Ebree 11 - New Testament

Lidaʋ ŋgʋ́ ɖɔ-cɔzɔnaa Izrɛɛlɩ ñɩma kaawɛnɩ Ɛsɔ yɔɔ yɔ

¹ Ɛsɔ yɔɔ lidaʋ wɛnaʋ lɛ se ɖɩtɩlɩ se mbʋ́ ɖɩɖaŋ kpam yɔ, pʋkɔŋ labʋ. Ḿbʋ́ ɖɔɖɔ mbʋ́ ɖɩɩnaɣnɩ ɖɛ-ɛsɛ yɔ, pʋwɛɛ.

² Lidaʋ ŋgʋ́ ɖooo lɔŋ taa ñɩma kɛwɛnɩ Ɛsɔ yɔɔ yɔ, kʋ-yɔɔ pɔ-tɔm kɛdɩnɩ-ɩ.

³ Đɩwɛnɩ lidaʋ Ɛsɔ yɔɔ yɔɔ ɖɩtɩlaa se ɛ-tɔm ɛlabɩnɩ kedeŋa. Pʋ-yɔɔ ɖɩtɩlaa ɖɔɖɔ se ɛkpaɣ mbʋ́ paanaɣ yɔ nɛ ɛlabɩnɩ mbʋ́ panaɣ yɔ.

⁴ Aabɛɛlɩ wɛnɩ lidaʋ Ɛsɔ yɔɔ yɔɔ ɛla-ɩ kɩlaʋ nɛ kɩkɩlɩ ɛ-ɖalʋ Kayɛnɩ ñɩŋgʋ. Kʋ-yɔɔ ɛ́lɛ́ kaɖaa se ɛkɛ kʋtʋʋzʋ. Mbʋ́ pʋyɔɔ yɔ, ɛ-haɖɛ ńɖɩ́ ɖɩkɛdɩnɩ-ɩ. Aabɛɛlɩ ɛnʋ, mbʋ́ ɛlaba nɛ pɩtɩŋnɩ e-lidaʋ ŋ́gʋ́ kʋ-yɔɔ yɔ, pʋ-yɔɔ pɛkɛdɩɣ-ɖʋ ɛ-tɔm halɩ nɛ sɔnɔ nɛ pʋwɛɛ ɛzɩ ɛnʋ yɔɔdʋʋnɩnɩ-ɖʋ yɔ. Ŋgʋ́ ɛsɩba.

⁵ Enɔɔkɩ ɖɔɖɔ ñaawɛnɩ lidaʋ Ɛsɔ yɔɔ. Pʋ-yɔɔ ɛ́lɛ́ kpaɣ-ɩ nɛ ɛ-ɛsɛ nɛ ewoni-i ɛ-cɔlɔ nɛ nɔɔyʋ tatasɩ-ɩ naʋ. Pʋcɔ ɛkpazɩ-ɩ lɛ, paalɩzɩ ɛ-aseɣɖe se ɛ-tɔm kɛdɩnɩ ɛ́lɛ́ pɩŋŋ.

⁶ Ŋgʋ́, yee nɔɔyʋ ɛwɛɛ nɛ ɛfɛyɩnɩ lidaʋ Ɛsɔ yɔɔ yɔ, ɛ-tɔm ɛɛkɛdɩɣnɩ-ɩ. Mbʋ́ pʋyɔɔ yɔ, weyi ɛñɔtʋʋnɩ-ɩ yɔ, pʋwɛɛ se etisi se ɛwɛɛ. Etisi ɖɔɖɔ se ɛlakɩ mbá pañɩnɩɣ-ɩ yɔ kʋjɔʋ.

