Ebree 12 - New Testament

Pʋwɛɛ se ɖɩɖɔkɩ ɖa-tɩ kaɖɛ alɩwaatʋ taa

¹ Đa lɛ, ḿbʋ́ aseɣɖe tɩnaa samaɣ sɔsɔɔ ŋgá kɛwɛnɩ lidaʋ yɔ, kɔcɔ-ɖʋ kata. Pʋ-yɔɔ lɛ, ɖɩlɔ ɖa-sʋʋtʋ nɛ ɖa-kɩwɛɛkɩm patɩŋa payɩ nɛ ɖɩpɩzɩ ɖise seya wena paɖʋ-ɖʋ yɔ siŋŋ. Mbʋ́ pʋyɔɔ yɔ, ḿbá yekina se ɖɩtaala mbʋ́ pʋpɔzʋʋ-ɖʋ yɔ.

² Đɩkɛzɩ ɛsɛ nɛ Yesu yɔɔ: ɛnʋ sɩnɩ ɖe-lidaʋ kiɖe, ɛnʋ kɔŋnɩ-kʋ tɛzʋʋ. Etisaa nɛ pakam-ɩ kaamaŋkaɣ yɔɔ nɛ ɛsɩ. Ɛlɛ́, fɛyɛ takpa-ɩ nɛ kaamaŋkaɣ yɔɔ sɩm ḿbʋ́, mbʋ́ pʋyɔɔ yɔ, ɛnawa se ɛkɔŋ wɛʋ laŋhʋlʋmɩyɛ taa. Lɛɛlɛɛyɔ, ɛcaɣ Ɛsɔ kewiyaɣ kpelaɣ cɔlɔ lone kɩbanɖɛ taa.

³ Ɩmaɣzɩ weyi etisaa nɛ ɛnɩɩ siziŋ pɩtɩɩfɛyɩ kɩwɛɛkɩm laɖaa nesi taa yɔ ɛ-yɔɔ. Pʋbʋ, piitisiɣ mi-toma taa nɛ ɩlɔ liu.

⁴ Mbʋ́ pʋyɔɔ yɔ, ɩwɛɛ iyouni kɩwɛɛkɩm. Ɛlɛ́, mɩ-taa nɔɔyʋ calɩm tɛkpɛdɩdɩ you ŋ́gʋ́ kɩ-taa.

⁵ Ɩtaasɔɔ tɔm ndʋ́ Ɛsɔ heyi-mɩ ɛzɩ e-piya se pɩlabɩ-mɩ hʋnʋm yɔ tɩ-yɔɔ. Ńdʋ́ lɛ se: «Man-pɩɣa, Kɩpaɣlʋ ɛhɔŋ ña-nɩŋgbaŋʋʋ yɔ, pɩtaakɛnɩ-ŋ aleɣya. Pɩtaatisi ño-toma taa alɩwaatʋ ndʋ́ ɛkalɩɣ-ŋ yɔ.

⁶ Weyi Kɩpaɣlʋ sɔɔlɩ-ɩ yɔ, ɛ-nɩŋgbaŋʋʋ ɛhɔŋ, weyi ɛsɩm-ɩ se ɛkɛ ɛ-pɩɣa yɔ, ɛnʋ ɛmakɩ.»

⁷ Itisi nɛ Ɛsɔ hɔ mɩ-nɩŋgbaaŋ: pɩwɩlɩɣ se ɛlakɩ-mɩ ɛzɩ e-piya yɔ. Pɩɣa nakɛyɛ wɛɛ se ka-caa ɛɛhɔŋ ka-nɩŋgbaŋʋʋ naa we?

⁸ Yee ɛɛhɔŋ mɩ-nɩŋgbaaŋ ɛzɩ piya lɛɛsɩ yɔ yɔ, pʋbʋ, ɩtɛkɛ ɛ-maɣmaɣ e-piya. Ɛlɛ́, habɩŋ taa piya ɩkɛnaa.

⁹ Đɩtɔzɩ kedeŋa yɔɔ cɩnɛ ɖa-caanaa yɔɔ: pɔhɔŋaɣ ɖa-nɩŋgbaaŋ nɛ ɖɩñaŋ-wɛ. Yee ḿbʋ́ lɛ, ɛzɩma ɖɩɩpɩzɩɣ ɖitisi ɖa-tɩ ɖa-Caa weyi ɛwɛ ɛsɔdaa yɔ ɛ-tɛɛ nɛ ɖɩwɛɛ wezuu yɔ?

