ ɖeu yɔ nɛ piyele ɩla mbʋ́ e-liu wɛɛ yɔ. Mentendiɣ-i ɖɔɖɔ se ɛtɩŋnɩ Yesu Krɩstʋ yɔɔ nɛ ɛñɔɔzɩ ɖa-laŋa taa ɛzɩ pɩkɛdɩnaʋ-ɩ yɔ. Yesu Krɩstʋ ɛwɛɛ koboyaɣ taa tam! Pɩla ḿbʋ́!

Kɛtɛzaɣ tɔm nɛ sɛtʋ

²² Taabalaa, meheyiɣ-mɩ se ɩɖɔkɩ mɩ-hɔ nɛ itisi sazʋʋ tɔm tʋnɛ. Mbʋ́ pʋyɔɔ yɔ, tɔm tobi yem mama-mɩ.

²³ Ɩtɩlɩ se palɩzɩ ɖa-taabalʋ Timootee nɛ salaka taa. Yee ɛtalɩ lɔŋ yɔ, ma nɛ ɩ ɖɩkɔŋna nɛ ɖɩna-mɩ.

²⁴ Ɩsɛɛ mɩ-ñʋndɩnaa nɛ Ɛsɔ ñɩma patɩŋa payɩ. Itaalii taabalaa sɛ-mɩ.

²⁵ Ɛsɔ ɛla mɩtɩŋa payɩ lootiye!