⁷ Nowee kɛwɛnɩ lidaʋ Ɛsɔ yɔɔ, pʋ-yɔɔ etisi tɔm ndʋ́ ɛ́lɛ́ heyaɣ-i yɔ se tɩkɔŋ labʋ. Ŋgʋ́, ɛtanada. Ɛlɛ́, ɛñam-ɩ nɛ ɛsaɣ mɛlɛ sɔsɔʋ se ɛ-hɔʋ taa ñɩma ehiɣ ñʋʋ yabʋ. Mbʋ́ Nowee lakaɣ yɔ, pɩwɩlaɣ se kedeŋa yɔɔ cɩnɛ ñɩma kɛ kañadɩnaa. Ɛlɛ́, pɩtɩŋnɩ e-lidaʋ yɔɔ nɛ ɛnʋ ñapɩsɩ kʋtʋʋzʋ Ɛsɔ ɛsɩndaa.

⁸ Abraham ɖɔɖɔ ñaawɛnɩ lidaʋ Ɛsɔ yɔɔ, pʋ-yɔɔ ɛñam-ɩ nɛ etisi tɔm ndʋ́ eheyi-i yɔ. Eeheyi-i se: «Kʋyɩ ŋwolo ɛjaɖɛ nɖɩ́ mawɩlɩɣ-ŋ yɔ ɖɩ-taa nɛ ŋtɩɣyɩ-ɖɩ.» Peeɖe Abraham kʋyɩ ɛ-ɛjaɖɛ taa nɛ ɛɖɛɛ. Ɛlɛ́, ɛtatɩlɩ ɖenɖe ewokaɣ yɔ.

⁹ Ɛɛwɛnɩ lidaʋ Ɛsɔ yɔɔ, pʋ-yɔɔ ɛkʋyaa nɛ ewolo ɛjaɖɛ nɖɩ́ ɛ́lɛ́ ɖʋwa se ɛhaɣ-ɩ yɔ ɖɩ-taa nɛ ɛwɛɛ ɛzɩ ɛgɔm yɔ. Ɛtalɩ peeɖe lɛ, ɛsʋʋ kɩɖanɖɩŋ tɛɛ. Pʋwayɩ lɛ, Izaakɩ nɛ Yakɔɔbʋ paba ñasʋʋ kɩɖanɖɩŋ tɛɛ ɖɔɖɔ: kʋjɔʋ kʋɖʋmʋʋ ŋ́gʋ́ Ɛsɔ kaɖʋwa se ɛlakɩ-wɛ.

¹⁰ Abraham ɛnʋ, ɛɛɖaŋaa se ɛsʋʋ tɛtʋ ndʋ́ tɩ-taa kuduyiŋ tigila wɛ ɖoŋ yɔ. Ɛsɔ maɣzɩna nɛ ɛma-ɩ.

¹¹ Saara kɛwɛnɩ lidaʋ ɖɔɖɔ Ɛsɔ yɔɔ, pʋ-yɔɔ Ɛsɔ ha-ɩ ɖoŋ se ɛpɩzɩ ɛlʋlɩ pɩɣa alɩwaatʋ ndʋ́ ɛkpadɩyɩ kuŋgu yɔ. Ɛlɛ́, ɛɛwɛnɩ lidaʋ Ɛsɔ yɔɔ se ɛlakɩ mbʋ́ ɛɖʋwa se ɛlakɩ-ɩ yɔ.

¹² Pʋ-yɔɔ pɩtɩŋnɩ ɛyʋ kʋɖʋm weyi ɛñɔtɩnɩ pɩlaʋ nɔɔ kpam yɔ ɛ-yɔɔ nɛ palʋlɩ ɛ-sayɩnaa sakɩyɛ ɛzɩ tɩɩnzɩ yɔ. Pɔɖɔ ɖɔɖɔ ɛzɩ teŋgu nɔɔ kañɩŋa yɔ.

¹³ Mbá paawɛnɩ lidaʋ Ɛsɔ yɔɔ yɔ, pɔɖɔkɩ-kʋ ḿbʋ́ nɛ pʋcɔ pɔkɔɔ pasɩ patɩŋa payɩ. Ɛlɛ́, petehiɣ mbʋ́ Ɛsɔ kaɖʋwa se ɛhaɣ-wɛ yɔ. Polosi-pʋ kulosuu poliŋ taa nɛ pɔyɔɔdɩ se pɛkɛ agɔmaa nɛ ñɩtʋ sʋyaa yem kedeŋa yɔɔ cɩnɛ.