¹⁰ Toovenim lɛ, ɖa-caanaa hɔŋaɣ ɖa-nɩŋgbaaŋ alɩwaatʋ pazɩ ɛzɩ pamaɣzʋʋ se pʋmʋnaa yɔ. Ɛlɛ́, Ɛsɔ ñɔhɔŋ-ɩ ɖɛ-kɛzɛɣa maɣmaɣ yɔɔ se ɖɩtɛzɩ wɛʋ ɛzɩ ɛnʋ yɔ.

¹¹ Kajalaɣ taa lɛ, nɩŋgbaŋʋʋ hɔm wɛ ɛzɩ ɛsɛñɩŋɩyɛ pʋyʋ yɔ, pɩfɛyɩ ɛzɩ laŋhʋlʋmɩyɛ pʋyʋ yɔ. Ɛlɛ́, mbá pɩsɩɣzɩ-wɛ lɔŋ yɔ, pʋkɔŋ-wɛ sɛʋ: pacakɩ wezuu ŋgʋ́ kʋtʋʋzaa yɔ laŋhɛzɩyɛ taa.

¹² Pʋ-yɔɔ lɛ, mbá mɩ pitibi mi-toma taa yɔ, ɩñaɣ pana.

¹³ Ɩɖɔ nʋmɔŋ weyi ɩtʋʋzaa yɔ ɩ-taa nɛ ɛjandʋ ndʋ́ ɩwɛna yɔ tɩtaatɛzɩ ɖɔʋ, ɛlɛ́, tɩtɛ.

Lɛɣtʋ tasʋʋ nɛ paɣ́ʋ

¹⁴ Ɩñaɣ pana nɛ mɩ nɛ paa weyi mɩ-laŋa hɛnɩ ɖama nɛ ɩcaɣ wezuu ɛzɩ Ɛsɔ liu wɛʋ yɔ. Pɩtɛkɛ ḿbʋ́, ɛyʋ ɛɛpɩzɩɣ ɛna Kɩpaɣlʋ.

¹⁵ Ɩcɔnɩ ɖama yɔɔ camɩyɛ nɛ mɩ-taa nɔɔyʋ ɛtaakɔɔ ɛha lootiye nɖɩ́ Ɛsɔ labɩ-mɩ yɔ siɣ́ye. Mɩ-taa nɔɔyʋ ɛtaawɛɛ ɛzɩ tɩʋ ñaŋ ñɩŋgʋ ŋgʋ́ kɩwɛɛ nɛ kʋ-sɔtʋ ɖɛɣ ɛyáa sakɩyɛ nɛ tɩwɛɛkɩɣ-wɛ yɔ.

¹⁶ Mɩ-taa nɔɔyʋ ɛtaala acɛyɛ yaa ɛtaakpaɣ Ɛsɔ ñɩm se pɩtɛkɛ pʋyʋ ɛzɩ Ezaayuu yɔ. Tam kʋɖʋm tɔɔnaɣ maɣmaɣ yɔɔ ɛɛpɛdɩ ɛ-sɔsɔtʋ.

¹⁷ Ɩtɛm naʋ se pʋwayɩ lɛ, ɛɛñɩnaa ɖɔɖɔ se ɛ-caa ɛwazɩ ɛ-yɔɔ nɛ ɛ́lɛ́ ɖɔɔnɩ-ɩ. Ŋgʋ́, ɛñɩnaɣnɩ ɛsɩtɛɣlɩm kpem se ɛlɛɣzɩ mbʋ́ ɛlaba yɔ. Ɛlɛ́, pɩtaha-ɩ waɖɛ.

¹⁸ Ɩtɔñɔtɩnɩ Ɛsɔ ɛzɩ Izrɛɛlɩ ñɩma yɔ. Paba kɔñɔtɩnɩ kedeŋa yɔɔ cɩnɛ pʋʋ nakʋyʋ: ŋ́gʋ́ lɛ Sinayii Pʋʋ. Alɩwaatʋ ńdʋ́ lɛ, miŋ sɔsɔŋ nɩɩyɩ mʋwaɣ kʋ-yɔɔ nɛ cɩkpɛndʋʋ yu kpemm nɛ heɣlim sɔsɔm nabʋyʋ makɩ.

¹⁹ Panɩɣaɣ ɛgandɩyɛ naɖɩyɛ nɛ nɔɔ nakɛyɛ pa-taŋ. Mbá paanɩ nɔɔ ŋ́gá yɔ, pɔtɔm se pataatasɩ-wɛ natʋyʋ heyuu nɛ pɩtasɩnɩ ndʋ́ panɩwa yɔ,

²⁰ mbʋ́ pʋyɔɔ yɔ, tɩkɩlɩ-wɛ. Ńdʋ́ lɛ se: «Paa kpɩnɛ maɣmaɣ etukunini pʋʋ yɔ, ɩkʋ-ɖɩ nɛ pɛɛ.»