¹⁴ Mbá pɔyɔɔdʋʋ ḿbʋ́ yɔ, pawɩlɩɣ kpaagbaa se pañɩnɩɣ pɔ-cɔzɔnaa tɛtʋ natʋyʋ se pɛwɛɛ tɩ-taa.

¹⁵ Yee paakpiɖaɣ ndʋ́ palɩnɩ tɩ-taa yɔ tɩ-yɔɔ yɔ, pɩɩha-wɛ waɖɛ se papɩsɩ ɖɩ-taa.

¹⁶ Toovenim lɛ, pe-liu kɛwɛ ɛjaɖɛ nɖɩ́ ɖɩkɩlɩ ɖeu yɔ. Pʋ-tɔbʋʋ se nɖɩ́ ɖɩwɛ ɛsɔdaa yɔ. Pʋ-yɔɔ fɛyɛ ɛɛkpaɣ Ɛsɔ se payaa-ɩ se pɛ-Ɛsɔ. Đɔɖɔ lɛ, ɛñɔɔzɩ-wɛ tɛtʋ sɔsɔtʋ natʋyʋ.

¹⁷ Abraham kɛwɛnɩ lidaʋ Ɛsɔ yɔɔ, pʋ-yɔɔ ɛkpaɣ ɛ-pɩɣa ɛgbamɩyɛ Izaakɩ se ɛlaɣ-ɩ alɩwaatʋ ndʋ́ ɛ́lɛ́ takɩ-ɩ se ɛna ɛ-wayɩ yɔ. Etisaa se ɛlaɣ-kɛ. Ŋgʋ́, ɛɖʋwa se kɔ-yɔɔ ɛkɔŋ tɩŋnaʋ nɛ ɛha-ɩ sayɩnaa.

¹⁸ Mbʋ́ pʋyɔɔ yɔ, eeheyi-i se: «Izaakɩ yɔɔ pɩtɩŋɩɣna nɛ ŋwɛnɩ sayɩnaa ɛzɩ maaɖʋʋ yɔ.»

¹⁹ Abraham maɣzaɣ se Ɛsɔ wɛnɩ ɖoŋ nɛ paa sɩɖʋ yɔ, ɛ́lɛ́ pɩzɩɣ efezi-i. Pʋ-yɔɔ ɛɖaɣnɩ ɛ-pɩyalʋ naʋ nɛ pʋwɛɛ ɛzɩ ɛ́lɛ́ fezi-i nɛ sɩm taa yɔ.

²⁰ Izaakɩ wɛnɩ lidaʋ Ɛsɔ yɔɔ, pʋ-yɔɔ ɛwazɩ Yakɔɔbʋ nɛ Ezaayuu yɔɔ cee wayɩ yɔɔ.

²¹ Yakɔɔbʋ ɖɔɖɔ kɛwɛnɩ lidaʋ Ɛsɔ yɔɔ, pʋ-yɔɔ ɛwazɩ paa Yozɛɛfʋ pɩyalʋ weyi ɛ-yɔɔ, alɩwaatʋ ndʋ́ ɛcaɣaɣ sɩbʋ yɔ. Đɔɖɔ lɛ, ɛɛñɩɣ ɛ-ɖaʋ yɔɔ nɛ ɛɖʋ Ɛsɔ hɩɖɛ.

²² Yozɛɛfʋ ɖɔɖɔ ñaawɛnɩ lidaʋ Ɛsɔ yɔɔ. Pʋ-yɔɔ ɛyɔɔdɩ kɩyakʋ ŋgʋ́ Izrɛɛlɩ ñɩma kɔŋ lɩʋ Ejiptɩ ɛjaɖɛ taa yɔ kʋ-tɔm alɩwaatʋ ndʋ́ ɛwɩzɩ sɩbʋ yɔ. Ɛyɔɔdɩ ɖɔɖɔ ɛzɩma mbʋ́ pʋwɛɛ se pala ɛ-mɔɔ ki-wiye yɔ.