²¹ Mbʋ́ pɩlabɩ peeɖe yɔ, pɩɩwɛ sɔɔndʋ siŋŋ. Pʋ-yɔɔ Mooyiizi tɔm se: «Sɔɔndʋ kɩlɩ-m kpem nɛ menseliɣ.»

²² Ɛlɛ́, mɩ mɩñɔtɩnɩ Siiyɔɔ Pʋʋ nɛ Ɛsɔ wezuu tʋ tɛtʋ: ńdʋ́ lɛ ɛsɔdaa Yeruusalɛm, Ɛsɔ tiyiyaa ɛgbaŋ ɛgbaŋ wɛ tɩ-taa.

²³ Iwobi Ɛsɔ kajalaɣ piya nzɩ́ pama sɩ-hɩla ɛsɔdaa nɛ sikpeɣli ɖama nɛ sɩtɔkɩ kazanɖʋ yɔ sɩ-ŋgbɛyɛ taa. Iwobi Ɛsɔ cɔlɔ ɖɔɖɔ, ɛnʋ hʋʋnɩnɩ ɛyáa tɩŋa payɩ: toovenim tɩnaa mbá pasɩba nɛ ɛtɛzɩ-wɛ pɩsʋʋ mbá pamʋnaa yɔ.

²⁴ Iwobi Yesu nɛ ɛ-calɩm mbʋ́ pɩkpɛdaa nɛ pɩkɩlɩ wazaɣ Aabɛɛlɩ ñɩmbʋ yɔ pɔ-cɔlɔ. Ɛnʋ lɛ ceyiyu nɔɔ haʋ kɩfam mbʋ́ pʋwɛ Ɛsɔ nɛ ɛyáa pɛ-hɛkʋ taa yɔ pɩ-taa.

²⁵ Yee ḿbʋ́, ɩɖɔkɩ mɩ-tɩ! Ɩtaakizi se iiwelesiɣni Ɛsɔ weyi ɛyɔɔdʋʋnɩ-mɩ yɔ. Mbʋ́ pʋyɔɔ yɔ, Izrɛɛlɩ ñɩma kizaa se paawelesiɣni weyi eheyaɣ-wɛ kedeŋa yɔɔ cɩnɛ mbʋ́ ɛwɩlɩ-ɩ yɔ nɛ patatʋlɩ nɩŋgbaŋʋʋ hɔm taa. Pʋ-yɔɔ lɛ, yee ɖa ɖahaɣ siɣ́ye weyi ɛyɔɔdʋʋnɩ-ɖʋ nɛ ɛsɔdaa yɔ yɔ, ɖɩɩpɩzɩɣ ɖɩlɩɩ pɩ-taa ɖɔɖɔ.

²⁶ Ɛɛyɔɔdɩnɩ-wɛ nɛ tɛtʋ ñamsɩ, ɛlɛ́, lɛɛlɛɛyɔ eheyi-ɖʋ se: «Mɔnkɔŋ tasʋʋ tɛtʋ ñamsʋʋ. Ɛlɛ́, pɩɩsɩɣnɩ ti-ɖeke, mañamsɩɣ ɖɔɖɔ ɛsɔdaa.»

²⁷ Tɔm pee anɛ, atasɩɣ wɩlʋʋ se mbʋ́ ɛlaba yɔ, pɩñamsɩɣ-pʋ nɛ pʋmʋʋ nɛ piyele mbʋ́ pɩfɛyɩ ñamsʋʋ yɔ pʋwɛɛ.

²⁸ Pʋ-yɔɔ lɛ, ɖɩwɛnɩ Ɛsɔ yɔɔ ɛsɩmɩyɛ, mbʋ́ pʋyɔɔ yɔ, ɛha-ɖʋ kewiyaɣ ŋgá kɛfɛyɩ ñamsʋʋ yɔ: ɖiluŋ ɛ-tɛɛ ɛzɩ pɩkɛdɩnaʋ-ɩ yɔ nɛ ñamtʋ nɛ sɔɔndʋ.

²⁹ Mbʋ́ pʋyɔɔ yɔ, ɖɛ-Ɛsɔ kɛ ɖɔɖɔ miŋ weyi ɛñakɩ pɩtɩŋa payɩ yɔ.