²³ Mooyiizi caa nɛ e-ɖoo paawɛnɩ lidaʋ Ɛsɔ yɔɔ. Pʋ-yɔɔ pɛmɛsɩ-ɩ alɩwaatʋ ndʋ́ palʋlɩ-ɩ yɔ fenasɩ naadozo. Pataase mbʋ́ wiyaʋ sɔsɔ ɖʋwa yɔ, mbʋ́ pʋyɔɔ yɔ, panawa se pɩɣa ŋ́gá keɖewa.

²⁴ Mooyiizi kɛwɛnɩ lidaʋ Ɛsɔ yɔɔ, pʋ-yɔɔ ekizi alɩwaatʋ ndʋ́ ɛpaɣlaa yɔ se ɛɛtasɩɣ kɛʋ Faraɔɔ pɛlɛ pɩyalʋ.

²⁵ Ɛsɔɔlaa siŋŋ se ɛ nɛ Ɛsɔ ñɩma pɛwɛɛ nɛ panazɩ-wɛ nɛ pɩkɩlɩ ɛzɩ ɛ-laŋɩyɛ kahʋlʋmɩnɩ kɩwɛɛkɩm alɩwaatʋ pazɩ yɔ.

²⁶ Toovenim lɛ, ɛmaɣzaɣ se yee peniɣzi-i ɛzɩ Krɩstʋ yɔ yɔ, pʋwɛɣ wazaɣ nɛ pɩkɩlɩ ñɩm mbʋ́ pʋwɛ Ejiptɩ yɔ. Mbʋ́ pʋyɔɔ yɔ, ɛcɔŋaɣnɩ kɩhɛyʋʋ ŋgʋ́ kʋwɛnɩ ɛsɩndaa yɔ ki-ɖeɖe.

²⁷ E-lidaʋ ŋ́gʋ́ kʋ-yɔɔ ɛkʋyɩ Ejiptɩ nɛ sɔɔndʋ takpa-ɩ nɛ wiyaʋ sɔsɔ pana. Mbʋ́ pʋyɔɔ yɔ, ɛɖɔkɩ ɛ-tɩ kpam nɛ pʋwɛɛ ɛzɩ ɛnaɣ Ɛsɔ yɔ, ŋgʋ́, paapɩzɩɣ pana-ɩ.

²⁸ Kʋ-yɔɔ ɖɔɖɔ ɛɖʋ Izrɛɛlɩ ñɩma Paska Kazandʋ. Ɛha nɔɔ se pataa calɩm nɔnɔsɩ yɔɔ nɛ tiyiyu weyi ɛkɔŋ kʋʋ kajalaɣ piya yɔ, ɛkɔma lɛ, ɛtaatukuni Izrɛɛlɩ ñɩma ñɩnzɩ yɔɔ.

²⁹ Izrɛɛlɩ ñɩma wɛnɩ lidaʋ Ɛsɔ yɔɔ, pʋ-yɔɔ pɛtɛzɩ Teŋgu Kɩsɛmʋʋ ɛzɩ ɛyáa ɖɔŋʋʋ tataa ɖenɖe pʋwɛ waɣwaɣ yɔ. Ɛlɛ́, Ejiptɩ ñɩma mbá patɩɣzɩɣnɩ-wɛ yɔ, pilibi-wɛ.

³⁰ Pɛwɛnɩ lidaʋ Ɛsɔ yɔɔ yɔɔ pɔcɔ Yeriikoo tɛtʋ kɩyakɩŋ lʋbɛ nɛ ti-kolonzi tɔlɩ.

³¹ Rahaabɩ kɛ halʋ weyi ɛpɛdaɣ ɛ-tɩ yɔ. Ɛlɛ́, ɛwɛnɩ lidaʋ Ɛsɔ yɔɔ nɛ ɛmʋ feŋiyaa nabɛyɛ camɩyɛ ɛ-tɛ. Pʋ-yɔɔ ɛ nɛ mbá paañaŋ Ɛsɔ yɔ pɛtɛkpɛndɩ sɩbʋ.

³² Ndʋ́ mantasɩɣ yɔɔdʋʋ ɖɔɖɔ yɔ? Alɩwaatʋ ɛɛtalɩɣ-m se mɛnkɛdɩ Jedeyɔɔ nɛ Baraakɩ nɛ Samsɔɔ nɛ Yeftee nɛ Daaviidi nɛ Samʋyɛɛlɩ nɛ náyaa pɔ-tɔm.

³³ Pɛwɛnɩ lidaʋ Ɛsɔ yɔɔ yɔɔ poyoni ajɛya lɛɛna taa ñɩma nɛ pawabɩ-wɛ nɛ pamʋ pɛ-tɛtʋ. Palabɩ mbʋ́ pʋwɛ ɖeu yɔ nɛ pehiɣ mbʋ́ Ɛsɔ ɖʋwa se ɛhaɣ-wɛ yɔ. Posuli tɔɔyɩŋ nɔsɩ

³⁴ nɛ peɖezi miŋ sɔsɔŋ. Pesewa nɛ patʋlɩ, patakʋ-wɛ nɛ sɩɣa. Paakɛ ajamaa nɛ pʋwayɩ lɛ, pakpa ɖoŋ. Paawɛ abalɩtʋ you taa nɛ pawa sɔɔjanaa agɔmaa nɛ pɔɖɔɔnɩ-wɛ.

³⁵ Halaa nabɛyɛ kɛwɛnɩ lidaʋ Ɛsɔ yɔɔ, pʋ-yɔɔ efezi pa-ñɩma mbá pasɩba yɔ nɛ ɛcɛlɩ-wɛ. Lɛlaa ñaatisaa nɛ paɖʋ-wɛ kʋñɔŋ siŋŋ nɛ pɔkɔɔ pasɩ, mbʋ́ pʋyɔɔ yɔ, paakizaa se pataayebi-wɛ. Paawɛnɩ lidaʋ Ɛsɔ yɔɔ se paa pasɩba yɔ, efeziɣ-wɛ nɛ pacaɣ wezuu ŋgʋ́ kɩkɩlɩ ɖeu ŋgʋ́ kɩ-taa paawɛɛ yɔ.

³⁶ Peniɣzi lɛlaa ɖɔɖɔ nɛ polu-wɛ agbazɛɛ. Pɔhɔkɩ lɛlaa yoŋgbasɩ nɛ paɖʋ-wɛ salaka.

³⁷ Pakʋ lɛlaa nɛ pɛɛ nɛ patayɩ lɛlaa titilee naalɛ naalɛ nɛ pakʋ lɛlaa nɛ sɩɣa. Lɛlaa kɛkɛ kʋñɔndɩnaa, posuu heŋ nɛ pʋŋ pɔ-tɔna wondu nɛ pɛwɛɛ pɔcɔʋ paa le. Ɛyáa kɛwɛ pa-wayɩ kaŋ kaŋ nɛ panazɩɣ-wɛ.

³⁸ Pɩtɛ ɛyáa ḿbá, kedeŋa taamʋnɩ-wɛ! Pɔcɔwaɣ lakɩŋ nɛ pʋŋ pa-taa nɛ pasʋʋ ɛwasɩ pɔŋ nɛ tɛtɛɛ ñɩŋ pa-taa.

³⁹ Mbá patɩŋa payɩ paawɛnɩ lidaʋ Ɛsɔ yɔɔ yɔ, ɛlɩzɩ pa-aseɣɖe se pɔ-tɔm kɛdɩnɩ-ɩ pɩŋŋ. Ɛlɛ́, petehiɣ mbʋ́ ɛɛɖʋwa se ɛlakɩ-wɛ yɔ.

⁴⁰ Mbʋ́ pʋyɔɔ yɔ, Ɛsɔ kaɖʋwa se ɛlakɩ-ɖʋ mbʋ́ pɩkɩlɩ ɖeu ḿbʋ́ yɔ. Ɛlɛ́, ɛtaasɔɔlɩ se pɛkɛ mbá pamʋnaa yɔ nɛ piyebi-ɖʋ.